1. Mwiya wekukwikwidzana ungaita kudini ku anhu?

MU NYIKA ino, anhu ajinji anodzikudza nge ndaa ye mwiya wekukwikwidzana. Mu empresário ungakwanisa kuseenzesa makwanza e utsinye kuti agare pamberi pe amweni. Mucai we bhora ungakwanisa kukuzvura mudoni wake kuti awine pa mutambo we bhora. Mufundi unonga ecida mbuto ku universidade inoirikira, ungakwanisa kubira mu maezame. Hingana aKristu, tinozviziya kuti mushobo uu wakashata; aya “mabasa e nyama.” (Aga. 5:19-21) Kunyazi zvakadaro, zvingaita here kuti aseenzi amweni a Djehovha aite kuti mu ungano mutangise makwikwi asati atozviziya here? Uu mubvunzo unokosha ngekuti mwiya wekukwikwidzana ungakwanisa kuparadza rubatano re ungano.

2. Ticaonei mu fundo ino?

² Mu fundo ino, ticareketa nge zve unhu usikazi kunaka ungaita kuti tikwikwidzane no hama dzedu. Uye ticaonawo miezaniso dze hama no hanzvadzi dzakagondeka dze mu nguwa ye Bhaibheri dzisikazi kuwira pa mwiya wekukwikwidzana. Cekutanga, ticaona kuti tingaongorora kudini miitiro yedu.

3. Mibvunzo dzipi dzatinodikana kudziita?

³ Nguwa dzimweni, zvakanaka maningi kuongorora maitiro edu. Tingadzibvunzisa kuti: ‘Ndinodzipima ndecidziezanisa no amweni here? Ndinomusambo wekudziwona hingana ndiri shasha pa zvese zvandinoita kana kuti kudziona hingana ndiri shasha kudarika hama imweni kana hanzvadzi here? Kana  kuti ndiri kuda basi kupasa Djehovha zvandinokwanisa?’ Ngei tecidikana kuita mibvunzo idzi? Onai zvinoreketwa ne Soko ra Mwari.

4. Ngei tisikadikani kudziezanisa no amweni, hingana zvareketwa pana Agaratiya 6:3, 4?

⁴ Bhaibheri rinotikohomedzesa kuti tisadziezanise no amweni. (Erengai Agaratiya 6:3, 4.) Ngei? Ngo dii rimweni, kana tikarangarira kuti tiri shasha kupinda hama dzedu, tingagara anhu anodzikudza. Ngo dii rimwenizve, kana tikadziezanisa zvisina kunaka no amweni, pamweni tingapedzesera taora mwoyo. Nge mushobo upi hawo, tinonga tisikarangariri zvakanaka. (Aro. 12:3) Hanzvadzi imweni inozwi Katerina, * yeku Grécia, inoti: “Ndaigara ndecidziezanisa no amweni ainga akarungama, aibudirira mu basa rekuparidzira uye aikwanisa kuita shamwari. Pakupedzesera ndakazwa hingana ndisikabetseri.” Tinodikana kuedzurira kuti Djehovha akatikweera kaari, haiwa ngekuti takarungama, tinoreketa zvakanaka, kana kuti tinoziikanwa, asi ngekuti takagadzirira kumuda uye kupurutana Mwana we rume wake.—Ju. 6:44; 1Ako. 1:26-31.

5. Mafundei pane zvakaitika no hama imweni inozwi Hyun?

⁵ Mubvunzo umweni watinodikana kudziita ndi uu: ‘Ndinoziikanwa hingana munhu unoda runyararo here, kana kuti ndinosooneka ndiri pakati pekuphiphana?’ Onai esperiensiya ye hama imweni inozwi Hyun, inogara ku Coréia do Sul. Pa nguwa imweni, iyena waiona aya ainga ano makomborero e basa hingana azondi ake. Iyena unoti: “Inini ndaishora hama idzi uye ndainga ndisikatenderani no zvaaibhuya.” Zvakazogumira papi? “Maitiro angu akaitisa kuti ungano isabatane,” iyena unotendera. Shamwari dzimweni dza Hyun dzakamubetsera kuti aone dambudziko rake. Hyun wakaita cinjo dzaidikanwa uye nyamasi uno iyena unoseenza hinga mukuru unobudirira. Kana tikaona kwatiri musambo wekumutsa makwikwi pane kusakurira runyararo, tinodikana kuita ciito.

6. Maererano na Agaratiya 5:26, unhu upi usikadikanwi unoita kuti tigare no mwiya we makwikwi?

⁶ Erengai Agaratiya 5:26. Unhu upi usikadikanwi ungaita kuti mugare no mwiya we makwikwi? Umwe wakhona nge we kudzionesa. Munhu unodzionesa unodzikudza uye anondodzirangarira. Mushobo umweni wakashata i tsumbi. Munhu ane tsumbi aadi basi ciro cine umweni wake, asi unodawo kupinga kuti umweni asagare no ciro caanaco. Zvezvirokwazvo, tsumbi ndi umwe mushobo wekuzonda. Tinoda maningi kudzidziirira pa unhu uu wakashata hingana nhenda!

7. Tingaezanisira kudini ngozi inokonzerhwa nge kudzikudza uye no tsumbi?

⁷ Unhu usikazi kunaka wekudzionesa uye tsumbi, ungakwanisa kuezaniswa no psvina inosvipisa dhizero inoita kuti ndeka ihambe. Ndeka ingakwanisa kusimuka, asi zvinosvipisa zvingakwanisa kuvhara matubo e dhizero, zveciita kuti motori isaseenze zvakanaka mu nguwa doko basi ndeka isati yacitha zvoita kuti ndeka imbwere. Nge mushobo umwewo, munhu ungakwanisa kuseenzera Djehovha kecinguwa. Asi kana iyena akadzikudza uye ogara no tsumbi unombwera. (Zvie. 16:18) Iyena unozosiya kuseenzera Djehovha uye ucadzikuwadza iyena pacake no amweni. Tingadzidziirira kudini pakudzikudza uye tsumbi?

8. Tingarhwisa kudini kudzikudza?

⁸ Tingarhwisa kudzikudza ngekurangarira  zano re muphostori Pauro ku Afiripi rinoti: “Musaite zviro mecikwikwidzana kana kudzikudza, asi dzidodosei meciona amweni hinga akuru kamuri.” (Afi. 2:3) Kana tikaona amweni hinga akuru katiri, atizokwikwidzani no aya ano cipo uye anokwanisa kuita zviro kupinda isusu. Kusiya izvona, ticapfara nge zvaanoita. Izvi nge zvezvirokwazvo kamare, kana awona akaseenzesa zvaanokwanisa kuita mu basa ra Djehovha kuti amukudze. Ngekudaro, kana hama no hanzvadzi dzedu dzino cipo akaseenzesa zano ra Pauro, awona acakanda ndangariro dzawo pa unhu waanokoshesa katiri. Migumisiro yakhona, tese ticasakurira runyararo uye rubatano mu ungano.

9. Tingaonerera kudini musambo wedu we kuita tsumbi?

⁹ Tingaonerera musambo wedu wetsumbi ngekusakurira kudzidodosa, izvi zviri kuda kubhuya kuti tinodikana kuziya patinogumira. Kana tikadzidodosa, atizoedzi kupangidzira kuti tino matarento kana kuti tinokwanisa kuita zviro kupinda amweni ese. Pane kudaro, ticaona kuti tingafundira kudini kubva kune aya anokwanisa kuita zviro kupinda isusu. Ngo muezaniso, ngatimboti hama ye mu ungano inopa mharidzo dzakanaka. Tingaibvunzisa kuti inogadzirira kudini mharidzo dzayo. kana hanzvadzi imweni icikwanisa kubika zvakanaka, tingaikumbira mazano anozotibetsera pakubika zvakanaka. Uye kana djaha reciKristu risikakwanisi kuita shamwari zviri nyore, ringakumbira mazano kubva kune aya anokwanisa kuita shamwari. Ngo kudaro, ticasiya kuita tsumbi totunhudzira uzii wedu wekuita zviro.

10. Zvinetso zvipi zvakasongana na Ghidhioni?

¹⁰ Rangarirai nge zve ciitiko cinobatanidza Gidhioni, waibva ku dzinza ra Manase, no anarume e dzinza ra Efuremu. Gidhioni no anarume ake anokwana kuita 300 akawina ngo rubetso ra Djehovha, izvo zvaizoita kuti adzikudze. Anarume eku Efuremu akasongana na Gidhioni, haiwa kuti amusimbe asi kuti areketedzane naye. Zvinoita hingana kuti kudzikudza kawo kakakuwadzwa ngekuti Gidhioni wainga asikazi kuapika kuti abatane pakurhwisana  mu hondo no azondi a Mwari. Awona ainga ano cinangwa cekucengetedza rukudzo re dzinza rawo zvekuti aazi kukwanisa kuona muezaniso mukuru wa—Gidhioni wainga abestera pakukudza zina ra Djehovha uye kudziirira anhu ake.—Ato. 8:1.

11. Gidhioni wakadaira kudini anarume e ku Efuremu?

¹¹ Gidhioni ecidzidodosa wakati ku anarume eku Efuremu: “Ndaitei inini kana ndeciezaniswa na imwimwi?” Wakabva apasa muezaniso kamare wekukomborerhwa kaakaizwa na Djehovha. Migumisiro yakhona, anarume aya “akaterama.” (Ato. 8:2, 3) Gidhioni ecidzipira, wakasiya kudzikudza kuti acengetedze runyararo pakati pe anhu a Mwari.

12. Tafundei kubva pamuezaniso wa Efuremu na Gidhioni?

¹² Tingafundei pa ciitiko ici? Ngo muezaniso Aefuremu, tinofunda kuti atidikani kunyanya kurangarira ngezvekucengetedza rukudzo redu pane kukudza Djehovha. Hingana misoro ye mhuri no akuru, pane zvatingafunda kubva kuna Gidhioni. Kana munhu akanyangadzwa nge ciro catinonga taita, tinodikana kuedza kuona zviro nge maonero ake. Tingasimbawo munhuwo nge zviro zvakanaka zvaanoita. Izvi zvinoda kuti tidzidodose, kunyanya kana ari munhuwo arikushaisha. Asi runyararo rinokosha maningi kupinda kudzikudza kedu pecedu.

13. Ana wakasongana no dambudziko ripi, uye wakarikunda kudini?

¹³ Rangariraiwo nge zve muezaniso wa Ana. Iyena wainga wakarorhwa no muRevhi waizwi Erikana, uyo waimuda maningi. Asi Erikana wainga ano mukadzi umweni, Penina. Erikana waidisisa Ana kupinda Penina; asi, “Penina wanga ano ana, uye Ana wainga asina.” Ngokudaro, Penina wakatuka Ana, “kuti amurhwadzise.” Ana wakaitei? Iyena wakanyangadzwa maningi! “Iyena waicema uye waikonerhwa kurhya.” (1Sa. 1:2, 6, 7) Asi, apana pakatarhwa kuti Ana wakaedza kuhwirinzira zvaaizirhwa na Penina. Pane kudaro, iyena wakafunungura mwoyo wake kuna Djehovha uye wakagonda kuti Djehovha waizogadzirisa zviro. Maonero a Penina kuna Ana akacinja here? Bhaibheri arireketi. Asi isusu tinoziya kuti Ana wakagarazve no runyararo mu mwoyo wake. “Hope yake yainga isikazizve kutsukwara.”—1Sa. 1:10, 18.

14. Tinofundei kubva pa muezaniso wa Ana?

¹⁴ Tingafundei ne muezaniso wa Ana? Kana munhu akaedza kuphiphana na imwimwi nge mushobo umweni, edzurirai kuti ndimwi muri kuhambisa maitiro aco e zviro. Imwimwi amudikani kutendera kuti mureketedzane. Pambuto pekuhwirinzira cakashata no cakashata, edzai kugadzirisa ndaa yakhona no munhuwo. (Aro. 12:17-21) Kunyazi akasama kumudaira, imwimwi mucacengetedza runyararo mu mwoyo menyu.

15. Aporo na Pauro akatodzana papi?

 ¹⁵ Pakupedzesera, onai zvatingafunda kubva pa muezaniso we mufundi Aporo no muphostori Pauro. Anarume airi aya ainga ano uzii wakanaka maningi we Matarhwa. Ese ari airi ainga ari afundisi airikira maningi. Uye ese akabetsera pakuita afundi akawanda. Asi apana kana umwe wakaona umweni hingana nyamarhwa wake.

16. Aporo wainga ari munhu wakadini?

¹⁶ Aporo wainga ari “we ku Alexandria,” kainga kuno cikora cekufundisa cepamusoro-soro mu zana rekutanga. Iyena wainga muiti we mharidzo ano cipo, uye “wainyasa kuziya Matarhwa.” (Zvi. 18:24) Aporo paakapedza nguwa ari ku Korinti, amweni e mu ungano akaita kuti zvigare pamweni kuti aimusanangura kupinda amweni akamboseenzera ikona, kubatanidza Pauro. (1Ako. 1:12, 13) Aporo wakabetserawo here murangariro uu unoparadzanisa? Atingakwanisi kurangariri kuti iyena wakadaro. Zvezvirokwazvo mumasure me cinguwa cidoko Aporo wabva ku Korinti, Pauro wakamukohomedzesa kuti ahwirirezve ikona. (1Ako. 16:12) Pauro wainga asikadi kuzviita kudai Aporo naiparadzanisa ungano. Zviri pamhene kuti Aporo waiseenzesa zvipo zvake nge mushobo wakanaka—kuti aparidzire masoko akanaka uye abambise hama dzake. Uyewo tingagondawo kuti Aporo wainga ari mwanarume waidzidodosa. Nge muezaniso, apana pezvakatarhwa kuti wakatsamwa paakapanganidzirhwa ndi Akira na Prisira zvakaringana ne “makwanza a Mwari zvakadjeka.”—Zvi. 18:24-28.

17. Pauro wakaita kudini kuti runyararo rirumbwe riri mu ungano?

¹⁷ Mupostori Pauro wainyasa kuziya basa  rakanaka raiizwa na Aporo. Asi Pauro aazi kuzwa kuneseka nge ndaa yake. Kudzidodosa, kugara pakati no pakati ka Pauro zvinooneka pa zano raakapasa ungano ye ku Korinti. Pano kuti agare akashatirhwa nge ndaa ye aya aiti: “Inini ndiri wa Pauro,” iyena wakaita kuti mbiri iende kuna Djehovha Mwari na Djesu Kristu.—1Ako. 3:3-6.

18. Maererano na 1 Akorinti 4:6, 7, tinofundei kubva pa muezaniso wa Aporo na Pauro?

¹⁸ Tingafundei ne muezaniso wa Aporo uye Pedru? Tingaseenza no simba rese kuna Djehovha uye kubetsa anhu akawanda kuti abhabhatidzwe. Asi tinoziya kuti ciro cipi haco catingakwanisa kuita, tinozviita nge ndaa ye makomborero a Djehovha. Ne miezaniso ya Aporo na Pauro, tinofunda kuti—patinobudirira maningi, tinonga tinomukana wekuita kuti runyararo rirumbwe riri mu ungano. Tinotenda maningi anarume akagadzwa anoita kuti pagare ne runyararo uye rubatano rinobva mu Soko ra Mwari, eciteedzera Kristu Djesu muezaniso wedu!—Erengai 1 Akorinti 4:6, 7.

19. Cinyi cingaizwa na umwe na umwe wedu? (Onai bhokisi rakazwi “ Itai kuti Pasaoneke Kukwikwidzana.”)

¹⁹ Umwe na umwe wedu une cipo caakapaswa na Mwari. Tingaseenzesa cipo ici “pakuseenzerana.” (1Pe. 4:10) Tingazwa hingana kuti basa ratinoita i doko. Asi zviito zvidoko zvinosakurira kubatana zvakatodzana no maboo madoko anobatanidza djira. Umwe na umwe wedu ngaaseenze no simba kuti abvise paari ciro cipi haco ce mwiya wekukwikwidzana. Ngatishingei kuita zvese zvatinokwnisa kuti timutsidzire runyararo nokubatana mu ungano.—Aef. 4:3.