1-2. Zvineso zvipi zviri kusongana no hama dzakawanda?

MUPHOSTORI Pauro wakakohomedzesa Timoti kuti, anyase kuita basa rake rekuparidzira. (2Ti. 4:5) Tese hedu tinobata no nyara mbiri zano ra Pauro, asi azviripi nyore. Ku hama no hanzvadzi dzedu dzakawanda zvinoda ushingi kuti abude mu basa rokuparidza. (2Ti. 4:2) Rangarirai nge zve aya anogara mu nyika yekuti basa redu rekuparidzira rinorambidzwa. Awona anoparidzira kunyazi eciziya kuti rusununguko rawo rinonga riri pa ngozi!

² Hama dzedu dzinosongana ne matambudziko akawanda zvokuti anoora mwoyo. Ngo muezaniso, awona anoseenza zuwa rese kuti ariritire mhuri dzawo. Awona aitodawo kuita zviro zvakawanda mu basa rokuparidza. Asi panozoguma mapeto e biningu, awona anonga apera simba. Amweni anoshuphika nge ndaa ye nhenda yagarisa kana kuti nge ndaa yekucembera; nguwa dzimweni aatombokwanisi kubuda pamuzi. Ndiyo ndaa asikaiti zviro zvakawanda mu basa rokuparidzira. Uye kune amweniwo anorhwisana ne mazwire asikazi kunaka. Awona anorangarira kuti aakoshi kuna Djehovha. Mariya, * hanzvadzi inogara ku Oriente Médio, inoti: “Kurhwisa mazwiro angu asikazi kunaka, ciro cinotodikana kuseenza no simba ngekuti ndinozwa kupera simba. Hino ndinodziwona hingana ndino ndaa, ngekuti zvinonditorera nguwa no simba rese randaikwanisa kuseenzesa mu basa rekuparidzira.”

3. Ticaonei mu fundo ino?

³ Kunyazi tiri pa mugariro upi hawo, Djehovha anotipasa simba rokushingirira matambudziko edu, zvoita kuti timuseenzere dakara panotenderhwa no mugariro wedu we zviro. Mu fundo ino, ticaona kuti Djehovha anozviita kudini. Asi ngatitange ngekuona kuti Djehovha akabetsera kudini Pauro na Timoti  kuti akwanisane ne zvineso, uye kuti anyase kuita basa rawo rekuparidza.

4. Pauro wakasongana ne zvineso zvipi?

⁴ Pauro wakasongana ne zvineso zvakawanda. Iyena waida simba kunyanya paaipondwa, paaifurhwa nge mapuwe uye paaikandwa mu karaboso. (2Ako. 11:23-25) Pauro wakareketawo pamhene kuti wairhwisana no mazwiro akashata. (Aro. 7:18, 19, 24) Kupinda izvi, iyena waishingirira “munzwa mu nyama”. Pa nguwa dzimweni, iyena wakatokumbira Mwari kuti abvise munzwa iwona.—2Ako. 12:7, 8.

5. Pauro wakakwanisa kuitei kunyazi paaisongana ne zvineso?

⁵ Kunyazi ne zvinetso zvese zvaakasongana nazvo, Pauro wakatambira simba ra Djehovha. Ngekudaro iyena wakakwanisa kuita basa rake rokuparidzira. Onai zvakakwanisa kuizwa na Pauro. Pa nguwa imweni iyena wainga asikadikani kubuda panyumba, ngekuti wainga akasungirhwa pa nyumba ku Roma. Kunyazi zvakadaro, iyena wakakwanisa kureketa nge zve masoko akanaka ku aya ano masimba. (Zvi. 28:17; Afi. 4:21,22) Pauro wakaparidzirawo arindiri akawanda e mu Cianze uye ku aya aienda komuvhakacira. (Zvi. 28:30, 31; Afi. 1:13) Ndipona paakakwanisa kutara tsamba dzimweni uye na nyamasi uno tsamba idzona dzicirikuseenza ku aKristu e cokwadi. Kupinda izvi, Pauro wakagara muezaniso wakanaka ku ungano yeku Roma, zvokutoti Bhaibheri rinobhuya kuti hama dze ikona “dzakatonyanya kupangidza ushingi pakureketa soko ra Mwari dzisingatyi.” (Afi. 1:14) Zvirokwazvo kuti Pauro wainga asikakwanisi kuita zviro zvese zvaaida, asi iyena waipeta masimba kuti aite zvaanokwanisa. Zvakazoguma papi? Hingana zvakareketwa na Pauro wene kuti, “zviri kuitika kandiri zvatozoita kuti masoko akanaka ahambire mberi.”—Afi. 1:12.

6. Maererano na 2 Akorinti 12:9, 10, cinyi cakabetsera Pauro kuti akwanise kuita basa rake?

⁶ Pauro waiziya kuti pasina simba ra Djehovha, iyena wainga asikazokwanisi kuita zvese zvaakaita. Iyena wakatendera kuti simba ra Mwari “rakaizwa rakakwana mukusama kake simba.” (Erengai 2 Akorinti 12:9, 10.) Ndiyo ndaa, muphostori uu wakagondeka wakakwanisa kunyasa kuita basa rake kunyazi pakuteererhwa, kukandwa mukaraboso uyewo ne zvineso zvimweni.

7. Timoti waidikana kukunda zvineso zvipi kuti akwanise kuita basa rake rekuparidzira?

 ⁷ Kunyazi wainga ari djaha kupinda Pauro, Timoti waidikanawo kugonda ne simba ra Mwari kuti akwanise kuita basa rake rekuparidza. Timoti wakahambawo murhwendo rakakura rekuparidzira na Pauro. Kupinda izvi, pauro wakakumbira Timoti kuti aitewo rhwendo rimweni rokuenda koovhakacira ungano kuti adzibambise. (1Ako. 4:17) Pamweni izvi ndizvona zvakaita kuti Pauro amupase zano rinoti: “Usasiye munhu ecikuringirira pasi ngekuti uciri mudoko.” (1Ti. 4:12) Panguwa iyona, Timoti wakasonganawo ne munzwa mu nyama—“iyena waigara ecirhwara-rhwara.” (1Ti. 5:23) Asi Timoti waiziya kuti waikwanisa kugonda mu mwiya mucena wa Djehovha. Ne rubetso re mwiya mucena, iyena wainga anosimba kuti akwanise kuparidzira nge zve masoko akanaka uye kuseenzera hama dzake.—2Ti. 1:7.

8. Djehovha anotipasa kudini simba nyamasi uno?

⁸ Nyamasi uno, Djehovha anopa aseenzi ake “simba rakatunhudzirhwa.” Nge ndaa ye simba iri, tinokwanisa kumuseenzera takagondeka. (2Ako. 4:7) Ngatione mishobo mirongomuna inoseenzeswa na Djehovha kuti atipase simba: munamato, Bhaibheri, hama dze ciKristu, uye basa rokuparidzira.

9. Munamato unotibetsera kudini?

⁹ Kubambiswa nge munamato. Pana Aefeso 6:18, Pauro unotikohomedzesa kuti tiite munamato kuna Mwari “nguwa dzese.” Mwari ucatidaira ecitipasa simba ratinoda. Jonnie, unogara ku Bolívia, wakaona rubetso ra Djehovha paakasongana ne matambudziko akateedzana. Mukadzi uye abereki ake akarhwara maningi pa nguwa imweyo. Zvainesa kuti Jonnie ariritire anhu atatu pa nguwa imweyo. Mai ake akazofa, uye zvakatora nguwa yakareba kuti mukadzi wake na baba ake aporezve. Paanorangarira nguwa iyona, Jonnie unoti: “Panguwa yendainyanya kuneseka, cakandibetsera kuita minamato.” Djehovha akapasa simba Jonnie kuti ashingirire. Ronald, mukuru unogara ku Bolívia, wakazwa kuti mai ake ainga ano câncer. Zvinotsukwarisa kuti awona akazofa mwedzi wakateera. Cinyi cakamubetsera kuti akwanisane ne dambudziko iri? Iyena unoti: “Pandinonamata kuna Djehovha ndinokwanisa kudurura zviri mu mwoyo mangu uye ndobhuya zviro zvandiri kuzwa. Ndinozviziya kuti Djehovha anondizwisisa kupinda munhu upi hake. Zvezvirokwazvo iyena unondiziya kutodarika inini wene.” Zvingaita kuti nguwa dzimweni tingazwa takaremerhwa no matambudziko uye tokonerhwa cokutoreketa pa munamato. Asi Djehovha anotipika kuti tiite minamato kaari kamare, kunyazi tecikonerhwa kureketa zviya zvatiri kuzwa.—Aro. 8:26, 27.

10. Maererano na Ahebheru 4:12, ngei zvecikosha kuerenga Bhaibheri uye kunyasa kurangarira?

¹⁰ Kubambiswa nge Bhaibheri. Pauro waitambira simba uye nyaradzo peciseenzeswa Matarhwa, izvona zvingaitikawo katiri. (Aro. 15:4) Zvinokosha kurumbwa tecierenga Soko ra Mwari uye kunyasa kurirangarira, patinoita izvi, Djehovha anoseenzesa mwiya wake mucena kuti tikwanisane ne matambudziko edu. (Erengai Ahebheru 4:12.) Ronald, wamboreketwa ngezvake unoti: “Zvakandinakira maningi kusakurira cido cekuerenga Bhaibheri usiku wese. Ndinorangarira maningi nge zve unhu wa Djehovha uye mushobo we rudo waanobata nawo assenzi ake. Izvi zvinondibetsera kuti ndionezve simba.”

11. Bhaibheri rakapa kudini simba hanzvadzi yainga yakatsukwara?

¹¹ Kunyasa kurangarira nge zve Soko ra Mwari kunotibetsera kuti tigare ne maonero akanaka  matambudziko edu. Onai zvakaitika ne hanzvadzi imweni. Iyona yakatsukwara maningi nge kufirhwa nge mwamuna wayo. Hino mukuru umweni wakaipasa zano rokuti aerenge bhuku ra Djobo. Hanzvadzi iyona yakasanangura kuzviseenzesa. Peyakatanga kuerenga, iyona yakatanga kushora mushobo wakashata wekurangarira wa Djobo. Hanzvadzi ii yaigara yeciti: “Djobo! Usarangarire kudaro!” Hanzvadzi ii, ndipona peyakazoona kuti yainga yecirangarira hingana Djobo. Kuerenga bhuku iri re Bhaibheri kakabetsera hanzvadzi yedu kuti igadzirise maonero ayo uye kuti iwone simba rokukwanisana ne dambudziko rekufirhwa nge mwamuna wayo.

12. Djehovha anoseenzesa kudini hama dzedu mukutenda kuti dzitipase simba?

¹² Kubambiswa ne hama dzedu dze ciKristu. Djehovha anotipasawo simba eciseenzesa hama dzedu dzatinonamata nadzo. Pauro wakatarira hama dzake mukutenda kuti “ndirikuda maningi kumuona kuti tibambisane.” (Aro. 1:11, 12) Kuna Mariya wamboreketwa ngezvake, kugara ne hama ciro cinokosha maningi. Iyena unoti: “Djehovha wakatoseenzesa hama ne hanzvadzi dzainga dzisikatozii nge zve matambudziko angu, aona akareketa zviro zvakandibambisa. Akanditumirawo tsamba uye izvona ndizvo zvandaida pa nguwa iyona. Ciro cimweni cinondibetsera nge cekucedza ne hama dzakambosonganawo ne matambudziko andinawo. Uye akuru anoita zviri zvese kuti andibvundze kuti ndinokosha mu ungano.””

13. Tingabambisana kudini pa misangano?

¹³ Misangano ye ciKristu, inotibambisa maningi. Pamucapinda musangano, madini kuedza kubambisa amweni. Bvunzai hama imweni kuti, ndinomudai, kana kuti ndinotenda maningi nge zvese zvamunoita. Nge muezaniso mukuru umweni unozwi Peter wakabvunza hanzvadzi imweni ino mwamuna usikatendi kuti: “Ndinobambiswa maningi ngekumuona muripano. Imwimwi munorumbwa meciunzisa ana enyu 6 ku misangano uye aona akatogadzirira kuti adaire pa misangano.” Hanzvadzi ii yakatanga kubvisa misodzi, iyona yakati: “Izvi ndizvona kamare zvandaida kuzwa nyamasi.”

14. Kuparidzira kungatibambisa kudini?

¹⁴ Kubambiswa nge kuparidzira. Patinoreketa ne anhu amweni nge zve Bhaibheri, tinozwa kupfara, kunyazi tikasama kutambirhwa zvakanaka. (Zvie. 11:25) Hanzvadzi imweni inozwi Stacy, yakaona kuti kuparidzira kunopa simba. Umwe we mhuri yake wakadzingwa uye zvakamurhwadza maningi. Iyena wakarumbwa ecidzibvunzisa kuti: ‘Ciripo candisikazi kuita kuti ndimubetsere here?’ Apana ciro cimweni caaikwanisa kurangarira. Cinyi cakabetsera Stacy kuti akwanisane ne mugariro uu unoshupha? Basa rokuparidzira! Paairumbwa eciita basa iri, iyena waibatikana pakubetsera anhu e mu ndima yake aida rubetso. Iyena unoti: “Panguwa iyona Djehovha wakandipa mufundi we Bhaibheri unobudirira. Izvi zvakandipfadza maningi. Ciro cinondipfadza mu upenyu, kuita basa rokuparidzira.””

15. Mafundei ne masoko a Mariya?

¹⁵ Hama dzimweni dzinorangarira kuti, nge ndaa ye migariro yawo inoshupha, aangakwanisi kuita zvakawanda mu basa rokupadzira. Munozwawo kudaro here? Hino edzurirai kuti Djehovha anopfara maningi pamunoita zvese zvamunokwanisa. Onaizve muezaniso wa Mariya. Paakacinja kuenda ku ungano inoreketa mureketero we kunza, iyena wakazwa hingana asikacakwanisi kuita zvakawanda. Iyena unoti: “Kenguwa yakareba ciro candaikwanisa kuita, kainga kuri kupasa mhinhuro isikazi kureba, kuerenga tsamba ye Bhaibheri, kana kupasa tratadho rimwe mu basa rekuparidzira.” Iyena waidziezanisa ne hama dzaikwanisa kureketa mureketero iwona uye iyena waizwa hingana  asikabetseri ciro. Asi iyena wakacinja mushobo wekurangarira. Iyena wakatanga kuona kuti Djehovha waikwanisa kumuseenzesa kunyazi asikazii zvakawanda nge zve mureketero iwona. Iyena unoti: “Cokwadi ce Bhaibheri cakanaka, cirinyore uye cinokwanisa kucinja upenyu we anhu.”

16. Kana musikakwanisi kubuda pa nyumba, cinyi cingamubetsera kuti muone simba?

¹⁶ Pamweni maida maningi kubuda mu basa rokuparidzira, asi amucakwanisi kubuda panyumba. Garai ne rugondo rokuti Djehovha anoona uye anozwisisa mugariro wenyu. Iyena ucapsvaka mukana wekuti muparidzire aya anomucengeta, maenfermero, kana kuti mamedhiko. Kupinda izvi, musaezanise zviya zvamunokwanisa kuita nyamasi ne zviya zvamakaita kare, ngekuti izvi zvicaita kuti muore mwoyo. Edzai kuona zvirikuizwa na Djehovha kuti amubetsere nyamasi uno. Kana mukaita izvi, mucaona simba rokushingirira dambudziko ripi haro musikaruzi mupfaro.

17. Marerano na Muparidzi 11:6, ngei tisikadikani kusiya kuita basa rokuparidzira?

¹⁷ Isusu tinopeta masimba kuti tisime mbeu ye cokwadi. Asi atizii kuti i mbeu ipi icamera yokura. (Erengai Muparidzi 11:6.) Onai muezaniso wa Barbara hanzvadzi ino makore 80, hanzvadzi ii inoparidzira yeciseenzesa thurufunu ne makarta. Mu tsamba dzese idzi, hanzvadzi iyona yakatora tsamba imwe okandandemo revhista yo Murindiri wa 1 ya Nyaonga ya 2014, yainga ino musoro unoti “Zvavakaitirwa naMwari.” Barbara wainga asikazvirangariri, asi tsamba yake yakatumirhwa kune kazado imweni yainga isiripizve Apupuri a Djehovha. Kazado ii yakaerenga revhista ii kakawanda. Mwamuna wakhona wakazwa hingana kuti Djehovha waireketa naye. Kazado ii yakatanga kupindazve misangano uye akagarazve Apupuri a Djehovha—mumasure memakore anodarika 27. Rangarirai mupfaro wakazwa Barbara ngekuona zvakaitika ne tsamba imwe basi yaakatuma!

18. Tinodikana kuitei kuti titambire simba ra Mwari?

¹⁸ Djehovha anotipasa mikana yakawanda kuti titambire simba rake. Iyena unoseenzesa minamato, Bhaibheri, hama dze ciKristu, uye basa rokuparidzira—kana tikadaro, tinonga tecipangidzira kuti Djehovha anoda kutibetsera. Rumbwai mecigonda na Baba edu e kudenga, uye garai no rugondo rekuti iyena ucapfara “kupangidza simba rake ecibetsera aya ano mwoyo wakaperera kaari.”—2Mak 16:9..