1-2. Masoko ari pana Muparidzi 11:6 anobatana papi no basa rekuparidza?

MU NYIKA dzimweni, anhu anotambira zvakanaka basa redu re kuparidzira. Masoko atinoparidza ndiwo aanoda kamare. Asi mu nyika dzimweni, anhu amweni aatombopfariri kuzwa nge zva Mwari kana Bhaibheri. Anhu e mu ndima yenyu anotambira kudini masoko amunoparidza? Zvezvirokwazvo azvinei no kutambira kaanotiita. Djehovha unoda kuti tirumbwe teciparidzira dakara ati zvakwana.

² Djehovha waakutoziya zuwa raacaimisa basa re kuparidzira, uye zuwa “ricauya mugumo.” (Mt. 24:14, 36) Dakara ikona, tingatondowedza kudini mutemo wekuti: “usasiye nyara dzako dzeciremba”? *—Erengai Muparidzi 11:6.

3. Ticafundei?

³ Mu fundo yakapera takafunda zviro zvirongomuna zvinodikanwa kuti munhu agare “muedzi wakanaka we anhu.” (Mt. 4:19) Mu fundo ino, ticafunda zviro zvitatu zvicatibetsera kuti tirumbwe teciparidzira, kunyazi tecibatana ne migariro isikazi kunaka. Ticafunda kuti ngei zvakanaka (1) kugara no cinangwa, (2) kunonoka kutsamwa uye (3) kutenda kakabamba.

4. Ngei tecidikana kugara no cinangwa pa basa ratakapaswa na Djehohva?

⁴ Djesu wakareketa kuti nyika yaizogara kudini mu mazuwa e kupedzesera. Uye iyena waiziya kuti migariro yakadaro yaizokangaidza ateeri ake pa kuita basa re kuparidzira. Hino, iyena wakangwadza afundi ake kuti: “Rumbwai makadjenga.” (Mt. 24:42) Kudzarisa ke mvhura kusati kaitika,  anhu ainga akakangaidzika no mabasa e zuwa no zuwa, ngokudaro, aazi kubata no nyara mbiri ngwadzo ya Nowa. (Mt. 24:37-39; 2Pe. 2:5) Mazuwa ano kuno zviro zvakawanda zvinokangaidzawo. Nge ndaa ii, tinodikana kugara no cinangwa pa kuita basa ratakapaswa na Djehovha.

5. Maererano no Mabasa 1:6-8 basa rekuparidzira raizoguma dakara kupi?

⁵ Basa rekuparidzira ndirona ratinodikana kukanda pa mbuto ye kutanga. Djesu wakati, mu masure me rufu rake, basa rekuparidzira raizoenderera ke nguwa yakareba uye raizoparidzirhwa kune anhu akawanda. (Ju. 14:12) Djesu paakafa, afundi ake amweni akahwirira ku basa rawo re kubata howe. Hino paakazomutswa, Djesu wakaita cishamiso kuti afundi ake abate howe dzakawanda. Pa nguwa iyona, iyena wakakhorovhera mukana uu kuti aabambise kuti kuita aedzi e anhu ibasa rinokosha kudarika basa ripi haro. (Ju. 21:15-17) Asati ahwirira kudenga, Djesu wakabvunza afundi ake kuti basa rekuparidzira raainga atanga raizoparidzirhwa mu nyika dzimweni. (Erengai Muparidzi 1:6-8.) Makore akateera, Djesu wakaita kuti muphostori Juau aone cioneso caipangidza zvaizoitika mu “zuwa ra Tenzi.” * Zviro zvimweni zvakaoneka na Juau zvaishamisa: Zvecitungamirirhwa ne ngirozi, “masoko anopfadza asikaperi” aiparidzwa “mu nyika dzese, madzinza ese, mumareketero ese, uye ku anhu ese.” (Zva. 1:10; 14:6) Izvi zvinopangidza pamhene zvinodiwa na Djehovha katiri kuti tiitewo basa iri rekuparidza dakara ku mugumo.

6. Cinyi cicatibetsera kuti tirumbwe tino cinangwa pa basa rekuparidza?

⁶ Ciro cingatibetsera kuti tirumbwe tiine cinangwa ce kuparidzira, kurangarira zvese zviri kuizwa na Djehovha kuti atibetsera. Ngo  muezaniso, muri kuona zvekurhya zve kunamata zvakawanda zvatinazvo here? Tino mabhuku akadhindwa, e pa interneti, zvekupurutana, mavhidhiyo, uye urongwa unobudiswa pa interneti. Tisikareketi saiti yedu ye pamutemo, ino masoko anooneka mu mareketero anokwana kuita 1000! (Mt. 24:45-47) Kunyazi nyika ino yakaparadzana nge zve matongerhwe e nyika, zvitendero, uye nge zve upfumi, nge dii rimweni kuno mamirionji 8 e aseenzi a Mwari anoumba mhuri yakabatana. Ngo muezaniso cishanu, 19 ya Abril ya 2019, Apupuri a Djehovha ainga akaungana kuti aone pamwepo tsamba ye zuwa. Usiku wakhona, anhu anokwana kuita 20 919 041 akaungana pamwepo kuti apemberere Cirangaridzo ce rufu ra Djesu. Kuona cishamiso ici ce mazuwa ano uye kubatanidzwawo, makomborero akakura. Patinoona zvese izvi, zvinotiita kuti tigare no cido cekurumbwa tine cinangwa mu basa re Umambo.

7. Muezaniso wa Djesu ungatibetsera kudini kuti tirumbwe tinocingwa?

⁷ Mushobo umweni unotibatsira wekurumbwa tinocinangwa cekuparidzira, nge cekuteedzera muezaniso wa Djesu. Iyena aazi kusiya kuti ciro cipi haco cimukangaidze pa basa rake rekuparidza cokwadi. (Ju. 18:37) Sathani paakamupasa “umambo wese we nyika uye no mbiri yawo,” Djesu aazi kuwira pa murau uu. Uyewo aazi kutendera kugadzwa kuti agare mambo. (Mt. 4:8, 9; Ju. 6:15) Djesu aazi kukangaidzwa nge cido cekuda upfumi we nyama, aatombozi kusiya kuti kuzondwa kumuimise pa basa rekuparidza. (Ru. 9:58; Ju. 8:59) Na isusuwo tingarumbwa tinocinangwa pa basa redu apo kutenda kedu pakunoedzwa. Tinodikana kuteedzera zano re muphostori Pauro. Iyena wakakohomedzesa aKristu kuti ateedzere muezaniso wa Kristu kuti “asarembe uye asasiye”!—Ahe. 12:3.

8. Cinyi cinozwi mwoyo unononoka kutsamwa, uye ngei tecidikana kugara nawo?

⁸ Kunonoka kutsamwa i simba rinoita kuti munhu akwanise kuetsera dakara zviro zvakashata zvaa zvacinja. Pa nguwa dzimweni tinosongana no migariro yakashata uye isusu tinoda kuti zviro izvi zvipere ciripori poco. Kana kuti tinoda kuti zvatinoda zviitike. Pa zviitiko zviri izvi, tinodikana kugara no mwoyo unonoka kutsamwa. Muphorofita Abhakuki waida maningi kuona mugumo we zve masimba-masimba mu nyika ye Djudha. (Hab. 1:2) Afundi a Djesu aiimira kuti Umambo “uwiye ciripori poco” kuti aaponese pa nyara dze Aroma. (Ru. 19:11) Uye isusu atione nguwa ye kuti Umambo wa Mwari upedze ushaishi uye wounzisa nyika ipsva no runyararo. (2Pe. 3:13) Asi zviro izvi zvisati zvaitika, tinodikana kugara no mwoyo unonoka kutsamwa uye kuetsera nguwa kwayo ya Djehovha. Onai kuti Djehovha unotifundisa kudini kuti tigare anhu ano mwoyo unononoka kutsamwa.

9. Miezaniso ipi inopangidza kuti Djehovha uno mwoyo unononoka kutsamwa?

⁹ Djehovha ndiye muezaniso wakanaka uye wakakwana we munhu unonoka kutsamwa. Ndambi isai yaitika, iyena wakapasa nguwa yakawanda Nowa kuti awake areka uye “aparidzire unatsi.” (2Pe. 2:5; 1Pe. 3:20) Abrahamu paakaita mibvuzo yakawanda nge zve kuparadzwa ke Sodhoma ne Gomora, Djehovha wakamuzwira no mwoyo unonoka kutsamwa. (Ge. 18:20-33) Ke makore akawanda, dzinza re aIsraeri ainga asikateereri Mwari, kunyazi zvakadaro iyena wakapangidza mwoyo unonoka kutsamwa. (Ne. 9:30, 31) Uye nyamasi tiri kuona kuti Djehovha aazi kucinja uciri kurumbwa ano mwoyo unononoka kutsamwa.  Iyena uciri kukweya anhu eciapasa nguwa yekuti awona “agume pa kucinyuka.” (2Pe. 3:9; Ju. 6:44; 1Ti. 2:3, 4) Patinorangarira muezaniso wa Djehovha, amutendi kuti tino zviro zvakanaka zvinoita kuti tirumbwe teciparidzira uye kufundisa no mwoyo unononoka kutsamwa here? Asi ngatione zvino muezaniso we mu Bhaibheri unoseenzeswa ndi Djehovha kuti atifundise kugara anhu anononoka kutsamwa.

10. Tinofundei no muezaniso uri pana Tiyago 5:7, 8?

¹⁰ Erengai Tiyago 5:7, 8. Muezaniso we murimi unotifundisa kugara anhu anononoka kutsama. Zvezvirokwazvo kuno miti inokura nokukasika. Asi kuno miti dzimweni kunyanya dziya dzinobara micero, dzinotora nguwa yakawanda kuti dzikure. Ku Israeri, miti dzaitora mwedzi mitanhatu kuti dzikure. Murimi waidikana kusima mbeu mvura yekutanga ya outono, uye waizokorora mvura ye primavera yaa yapera. (Mk. 4:28) Kuetsera kunoizwa nge murimi muezaniso wakanaka katiri. Asi azvirinyorepi.

11. Mwoyo unononoka kutsamwa unotibetsera kudini pa basa re kuparidza?

¹¹ Nge kusama kukwana kedu, tinomuitiro we kuda kuona makomborero ciripori poco. Asi kuti muti ubare micero murimi unodikana kuuonerera—iyena unodikana kurima, kusima beu, kusakura uye kudirira. Basa rekuita afundi rinodawo kupeta masimba mazuwa ese. Zvinotora nguwa kuti mufundi abvise unhu wese wakaita hingana shango we kusanangura uye wekusada kuzwa mipango. Kana tikagara anhu anononoka kutsama, zvinetso azvizoiti kuti titsukware. Kunyazi amweni ecitambira zvakanaka masoko atinoparidza, tinodikana kugara no mwoyo unononoka kutsamwa. Atidikani kubambidzira mufundi kuti akure mukutenda. Kunyazi afundi a Djesu nguwa dzimweni ainonoka kuzwisisa zvaaifundiswa. (Ju. 14:9) Edzurirai  kuti tinokwanisa kusima no kudirira, asi Mwari ndiye unoita kuti zvikure.—1Ako. 3:6.

12. Tingapangidzira kudini mwoyo unononoka kutsamwa patinoparidzira abereki asikatendi?

¹² Dii rimweni rinoda mwoyo unonoka kutsamwa, ndipona patinoparidzira abereki asikatendi. Asi ciro cingatibetsera ciri pana Muparidzi 3:1, 7, pano . . . “Nguwa yekunyarara no nguwa yekureketa.” Pa zviitiko zvimweni tingakwanisa kugara takanyarara uye tosiya kuti muhambiro wedu wakanaka utipupurire. Asi tinodikana kugarawo takagadzirira kureketa cokwadi pese patinoona mukana. (1Pe. 3:1, 2) Zvakanakawo kuphanisira pa basa rekuparidza, asi tinodikana kupangidza mwoyo unononoka kutsamwa ku anhu ese—kutobatanidzawo anhu e mu mhuri yedu.

13-14. Miezaniso dzipi dzatingateedzera kuti tigare anhu anononoka kutsamwa?

¹³ Tingafundira kugara no mwoyo unononoka kutsamwa nge muezaniso wakasiiwa no aseenzi akagondenga e mu nguwa ye kare uye e mu nguwa yatiri kurarama. Abhakuki waida maningi kuona mugumo we zviro zvakashata, asi iyena wakapangidza mwoyo unononoka kutsamwa paakati: “Ndicarumbwa ndecietsera pa mbuto yangu yekurinda.” (Hab. 2:1) Mu phostori Pauro wakatendera kuti waida “kupedza” basa rake rekuparidzira. Asi iyena wakarumbwa ecipa “ucapupu wakabamba e masoko anopfadza.”—Zvi. 20:24.

¹⁴ Rangariraiwo muezaniso we kazado imweni yakabuda ku cikora ce Gileadhi. Iwona akaendeswa ku nyika isina Apupuri a Djehovha akawanda. Uye akawanda e mu nyika yakhona aatendi, uye kazado ii aizi kugumira anhu akawanda ano cido ce kufunda Bhaibheri. Nge dii rimweni, adoni awo aainganawo ku cikora ce Gileadhi ainga ecisenza ku nyika dzimweni, airumbwa ecitumira masoko anopfadza e afundi awo akawanda aibudirira. Asi kazado ii yakarumbwa ino mwoyo unononoka kutsamwa. Kunyazi basa rawo rekuparidza rainga risikabudiriri mu ndima ii, iwona aazi kusiya kuparidzira. Mu masure me kuparidzira ke makore anokwa kuita masere mu ndima yainga isikabudiriri, iwona akapfara maningi paakaona umwe we mufundi wawo ecibhabhatidzwa. Muezaniso uu we kare unobatana papi no muezaniso wa nyamasi? Iwona aazi kuita umbwa uye aazi kusiya nyara dzawo dzeciremba, uye Djehovha akakomborera kunonoka kutsamwa kawo. Izvi zvinoita kuti tigare “ateedzeri e aya anogara nhaka ye zviro zvakagondeswa ecizviona mukubatanizwa nge kutenda uye mwoyo unononoka kutsamwa.”—Ahe. 6:10-12.

15. Kutenda kunotibetsera kudini kuti tirumbwe tecida basa rekuparidzira?

¹⁵ Kutenda kunotiita kuti tisasiye nyara dzedu dzeciremba. Onai zvingaitika. Cekutanga, isusu tinotenda masoko atinoparidza. Ndiyo ndaa tinoita zviri zvese kuti tiparidzire ku anhu ese. Isusu tinogonda zvipikirhwa zviri mu Soko ra Mwari. (Pis. 119:42; Isa. 40:8) Tiri kuona uphorofiti we Bhaibheri yecidzadzika mu mazuwa atiri ano. Tirikuonawo anhu eciseenzesa mazano e Bhaibheri uye ecicinja mu upenyu wawo kuti agare zvakanaka. Zvese izvi, zvinotiita kuti tigare no rugondo rekuti anhu ese anodikana kuzwa masoko anopfadza e Umambo.

16. Maererano na Pisarema 46:1-3, kutenda muna Djehovha uye Djesu kunotibetsera kudini kuti tirumbwe teciparidzira?

¹⁶ Mushobo we cipiri, isusu tinotenda muna Djehovha, Muridzi we masoko atinoparidza, uye tinotenda muna Djesu, wiya wakasanangurhwa ndi Djehovha kuti agare Mambo  we Umambo. (Ju. 14:1) Azvinei ne mugariro wedu, Djehovha ucarumbwa ari mbuto yedu yekutizira uye simba redu. (Erengai Pisarema 46:1-3.) Kusiya izvi, tino rugondo rekuti Djesu uri kutungamirira basa rekuparidzira ari kudenga, eciseenzesa simba uye ciremera caakapaswa ndi Djehovha.—Mt. 28:18-20.

17. Panganidzai kuti ngei tecidikana kurumbwa teciparidza.

¹⁷ Kutenda kunotunhudzira rugondo redu rekuti Djehovha ucakomborera masimba edu. Uye izvi zvingaitika nge mushobo watisikakariri. (Mup. 11:6) Ngo muezaniso, tinoziya kuti mamiriyonji e anhu anouya pa zviro zvinopangidza mabhuku edu e pa zvingoro. Hino mushobo uu uri kuseenza here? Zvezvirokwazvo! Ushumiri Hwedu Uye kurarama kwechiKristu wa November 2014 wakapanganidza mufundi we ku universidade waida kuita basa rakaringana ne Apupuri a Djehovha. Iyena wainga asikakwanisi kugumira Nyumba yo Umambo, asi wakagumira meza yainga ino mabhuku pa cikora caaifundira, uyewo wakagumira masoko aaida pa kuita basa rake. Pakupdzesera, iyena wakazogara Mupupuri wa Djehovha wakabhabhatidzwa uye nyamasi waakuseenza se piyonero we nguwa dzese. Eshiperiyensiya yakadai inotiita kuti tide kurumbwa teciparidzira. Izvona zvinopangidza kuti kuciri no anhu aciri kuda kuzwa masoko e Umambo.

18. Ngei tecidikana kugara norugondo rekuti zuwa ra Djehovha ricauya pa nguwa kwayo?

¹⁸ Tinorugondo rekuti basa re kuparidzira ricapera pa nguwa kwayo. Rangarirai zvakaitika mu mazuwa a Nowa. Djehovha wakapangidza kuti unonyasa kuonerera nguwa zvakakwana. Makore 120 asati aguma, Djehovha wainga atogadza zuwa raaizounza Ndambi. Makore akazouya, Djehovha wakapa Nowa basa rekuwaka areka. Pamweni, mu makore 40 kana 50 Ndambi isati yauya, Nowa wakarumbwa eciseenza no simba rese. Kunyazi anhu ainga asikamuzwiri, Nowa wakarumbwa eciparidza masoko e kungwadza dakara zuwa iro Djehovha wakati yaa nguwa yokukanda zvinyama mu areka. Hino, pa nguwa kwayo, “Djehovha wakafunga musuwo.”—Ge. 6:3; 7:1, 2, 16.

19. Makomborero api aticawina kana tikasama kusiya nyara dzedu dzeciremba?

¹⁹ Mbai-mbai pano, Djehovha ucareketa kuti basa rekuparidzira Umambo rapera. Iyena “ucafunga musuwo” we nyika ya Sathani uye ounza nyika ipsva ino unatsi. Dakara zuwa iri raguma, teedzerai Nowa, Abhakuki, uye ne amweni asikazi kusiya nyara dzawo dzeciremba. Garai muno cinangwa, garai muno mwoyo unononoka kutsamwa uye garai no kutenda kakabamba mu zvipikirhwa zva Mwari.