1-2. Masoko a Djehovha ari pana Isaia 65:16, 17, anotibetsera kudini kuti tishingirire?

“MUSAREMBE!” ndiwona wainga uri musoro we gungano ra 2017. Urongwa uu wakatipangidza kuti tingashingirira kudini miedzo dzinotiwira. Makore marongomuna atopinda, uye isusu ticiri pano, ticiri kurarama mugariro we zviro we nyika ino.

² Zvinyi zvamabva kusongana nazvo mu nguwa yadarikei? Makafirhwa no umwe we nhengo ye mu mhuri kana kuti no shamwari yamunoda here? Muno nhenda ingaitisa kuti mufe here? Upenyu uri kushupha here ngekuti maakucena? Makasongana no ngozi inoitika yega, ubhinya, kana kuti kuteererhwa here? Kana kuti muri kubatana no zvitsinzwa zvinobarhwa nge nhenda yakaita hingana KORONAVIRUS here? Tiri kuetsera no mwoyo wese zuwa rekuti zviro zvese izvi zvinonga zvadarika—zvinonga zvakanganwika uye azvicazoitikizve!—Erengai Isaya 65:16, 17.

3. Ngazvipi zvatinodikana kuita zvino, uye ngei?

³ Upenyu mu nyika ino uri kushupha maningi, uye tingakwanisa kubatana no matambudziko akakura mune ramangwana. (Mt. 24:21) Ngokudaro, tinodikana kurumbwa tecifundira kushingirira. Ngei? Ngokuti Djesu akati: “Kana mukashingirira dakara kumagumo, mucaponesa mwiya wenyu.” (Ru. 21:19) Kurangarira kuti amweni ari kukwanisa kudini kushingirira miedzo yakaita hingana yatiri kusongana nayo, zvinotibetserawo kuti tishingirire.

4. Ngei teciti Djehovha i muezaniso wakanaka we kushingirira?

⁴ Ndiyani muezaniso mukuru we kushingirira? Djehovha Mwari. Mhinduro ii yamushamisai here? Pamweni maitorangarira nge zvazvo. Nyika ino iri kuonererhwa na Dhiyabhorosi, uye yakadzara no zvinetso. Djehovha uno simba re kupedza  izvona ke nguwa doko basi, asi Mwari wedu uri kuetsera zuwa raacaita izvi mune ramangwana kuti aite izvona. (Aro. 9:22) Asi panguwa ino, Mwari wedu uri kurumbwa ecishingirira dakara pa zuwa irona. Ngationei zviro zvipfembamwe zviri kushingirirhwa na Djehovha.

5. Zina ra Mwari rakashorhwa kudini, uye imwimwi munozwawo kudini nge zvazvo?

⁵ Kusareremedzwa ke zina rake. Djehovha une rudo ne zina reke uye anoda kuti anhu ese arireremedze. (Isa. 42:8) Asi ke makore anodarika mamirionji matanhatu, zina rake rakanaka riri kushorhwa. (Pis. 74:10, 18, 23) Asi izvona zvakatanga mu munda we Edheni apo Dhiyabhorosi (zvecida kubhuya “Mureyi”), wakapumha Mwari kuti aipingidza Adhamu na Evha ciro caaida caizoita kuti awona apfare. (Ge. 3:1-5) Kubvira apona, Djehovha uri kupumhwa ne manyepo okupingidza anhu zviro zvaanoda. Djesu wainga ecinetseka maningi nge zve kushorhwa ke zina ra Baba wake. Ngokudaro, Djesu wakafundisa afundi ake kunamata, eciti: “Baba edu ari kudenga, zina renyu ngariceneswe.”—Mt. 6:9.

6. Ngei Djehovha wakasiya kuti papinde nguwa yakareba asati agadzirisa ndaa ye ucangamire wake?

⁶ Kuzondwa ke ucangamire wake. Djehovha uno citenderhwa cakakura ce kutonga kudenga no panyika, uye matongere ake akanaka kupinda ese. (Zva. 4:11) Asi Dhiyabhorosi wakacengedza ngirozi no anhu eciita kuti arangarire kuti Mwari aana citenderhwa icona. Asi ndaa iyona ii ye citenderhwa ce ucangamire wa Djehovha, yainga isikadikani kutongwa ke nguwa doko basi. No ungwaru, Mwari akaita kuti pagare no nguwa yakareba kuitira kuti anhu awone kuti, anhu paanoedza kudzitonga oga pasina rubetso re Musiki, apana zvinobudirira. (Dje. 10:23) Nge ndaa ye kunonoka kutsamwa ka Mwari, ndaa ii icatongwa kamwe no kamwe. Iyena ucaita kuti zvibude pamhene kuti Umambo wake basi ndiwona ucaunzisa runyararo re zvirokwazvo uye rucengeteko pa nyika.

7. Ndiyanani akapandukira Djehovha, uye ngazvipi zvaacaita kaari?

⁷ Kupanduka ke ana ake amweni. Djehovha wakasika ngirozi uye no ana ake o pasi pano akakwana, asina citema. Asi ngirozi imweni yakapanduka inozwi Sathani (zvecida kureya “Muphikisi”) wakaita kuti anhu asina citema, Adhamu na Evha, apandukire Mwari. Asi ngirozi dzimweni ne anhu akabatanawo pa kupanduka uku. (Dju. 6) Mumasure me cinguwa, kunyazi nhengo dze dzinza re aIsraeri, anhu akasanangurhwa na Mwari, akamuramba uye akawhirira pa kunamata madzimwari e kunyepa. (Isa. 63:8, 10) Zvezvirokwazvo Djehovha wainga uno razau kuti azwe hingana watsotswa. Asi iyena wakashingirira uye ucarumbwa ecishingirira dakara pacaguma nguwa ye kuparadza apanduki ese. Izvona zvicaunzisa zororo rakakomborerhwa kuno anhu ake akagondeka, ekuti ari kushingirirawo pamwepo naye zviro zvakashata mu mugariro we zviro we pa nguwa ino!

8-9. Manyepo api anorekethwa nge zva Djehovha uye isusu tingaiteiwo?

⁸ Manyepo anogara eciizwa na Dhiyabhorosi. Sathani wakapambadzira Djobo, museenzi munatsi wa Djehovha, eciti ese anamati a akagondeka a Djehovha anoseenzera Mwari nge ndaa yekuti pano zvaanonga ecida. (Djo. 1:8-11; 2:3-5) Dakara na nyamsi uno, Dhiyabhorosi uri kurumbwa ecipambadzira anhu. (Zva. 12:10) Pacedu isusu tingapangidzira kuti apana zvirokwazvo pa manyepo a Sathani, tecishingirira miyedzo dzedu uye tecirumbwa takagondeka kuna Djehovha, nokuti tinomuda. Hingana zvakaitika na Djobo, ticakomborerhwa nge kushingirira kedu.—Tg. 5:11.

 ⁹ Sathani unoseenzesa atungamiriri e magereja e kunyepa abhuye kuti Djehovha wakashata uye ndiye uri kuitisa matambudziko e anhu. Amweni anosoti ana adoko paanofa, Mwari anosowatora ngekuti ari kuda kutunhudzira ngiroji kudenga. Uku kutuka kamare! Asi isusu tinoziya kuti Djehovha ndi Baba ane rudo. Patinokuwadzwa no nhenda isikarapiki kana kuti patinofirhwa nge munhu watinoda, isusu atigumi pa kupumha Mwari. Kusiyana na izvona, isusu tinotenda kuti ricaguma zuwa raacagadzisira zviro zvese. Tingabvunza anhu ese anotenda kuzwa kuti Djehovha ndi Mwari ane rudo. Izvi zvinomupasa mhinduro yakanaka kuno aya anomushora.—Zvie. 27:11.

10. Pisarema 22:23, 24 inotipangidzei nge zva Djehovha?

¹⁰ Matambudziko e aseenzi ake aanoda. Djehovha ndi Mwari ane usisi. Iyena unozonda kutizwa tecikakarara nge ndaa ye matambudziko atiri kushingirira—hingana kuteererhwa, nhenda kana kuti kusama kwana kedu. (Erengai Pisarema 22:23, 24.) Djehovha anozwisisa kutambudzika kedu; iyena uri kuda kuwapedza, uye acaapedza. (Ezanisai na Ekisodho 3:7, 8; Isaya 63:9.) Ricaguma zuwa rekuti iyena “ucapukuta misodzi yese pa madziso [edu], kufa akucazoonekizve, kana kucema, kana kuridza mhere, kana kurhwadziwa.”—Zva. 21:4.

11. Ngacipi cinoita kuti Djehovha agare no cisuwo nge aseenzi ake akagondeka?

¹¹ Kusiiwa nge shamwari dzake dzakafa. Djehovha unozwa kudini nge anarume ne anakadzi akagondeka akafa? Iyena ari kuda maningi kuwaonazve! (Djo. 14:15) Imwimwi munokwanisa kurangaridza here cido cina Djehovha ce kuda kuonazve shamwari yake Abhrahamu? (Tg. 2:23) Kana kuti Mozesi, waakareketa naye “hope no hope”? (Eki. 33:11) Uye iyena une cisuwo cakakura kudini ce kuda kuzwazve Dhavhidhi uye no aembi amwe e pisarema eciemba ngoma dzawo dzakanaka dze kurumbidza!  (Pis. 104:33) Kunyazi shamwari idzi dza Mwari dzakawata mu rufu, Djehovha aazi kudzikanganwa. (Isa. 49:15) Iye anoedzurira unhu wese wawo. Asi Bhaibheri rinoti, “iye ndi Mwari we apenyu, haiwa we akafa.” (Ru. 20:38, masoko opasi.) Zuwa rimweni, iyena ucaawhiridzazve ku upenyu, ucazwazve minamato yawo ye pa mwoyo uye ucatendera kunamata kawo. Kana makafirhwa nge munhu wamunoda, murangariro wakadaro ungakwanisa kumunyaradza uye kumubambisa.

12. Cinyi cirikunyanya kurhwadzisa Djehovha mu mazuwa ano ekupedzesera?

¹² Kubzwinyirirhwa ke anhu ake nge akashata. Kupanduka pe pakatanga mu munda we Edheni, Djehovha waiziya kuti zviro zvaizorumba zvecishata pazvinonga zvisati zvagadzirisika. Djehovha unozonda ushaishi, zvisina unatsi, uye zve masimba-masimba zviri mu nyika nyamasi uno. Iyena unozwira usisi arombo—asina simba uye nherera uyewo afirhwakadzi. (Zak. 7:9, 10) Djehovha unorhwadziwa pese paanoona aseenzi ake akagondeka ecibzwinyirirhwa uye eciendeswa mukaraboso. Garai no rugondo rekuti iyena unomudai mwese imwimwi nge kushingirira pamwepo naye.

13. Zviro zvipi zvakashata zvirikuizwa nge anhu, uye Djehovha ucaitei?

¹³ Kuparadzana ke mhuri dze anhu ese panyika. Sathani unoda kuona anhu hingana asina basa, awo akasikwa ngo mufanikiso wa Mwari. Mwari “akaona kuti ushaishi we anhu wainga wakakura” mu nguwa ya Nowa, “Djehovha wakatsumba nge nda ye kuita anhu pa nyika, uye akarhwadziwa mu mwoyo make.” (Ge. 6:5, 6, 11) Dakara nyamasi uno, zviro zvacinja here? Zviri pamhene kuti haiwa! Dhiyabhorosi unopfara maningi nge kuona kubambirira kuri kuita uhure weciizwa nge mishobo iri yese, hingana miitiro yese yakashata ye uhure inoizwa ne mwanarume no mwanarume, mwanakadzi no mwanakadzi uye mwanarume no mwanakadzi! (Aef. 4:18, 19) Sathani unonyasa kupfara kana akakwanisa kuita kuti anamati a Djehovha aite citema. Kana kunonoka kutsamwa ka Djehovha kukazopera, iyena ucapangidzira kuti aatenderi miitiro yese yakashata ye uhure.

14. Zvii zviri kuita munhu ne nyika uye no zvinyama?

¹⁴ Kuparadzwa ke zvisikwa zvake. Munhu aaripi basi ‘kukuwadza umweni wake kuti zvimushatire,’ asi iyena ariipi kuseenzesawo zvakanaka nyika ne zvisikwa, hinga zvinyama zvaakapaswa na Djehovha kuti azvicengete. (Mup. 8:9; Ge. 1:28) Masientista amweni anopasa ngwadzo yekuti zviri kuizwa ne anhu zvingakwanisa kuita kuti mamirionji e mishobo yakasiyana-siyana * ye zvisikwa zvitsakatike pa makore anoteera. Azvitishamisi paanobhuya kuti zvisikwa zviri pa ngozi! Zvinopfadza kuziya kuti, Djehovha akagondesa ‘kutsakatisa aya ari kutsakatisa nyika’ uye kucinja nyika yese kuti igare paradhizo.—Zva. 11:18; Isa. 35:1.

15-16. Cinyi cingatikohomedzesa kuti tishingirire tese na Djehovha? Pasai muezaniso.

¹⁵ Rangarirai matambudziko ese anorhwadza ari kushingirirhwa na Baba edu e kudenga aari kushingirira ke mamirionji e makore. (Onai bhokisi rakazwi, “ Ngazvipi Zviri Kushingirirhwa na Djehovha.”) Djehovha aikwanisa kutsakatisa mugarire we zviro wakashata we nyika ino pa nguwa ipi hayo. Asi kunonoka kake kutsamwa kakatibetsa maningi! Tingarangarira kudai. Ngatirangarirei nge zve mwarume no mukadzi wake anobvunzwa kuti mwana wawo asati atobarhwa uno zvinetso zvikuru zve pa mwiri uye mwanewo aazogari no upenyu wakareruka uyezve acafa pa nguwa doko. Kunyazi izvi zvicaanetsera, madzibabewo anomutambira no mupfaro paanobarhwa. Rudo  rawo kune mwana uu rinowaitisa kuti ashingirire matambudziko ese, ngekuti ari kuda kumupasa upenyu wakanaka ungakwanisika.

¹⁶ Nge mushobo umwewo, mubarirhwana wese wa Adhamu na Evha anobarhwa asikazi kukwana. Kunyazi zvakadaro, Djehovha anowada uye anowacengeta. (1Ju. 4:19) Kusiyana ne madzibaba okunyama ari pa muezaniso wedu, Djehovha anokwanisa kupedza matambudziko e ana ake. Iyana wakasanangura zuwa raacapedza nhenda dzese dziri kushupha anhu ake aakasika. (Mt. 24:36) Rudo rake aritikohomedzesi here kuti tishingirire pamwepo naye panguwa yese pazvinonga zvecidikanwa?

17. Masoko a Djesu ari pana Ahebheru 12:2, 3, anotikohomedzesei?

¹⁷ Djehovha wakapasa muezaniso wakakwana we kushingirira. Djesu wakakwanisa kuteedzera kushingirira ke Baba ake. Hingana munhu, Djesu wakashingirira masoko e azondi, aipsverudza uye pa mutanda we kutambudzikira nge ndaa yedu. (Erengai Ahebheru 12:2, 3.) Zviri pamhene kuti muezaniso we kushingirira wa Djehovha, wakapasa Djesu simba re kushingirira. Izvi zvingatibetserawo.

18. 2 Pedru 3:9 ingatibetsera kudini kuziya zvakaitika nge ndaa ye kunonoka kutsamwa ka Djehovha?

¹⁸ Erengai 2 Pedru 3:9. Djehovha anoziya nguwa yakanaka yekuti atsakatise nyika ino yakashata. Kunonoka kutsamwa kake kakaita kuti aunganidze anhu akawanda, anokwana mamirionji, anomunamata no kumurumbidza. anhu ese anopfara nge kushingirira ka Djehovha ke nguwa yakareba kuti awona abarhwe, afunde kumuda uye no kudzipira kaari. Cisanangura ca Djehovha ce kushingirira cicazoonesa cikonzero cakhona paacakomborera mamirionji edu akashingirira dakara kumagumo!

19. Tinodikana kushinga kuitei, uye makomborero api aticapaswa?

¹⁹ Tafundira nge zva Djehovha kuti tingashingirira kudini ne mupfaro. Kunyazi no marhwadzo ese uye no matambudziko akaitiswa na Sathani, Djehovha anorumbwa ari “Mwari anopfara.” (1Ti. 1:11) Isusu tingakwanisa kupfara tecietsera Djehovha no mwoyo unononoka kutsamwa kuti acenese zina rake, akudze ucangamire wake, apedze unzondi wese uye apedze matambudziko atiri kusongana nawo. Ngatirumbwei tecishingiria uye tecidzinyaradza ngokuziya kuti Baba edu ari kudenga ari kushingirirawo. Kana tecizviita, masoko aya akagara e zvirikwazvo kune umwe na umwe wedu ekuti: “Anopfara munhu anorumbwa ecishingirira miedzo, ngekuti paanotenderhwa acapaswa korona ye upenyu, yakagondeswa na Djehovha kune aya anorumbwa ecimuda.”—Tg. 1:12.