Ciitiko ici cinothyisa, cakacinja upenyu wangu ngekuti ndipona pendakatanga kupsvaka Musiki. Asi ndisati ndareketa zvakaitika usikuwo, ndicambotanga ngekureketa maeshiperiensiya akapingaidza marangariro angu uye akagadzirira mwoyo wangu kuti ndipsvake Mwari.

Ndakabarhwa mu gore ra 1937 ku Guesnain, thaundi rino gordhi riri kakutsi ke França. Baba angu ainga ari muceri we mapuwe e marasha, uye awona akandifundisa kuti zvinokosha kuseenza no simba. Baba angu angandifundisawo kuzonda zviro zvisina unatsi. Awona akaona kuti aceri amweni e mapue e marasha, ainga asikabatwi zvakanaka uye aiseenza mu mbuto dzine ngozi uye awona aida kuabetsera. Kuti aedze kugadzirisa ndaa ii, baba angu akabatana no sangano rimweni rairhwira zvitenderhwa zve aceri e mapuwe e marasha. Awona ainga akashatirhwawo nge kunyepera kaaiona keciizwa nge mapadre. Anhu ajinji ainga ano upenyu wakanaka, kunyazi zvakadaro awona aikumbirazve aceri e mapuwe e marasha kuti aapase mare uye zvokurhya. Baba angu akanyenyeswa maningi nge zve unhu e mapadre zvekuti  apana caakambondifundisa nge zve citendero. Kureketa zvazviri, atizi kumboreketa nge zva Mwari.

Pandakakura, ndakatangawo kuzonda zviro zvisina unatsi. Kusama unatsi uku, kunobatanidza rusananguro raiipangidzwa ne anhu amweni ainga asikadi kuona anhu e mu nyika dzimweni anogara ku França. Ndaicaya bhora ne ana aibva ku nyika dzimweni, uye ndaidakadzwa nge kutamba nawo. Kusiya izvona, mai angu ainga asiripi mu francês, asi mu Polonês. Inini ndaida maningi kuti anhu e madzinza akasiyana-siyana agare pamwepo ari murunyararo uye abatwe zvakaezana.

Ndakapikwa kuti ndiende ku basa re hondo muna 1957. Ndiwona magumire andakaita ku makomo e ku Argélia mu usiko uya wandamboreketa pakutanga. Mu masure mekukhuwa kuti “Mwari! Oh, Mwari!” Ndakaringisana haiwa no musurudado muzondi, asi no dhongi re mushango! Ndakazwa kurerukirhwa! Ciitiko ici—uye hondo—zvakandiita kuti ndinyase kurangarira nge zve cinangwa ce upenyu. Tiri pano ngei? Mwari anotirangarirawo here? Ticazombogarawo no runyararo risikaperi here?

No kuhamba ke nguwa, pandakamboenda kumba kovhakacira abereki angu, ndakaziyana no umwe we Apupuri a Djehovha. Iyena wakandipasa kopiya ye La Sainte Biblia, uma tradução Católica Francesa ye Bhaibheri, uye ndakatanga kurierenga pandakahwirira ku Argélia. Tsamba imweni yakandishamisa maningi nge ya Zvakapangidzwa 21:3, 4. Inoti: “Tenda ra Mwari riri pakati pe anhu. Acapukuta misodzi yese pamaziso awo, uye apazoonekizve rufu, kana kucema kana kuridza mhere kana kurhwadziwa.” * Masoko aya akandishamisa. Ndakadzibvunzisa kuti ‘Masoko aya ainga ari e cokwadi here?’. Pa nguwa iyona, ndainga ndisikazii ciro zvakaringana na Mwari uye Bhaibheri.

Pandakapedza basa rangu re hondo muna 1959, ndakasongana no Mupupuri wa Djehovha unozwi François, uye iyena wakandifundisa zvakawanda nge zve Bhaibheri. Ngo muezaniso, iyena wakandifundisa kuti Mwari ano zina rake pacake, Djehovha. (Pis. 83:18) François wakandifundisawo kuti Djehovha acaunzisa unatsi mu nyika, acaita kuti nyika igare paradhizo uye acadzadzisa masoko ari pana Zvakapangidzwa 21:3, 4.

Zvaaindifundisa zvainga zvino musoro, uye zvakabaya mwoyo wangu. Asi ndakashatirhwawo nge ndaa ye ma padhre uye ndaida kuakeshari nge kufundisa zviro zvisiripi mu Bhaibheri! Asi ndainga ndecirangarira hingana baba angu uye ndaida kurhwira kutama unatsi. Ndainga ndisikadi kuemera!

François uye shamwari dzangu dzipsva, dzakandibetsera kuti nditerame. Awona akandipanganidzira kuti, hingana aKristu, atidikani kutonga anhu amweni, asi tinodikana kuapasa kariro teciseenzesa masoko akanaka e Umambo wa Mwari. Ndirona basa rakaizwa na Djesu uye raakapasa ateeri ake kuti aite. (Mt. 24:14; Ru. 4:43) Ndaidikanawo kufundira kureketa no anhu zvakanaka uye no ungwaru, pasinei no zvaanotenda. Bhaibheri rinoti: “Museenzi wa Tenzi aadikani kurhwa, asi unodikana kugara mupfawi ku anhu ese.”—2Ti. 2:24.

 Ndakaita cinjo dzaidikanwa ndobhabhatidzwa hingana umwe we Apupuri a Djehovha muna 1959 pa gungano re nharaunda. Ndikona kandakasongana ne hanzvadzi imweni inozwi Angèle, uye ndakamupfarira. Ndakatanga kuvhakacira ungano yaaipinda uye takacata muna 1960. Zvezvirokwazvo, iyena mukadzi wakanaka uye cipo cinokossha candakapaswa na Djehovha.—Zvie. 19:14.

Mu makore adarika, ndakafundira zvakawanda zvinokosha kubva ku hama dzakangwara uye dzagara ne basa. Ciro cimweni cendakafundira nge cekuti: Tingabudirira mu basa ripi haro rinoshupha kana tikagara anhu anodzidodosa uye kana tikaseenzesa uzii watinogumira pana Zvierengo 15:22, inoti: “Kana anhu anopasa mazano akawanda zviro zvinobudirira.”

Muna 1964, inini ndaidikana kuseenzesa zano iri. Ndainga ndatanga kuseenza hingana muonereri we nharaunda uye basa rangu rainga rekuvhakacira ungano kuti ndibambise hama ne hanzvadzi uye kuabetsera kuti akwedere dhuze na Djehovha. Pa nguwa iyona, ndainga ndino makore 27 uye ndainga ndisina exiperiensiya. Hino ndakashaisha. Asi ndakaedza kufundira no zvishaishi zvandakaita. Kupinda zvese izvi, ndakafundira zviro zvakawanda zvinokosha kubva kune anhu “agara ne basa.”

Ndiri kuedzurira ciro cimweni cakaitika pendainga ndecitangisa kuita basa re muonereri we nharaunda. Mu masure mekuvhakacira ungano imweni ku Paris, hama imweni yagara ne basa, yakandibvunzisa kuti zvaiita here kureketa na inini. Inini ndakati: “Zvinoita”.

Iyona yakabvunzisa kuti, “Louis, medhiko paanoenda kovhakacira munhu kumba kake, unonga ecienda koona ani?”

Ndakadaira kuti, iyena unonga ecienda koovhakacira anhu “anorhwara”.

Iyona yakati: “Ndizvona kamare. Asi ndinosiwona kuti unotora nguwa yakawanda no anhu ano uthongo wakanaka ku mwiya, hingana akuru e ungano. Mu ungano medu mune hama no hanzvadzi dzakawanda dzakaora mwoyo, apsva, kana kuti anopsveruka. Izvi zvaizoabambisa maningi kana ukatora nguwa kuti ucedze nawo uye kana ukaenda kumba kawo kuti urhye nawo.”

Ndakatenda maningi zano iri rakanaka re hama ii. Kuda kaiita mabira a Djehovha kakabaya mwoyo wangu. Hino ndakasiya kudzikudza kandaiita  uye ndakatanga kuseenzesa zano raakandipasa. Ndinotenda Djehovha nge hama dzakadai.

Muna 1969 uye 1973, ndakagadzwa kuti ndionerere Dhepartamento re Basa rezveKurhya pa magungano e nyika mairi ku Colombes, Paris. pa gungano ra 1973, anhu anokwana kuita 60,000 aidikana kupaswa zvekurhya ke mazuwa mashanu! Ndainga ndisikazii kuti taizozviita kudini. Kecipirizve, khii yekubudirira yainga Zvierengo 15:22—bvunzisa ano ungwaru. Ndakakumbira hama dzainga dzino uzii kuti dzindibetsere. Awona aibatanidza atengesi, arimi e muriyo, abiki uye atengi. Takabatana tese uye takakwanisa kuita basa iri rinoshupha.

Muna 1973, inini ne mukadzi wangu takapikwa kuti tiende kooseenzsera ku Bheteri re França. Basa randaiita rainga recindishuphirawo. Ndaiendesera mabhuku hama dzedu ku nyika dze ku África ku Camarões, kakarambidzwa basa redu muna 1970 uye 1993. Ndainga ndisikazii kuti ndaizozvikwanisa here. Pamweni muonereri we firiyari ku França wakakwanisa kuona mazwire andaiita. Kuti andibambise, iyena wakati: “Hama dzedu ku Camarões dzinoda maningi zvekurhya zvekunamata. Tinodikana kuwariritira!” Uye ndizvona zvetakaita.

Ndakaita rhwendo rakawanda ku nyika dzinogurirana ne Camarões kuti ndionane ne akuru e nyika idzona. Anarume ano ushingi uye ungwaru akandibetsera kuti dikwanise kuita urongwa we kupasa zvekurhya zve kumwiya zvaidikanwa ku Camarões. Djehovha akakomborera kupeta masimba ketakaita. Zvezvirokwazvo, pa makore 20 anhu a Djehovha mu nyika iyona aazi kumboshoterhwa nge Murindiri uye kunyazi revhista yaizwi Nosso Serviço do Reino.

Kubvira petakatanga kuhambidzana, ndakawona kuti Angèle wainga ano ukama we pa dhuze na Djehovha. Unhu iwona wakatonyanya kutooneka petakacata. Zvezvirokwazvo, mu usiku we zuwa  retakacatero kamare, iyena wakandikumbira kuti tiite munamato wakaringana no cido cedu cekuda kuseenzera Djehovha ne mwoyo wese. Djehovha akadaira munamato iwona.

Angèle wakandibetserawo kuti ndinyase kugonda na Djehovha. Ngo muezaniso: Mu gore ra 1973 takapikwa kuti tiseenzere pa Bheteri, ndakambozeza ngekuti daida basa remuonereri we nharaunda. Asi Angèle wakandiedzurira kuti takapira upenyu wedu kuna Djehovha. Atidikani here kuita zvese zvatinokumbirhwa no sangano rake kuti tiite? (Ahe. 13:17) Ndakatenderana naye! Hino takaenda ku Bheteri. Mu upenyu wedu wakareba tiri tese, ungwaru, ndagariro dzakanaka uye maonero akanaka pakunamata e mukadzi wangu zvakabambisa mucato wedu uye kakatibetsera pakuita zvisananguro zvakanaka.

Mu makore edu e kukura, Angèle anorumbwa ari mukadzi wakanaka, anobetsera. Ngo muezaniso, kuti tikwanise kupinda zvikora zve sangano, kajinji aiizwa no cingezi, ini na Angèle takatanga kuseenza no simba kuti titunhudzire uzii wedu pa mureketero uu. Izvi zvaibatanidza kupinda mu ungano inoreketa ciNgezi, kunyazi hazvo isusu tainga tiri pakati pe makore 70 pa nguwa yakhoneyo. Nge ndaa ye ubaba wandaindga ndinawo hinga umwe we Dare re Firiari re ku França, zvaishupha kufundira mureketero umweni. Asi inini na Angèle taibetserana. Zvino taane makore 80, tiri kurumbwa tecigadzirira misongano ye ungano yedu mu mureketero we ciNgezi no ciFranseji. Tinoedzawo kuita zvatinokwanisa ku misangano uye mu basa re kuparidzira no ungano yedu. Djehovha akakomborera kupeta kedu masimba kuti tifundire mureketero we ciNgezi.

Cikomborero cimweni cakakura cakauya mu gore ra 2017. Inini na Angèle takakwanisa kupinda cikora ce nhengo dze Dare re Firiari no akadzi awo, cakaitirhwa ku Centro Educacional da Torre de Vigia ku Patterson, Nova York.

Zvezvirokwazvo Djehovha Mufundisi Mukuru kamare. (Isa. 30:20) Hino azvishamisi kuti anhu ake—akuru no adoko—atambire fundo yakanakisisa kudarika amweni ese! (Dhe. 4:5-8) Zvirokwazvo, inini ndakaona kuti madjaha anopurutana Djehovha ne hama no hanzvadzi dzino uzii anohambira mberi pakunamata uye anogara anhu akuru anobudirira. Zvierengo 9:9, inotiedzurira kuti: “Pasai uzii munhu wakangwara, uye iyena ucatunhudzira kungwara. Fundisai munhu une unatsi, uye iyena ucatunhudzira kufunda.”

Nguwa dzimweni, ndinorangarira nge zve usiku uya wakasvipa, unotyisa mu matunhu e ku Argélia makore 60 adarika. Pa nguwa yakhoneyo ndainga ndisikazii kuti zviro zvipi zvakanaka zvaizouya mberi kangu. Ndakafunda zviro zvakawanda kubva ku anhu amweni! Zvezvirokwazvo Djehovha akandipasa, Angèle, upenyu wakapfuma uye unopfadza. Hino isusu takashinga kusamboima kufunda kubva kuna Baba edu e kudenga uye uzii no maexperiensiya e hama no hanzvadzi dzinoda Djehovha.