1. Zvinyi zvamakaizirwa na Djehovha?

ZVAKAHAMBA kudini kuti muzogare Mupupuri wa Djehovha? Kutanga, makazwa “masoko akanaka”—pamweni makaazwa no abereki enyu, no mudoni wenyu wekubasa, kana kuti wekucikora. (Mk. 13:10) Zvadaro, munhu umweni wakapedza nguwa no simba eciita fundo ye Bhaibheri na imwimwi. Pamaifunda makaguma pakuda Djehovha uye makafunda kuti iyena unomudai. Djehovha wakamukweera mu cokwadi, uye zvino hingana mufundi wa Djesu Kristu, imwimwi maano kariro yekurarama nokusikaperi. (Ju. 6:44) Zviri pamhene kuti munotenda Djehovha ngekuitisa kuti munhu umweni amufundise cokwadi uye kuti akamutendera hingana umwe we aseenzi Ake.

2. Ticaonei mu fundo ino?

² Zvino zvetaakuziya cokwadi, tino makomborero e kubetsera anhu kuti abatane na isusu mu gwanza ro upenyu. Tingagara takasudzunuka pakuparidzira pa nyumba no nyumba, asi zvingatishuphira kuitisa fundo ye Bhaibheri. Ndizvona zvamunozwa here? Kana zviri izvona, pamweni mucaona mazano ari mu fundo ino acamubetsera. Ticabhuya nge zve zviro zvingatibetsera pakuita afundi. Uye ticaonawo kuti tingaita kudini kuti tikunde zvinetso zvingatipingaidza kuti tisaitise fundo ye Bhaibheri. Kutanga, ticaona kuti ngei tisikadikani kugara basi aparidzi, asi tinodikanawo kugara afundisi e masoko akanaka.

3. Ngei teciparidzira masoko e Umambo?

³ Djesu paainga ari pasi pano, wakapasa ateeri ake basa rakapetwa kairi. Kutanga, iyena wakaabvunza kuti aparidzire masoko  akanaka e Umambo uye wakaapangidza kuti angazviita kudini. (Mt. 10:7; Ru. 8:1) Pazvese zvaakaita, Djesu wakagadzirirawo afundi ake pa mhinduro yakashata kana kuti yakanaka yaizopaswa nge anhu yakaringana no masoko e Umambo. (Ru. 9:2-5) Iyena wakareketawo kaizogumira basa re kuparidzira, paakabhuya kuti ateeri ake aizogara “apupuri kumadzinza ese.” (Mt. 24:14; Zvi. 1:8) Azvinei kuti anhu aizotambira kana kuramba, afundi aidikana kuaparidzira nge zve Umambo wa Mwari uye zviro zvaizoizwa no Umambo iwona.

4. Maererano na Mateu 28:18-20, cinyi catinodikana kuita pane kuparidzira basi nge zve Umambo?

⁴ Ndiupi mutemo we dii recipiri wakapaswa na Djesu? Iyena wakabvunza ateeri ake kuti afundise afundi kuti akwanise kucengeta zviro zvese zvaakabhuya kuti aite. Basa iri re kuparidzira uye re kufundisa raizoimiswa mu zana re makore ekutanga hingana zvinoreketwa no anhu amweni here? Haiwa, Djesu wakapangidzira kuti basa rinokosha raizoenderera mberi dakara ku mazuwa edu, “dakara pakuguma ke nyika.” (Erengai Mateu 28:18-20.) Pamweni Djesu wakapasa basa iri pakaadzipangidzira ku afundi ake anodarika 500. (1Ako. 15:6) Pa cioneso caakapasa Juau, Djesu wakapangidza pamhene kuti zvinoimirhwa kuti afundi ake ese abetse amweni kufunda nge zva Djehovha.—Zva. 22:17.

5. Maererano na 1 Akorinti 3:6-9, Pauro akaezanisa kudini mubatano uripo pakati pekuparidzira uye kufundisa?

⁵ Muphostori Pauro wakaezanisa basa re kuita afundi ne kurima, kupangidza kuti tinodikana kuseenza maningi pane kusima mbeu basi. Iyena wakaedzurira Akorinti kuti: “Inini ndakasima, Aporo wakadirira . . . Imwimwi muri munda wa Mwari wekurimira.” (Erengai 1 Akorinti 3:6-9.) Hingana aseenzi e “mumunda wa Mwari” atisimi basi mbeu, asi tinoidiirirawo teciongorora nguwa dzese kubudirira ke zvisimwa zvedu. (Ju. 4:35) Pa nguwa imweyo, tinoziya kuti ndi Mwari unoita kuti mbeu ikure.

6. Basa redu hinga afundisi rinobatanidzei?

⁶ Tiri kupsvaka aya ano “cido cekuona upenyu usikaperi.” (Zvi. 13:48) Kuti tibetsere anhu aya kuti agare afundi, tinodikana kuabetsera kuti (1) azwisise, (2) atendere, uye kuti (3) aseenzese zviro zvaakafunda mu Bhaibheri. (Ju. 17:3; Ako. 2:6, 7; 1Ate. 2:13) Ese ari mu ungano angabetsera afundi e Bhaibheri nge kugara muezaniso wekupangidza rudo ku apsva aya uye kuita kuti azwe kutambirhwa paanouya ku misangano. (Ju. 13:35) Uya unoitisa fundo ungapedzawo nguwa yakawanda uye simba kuitira kuti abetsere mufundi kuti asiye zvaaitenda uye miitiro yaainga adjaira. (2Ako. 10:4, 5) Zvingatora nguwa yakareba kufundisa munhu kuti agume pakubhabhatidzwa. Asi kuita cinjo idzona zvinobetsera.

7. Cinyi cinotiitisa kuti tiite basa re kuparidzira uye kuita afundi?

⁷ Ngei teciita basa re kuparidzira uye kuita afundi? Kutanga, ngekuti tinoda Djehovha. Pamunoita no pamunokwanisa napo kupurutana mutemo we kuparidzira uye kuita afundi, munonga mecipangidza kuti munoda Mwari. (1Ju. 5:3) Rangarirai zvinoteera: Kuda kamunoita Djehovha kakamuita kuti muparidzire pa nyumba no nyumba. Mutemo uu wainga uri nyore kuupurutana here? Pamweni haiwa. Pemakaguma pa nyumba yokutanga mu basa re kuparidzira, makatya here? Zviri pamhene kuti mainga mecitya! Asi imwimwi maiziya kuti iri ndiro basa raidiwa na Djesu kuti muite uye imwimwi makatotondowedza mutemo uu. Uye pamweni, no kuhamba ke nguwa, zvakamuitira nyore kuti mubatikane mu basa re kuparidzira.  Hino, zvakadini kuitisa fundo ye Bhaibheri? Ndangariro ii inoita kuti mutye here? Pamweni. Ngo kudaro, pamunokumbira Djehovha kuti amubetsere kukurira kutya uye kuti muone ushingi we kukumbira kufunda Bhaibheri, Djehovha ungamubetsera ecibambisa cido cenyu cekuita afundi.

8. Maererano na Marko 6:34, cinyizve cingatiitisa kuti tifundise anhu amweni?

⁸ Cocipiri, rudo ku adoni edu rinotikohomedzesa kuti tiafundise cokwadi. Muciitiko cimweni, Djesu no afundi ake ainga aremba nge basa rawo re kuparidzira. Awona aida mbuto kuti azorore, asi cikwata cakakura ce anhu akaagumira. No usisi, Djesu wakatanga kufundisa anhu “zviro zvakawanda.” (Erengai Ruka 6:34.) Iyena wakapeta masimba pa nguwa iyona. Ngei? Djesu wakadzikanda pa mbuto pe cikwata cakakura ce anhu. Iyena wakaona kunetseka kawo—kuda kaaita kariro—uye iyena waida kuabetsa. Nyamasi uno, anhu arikubatana no zvimwezvo. Musadzitsotse no mushobo waanotipangidzira. Awona akaita hingana mabira akapsveteka asikadzivhikhiri, asina muushi kuti aatungamirire. Muphostori Pauro wakapanganidza nge zve anhu aya hinga anhu asina Mwari uye asina Kariro. (Aef. 2:12) Awona ari mu “gwanza rinoendesa mukuparadzwa”! (Mt. 7:13) Patinorangarira nge zve mugarire we kumwiya we anhu e mu ndima medu, rudo uye usisi zvinotiitisa kuti tiabetsere. Uye mushobo wakanaka we kuabetsera nge we kudzipira kuti tifunde nawo Bhaibheri.

9. Maererano na Afiripi 2:13, Djehovha ungamubetsera kudini?

⁹ Pamweni mungatya henyu kuita fundo dze Bhaibheri ngekuti munoziya kuti fundo inoda nguwa yakawanda. Kana zvakadaro, cedzai na Djehovha nge zvamurikuzwa. Kumbirai kuti amubetsere kuti mugare no cido cekupsvaka uye kuitisa fundo. (Erengai Afiripi 2:13.) Muphostori Juau wakatigondesa kuti Mwari anodaira minamato inoenderana nokuda Kake. (1Ju. 5:14, 15) Hino, mungagonda henyu kuti Djehovha ucamubetsera kugara no cido cokuita afundi.

10-11. Cinyi cingatipingaidza kuitisa fundo ye Bhaibheri?

¹⁰ Tinobata no nyara mbiri mutemo wedu wekufundisa, kunyazi tecisongana no zvinetso zvingatipingaidza kuita zvakawanda zvataizoda pakuita afundi. Ngatione kuti zvinetso zvipi izvona uye tingazvikurira kudini.

¹¹ Tingazwa hingana tisikakwanisi kuita zviro zvakawanda nge ndaa ye mugariro wedu we zviro. Ngo muezaniso, aparidzi amweni acembera kana kuti ano dambudziko re uthongo. Kodi ndizvona zvamurikubatana nazvo here? Kana zviri izvona, onai ciro cimweni catakafunda nge ndaa ye nhenda ya COVID-19. Takaona kuti tingaita fundo dze Bhaibheri dzinobudirira nge zvigadzirhwa zve magetsi! Ngokudaro, imwimwi mungatanga kuitisa fundo dze Bhaibheri makagarisika pa nyumba penyu. Uye pano zvimweni zvingabetserawo. Anhu amweni anoda kufunda Bhaibheri, asi aakwanisi kufunda pa nguwa inosanangurhwa no hama dzedu kuti dziparidzire. Ngo kudaro, awona angakwanisa kufunda cemacibese-bese kana kuti pakati pe usiku. Makagadzirira kuti mudzadzise zvinodikanwa izvi here? Djesu waifundisa Nikodhimo usiku, nguwa yainga yakasanangurhwa na Nikodhimo.—Ju. 3:1, 2.

12. Zviro zvipi zvinotipasa rugondo rekuti tinokwanisa kugara afundisi anobudirira?

¹² Tingakwanisa kugara tisina rugondo nge zve mafundisiro atinoita fundo dze Bhaibheri. Pamweni tinoona kuti tinodikana kugara no uzii wakakura hingana afundisi tisati tatanga kufunda no munhu. Kana zviri izvona zvamuri kuzwa onai zviro zvitatu  zvingakwanisa kuthunhudzira rugondo renyu. Cekutanga, Djehovha unomuona kuti imwimwi makakwaniriswa kuti mufundise amweni. (2Ako. 3:5) Cecipiri, Djesu uno, ‘masimba ese kudenga no pa nyika,’ wakamutendera kuti mufundise. (Mt. 28:18) Uye cecitatu, imwimwi mungagonda no rubetso re anhu amweni. Djesu wakagonda zvaakafundiswa na Baba ake pa zviya zvaaidikana kubhuya no kureketa uye imwimwi mungazviitawo. (Ju. 8:28; 12:49) Kusiya izvi, imwimwi mungakumbira muonereri wenyu we mu basa re kuparidzira, mupionero wakakwaniriswa kana kuti muparidzi wagara ne basa kuti amubetsere kutanga uye kuitisa fundo ye Bhaibheri. Mishobo imweni yamungagara no rugondo ngeye kuperekedza fundo ye Bhaibheri inoizwa no umwe we aparidzi aya.

13. Ngei tecidikana kudjairana no maitiro mapsva?

¹³ Tingaona hingana kuti zvinotishuphira kudjairana no maitiro uye maferamenta mapsva. Mushobo watinoitisa fundo dze Bhaibheri wacinja. Bhuku redu rikuru rekufundisa, Pfadzwai ne Upenyu Nokusikaperi!, rinoda kuti tigadzirire fundo yakhona teciitisa nge mushobo wakasiyana no zvataiita kare. Tinoerenga ndima dzisikazi kuwanda uye tinocedza maningi no mufundi. Pa nguwa yekufundisa, tinoseenzesa maningi mavhidhiyo uye zvigadzirhwa zvemagetsi, hingana JW Library^®. Kana musikazi kusudzunuka kuseenzesa maferamenta aya, reketai no munhu umweni ungamubetsera kuti mufundire kuaseenzesa. Isusu anhu tiri zvisikwa zvinofundira zviro zvpsva no kukasika. Azviripi nyore katiri kudjairana ne mishobo mipsva yekuita zviro. Asi no rubetso ra Djehovha uye ne ro anhu amweni mucaona kuti zviri nyore kudzigadzirisa uye zvicabambirira kumudakadza kufunda no anhu amweni. Hingana zvarekethwa no mu pionero umweni, mushobo uu wekufunda “unobambisa mufundi uye no mufundisi”

14. Tinodikana kuedzurirei patinoseenza mu ndima dzinonetsa, uye 1 Akorinti 3:6, 7 inotibambisa kudini?

¹⁴ Tingagara mu ndima ingashupha kutanga fundo ye Bhaibheri. Anhu angaita hingana asina basa ne masoko edu kana kutoazonda. Zvinyi zvingatibetsera kuti tigare no marangariro akanaka mu ndima yakadaro? Edzurirai kuti mugariro we anhu mu nyika ino inoshupa angacinja nokukasika, uye aya ainga asikapfariri angazokwanisa kuona zvinodiikanwa zvawo zvekumwiya. (Mt. 5:3) Anhu amweni aigara eciramba mabhuku edu akazotenda kufunda Bhaibheri. Tinoziyawo kuti Djehovha ndiyena Tenzi wekukorora. (Mt. 9:38) Iyena anoda kuti tirumbwe tecisima nokudirira, asi ndiyena Basi unoitisa kuti zvikure. (1Ako. 3:6, 7) Uye zvinobambisa maningi kuedzurira kuti, kunyazi tisikakwanisi kuitisa fundo dze Bhaibheri pa nguwa ino, Djehovha unotikomborera nge kupeta masimba katinoita, haiwa ngekubudirira kedu! *

15. Djehovha unozwa kudini kana munhu akatenda fundo ye Bhaibheri uye orarama maererano no zvaarikufunda?

¹⁵ Djehovha unopfara kana munhu akatenda cokwadi ce Bhaibheri uye obvunzawo amweni. (Zvie. 23:15, 16) Djehovha anopfara maningi paanoona zviri kuitika nyamasi! Ngo muezaniso, kunyazi no nhenda yakabararika mu nyika dzese mukati me gore re basa ra 2020, fundo dze Bhaibheri dzinokwana kuita 7705 765 dzakaizwa, izvi zvakabetsera anhu anokwana kuita 241 994 kuti adzipire kuna Djehovha uye obhabhatidzwa. Afundi apsva aya anozoitisawo  fundo dze Bhaibheri oita afundi amweni. (Ru. 6:40) Zviri pamhene kuti tinopfadza Djehovha patinobatikana mu basa rekuita afundi.

16. Tinodikana kugara ne cinangwa cipi cakanaka?

¹⁶ Kuita afundi i basa rinoda simba, asi no rubetso ra Djehovha tingakwanisa kubetserawo pakufundisa anhu apsva kuti ade Baba edu e kudenga. Tingakwanisa kugara no cinangwa ce kutanga uye kuitisa fundo imwe ye Bhaibheri hayo hewe? Tingashamisika ngo zvicaitika kana tikaseenzesa mikana iri yese kuti tikumbire aya atinogumira kuti afunde na isusu. Tingagara no rugondo rokuti Djehovha ucakomborera kupeta katinoita masimba edu.

17. Ticazwei kana tikakwanisa kuitisa fundo ye Bhaibheri?

¹⁷ Makomborero makuru atinawo e kuparidza uye kufundisa cokwadi ku amweni! Basa iri rinoita kuti tipfare zvezvirokwazvo. Muphostori Pauro, wakabetsera anhu akawanda e ku Tesaronika kuti agare afundi, wakareketa mazwire ake eciti: “Ngaipi kariro yedu kana mupfaro kana korona yekupemberera pamberi pa Tenzi wedu Djesu pakuoneka kake? Andimwipi here? Zvezvirokwazvo imwimwi ndimwi kukudzwa kedu ne mupfaro wedu.” (1Ate. 2:19, 20; Zvi. 17:1-4) Akawanda nyamasi anozwawo kudaro. Hanzvadzi imweni inozwi Stéphanie pamwepo no mwamuna wayo, akabetsera anhu akawanda kuti akugume pakubhabhatidzwa, anoti: “Akuna mupfaro mukuru kudarika kubetsera anhu kuti adzipire kuna Djehovha.”