1. Cinyi cingadaro cakaitika pa zuwa renyu remakatanga kuparidzira?

MUCIRIRI kuedzurira zuwa remakatanga kugumira cokwadi here? Fundiso dze Bhaibheri dzemakafunda, dzainga dziri cokwadi! Imwimwi makaona kuti anhu ese aizodawo kufunda zviya zvamunotenda. Uye imwimwi mainga muno rugondo rokuti masoko e Bhaibheri, aizobetsera anhu kuti apfare uye agare ano ramangwana rakanaka. (Pis. 119:105) No cido ici, makasanangura kureketa cokwadi cemainga mafunda ku shamwari pamwepo ne anyaukama enyu. Asi cinyi cakazoitika? Makashamiswa ngekuti anhu ajinji aazi kupurutana zvemaireketa.

2-3. Anhu akawanda e mu nguwa ya Djesu aimuona kudini?

² Atidikani hedu kushamiswa patinoona anhu asikatenderi masoko atinoparidzira. Djesu wene wakarambwa nge anhu akawanda e mu nguwa yake uye onai kuti iyena wakaita zvishamiso kuti apangidze kuti waitsigirhwa na Mwari. Ngo muezaniso, Djesu wakamutsa Razaro—cishamiso cokuti kunyazi azondi ake ainga asikakwanisi kuciramba. Asi atungamiriri eciDjudha, akaramba kutendera kuti Djesu wainga ari Mesiya. Awona akaedza kuuraya Djesu pamwepo na Razaro!—Ju. 11:47, 48, 53; 12:9-11.

³ Djesu waiziya kuti anhu akawanda ainga asikazotenderi kuti iyena wainga ari Mesiya. (Ju. 5:39-44) Iyena wakabvunza afundi a Juau Mubhabhatidzi kuti: “Anopfara uya asikaoni ciro cingamukuhunyisa kandiri.” (Mt. 11:2, 3, 6) Asi ngei anhu akawanda akaramba Djesu?

4. Ticaonei mu fundo ino?

⁴ Mu fundo ino no inouya pano, ticaona zvikonzero zvakaita kuti anhu amweni e mu nguwa ya Djesu asatende maari.  Uyewo, ticaonawo kuti ngei anhu akawanda nyamasi uno ecikuhunyika, kana kuti eciramba masoko edu. Uye cinonyanya kukosha, ticada kufunda kuti ngei tecidikana kugara nokutenda kakabamba muna Djesu kuti tisakuhunyike.

5. Cinyi cakaita kuti anhu akawanda asagonde kuti Djesu ndiye Mesiya wainga akapikirhwa?

⁵ Anhu akawanda akakuhunyika nge ndaa yekakabva Djesu. Awona aiziya kuti Djesu wainga ari mufundisi unoshamisa uye kuti iyena waiita zvishamiso. Asi ku anhu aya, Djesu wainga ari basi mwana wa karpintero. Uye iyena wainga ari we ku Nazareta, thaundi rokuti anhu ajinji airiwona hingana risiripi ciro. Kunyazi Natanieri, wakazogara mufundi wa Djesu, wakazoguma pakuti: “Pano ciro cakanaka cingabuda ku Nazareta here?” (Ju. 1:46) Pamweni Natanieri wainga asikazi kupfarira thaundi rairarama Djesu. Pamweni iyena wairangarira uphorofita uri pana Mika 5:2, unoreketa ngezve kuti Mesiya waizobarirhwa ku Bheterehema, haiwa ku Nazareta.

6. Cinyi cingadai cakabetsera anhu e mu nguwa ya Djesu kuti amuone hingana Mesiya?

⁶ Matarhwa anoreketei? Muphorofita Isaya wainga akareketa kuti azondi a Djesu, ainga asikazoneseki “nge zve masoko e dzinza ra [Mesiya].” (Isa. 53:8) Masoko majinji e uphorofita uu, ainga atorekethwa. Kudai anhu akatora nguwa yekuti azviongorore, awona aizoziya kuti Djesu wainga abarirhwa ku Bheterehema uye kuti wainga ari mubarirhwana wa Mambo Dhavhidhi. (Ru. 2:4-7) Mbuto yakabarirhwa Djesu, yainga iri iyona kamare yakaphorofithwa mu bhuku ra Mika 5:2. Hino cinyi caishupha? Awona akagogomeka kurangarira zvisirizvopi. Awona ainga asikazii zviro zvese zvaibatanidzwepo. Ndiyo ndaa akapedzesera akuhunyika.

7. Ngei anhu ajinji eciramba anhu a Djehovha mazuwa ano?

⁷ Dambudziko iri, riri kuitikawo here mazuwa ano? Honde. Aseenzi a Djehovha akawanda, anhu asina zviro zvakawanda. Ndiyo ndaa awona anoonekwa hingana anhu “asikazi kufunda uye ari anhuwo hawo.” (Zvi. 4:13) Anhu amweni anorangarira kuti anhu a Djehovha aadikani kufundisa Bhaibheri anhu amweni ngekuti awona aana ma dhiproma. Amweni anotiwo Apupuri a Djehovha i “gereja re ku América,” asi cokwadi ngecekuti, pa Apupuri a Djehovha anomwe, umwe basi ndiye unogara ku Estados Unidos ye América. Uye amweni akazwawo anhu ecireketa kuti Apupuri a Djehovha aatendi muna Djesu. Ke makore akawanda, anhu a Djehovha anodainzwa kuti “ciKomunista”, “asori e ku América” uye “apanduki.” Anhu anoteya nzee masoko awona uye asikazii cokwadi cakaringana na isusu, anopedzesera akuhunyika kana kuti, aramba anhu a Djehovha.

8. Maererano na Zviito 17:11, anhu anodikana kuitei kuti aziye kuti ndiyani aseenzi a Mwari mazuwa ano?

⁸ Tinodikana kuitei kuti tisapauswe? Anhu anodikana kuongorora masoko. Ndizvona zvakaizwawo ngo mutari we Evhangeri ra Ruka. Iyena wainga akashinga kukwarakwatisa “zviro zvese kubvira pezvakatangira.” Iyena waida kuti aerengi ake “anyase kugara no cokwadi pa zviro zvese” zvaainga anazvo zvakaringana na Djesu. (Ru. 1:1-4) ADjudha e ku thaundi re ku Bereia ainga akaitawo hingana Ruka. Paakazwa masoko akanaka akaringana ngezva Djesu, awona akakwarakwatisa mu Matarhwa eciHebheru kuti aziye kuti cainga ciri cokwadi here. (Erengai Zviito 17:11.) Zvimwezvimwezvoo, anhu anodikanawo kuongorora masoko. Awona anodikana kuezanisa zvinofundiswa nge anhu a Mwari, no zvinoreketa  Matarhwa. Awona anodikanawo kufunda ngano dze anhu a Djehovha e mazuwa ano. “Kana akaongorora” zvakaitika ku anhu a Djehovha, kuzondwa uye zvinorekethwa ne anhu, zviro izvi azvizomboapausi.

9. Cinyi cakaitika Djesu paakaramba kupangidza cioneso ce kudenga?

⁹ Zvaifundisa Djesu zvaishamisa. Asi ku anhu amweni e mu nguwa yake, izvona zvainga zvisikakwani. Awona aidazve kupinda apona. Awona akakumbira kuti Djesu apangidze kuti wainga ari Mesiya, ngekupangidza “cioneso ce kudeka.” (Mt. 16:1) Pamweni awona akaita cikumbiro ici ngokuti awona ainga asikanyasi kuziya masoko ari pana Dhanyeri 7:13, 14. Asi, yainga isati yaguma nguwa yakasisira yekuti Djehovha adzadzise uphorofita iwona. Zvaifundiswa na Djesu, zvingadai zvakakwana kuti awona aone kuti iyena wainga ari Mesiya. Asi Djesu paakaramba kupangidza cioneso cekudenga caidiwa maningi nge anhu aya, awona akakuhunyika.—Mt. 16:4.

10. Djesu wakadzadzisa kudini masoko akatarhwa ndi Isaya akaringana nge zva Mesiya?

¹⁰ Matarhwa anoreketei? Muphorofita Isaya, wakatara nge zva Mesiya kuti: “Aazokhui kana kupurumutsa izwi, uye aazoiti kuti izwi rake rizwike mu makwanza.” (Isa. 42:1, 2) Djesu waiita basa rake rekuparidzira asikadzionesi. Iyena aazi kugadzira ma tempro makuru, aazi kupfeka macira ecitendero anokosha uye aazi kukumbira kuti anhu amudaidze nge mazina e kureremedza anodaidzwa anhu mu magereja. Kunyazi pa nguwa yekuti upenyu wake wainga uri mu nyara dza Mambo Herodhi, Djesu aazi kuita cishamiso cekushamisira. (Ru. 23:8-11) Icokwadi kuti Djesu wakaita zvishamiso, asi cainyanya kukosha kuna Djesu cainga ciri cekuparidzira masoko akanaka. Iyena wakati ku afundi ake: “Ngekuti izvi ndizvona zvandakuira”.—Mk. 1:38.

11. Marangariro api akashata ano anhu amweni mazuwa ano?

¹¹ Dambudziko iri, riri kuitikawo here mazuwa ano?  Honde. Anamati akawanda, anopfadzwa maningi nge kuwona zviwako zvikuru zvemagereja zvakawakwa ngo zviro zvinodhura, atungamiriri e magereja ano mazina anooneka hingana anokosha uye mabiko asikaziikanwi kaakabva. Asi awona anofundei nge zva Djehovha pamwepo ne cinangwa cake nge zviro zvese izvi? Aya anopinda misangano pamwepo nesu, anofunda zviro zvinoda Djehovha kuti tiite. Nyumba dzedu dze Umambo, i mbuto dzakacena uye dziri pakati no pakati. Aya anotungamirira aapfeki macira akasiyana uye haana mazina ekureremedzwa ndiwona. Zviro zvatinofundisa no zvatinotenda, zvinobva mu Soko ra Mwari. Kunyazi zvakadaro, anhu ajinji nyamasi uno arikukuhunyika uye anorangarira kuti mushobo watinonamata nawo Mwari, ngewe nyore maningi uye ngokuti zviro zvatinofundisa, andizvopidi kamare zvaanoda kuzwa.

12. Maererano na Ahebheru 11:1, 6, kutenda kedu kunodikana kuwakirhwa papi?

¹² Tinodikana kuitei kuti tisapauswe? Muphostori Pauro wakabvunza aKristu e kuRoma kuti: “Kutenda kunouya kana munhu azwa soko. Uyewo, soko rakhona rinouya panoparidzwa nge zva Kristu.” (Aro. 10:17) Mabiko e magereja asikabvi mu Bhaibheri, kunyazi akarungama kana ecishamisira, aangabambisi kutenda kedu. Cinotibetsera kuti tisakurire kutenda, kufunda Soko ra Mwari. “Pasina kutenda azvibviri kupfadza Mwari.” Ndiyo ndaa, tinodikana kusakurira kutenda kakabamba kunobva mu ruziwo recokwadi (Erengai Ahebheru 11:1, 6.) Hino, kuti tigonde kuti takagumira cokwadi, apadikani kugara no cioneso cinoshamisa co kudenga. Kunyasa kuongorora zvinofundiswa ne Bhaibheri, zvinobambisa kutenda kedu uye zvinokwana kuti isusu tinyase kuziya zviro zvatainga tisikazii.

13. Ngei anhu ajinji akaramba Djesu?

¹³ Mu mazuwa a Djesu, afundi a Juau Mubhabhatidzi akashamisika ngekuti afundi a Djesu ainga asina tsika ye kutsanya. Djesu wakapanganidza kuti awona ainga asikadikani  kuita izvi iyena aciri mupenyu. (Mt. 9:14-17) Kunyazi zvakadaro, Djesu wairambwa nge Afarisi uye no azondi amweni nge ndaa yekusama kuita tsika dzawo. Anhu aya akashatirhwa maningi Djesu paakaporesa arhwari anganani mu Sabudu. (Mk. 3:1-6; Ju. 9:16) Kana tikada kuona, awona aidada ngokucengeta Sabudu, asi nge dii rimweni, ainga asikaoni pezvakashatira kuita bhizi mu tempro. Awona akashatirhwa maningi Djesu paakasumurura nge ndaa yazvo. (Mt. 21:12, 13, 15) Uye anhu akazwa Djesu eciparidzira mu sinagogi re ku Nazareta, akashatirhwa Djesu paakaseenzesa muezaniso we ngano ye aIsraeri kuti apangidze ushaishi wawo uye kusama kawo kutenda. (Ru. 4:16, 25-30) Muitiro usikazi kudjairika wa Djesu, wakaita kuti anhu ajinji akuhunyike.—Mt. 11:16-19.

14. Ngei Djesu wakashora tsika dze anhu dzainga dzisikapindirani no Matarhwa?

¹⁴ Matarhwa anoreketei? Eciseenzesa muphorofita Isaya, Djehovha akati: “Anhu aya anouya kandiri ne miromo yawo, uye anondikudza ne miromo yawo, asi mwoyo yawo iri kure na inini; uye kunditya kawo kunobva pa mitemo yaakafundiswa nge anhu.” (Isa. 29:13) Djesu wainga ari mugwanza paakashora tsika dze anhu dzainga dzisikapindirani no Soko ra Mwari. Anhu aiwona mitemo ne magariro e anhu hingana anokosha kudarika Matarhwa. Zvezvirokwazvo aitoramba Djehovha uye uya waakatuma hingana Mesiya.

15. Ngei anhu ajinji nyamasi asikapfariri Apupuri a Djehovha?

¹⁵ Dambudziko iri, riri kuitikawo here mazuwa ano? Honde. Anhu ajinji anoshatirhwa ngekuti Apupuri a Djehovha aapindiri mu mabiko ne tsika dzisikapindirani ne Bhaibheri, dzakaita hingana mazuwa e kubarhwa no makhisimisi. Amweni anoshatirhwa Apupuri a Djehovha paasikapembereri mabiko ekutsigira nyika uye kana asikateedzeri tsika dzemariro dzinopesana no zvinofundiswa ne Bhaibheri. Anhu aya anonyasa kutenda kuti ari kunamata Mwari ne mushobo waanoda. Asi munhu unopfarira kuteedzera tsika dze nyika, pane kuteedzera fundiso dzakadjeka dze Bhaibheri, unonga asikapfadzi Djehovha.—Mk. 7:7-9.

16. Maererano na Pisarema 119:97, 113, 163-165, tinodikana kuitei uye tinodikana kurambei?

¹⁶ Tinodikana kuitei kuti tisapauswe? Tinodikana kusakurira rudo rakakura ku mitemo ne mazano a Djehovha. (Erengai Pisarema 119:97, 113, 163-165.) Kana tecida Djehovha, ticaramba tsika ipi hayo yaanozonda. Uyewo, atizosii kuti ciro cipi haco cigare pa mbuto yekutanga kudarika rudo redu kuna Djehovha.

17. Anhu e mu nguwa ya Djesu aiimira kuti Mesiya aitei?

¹⁷ Anhu amweni e mu nguwa yake aida maningi kuti Djesu aite cinjo mune zvematongerhwo e nyika. Awona aidzvinyirirhwa nge utongi we ku Roma uye aida kuti Mesiya aapukunyuse. Asi paakaedza kuita kuti Djesu agare mambo, iyena wakaramba. (Ju. 6:14, 15) Hino amweni—kubatanidza apristi, akatambira simba kubva ku aRoma, ndiyo ndaa aityira kuti Djesu waizopurumutsa utongi unopesana no we Roma. Kunetseka ke zvematongerhwo e nyika uku, kakaita kuti aDjudha akawanda apauswe.

18. Uphorofiti upi wakaringana nge zva Mesiya wakarambwa nge anhu ajinji?

¹⁸ Matarhwa anoreketei? Uphorofiti wakawanda wakaringana nge zva Mesiya, waireketa kuti iyena waizogara Musurudado anokunda. Asi umweni waipangidza kuti waidikana kutanga afira zvishaishi zvedu. (Isa. 53:9, 12) Hino, ngei aDjudha ainga ano murangariro usikazi kunaka nge zva Mesiya? Ngekuti ajinji  awo aida kuti mhinduro ikasike kuuya yakaringana no kupedza matambudziko awo. Ndiyo ndaa, awona airamba uphorofiti upi hawo wainga usikapikiri izvona—Ju. 6:26, 27.

19. Mirangariro ipi yakashata inoita kuti anhu ajinji nyamasi uno akuhunyike?

¹⁹ Dambudziko iri, riri kuitikawo here mazuwa ano? Honde. Anhu ajinji nyamasi anokuhunyika ngokuti isusu atipindiri mune zvematongerhwo e nyika. Awona anorangarira kuti isusu taidikana kusanangura mudongeri umwe pa sananguro. Asi isusu tinoziya kuti kusanangura munhu kuti agare mambo wedu, tinonga teciramba Djehovha. (1Sa. 8:4-7) Pamweni anhu angarangarira kuti isusu taidikana kuwaka zvikora, zvipitari uye kuita mabasa amweni e rupo. Awona anokuhunyika paanotiwona kuti isusu tinopeta masimba edu pa basa rekuparidzira haiwa pakupedza matambudziko e nyika ino.

20. Maererano ne masoko a Djesu ari pana Mateu 7:21-23, cinyi catinodikana kukanda pa mbuto yekutanga katiri?

²⁰ Tinodikana kuitei kuti tisapauswe? (Erengai Mateu 7:21-23.) Cinonyanya kukosha katiri, kuita basa retakapaswa na Djesu. (Mt. 28:19, 20) Atidikani kukangaidzwa nge zve matongerhwo e nyika ino. Isusu tinoda anhu uye tinonesekawo no matambudziko aarikusongana nawo. Asi tinoziya kuti mushobo wakanaka wekubetsera anyacigarisano edu, nge wekuafundisa zvakaringana no Umambo wa Mwari uye kuabetsera kuti agare shamwari ya Djehovha.

21. Tinodikana kushinga kuitei?

²¹ Mu fundo ino, tawona zviro zvirongomuna zvinoita kuti anhu amweni akuhunyike, arambe Djesu uye zviro zvirikuitawo kuti anhu amweni arambe ateeri a Djesu mazuwa ano. Asi tinodikana kudjenga pa zviro izvona basi here? Haiwa. Mu fundo inoteera, ticada kuonawo zviro zvirongomuna zvinoita kuti anhu akuhunyike. Shingai kuti musakuhunyike uye rumbwai munokutenda kakabamba!