1. Migariro ipi ye zviro ingashupha kuseenzera Djehovha?

NDEPAPI pamunoona kuti zvinoshupha kuseenzera Djehovha?—pamunonga mecisongana no zvinetso here, kana kuti pazvinoita hingana zvakanaka? Zviri nyore kugonda Djehovha patinosongana no zvinetso. Asi ticaitei kana upenyu wedu uri pa mbuto iri nani? Zvingatiita kuti tikanganwe kunamata Djehovha here? Djehovha wakaziisa aIsraeri kuti izvi zvaizoitika.—Dhe. 6:10-12.

2. Muezaniso upi wakasiya Mambo Aza?

² Mambo Aza, muezaniso wakanaka we munhu wakaita zviro no ungwaru. Iyena nguwa dzese wairumbwa ecigonda Djehovha uye wakaseenzera Mwari haiwa basi zviro pazvainga zvecishupha, asiwo mu nguwa ye runyararo. Kubvira aciri mudoko “mwoyo wa Aza wainga wakanyatsodzipira kuna Djehovha.” (1 Mad. 15:14, masoko e pasi) Mushobo umweni wekudzipira ka Mambo Aza kuna Mwari nge we kubvisa kunamata kese ke kunyepa mu nyika ye Djudha. Bhaibheri rinoti “wakabvisa artari dze madzimwari e nyika dzimweni ne mbuto dzakakwirira, akaphwanya dzukunyumba re kudira, uye akatema tema miti dzese dzekudira.” (2 Mak. 14:3, 5) Aza wakatobvisa mbiya ake Maaka, pa cigaro ce umambo. Ngei? Ngekuti iyena waitsigira kunamata kekunyepa.—1 Mad. 15:11-13.

3. Ticaonei mu fundo ino?

³ Aza wakatoita zvakawanda kudarika kubvisa citendero cekunyepa mu nyika. Iyena wakahwirinza kunamata kakacena uye wakabetsa aDjudha kuhwirira kuna Djehovha. Nge kudaro, Djehovha wakakomborera Mambo Aza uye aIsraeri kuti  agare mu runyararo. * Mukati me makore gumi me kutonga ka Aza, “nyika yainga iri mu runyararo.” (2 Mak. 14:1, 4, 6) Mu fundo ino, ticada kuona kuti Mambo Aza wakakhorovhera kudini nguwa ii ye runyararo. Photopo, ticada kufunda muezaniso we aKristu e mu nguwa ye kare. Kuita hinga Aza, awona akakwanisa kukhorovhera mukana we runyararo. Pa kupedzesera, ticada kudaira mubvunzo unoti: Kana mecirarama mu nyika ine rusudzunuko re kunamata, mungaseenzesa kudini ungwaru mu nguwa ii ye runyararo.

4. Maererano na 2 Makoronika 14:2, 6, 7, Aza wakakhorovhera kudini nguwa yaainga ari mu runyararo?

⁴ Erengai 2 Makoronika 14:2, 6, 7. Aza wakati kune anhu kuti Djehovha ainga ‘aazorodza ku matii ese.’ Aza wainga asikaoni kuti nguwa ye runyararo yainga iri nguwa ye kukanganwa kuno mushwe. Kusiyana na izvona, iyena wakakhorovhera nguwa ii kuti awake mathaundi, ukutira, nyumba dze kurindira, uye misuwo. Aza wakati kuna aIsraeri: “Nyika iciri mu nyara dzedu.” Izvi zvaida kureyei? Anhu aikwanisa kuhamba no rusudzunuko nyika yese uye kuwaka asikaphikiswi no azondi. Aza wakakohomedzesa anhu kuti akhorovhere nguwa ii ye runyararo.

5. Ngei Aza wakabambisa masurudado ake?

⁵ Aza wakakhorovherawo nguwa ye runyararo kuti abambise masurudado ake. (2 Mak. 14:8) Izvi zvinopangidza kuti wainga asina kutenda muna Djehovha here? Haiwa. Aza waiziya kuti waidikana kugadzirira anhu pa matambudziko api hawo aizouya pane ramangwana. Iyena waiziya kuti nguwa ii ye runyararo yainga isikandorumbwi iripo. Ndizvonadi kamare zvakazoitika.

6. MaKristu e kare aikhorovhera kudini nguwa ye runyararo?

⁶ Kunyazi hazvo aishuphika nge ndaa yekuzondhwa, maKristu e mu nguwa ye kare akagarawo mu nguwa ye runyararo. Afundi aiitei pa nguwa ii? Iwona aikhorovhera mukana uu kuti arumbwe eciparidzira masoko anopfadza. Maererano no bhuku ra Zviito, anarume aya no anakadzi akagondeka, “aihamba ecitya Djehovha.” Iwona airumbwa eciparidza masoko anopfadza uye migumisiro yakhona “akarumbwa eciwanda.” Zvezvirokwazvo Djehovha akakomborera kupeta masimba kawo kaakaita mu nguwa ye runyararo.—Zvi. 9:26-31.

7-8. Zvii zvaiizwa na Pauro uye ne aKristu amweni paainga ano mukana? Panganidzai.

⁷ MaKristu e mu nguwa ye kare aikhorovhera mikana yese kuti aparidze masoko anopfadza. Ngo muezaniso, Mupostori Pauro wakaziya kuti musuwo mukuru wainga wafunguka mu Efeso. Hino, iyena wakakhorovhera mukana uu kuti aparidzire uye kuti aite afundi mu thaundi iri.—1Ako. 16:8, 9.

⁸ Mukana umweni wakabudira pana Pauro uye ku akristu amweni igore ra 49 K.A., apo ndaa ye ucekeri payakagadziriswa. (Zvi. 15:23-29) Mu masure me ungano dzaziya izvi, afundi akaseenza no simba kuti aparidze “masoko anopfadza e soko ra Djehovha.” (Zvi. 15:30-35) Mugumisiro wakhona? Bhaibheri rinoti: “ungano dzakarumbwa dzecibambiswa pa kutenda uye dzeciwanda zuwa ne zuwa.”—Zvi. 16:4, 5.

9. Parizvino nyika dzakawanda dzakadini, uye tinodikana kudzibvunzisei?

⁹ Parizvino zvinoita kuti tiparidzire mu nyika dzakawanda takasununguka. Imwimwi mune rusununguko re kunamata mu nyika yenyu here? Kana zviri izvona, dzibvunzisei kuti: Ndiri kukhorovhera mukana uu here? Mu mazuwa ano e kupedzesera, sangano ra Djehovha riri kutungamirira gwitikwiti rakakura re kuparidzira uye basa riri kuizwa mu nyika yese. (Mk. 13:10) Misuwo yakawanda yakafununguka ku anhu a Djehovha.

10. Tsamba ya 2 Timoti 4:2 inotikohomedzesa kuti tiitei?

¹⁰ Mungakhorovhera kudini nguwa ye runyararo? (Erengai 2 Timoti 4:2.) Madini kumbodziongorora nge zvamuri? Imwimwi kana we mumhuri yenyu munokwanisa kutunhudzira pa basa renyu rekuparidzira, pamweni meciseenza hingana piyoneiro here? Zvino, ainguwapi ye kuunganidza upfumi—zviro zvicaparadzwa pa kutambudzika kukuru.—Zvie. 11:4; Mt. 6:31-33; 1Ju. 2:15-17.

11. Cinyi ciri kuizwa nge aparidzi kuti akwanise kuparidzira anhu akawanda?

¹¹ Aparidzi akawanda arikufundira mireketero mipsva kuti aparidzire uye afundise. Sangano ra Djehovha rinobetsera hama idzi pa ku dhinda mabhuku e mireketero dzakawanda. Ngo muezaniso mu gore ra 2010 takadhinda mabhuku e mureketero inokwana 500. Mazuwa ano, taakudhinda mu mireketero inodarika 1000.

12. Zvakanakira papi kuti anhu azwe masoko e Umambo mu mureketero wawo? Pasai muezaniso.

¹² Kodi zvine musiyano munhu kuzwa cokwadi ce Soko ra Mwari pa mureketero wake here? Onai muezaniso we hanzvadzi yakapinda  gungano re muthanha ku Memphis, Tennessee, EUA. Hanzvadzi ii inoreketa ci Kinyarwanda, mureketero unonyanya kureketwa ku Ruwanda, Kongo (Kinshasa), uye ku Uganda. Gungano iri rakaizwa mu mureketero wake. Gungano perakapera hanzvadzi ii yakati: “Kaakudarika makore 17 ndecirarama mu Estados Unidos, asi gungano iri ndirona rakanyasa kubaya mwoyo wangu.” Zviri pamhene kuti hanzvadzi ii yakapfadzwa maningi nge kuzwa gungano mu mureketero wayo. Kana migariro wenyu wecitendera, zvakadini kufundirawo mureketero mupsva kuti mubetserewo amweni ari mu ndima yenyu? Pamweni mu ndima menyu muno anhu anozwa akasudzunuka kureketa mu mureketero umweni. Kodi izvi zvingamuita kuti mufundire mureketero mupsva here? Kureketa zvazviri, zvinoda kuseenza no simba, asi zvinopfadza.

13. Hama dzedu dziri ku Rússia dzakakhorovhera kudini nguwa ye runyararo?

¹³ Ahamepi dzese dzine mikana ye kuparidzira. Mu nyika dzimweni anyautongi anorambidza basa re kuparidzira. Ngo muezaniso, rangarirai hama dzedu dze ku Rússia. Mumasure me makore akawanda e kuzondwa, iwona akapaswa mukana we kunamata akasudzunuka mu mwedzi wa Nyaonga 1991. Mu nguwa iyona, ku Rússia kainga kuno aparidzi anokwana 16 000. Pakazopera makore 20, numero ye aparidzi yakatunhudzirika ikadarika 160 000! Zviri pamhene kuti hama dzedu dzakaseenzesa ungwaru uye dzakakhorovhera mukana uu kuti dziparidzire dzakasudzunuka. Asi mukana uu we runyararo auzi kurumbwa uripo. Asi zviro pezvakacinja, awona aazi kuhwirira sure pa kunamata kakacena. Iwona aciri kuseenzera  Djehovha uye ari kuseenzesa mishobo yakasiyana-siyana kuti arumbwe akadaroko.

14-15. Djehovha wakapangidza kudini kuti waitsigira Aza?

¹⁴ Mu nguwa ya Aza, mwaka we runyararo wakazopera. Masurudado asikaerengeki—anodarika mirionji imwe—akauya kubva ku Etiópia. Mutungamiriri, Zera, wainga ano rugondo rekuti waizokwanisa kunyisa Djudha. Asi Mambo Aza, wainga asikagondi uwandu we anhu, asi mu Mwari wake, Djehovha. Aza wakanamata: “Tibetseiwo Djehovha Mwari wedu, ngekuti tinogonda nemwi, uye tauya kuzorhwa no anhu ajinji aya muzina renyu.”—2 Mak. 14:11.

¹⁵ Kunyazi hazvo masurudado e ku Etiópia aipeta kairi masurudado a Aza, iyena waigonda simba rina Djehovha pa kubetsera anhu ake. Uye Djehovha aazi kusiya ega, wa Etiópia akanyiswa zvinopsverudza.—2 Mak. 14:8-13.

16. Tinoziya kudini kuti nguwa ye runyararo aizorumbwi iripo?

¹⁶ Atizii zvakatiemera pane ramangwana. Asi tinoziya kuti nguwa ye runyararo ye anhu a Mwari icapera. Zvezvirokwazvo Djesu wakareketa kuti afundi ake “aizozondhwa nge madzinza ese.” (Mt. 24:9) Uye mupostori Pauro wakati: “Ese aya anoda kurarama ecidzipira kuna Mwari muna Kristu Djesu acatambudzwawo.” (2Ti. 3:12) Sathani “wakatsamwa maningi,” uye kaizonga kupenga kurangarira kuti atizowirhwi nge shungu dzake.—Zva. 12:12.

17. Ticasongana no miedzo ipi ye kutenda?

¹⁷ Nge kukasika, tese ticasongana no muedzo we kutenda kedu. Nyika icasongana no “kutambudzika kukuru kusati kakamboitika kubvira pa kutanga ke nyika dakara zvino.” (Mt. 24:21) Pa nguwa ii, pamweni hama dzedu dzingatizonda, uye pamweni basa redu ricarambidzwa. (Mt. 10:35, 36) Mucaitei? Mucateedzera Aza pa kugonda no rubetso uye rudziiriro ra Djehovha here?

18. Maererano na Ahebheru 10:38, 39, cinyi cicatibetsera kuti tigare takagadzirira kupera ke nguwa ye runyararo?

 ¹⁸ Djehovha uri kuti gadzirira pane zvicaitika mune ramangwana. Iyena uri kutungamirira “museenzi wakagondenga wakangwara” kuti atipase zvekurhya “pa nguwa kwayo” ngokudaro tingarumbwa takabamba pa kunamata Mwari wedu. (Mt. 24:45) Asi tinodikana kuita zvese zvatinokwanisa kuti tibambise ukama wedu na Djehovha.—Erengai Ahebheru 10:38, 39.

19-20. Maererano na 1 Makoronika 28:9, Tinodikana kudzibvunzisa mibvunzo dzipi, uye ngei?

¹⁹ Hingana Mambo Aza, tinodikana “kupsvaka Djehovha.” (2 Mak. 14:4; 15:1, 2) Danho rekutanga ngere kuziya Djehovha uye kubhabhatidzwa. Tinodikana kukhorovhera mikana yekubambisa rudo redu kuna Djehovha. Kuti muziye kuti muri kuzviita here, dzibvunzisei kuti: ‘Ndiri kupinda misangano yese here?’ Pa misangano, tinoona simba rekuti tide kurumbwa teciseenzera Djehovha, uye tinobambiswa nge hama dzedu mukutenda. (Mt. 11:28) Mibvunzo dzimweni dzatinodikana kudzibvunzisa ndi idzi: ‘Inini ndinomusambo we kufunda Bhaibheri nguwa dzese here? Kana inini decirarama no mhuri yangu, ndino tsika yo kuita kunamata ke mhuri ke masumana ese here? Kana ndecirarama ndega, ndino nguwa yo kufunda hingana zvinoizwa no mhuri? Uye ndinoita zviri zvese kuti ndibude mu basa re kuparidzira uye kuita afundi here?’

²⁰ Ngei zvakanaka kudzibvunzisa mibvunzo idzi? Bhaibheri rinobbuya kuti Djehovha unoongorora ndangariro dzedu uye mwoyo wedu, hino, tinodikana kudziongororawo. (Erengai 1 Makoronika 28:9.) Kana mukaona kuti pano ciripo camunodikana kucinja, pa zviito, uye pa ndangariro, kumbirai Djehovha kuti amubetsere kucinja. Ino ndiyo nguwa ye kugadzirira miyedzo icauya. Musasiye ciro cipi haco cecimupingaidza kuseenzesa ungwaru mu nguwa ye runyararo!