1. Djesu wakasiya muezaniso upi ku ateeri ake, uye awona akauseenzesa kudini? (Onai foto ye pa kapa.)

PA NGUWA yake yese yaakapedza mu basa rake re kuparidzira pasi pano, Djesu wakarumbwa ano maonero akanaka, uye aidawo kuti ateeri ake agarewo no maonero akadaro. (Ju. 4:35, 36) Paainga ari pamwepo na Djesu, afundi ake aipeta masimba kuti aparidzire. (Ru. 10:1, 5-11, 17) Asi mu masure mekuti Djesu afa, uye pa nguwa yekuti ainga asati amutswa, afundi ake akagara asina simba ke nguwa doko pa basa rekuparidzira. (Ju. 16:32) Mu masure mekuti Djesu amutswa, ayena akaakohomedzesa kuti akande nzero dzawo pa basa rekuparidzira. Ndiyo ndaa, mu masure mekuti Djesu ahwirira kudenga, afundi ake akatanga kupeta masimba ari ese pa kuparidzira, zvekuti azondi awo akatanga kureketa eciti: “Onai! Madzadza Djerusarema rese no kufundisa kenyu.”—Zvi. 5:28.

2. Djehovha akakomborera kudini basa rekuparidzira?

² Djesu wakatungamirira basa rekuparidzira rakaizwa nge aKristu e kutanga, uye Djehovha akaakomborera zvekuti anhu akawanda akatenda masoko aiparidzirhwa nge aKristu aya. Ngo muezaniso, pa Pentekosti ye gore ra 33 K.A., anhu anokwana kuita 3 000 akabhabhatidzwa. (Zvi. 2:41) Uye numero ye afundi yakarumbwa yecitunhudzirika. (Zvi. 6:7) Asi, Djesu wakareketa kuti basa rekuparidzira raizobudirira maningi mu nguwa ye kuguma—Ju. 14:12; Zvi. 1:8.

3-4. Ngei anhu amweni eciona hinga kuti basa rekuparidzira rinoshupha maningi, uye ticaonei mu fundo ino?

³ Tese hedu, tinodikana kugara no maonero akanaka pa basa redu rekuparidzira. Mu mbuto dzimweni, azvishuphi kuita izvona. Ngei? Nge ndaa yekuti anhu akawanda ano cido ce kufunda Bhaibheri, awona anotoetsera kuti umwe we Mupupuri wa Djehovha agare akasudzunuka kuitira kuti afunde Bhaibheri! Asi mu mbuto dzimweni dze nyika, aparidzi amweni anoona hingana kuti basa rekuparidzira  rinoshupha maningi; zvinoshupha kuti awona agumire anhu mu nyumba dzawo, uye kana akaagumira awona aana cido cekuda kufunda Bhaibheri.

⁴ Asi kana imwimwi mecigara ku mbuto dzekuti kuparidzira kunoshupha, maonero ari mu fundo ino, angakwanisa kumubetserai. Ngationei kuti ngazvipi zviri kuizwa no hama dzimweni, kuti aparidzire anhu akawanda. Uyewo ticaonawo kuti tingagara kudini no maonero akanaka mu basa redu rekuparidzira, kunyazi kana anhu ecizwa masoko atinoparidzira kana kuti haiwa.

5. Zvinetso zvipi zvinosongana no Apupuri a Djehovha akawanda?

⁵ Ku Apupuri a Djehovha akawanda, zvaakushupha maningi kuti agumire anhu mu nyumba dzawo uye kuti acedze nawo. Aparidzi amweni anorarama mu mbuto dzekuti muno nyumba dzakawanda dze kuarogari dzinomusiwo yakawanda kana kuti mumapredhiyo akanyasa kucengeteka. Pamweni murindi ungakwanisa kurambidza munhu upi hake kuti apinde mu nyumba iyona kana asikazi kupikwa ne munhu anogara pa nyumba iyona. Asi ku aparidzi amweni anokwanisa kuparidzira akasudzunuka pa nyumba no nyumba, asi aagumiri anhu mu nyumba idzona. Uyezve ku aparidzi amweni anoparidzira ku mitanha kana kuti ku mbuto isikagari anhu akawanda. Awona anohamba mukuwo wakareba kuti akwanise kuparidzira munhu umwe basi—uye angakwanisa kutama kumugumira pa nyumba pake! Kana imwimwi mecisongana no matambudziko akaita hingana aya, musaore mwoyo. Zvinyi zvingakwanisa kumubetserai kuti mubudirire mu basa renyu rekuparidzira?

6. Aparidzi uye no aedzi e howe akaezana papi?

⁶ Djesu akaezanisa basa rekuparidzira uye no basa re muedzi we howe. (Mk. 1:17) Aedzi e howe amweni angakwanisa kupedza mazuwa akawanda asikabati howe imwe hayo. Asi Awona aasii; asi anoedza kucinja-cinja. Awona anocinja mbuto, nguwa, uye mushobo we kubata ndiwona howe. Isusuwo tingakwanisa kuitawo cinjo dzimwedzo mu basa redu re kuparidzira. Onai maonero manganani angakwanisa kutibetsera.

7. Cinyi cingakwanisa kuitika kana tikaparidzira nguwa dzakasiyana-siyana?

⁷ Edzai kuparidzira mu nguwa dzakasiyana-siyana. Ticakwanisa kucedza no anhu akawanda kana tikaparidza mu nguwa dzakasiyana-siyana. Kana tikada kuona, pano nguwa yekuti munhu wese anonga ari pa nyumba! Aparidzi akawanda, anokwanisa kugumira anhu akawanda mu nyumba dzawo, kana akaparidzira co madekoni kana kuti ce usiku. Kupinda izvi, pa nguwa idzi anhu akawanda anonga akagarisika uye ano cido ce kuda kucedza. Pamweni mungapfarira maonero e mukuru umweni unozwi Dhavhidhi. Iyena unoreketa kuti mu masure me kuparidzira ke nguwa yakareba mu ndima, iyena no mudoni wake anohwirira ku nyumba dziya dzaakagumira dzisina anhu. Iyena unoreketa eciti: “Zvinoshamisa patinogumira samuzi mu nyumba dziya dzatinonga tisikazi kuparidzira, patinohwirirepo kecipiri.” *

8. Tingaseenzesa kudini zvinorekethwa na Muparidzi 11:6 mu basa redu rekuparidzira?

⁸ Atidikani kuremba. Ndizvona zvatinokohomedzeswa no tsamba yakanyokorerhwa fundo ino. (Erengai Muparidzi 11:6.) Dhavhidhi, wamborekethwa nge zvake aazi kuremba. Mumasure mekuhwirira kakawanda asikagumiri munhu, pakupedzesera akagumira samuzi ari pa nyumba pake. Mwanarumewo wainga ano cido cekucedza nge zve Bhaibheri, iyena wakati: “Ndaano makore anokwana kuita 8 ndiri pano, asi ndainga ndisati ndambovhakacirhwa ne umwe we Mupupuri wa Djevovha.” Dhavhidhi unopanganidza eciti: “Ndakaziya kuti pakupedzesera kana mukagumira samuzi ari pa nyumba, zvezvirokwazvo unonga uno cido cekuda kuzwa masoko atinoparidzira.”

9. Zvinyi zvinoizwa no aparidzia amweni pawanoona kuti zviri kushupha kugumira anhu?

 ⁹ Edzai mu mbuto dzimweni. Pawanoona kuti zviri kushupha kugumira anhu mu nyumba dzawo, aparidzi amweni anoedza kuparidzira mu mbuto dzakasiyana-siyana. Ngo muezaniso, zvinosowabetsera maningi kuparidzira mu makwanza uye kuseenzesa zvingoro zve kuparidzira ndizvoona. Nge mushobo uu, Apupuri a Djehovha anokwanisa kucedza akanangirana no anhu anogara mu nyumba dzakakura zvekuti nge mushobo umweni ainga asikazokwanisi kuaparidzira. Uyezve, aparidzi akawanda akaona kuti anhu akawanda anonga ano cido cekureketa uye cekutambira mabhuku edu, paanonga ari mu maparki, mu mabazari uye mu mbuto dzinoizwa zvekutengeserana. Floiran, muonereri we nharaunda we ku Bolívia, unoti: “Tinosoenda mu mabazari uye mu mbuto dzinoizwa zvekutengeserana, pa nguwa 1 kana kuti 3 dze madekoni. Pa nguwa idzi atengesi akawanda anonga asikazi kunyasa kubatikana. Tinosocedza no anhu akawanda anopfarira uye tinosokwanisa kutanga fundo dze Bhaibheri.”

10. Mungakwanisa kuseenzesa mushobo upi kuti muparidzire anhu akawanda?

¹⁰ Edzai mushobo umweni wakasiyana. Pamweni imwimwi maedza mishobo iri yese kuti muparidzire munhu umwe basi, asi zvisikabudiriri. Maenda pa nyumba pake mu nguwa dzakasiyana-siyana, asi amuzi kumugumira. Pane mushobo umweni we kumuparidzira here? Hanzvadzi imweni inozwi Katarína, inoti: “Inini ndinosotara matsamba ku anhu andinonga ndisati ndagumira mu nyumba dzawo, ndinosotara zviya zvandaida kureketa, kudai ndaagumira mu nyumba dzawo.” Ngazvipi zvatingafunda pa muezaniso uu? Pamunonga muri mu basa re kuparidzira,  edzai kuparidzira anhu ese ari mu ndima yenyu. Asi kana musikakwanisi kuwaparidzira nge mushobo umweni, edzai kuwaparidzira meciseenzesa makwanza amweni.

11. Ngei anhu amweni asikadi kuzwa masoko atinoparidzira?

¹¹ Amweni aadi kuzwa masoko atinoparidzira. Awona aazii kuti ngei ecidikana kufunda nge zva Mwari uye nge zve Bhaibheri. Nge kuona matambudziko akawanda ari mu nyika, awona aatendi kuti kuna Mwari uye awona aana cido cekuda kufunda Bhaibheri, ngekuti anoona atungamiriri e magereja, awo anoreketa kuti anorarama maererano no zviri mu Bhaibheri, asi eciita zviro zvakashata. Amweni akabatikana no mabasa awo, mhuri dzawo, kana kuti matambudziko awo, uye anoona hingana kuti Bhaibheri arikwanisi kuwabetsera. Ngazvipi zvatinodikana kuita kuti tirumbwe tino mupfaro kunyazi anhu akawanda aakoshesi masoko atinoparidzira?

12. Kuseenzesa zano riri pana Afiripi 2:4 ringatibetsera kudini mu basa rekuparidzira?

¹² Pangidzai kuti munoapfarira. Anhu akawanda ainga asikapfariri masoko atinoparidzira pakutanga, akacinja muitiro paakaona kuti zvezvirokwazvo isusu tinowakoshesa. (Erengai Afiripi 2:4.) Ngo muezaniso, Dhavhidhi wamborekethwa pakutanga, iyena unoti: “Munhu paanoreketa kuti aapfariri, isusu tinokanda maBhaibheri edu uye mabhuku edu mu mapasta, pedzepo tomubvunzisa kuti: ‘Ndaipfarira maningi kuziya kuti ngei mecirangarira kudaro.’” Anhu akawanda anokwanisa kuona kana munhu ecimukoshesa. Awona angasakwanisa kuguma pakusaedzurira zviro zvatareketa, asi ungakwanisa kuedzurira mushobo watamubata ndiwona. Kunyazi kana samuzi asikadi kuti tirekete naye, tingapangidza kuti tinomuda nge zvatinoita uye nge masoko edu e upfawi.

13. Tingacinja-cinja kudini masoko edu kuti aenderane no samuzi?

¹³ Mushobo umweni wekupangidza kuti tinopfarira anhu, ndewekucinja masoko edu atinoparidzira kuti aenderane no samuzi. Ngo muezaniso, pano ciro panyumbepo cinopangidza kuti ano ana here? Kana ari baba kana kuti mai, pamweni ungapfarira mazano ari mu Bhaibheri anoreketa kuti angarera kudini ana awo uye angagara kudini no mhuri inopfara. Pa misuwo yawo, muri kuona makandiyado akawanda here? Kana zvakadaro, tingakwanisa kureketa ngezve ubhinya wakawanda uri kuitika, uye iwona uri kusiya kudini anhu kuti agare ecithya. Samuzi ungakwanisa kupfara nge kuzwa kuti matambudziko aya aazoonekizve mu nguwa yo mberi. Pese pamunogumira munhu anopfarira, edzai kumupangidza kuti mazano ari mu Bhaibheri angamubetsera kudini. Katarína, wamborekethwa ngezvake, unoti: “Ndinoedza kuedzurira kuti cokwadi cakacinja kudini upenyu  wangu.” Nge mushobo uu, Katarína unokwanisa kureketa no rugondo ku anhu, uye anhu anonga acimupurutana anokwanisa kuona izvona.

14. Maererano na Zvierengo 27:17, adoni edu e mubasa rekuparidzira angatibetsera kudini?

¹⁴ Khorovherai rubetso re amweni. Muphostori Pauro, wakafundisa Timoti mushobo we kuparidzira uye we kufundisa ndiwona, uye iyena akamukohomedzesawo kuti aseenzese mushobo iwona pa kubetserawo amweni. (1Ako. 4:17) Kuitawo hingana Timoti, isusu tingakwanisa kufunda zvakawanda ku hama dzedu dziri mu ungano dzino ruziyo rakawanda. (Erengai Zvierengo 27:17.) Onai muezaniso we hama imweni inozwi Shawn. Iyona yakamboseensa hingana piyoneiro ku mbuto isikagari anhu akawanda, zvekuti ku mbuto iyona anhu akawanda aipfarira citendero cawo. Hama ii yakarumbwa kudini ino mupfaro mu basa rekuparidzira? Iyona inoti: “Pese painga zvecibvira, ndaibuda mu basa rekuparidzira no mudoni wangu Taikhorovhera pa mukana wese wataiyenda ku nyumba imweni, kuti tibetserane kuitira kuti titunhudzire uzii wedu we kufundisa. Ngo muezaniso, taiphindazve kureketa makani atainga taseenzesa pa nyumba yadarika. Izvi zvaitibetsera kuona kuti ngepapi petaidikana kutunhudzira pa nyumba yaizoteera.”

15. Ngei munamato unokosha maningi mu basa redu rekuparidzira?

¹⁵ Namatai mecikumbira rubetso ra Djehohva. Pese Pamunonga mecibuda mu basa rekuparidzira, namatai mecikumbira kuti Djehovha amutungamirirei. Apana na umwe wedu waizokwanisa kuita zviro zvakawanda mu basa rekuparidzira, pasina rubetso re mwiya mucena wa Mwari. (Pis. 127:1; Ru. 11:13) Pamunonamata reketai zvamuri kuda kamare. Kumbirai Djehovha kuti amubetserei kugumira munhu anoda kuzwa masoko atinoparidzira uye anoda kufunda zvakawanda nge zvake. Zvaa zvadaro, edzai kuita dii renyu uye petai masimba ari ese kuti murekete no munhu wese wamucagumira.

16. Ngei kuita fundo ye munhu ega kucibetsera mu basa redu rekupabridzira?

¹⁶ Garai no nguwa ye kuita fundo ye munhu ega. Soko ra Mwari rinoreketa kuti aKristu anodikana “kuziya zvinodiwa na Mwari zvakanaka, zvaanotendera uye zvakakwana.” (Aro. 12:2) Patinorumbwa tecifunda Bhaibheri, ticatunhudzirawo kunyasa kuziya Djehovha. Hino patinoparidzira nge zvake, anhu acakwanisa kuona uye kuzwa kuti zvezvirokwazvo, tinotenda mu zviya zvatinonga teciparidzira. Katarína, wamborekethwa nge zvake, unoti: “Mu nguwa dzadarika, ndakaona kuti ndaidikana kutunhudzira kutenda kangu mu cokwadi cinodikanwa ciri mu Bhaibheri. Ndiyo ndaa, ndakatanga kufunda uye ndecinyasa kukwarakwatisa zviro zvinopangidza pamhene kuti kuno musiki, kuti Bhaibheri i Soko ra Mwari, uye kuti Mwari uno sangano rake raari kuonerera pasi pano.” Katarína unoreketa kuti kugara no fundo ye munhu ega, kakamubetsera kutunhudzira kutenda kake uye kutunhudzira mupfaro wake mu basa rekuparidzira.

17. Ngei Djesu akarumbwa ano maonero akanaka mu basa rake rekuparidzira?

¹⁷ Amweni ainga asikadi kupurutana masoko aiparidzwa na Djesu, kunyazi zvakadaro ayena akarumbwa ano maonero akanaka mu basa rake rekuparidzira. Ngei? Ayena aiziya kuti anhu akawanda aidikana kufunda cokwadi, uye aida kubetsera anhu akawanda kuti agume pakutenda masoko e Umambo wa Mwari. Uye ayena aiziyawo kuti, anhu anganani ainga asikadi kuzwa masoko pekutanga, aizokwanisa kucinja muitiro mu nguwa yo mberi. Onai zvakaitika no mhuri ya Djesu kamare. Ayena akaparidza ke makore matatu no hafu, uye apana hama yake ye kunyama yakagara mufundi wake. (Ju. 7:5) Asi, mu masure mekuti Djesu amutswa, Awona akagara aKristu.—Zvi. 1:14.

18. Ngei tecidikana kurumbwa teciparidzira?

¹⁸ Atikwanisi kuziya kuti ndiyani ucazogara  museenzi wa Djehovha. Amweni angakwanisa kutora nguwa yakareba kudarika amweni kuti afunde cokwadi. Uye kunyazi no aya ainga asikatendi kuzwa masoko edu atinoparidzira, angakwanisa kuguma pa ‘kukudza Djehovha’ nge kuona mabasa edu uye muitiro wedu wakanaka.—1Pe. 2:12.

19. Maererano na 1 Akorinti 3:6, 7, ngazvipi zvatinodikana kuziya?

¹⁹ Isusu tinosima uye tinodiridza, asi tinodikana kuziya kuti Djehovha ndiyena uno basa rakakura maningi mu basa redu rekuparidzira. (Erengai 1 Akorinti 3:6, 7.) Getahun, hama imweni inoseenzera ku Etiópia, inoti: “Padarika makore anokwana kuita 20, ndiri ndega hinga Mupupuri wa Djehovha mu ndima ino isikasenzwi kakawanda. Asi pa nguwa ino, kaano aparidzi anokwana 14. 13 awo akabhabhatidzwa, kutobatanidzawo mukadzi wangu uye no ana edu 3. Kana tikada kuona, anhu anokwana kuita 32 anopinda misangano yedu.” Getahun unopfara nge kuetsera asikanonoki kutsamwa kuti Djehovha abetsere amweni kuitira kuti agare dii re sangano Rake!—Ju. 6:44.

20. Ngei tecikwanisa kureketa kuti tiri anhu anoseenza pamwepo kuti aponese anhu anonga ari pa ngozi?

²⁰ Kuna Djehovha, anhu ese anokosha. Ayena anotipasa ropapfadzo ye kuseenza pamwepo no Mwana wake kuti tiunganidze anhu e madzinza ese mugumo usati waguma we nyika ino. (Aje. 2:7) Basa redu rekuparidzira rakaezana no cikwata ce kuponesa anhu. Uye isusu tiri nhai ye cikwata ici ce anhu anotumwa kuti aponese anhu anonga ahidhikirhwa no mugodhi. Pamweni anhu anganani ndiwo angakwanisa kuponesa munhu, asi basa rinonga raizwa no anhu esse ndiro rinokosha. Tingakwanisa kureketa kuti zvakaezanawo no basa redu rekuparidzira. Atizii kuti ndiyani ucakwanisa kuponesa munhu, mu nyika ino ya Sathani. Asi catinoziya ndecekuti Djehovha unokwanisa kuseenzesa umwe wedu. Andreas, unogara ku Bolívia, unoti: “Pacangu, kuti munhu agume pa kufunda cokwadi ciri mu Bhaibheri, uye azoguma pa kubhabhatidzwa, ikubarira ke kuseenza pamwepo hingana grupu.” Tinodikana kugarawo no maonero akadaro, mu basa redu rekuparidzira. Kana tikadaro, Djehovha ucatikomborera, uye ucaita kuti basa redu rekuparidzira rigare manyuku e mupfaro.