Patinoerenga nokukasika tsamba idzi, pamweni tingagara no mubvunzo uwona. Asi zvezvirokwazvo tsamba idzi dzinoreketa nge zve anhu airi akasiyana ano zina rimwero Mefibhozeti, uye isusu tingafunda zvakawanda nge kunyasa kukwarakwatisa zvakaitika.

Mambo Sauro wainga ano ana e anarume anokwana anomwe uye airi e anakadzi. Mwana wake we dangwe waizwi Djonatani. Nokuhamba ke nguwa, mambo Sauro wakagara no mwana umweni unozwi Mefibhozeti. Iyena wainga ari mwana wa concubina wa Sauro unozwi Rispa. Zvinoshamisa kuti Djonatani wainga ano mwana unozwiwo Mefibhozeti. Hino Mambo Sauro wainga ano mwana unozwi Mefibhozeti uye muzukuru uno zina rimwero.

Paaitonga, Mambo Sauro akaedza kuparadza Adjibhioni ese airarama pakati pe Aisraeri. Zvinoita hingana kuti ese akafa. Asi izvona zvainga zvakashata. Ngei? Ngekuti mu mazuwa a Djoshuwa Akuru-akuru e ku Israeri akaita citenderano ce runyararo no Adjibhioni.—Djos. 9:3-27.

Citenderano icona, cainga ciciri kuseenza dakara mu mazuwa a Mambo Sauro. Kunyazi zvakadaro, mambo Sauro aazi kutondoedza citenderano icona uye wakaedza kuparadza Adjibhioni. Nge ndaa yazvo “Sauro no mhuri yake yese ainga ano ndaa ye ngazi.” (2 Sam. 21:1) Nokuhamba ke nguwa, Dhavhidhi ndiyena wakazogara mambo. Hino Adjibhioni akakwanisa kupukunyuka, akamupanganidzira zvakaitika. Dhavhidhi wakaabvunzisa kuti cinyi caidikana kuizwa kuti aripe cishaishi cakaizwa na mambo Sauro ngekuti izvona zvaizoita kuti Djehovha akomborere nyika. Pane kukumbira mare, awona akakumbira ana anomwe e mwanarume “wakaronga kuparadza” Adjibhioni kuti aauraye. (Num. 35:30, 31) Dhavhidhi wakatendera cikumbiro cawo.—2 Sam. 21:2-6.

Pa nguwa iyona, Sauro na Djonatani ainga afa, asi mwana wa Djonatani Mefibhozeti wainga aciri mupenyu. Iyena wainga akaremara nge ndaa ye tsaona yaakasongana nayo aciri mwana mudoko, uye zviri pamhene kuti iyena wainga asiriopi Sauro paakaedza kuparadza Adjibhioni. Nge ndaa ye ushamwari wake na Djonatani, Dhavhidhi wakaita citenderano naye uye no abarirhwana ake, kutobatanidzawo mwana wa Djonatani Mefibhozeti. (1 Sam. 18:1; 20:42) Nyaya iyona inobhuya kuti: “Mambo [Dhavhidhi] akazwira usisi Mefibhozeti mwana wa Djonatani, mwana wa Sauro nge ndaa yecitenderano cakaizwa na Dhavhidhi uye na Djonatani pamberi pa Djehovha.”—2 Sam. 21:7.

Kunyazi zvakadaro, Dhavhidhi wakatendera cikumbiro ce Adjibhioni. Iyena wakapasa ana airi a Sauro, umwe wawo waizwi Mefibhozeti uye no azukuru anokwana ashanu a Sauro. (2 Sam. 21:8, 9) Zvakaizwa na Dhavhidhi zvakaita kuti nyika isagarezve no ndaa ye ngazi.

Nyaya ii ainhorondopi inoshamisa basi. Mutemo wa Mwari wainga wakadjeka. Iwona waiti: “Ana aadikani kuuraiwa nge zvishaishi zve abereki awo.” (Dhe. 24:16) Djehovha ainga asikadi kutendera kuti ana airi no azukuru ashanu a Sauro auraiwe kudai awona ainga asina ndaa. Mutemo umwe umwewo waibhuyawo kuti : “Munhu unodikana kuuraiwa nge ndaa ye citema cake kamare.” Hino zviri pamhene kuti abarirhwana anokwana anomwe a Sauro, ainga aripo Sauro paaiedza kuparadza Adjibhioni. Nge ndaa yazvo, awona akauraiwa nge ndaa ye zvishaishi zvawo.

Nyaya ii inopangidza kuti munhu aadikani kukumbira rurekerero nge zvishaishi zvake ecirangarira kana kubhuya kuti wakazviita ngekuti waiteerera mutemo. Cierengo cino ungwaru cinoti: “Gadzirira tsoka dzako gwanza rakathwasuka, uye makwanza ako ese anonga akacengeteka.”—Zvie. 4:24-27; Aef. 5:15.