Djehovha anoda kuti anhu airi anowakana agare akapfara, uye agare zvakanaka nokusikaperi. (Mt. 19:4-6) Kana mecida kuwaka kana kuwakwa, mungamuonera kupi munhu wakanaka? Musiki wedu Djehovha, unoziya cinoita kuti tipfare mu mucato. Ndiyo ndaa kana mukaseenzesa mazano aanotipasa, mucapfara mu mucato wenyu. Onai mazano angamubetsera.

Cekutanga, tinodikana kuzwisisa izvi pacedu kamare: “Mwoyo unocengedzera kudarika zviro zvese uye wakashata maningi.” (Dje. 17:9) Munhu paanoedza kusvaka wekuwakana naye, cido cekuda kuwatana no munhu cinokura nokukasika uye cingabvisa marangariro akanaka. Kana anhu akada kuwaka nge ndaa yocido cekuda kuwata no munhu, kajinji kakhona anozopedzesera aakutsumba. (Zvie. 28:26) Ndiyo ndaa zvisikazi kunaka kuti anhu airi abhuye makani anoita kuti arangarire bonde zviro zvakadzika mukutanga kudisana musati manyasa kuziyana.

Zvierengo 22:3 inoti: “Munhu akangwara unoona dambudziko ofindara, asi usina ungwaru unorumbwa ecienda osongana no matambudziko.” Zvakashatira papi kuseenzesa saiti yemu interneti kuti musvake munhu wekuwakana naye? Zvinotsukwarisa, kuti amweni akazofunda nemisodzi pamatama paakaziya kuti akatorhwa mazwiro awo no aakasongana nawo muinternenti. Ngodii rimweni, anhu asikathembeki akagadzira makonta e mare e kunyepa kuti atsotse anhu asina ungwaru uye kuti aabire mare yawo. Nguwa dzimweni, aya aiita utsotsi wakashata kudaro, aidziti Apupuri a Djehovha.

Rangarirai nge zve ngozi imweni. Masaiti amweni e kuonana, anoseenzesa zvinobuda paanoita matemática dzinopangidzira hingana kuti anhu anopindirana. Asi apana cinopangidzira kuti mishobo ii inoseenza. Kungazwi kungwara here kuthemba mitemo yakagadzwa no anhu kuti mugare no rugondo rekubudirira keciro cinokosha hingana mucato here? Makwanza e matemática angakwanisa kudini kutanga kuezaniswa no cokwadi cisikacinji ce Bhaibheri?—Zvie. 1:7; 3:5-7.

Cokwadi cisikacinji catinogumira pana Zvierengo 14:15 cinoti: “Munhu usina uzii unondotenda masoko ese, asi munhu uno ungwaru unorangarira danho rimwe na rimwe.” Musati marangarira nge zve munhu wekuwakana naye, munodikana kunyasa kuziya munhu wakhona. Asi kusongana mu saiti kunganetsa kuti munyase kuziyana.  Kunyazi mecipasana mafoto uye mecitora nguwa yakawanda mecitumirana ma mesaji zvinoreya here kuti munonyasa kumuziya munhuwo here? Amweni airangarira kuti agumira rudo rawo kamare, akazotsumba paakazoonana ne munhuwo hope no hope.

Mutari we Pisarema wakati: “Anditambi ne anhu anocengedza, uye ndinotambira kure ne aya anoiga zvaari.” (Pis. 26:4) Anhu akawanda ano mushobo wekunyepedzera paanocedza ne munhu eciseenzesa ma site. Awona angaiga zvaari kamare kana kuti adzionesi zvaari pamunonga mecicedza. Kunyazi anhu amweni angareketa eciti Mupupuri wa Djehovha, Asi wakabhabhatidzwadi here? Awona akakura pakunamata here? Anoukama na Djehovha here? Anoreremedzwa mu ungano here? Kana kuti ano muezaniso wakashata kana kutogara ne “tsika dzakashata”? (1Ako. 15:33; 2Ti. 2:20, 21) Maererano ne Bhaibheri akasudzunuka kuwaka here? Imwimwi munodikana kuziya zviro izvi, asi amungakwanisi kuzviona kana musina munhu angamupasa masoko akaringana naye. (Zvie. 15:22) Zviripamhene kuti museenzi wa Djehovha wakagondeka aatomborangariri kudzikanda mu “djoki ne munhu asikatendi.”—2Ako. 6:14; 1Ako. 7:39.

Tecirangarira nge zve ngozi iripo ye kunamorari ne munhu ne masaiti, pano mishobo yakanaka yekupsvaka wekuziyana naye dakara pakucata kunokudzwa. Mungaona kupi mikana yokugumira wamungawakana naye? Kana moopinda misangano, mungakwanisa kuonana ne munhu wese pa misangano ye ungano, pa magungano, magungano e mutanha uye ne misangano imweni.

Kana tisikacakwanisi kuungana mu nyumba ye umambo, hinga pa nguwa ino nge ndaa ye nhenda ya COVID-19, tinoseenzesa micini ye magetsi kuti tipinde misangano ye ungano patinoona mukana we kuziyana no Apupuri amweni asikazi kuwakwa kana kuwaka. Munokwanisa kuona madairire aanoita pa misangano uye kuzwa mapangidzire aanoita kutenda kawo. (1Ti. 6:11, 12) Mungakwanisawo kucedza nawo mu sala de apoio musangano waawapera. Pamunonga mecicedza no Apupuri amweni hinga cikwata meciseenzesa mucini ye magetsi, mungakwanisawo kuona kuti munhu wamuri kuda unocedza kudini no anhu amweni uye izvi zvingapangidza zvaari, unhu wake pacake. (1Pe. 3:4) Nekuhamba ke nguwa, pamucadjairana zviri nani, mucakwanisa kuona kana zvinangwa zvenyu no unhu wenyu zvakaezana here uye kuti imwimwi naye munopindirana here.

Aya asikazi kuwaka kana kuwakwa akaseenzesa mazano e Bhaibheri pakupsvaka we kuwakana naye, awona acagara no mucato unopfadza acaona kuseenza ke cokwadi cinorekethwa pana Zvierengo, cinoti: “Uya unoona mukadzi wakanaka [kana kuti mwamuna wakanaka] waona ciro cakanaka, uye ucapfarirhwa na Djehovha.”—Zvie. 18:22.