1-2. Maererano na 1 Timoti 6:20, Timoti akapaswei?

ZVIRI NYORE kusiya kuti zviro zvedu zvinokosha zviizwe nge amweni. Ngo muezaniso, akawanda edu tinoiga mare ku banko. Tinomira kuti icacengethwa zvakanaka, uye kuti isapsveteke uye kana kubiwa. Dakara zvino, taakuzwisisa kuti cinyi cinozwi kucengetesa munhu ciro cenyu camunoda.

² Erengai 1 Timoti 6:20. Mu apostori Pauro akaedzurira Timoti kuti ayena ainga atambira ciro cinokosha—ruziyo re cokwadi re zviro zvicaizwa na Mwari nge kuda ke anhu. Uye Timoti akatambirawo cikomborero ce “kuparidza soko” uye ce “kuita basa re muvhangeri.” (2Ti. 4:2, 5) Ndiyo ndaa Pauro akakohomedzesa Timoti kuti abatisise zvaainga acengeteswa. Hingana zvaakaitira Timoti, Djehovha akaticengetesa zviro zvinokosha maningi.

3-4. Zviro zvipi zvinoita kuti zvokwadi zve Bhaibheri zvikoshe kudarika zviro zvese?

³ Nge mutsa wake Djehovha ari kutipa ruziyo recokwadi rinokosha riri mu Soko rake Bhaibheri. Zvokwadi zviri mu Bhaibheri zvinokosha ngekuti zvinotifundisa mushobo watingagara no ushamwari wakanaka na Djehovha uye zvinotipangidza kuti cinyi cinotipasa mupfaro mu upenyu. Kana tikazvitendera zvokwadi izvi uye torarama maererano nazvo, tinoona rusudzunuko. Aticanyeperhwi nge mafundisiro e kunyepa uye ne miitiro isikazi kucena.—1Ako. 6:9-11.

⁴ Ciro cimweni cinoita kuti zvokwadi izvi zve Soko ra Mwari zvikoshe nge zve kuti Djehovha anozvipangidza ku munhu uya anodzidodosa uye ano “mwoyo unoda.” (Zvi. 13:48) Anhu aya anotenda gwanza riri kuseenzeswa na Djehovha mazuwa ano kuti atipase zvokwadi izvi. (Mt.  11:25; 24:45) Kudai tisina rubetso ra Djehovha taizokwanisapi kufunda zvokwadi izvi, uye apana zviro zvinokosha kudarika zvokwadi izvi mu nyika ino.—Zvie. 3:13, 15.

5. Djehovha akaticengeteseizve?

⁵ Djehovha akatipasa cikomborero ce kufundisa amweni nge zvake uye ne zvipikirhwa zvake. (Mt. 24:14) Soko ratinoparidza rinokosha maningi. Irona rinobetsera anhu kuti agare dii re mhuri ya Djehovha uye rinowapasa mukana we kurarama nokusikaperi. (1Ti. 4:16) Kunyazi tecikwanisa kuita zvakawanda kana padoko, tese tiri kuita basa rinokosha maningi. (1Ti. 2:3, 4) Zviri pamhene kuti cikomborero cikuru kuseenza pamwepo na Mwari!—1Ako. 3:9.

6. Cinyi cakaitika ku akristu amweni asikazi kurumbwa akadjenga?

⁶ MaKristu amweni akarama pa nguwa imweyo na Timoti aazi kurumbwa ecikoshesa cikomborero cekuseenza pamwepo na Mwari. Nge muezaniso, Dhema waida nyika uye nge ndaa yazvo akasiya cikomborero cekuseenza na Pauro. (2Ti. 4:10) Figero na Hermogene akasiyawo basa rawo rekuparidza, zvecida aitya kusongana ne zvakabatana na Pauro. (2Ti. 1:15) Imineu, Arexandre na Fireto akapanduka uye osiya cokwadi. (1Ti. 1:19, 20; 2Ti. 2:16-18) Zviri kuita hingana kuti anhu aya ainga akakura pakunamata, asi akaruza zviro zvaikosha.

7. Mirau ipi inoseenzeswa a Sathani kuti atisiise cokwadi?

⁷ Sathani ari kuedza kudini kuti tipsvete zvatakacengeteswa? Mirau ipi yaanoseenzesa? Cekutanga, iyena anoseenzesa waraidzo ne anopeperusa masoko. Eciseenzesa zviro izvi Sathani anobararisa mirangariro ne miitiro ingakwanisa kutiita kuti tisiye cokwadi. Cecipiri, Sathani anotyisidzira. Angazviita eciseenzesa atinofunda nawo ku cikora kana kuteererhwa kamare, Sathani anoda kuti tisaparidzire. Uye cecitatu, ndiwona akasiya cokwadi. Sathani anoedza kutibata pa mirau “nge zviya zvinozwi ‘ruziwo’” raanobararisa, uye anoda kuti isusu tisiyewo cokwadi.—1Ti. 6:20, 21.

8. Mafundei pa zviro zvakaitika ku hama inozwi Dhanyeri?

⁸ Kana tikasama kudjenga, zvingaita kusiya cokwadi padoko no padoko. Onai zvakaitika kuna Dhanyeri, * uwo aida maningi kutamba vhidhiyogemi. Iyena anoti: “Ndakatanga kutamba vhidhiyogemi pandainga  no makore 10. Pakutanga jogo dzangu dzainga dzisikazi kushata. Asi ndakazotanga kutamba jogo dze masimba-masimba kana kuti dze cidhimoni.” Pa nguwa imweni Dhanyeri aipedza nguwa inokwana 15 pa zuwa ecitamba vhidhiyogemi. Iyena anoenderera eciti “Mukati me mwoyo mangu, ndaiziya kuti nguwa yendaipedza ndecitamba uye mushobo we jogo yandaitamba dzaindiparadzanisa na Djehovha. Asi mwoyo wangu wainga watunduwara. Ndairangarira kuti mazano e Bhaibheri ainga asikaseenzi kandiri,” anodaro Dhanyeri. Zvimwezvowo zvingakwanisa kuitikawo katiri. Waraidzo ingakwanisa kutipausa tisikazvikariri uye yoita kuti tisiye cokwadi. Kana izvi zvikaitika, tingakwanisa kupsvetekerhwa nge zviro zvinokosha zve takacengeteswa na Djehovha.

9. Maererano na 1 Timoti 1:18, 19, Pauro akaezanisa Timoti nei?

⁹ Erengai 1 Timoti 1:18, 19. Pauro akaezanisa Timoti ne musurudado uye akamukohomedzesa kuti “Rumbwa we cirhwa hondo yakanaka.” Yainga isiripi hondo ye nyama, asi ye ku mwiya. Asi aKristu ne masusurudado akaezana pa cinyi? Unhu upi watinawo isusu arhwi aKristu watinodikana kugara nawo? Ngationei zviro zvishanu zvaticafunda pa mufanikiso wa Pauro. Zviro izvi zvicatibetsera kunyasa kubatisisa cokwadi.

10. Kutya Mwari kudini uye ngei tecidikana kugara nako?

¹⁰ Ityai Mwari. Musurudado wakanaka, wakagondeka. Iyena anorhwa no simba rese kuti adziirire waanoda kana kuti ciro cinokosha kaari. Pauro akakohomedzesa Timoti kuti kuti atye Mwari —kana kuti kugara no ushamwari wakagondeka na Mwari. (1Ti. 4:7) Kana rudo redu rikakura kuna Mwari, ticagarawo no cido cikuru ce kubatisisa cokwadi.—1Ti. 4:8-10; 6:6.

11. Ngei tecidikana kudzibata?

¹¹ Sakurirai wara re kudzibata. Kana musurudado ecida kugara akagadzirira anodikana kudzibata. Timoti ainga akagadzirira ku mwiya ngekuti aipurutana mipango yaaitambira kuna Pauro. Iyena aitiza zvido zvakashata, aibatikana mu zviro zve ci kristu uye aiungana no hama mu kutenda. (2Ti. 2:22) Izvi zvaida kuti adzibate. Zvimwezvo zvinoitikawo katiri nyamasi. Tinodikana kudzibata kuti tiwine pa hondo ye zvido zvakashata. (Aro. 7:21-25) Zvinodikana kudzibata kuti tibvise unhu we kare uye tigare no unhu upsva. (Aef. 4:22, 24) Uye zvinoda kudzibata kuti tipinde misangano patinonga takaremba nge basa.—Ahe. 10:24, 25.

12. Tingagara kudini afundisi akanaka e Bhaibheri?

¹² Musurudado anodikana kufundira kuseenzesa pfuti yake. Uye anodikana kuita izvi nguwa yese kuti azvikwanise. Zvimwezvoo, isusu tinodikana kuziya kuseenzesa Soko ra Mwari. (2Ti. 2:15) Zvimweni tinozvifundira pa misangano. Asi kana tecida kuti amweni aziyewo, tinodikana kugara tecifundira tega patinofunda Bhaibheri tiri tega. Tinodikana kuseenzesa Soko ra Mwari kuti tibambise kutenda kedu. Izvi azvindopereri basi pa kuerenga Bhaibheri. Tinodikana kunyasa kurangarira zviya zvatinoerenga uye kupsvakisisa mu mabhuku. Kana tikadaro ticakwanisa kuzwisisa zvakanaka Matarhwa uye kuzviseenzesa mu upenyu wedu. (1Ti. 4:13-15) Kana tikaita izvi, tinonga tookwanisa kuseenzesa Soko ra  Mwari uye kufundisawo amweni. Azvindopereri basi pa kuerengera vhersikuro anhu. Tinodikana kuabetsa kuti azwisise tsamba uye kuti inoseenza kudini mu upenyu wawo. Kana tino tsika yekuerenga Bhaibheri zuwa no zuwa, fundo ye munhu ega ye Bhaibheri, tinonga tecienderera mberi se afundisi e Soko ra Mwari.—2Ti. 3:16, 17.

13. Maererano na Ahebheru 5:14, ngei tecidikana kugara no ungwaru?

¹³ Garai no ungwaru. Musurudado unodikana kuona ngozi uye ofindara. Isusuwo tinodikana kufundira kuona pano ngozi uye todzinzvenga. (Zvie. 22:3; erengai Ahebheru 5:14.) Ngo muezaniso, tinodikana kusanangura zvakanaka zvinotiwaraidza. Mafirme akawanda anobuda pa TV anopangidza zviro zvakashata. Miitiro ii inonyangadza Mwari, uye zvinopedzesera zvatikuwadza. Ndiyo ndaa tecidikana kutiza waraidzo ingatipausa kuna Djehovha.—Aef. 5:5, 6.

14. Ungwaru wakabetsera kudini Dhanyeri?

¹⁴ Dhanyeri wetamboreketa nge zvake, akaona kuti zvainga zvakashata kutamba vhidhiyogemi ino masimba-masimba uye inobatanidza zve midzimu. Hino, akapsvakisisa mu Watchtower Library, mabhuku angamubetsera kuwina dambudziko rake. Zvakabudirira here? Dhanyeri wakasiya kutamba mavhidhiyogemi dzino masimba-masimba. Iyena akatofunga zvese zvaaita ne atambi doni. Dhanyeri takati: “Pano kutamba mavhidhiyogemi, ndakatanga kutora nguwa yakawanda ndisipi pa nyumba, uye kuungana no hama dze ungano.” Zvino Dhanyeri arikuseenza hingana piyonero uye mukuru we ungano.

15. Ngei masoko ekunyepa ano ngozi?

¹⁵ Kuezana na Timoti, tinodawo ungwaru kuti tione ngozi ye masoko ekunyepa anobudiswa nge anhu akasiya sangano. (1Ti. 4:1, 7; 2Ti. 2:16) Nge muezaniso awona angakwanisa kubararisa masoko ekunyepa akaringana no hama dzedu kana nge sangano ra Djehovha. Masoko aya ekunyepa angatipausa pakutenda. Tinodikana kungwarira kuti tisacengedzwe ndiwona. Ngei? Ngekuti masoko aya ekunyepa anobarariswa nge “anhu akapauswa mu  nzero uye asikazii cokwadi.” Cido cawo nge ce “kuparadzanisa anhu uye kureketedzana” (1Ti. 6:4, 5) Awona anoda kuti titende manyepo awo uye kuti tisagonde hama dzedu.

16. Zviro zvipi zvingatikangaidza?

¹⁶ Musawarairhwe. Nge “kugara musurudado akanaka wa Kristu Djesu,” Timoti ainga akakanda nzero dzake pa basa rekuparidza. Iyena ainga asikadikani kusiya kuti mare kana zviro zvimweni zvimubvise nzero pa basa rake. (2Ti. 2:3, 4) Kuezanawo na Timoti, atidikani kusiya kuti zviro zve kunyama zvitikangaidze. “Simba rinokangaidza re upfumi” ringakwanisa kukangaidza rudo redu kuna Djehovha ne Soko rake. Simba iri ringakwanisa kuita kuti tipererhwe nge cido cekuparidzira amweni. (Mt. 13:22) Nge ndaa yazvo, tinodikana kugara ne upenyu usina zvakawanda uye kuseenzesa nguwa no simba redu “kuti . . . arumbwe ecitanga kukanda Umambo pa mbuto yekutanga.”—Mt. 6:22-25, 33.

17-18. Tingaitei kuti tidziirire ukama wedu na Djehovha?

¹⁷ Gadzirirai kuti mukasike kuita ciito. Musurudado anodikana kuronga nguwa iciripo kuti aone kuti angaita kudini pakaitika ngozi. Kana tecida kudziirira zviya zvatakapaswa na Djehovha, tinodikanawo kukasika kuita ciito kana pakamuka ngozi. Cinyi cicatibetsera kuti tiite ciito no kukasika? Tinodikana kugadzirira nguwa iciripo.

¹⁸ Mukuezanisira: Mu zviitiko zvimweni anhu anonga aripo anobvunzwa misuwo yekutizira iri dhuze no mipango dzawo. Ngei? Nge kuti kana pakamuka ngozi, munhu wese anokwanisa kutiza odziponesa. Zvimwezvoo, isusu tingakwanisa kufundira nguwa iciripo kuwona kuti i mbuto ipi “yekubuda nayo” yaticaseenzesa patinonga teciona TV kana teciseenzesa interneti, kana pangabudisa ngozi. Kana tikagara takagadzirira ticakwanisa kutiza nokukasika. Isusu ticadziirira ukama wedu uye ticarumbwa takacena mu madziso a Djehovha.—Pis. 101:3; 1Ti. 4:12.

19. Makomborero api aticaona kana tikacengetedza zviro zvinokosha zvetakacengeteswa na Djehovha?

¹⁹ Isusu tinodikana kucengeta zviro zvinokosha zvetakapaswa na Djehovha —zvokwadi zvinokosha zve Bhaibheri uye cikomborero ce kufundisa amweni. Kana tikazviita ticaona makomborero akanaka, hana yakacena, upenyu unocinangwa, uye mupfaro wekubetsera amweni kuti aziye Djehovha. Musakanganwe kuti no rubetso ra Djehovha, munokwanisa kucengetedza zvamakaigiswa naye.—1Ti. 6:12, 19.