1. Afundi a Djesu eciDjudha akatii ku cikwata cimweni ce anhu?

CIKWATA cikuru ce anarume no anakadzi e nyika dzakawanda ainga aenda ku Djerusarema. Anhu aya aireketa mireketero yakawanda yakasiyana-siyana. Uye zuwa irona kakaitika cishamiso. Grupu rimweni re afundi eciDjudha a Djesu akatanga kureketa mireketero ye anhu aya aiavhakacira. Izvi zvakashamisa cikwata ce anhu aya. Asi cakanyanya kubaya mwoyo ye anhu aya, masoko akareketwa no afundi a Djesu eciDjudha uye masoko akareketwa ne muphostori Pedru. Awona akafundira kuti kana ecida kuponeswa, aidikana kupangidza kuti anotenda muna Djesu Kristu. Awona akapfara maningi zvekuti akabvunzisa kuti: “Tinodikana kuitei?” Pedru wakati: “Umwe na umwe wenyu ngaabhabhatidzwe.”—Zvi. 2:37, 38.

2. Ticaonei mu fundo ino? (Onai foto ye pa kapa.)

² Mu masure me izvi pakazoitika ciro cinoshamisa. Pa zuwa irona, anhu anokwana kuita 3000 akabhabhatidzwa uye akagara afundi aKristu. Uku kainga kutanga ke basa guru rakabhuya Djesu kuti afundi ake aite —basa rekuita afundi. Na nyamasi uno, afundi a Djesu arikurumbwa eciita basa iri. Mu mazuwa edu ano, azviiti kubetsera munhu kuti agume pakubhabhatidzwa ke nguwa doko basi. Izvi zvingatora mwedzi dzakawanda, gore rimwe kana kuti makore akawanda. Kana muri kufunda ne munhu Bhaibheri, imwimwi munonyasa kuziya kuti kuita afundi zvinoda kupeta masimba. Mu fundo ino, ticaona zvamunodikana kuita kuti mubetsere mufundi wenyu we Bhaibheri kuti agume pakubhabhatidzwa.

3. Maererano na Mateu 28:19, 20, mufundi unodikana kuitei kuti agume pakubhabhatidzwa?

³ Asati abhabhatidzwa, mufundi unodikana kuseenzesa zvinoreketwa ne Bhaibheri. (Erengai Mateu 28:19, 20.) Mufundi paanoita izvi, iyena unogara hingana “mwanarume wakangwara” unorekethwa mu muezaniso wa Djesu uyo wakacera zvakadzika kuti awakire nyumba yake pa buwe. (Mt. 7:24, 25; Ru. 6:47, 48) Tingabetsera kudini mufundi kuti aseenzese zviya zvaanofunda? Ngationei zviro zvitatu zvatinodikana kuita.

4. Tingabetsera kudini mufundi kuti arumbwe ecipeta masimba kuti agume pakubhabhatidzwa? (Onai bhokisi rakazwi “ Betserai Mufundi Wenyu kuti Agare ne Zvinangwa uye Azvidzadzise.”)

⁴ Betserai mufundi wenyu kuti agare no zvinangwa. Ngei mecidikana kudaro? Rangarirai nge zve muezaniso uu: Toti murikuda kuita rhwendo rakareba nge karu. Pamweni imwimwi mungasanangura kuima mu mbuto dzakarungama mu makwanza. Nge kudaro, rhwendo renyu arizorembesi. Zvimwe-zvimwezvoo, mufundi unodikana kugara no zvinangwa zvaangakwanisa kugumira mu nguwa doko basi, kana akadaro, iyena ucazwisisa kuti zvinobvira kubhabhatidzwa. Kuti mubetsere mufundi wenyu kuti abudirire, seenzesai pakazwi “Cinangwa” mu bhuku ra Pfadzwai ne Upenyu Nokusikaperi!. Pa kupera ke fundo rimwe na rimwe, cedzai nge zvekupindirana kunoita cinangwa icona no zvafundhwa ne mufundi wenyu. Kana mecida kuti mufundi wenyu agumire cinangwa cimweni cakasiyana, mungacitara pakazwi “Masoko amweni.” Rumbwai meciseenzesa dii iri rebhuku kuti mucedze no mufundi wenyu zvakaringana no zvinangwa zvake, zvingaita zvakareba kana kuti haiwa.

5. Maererano na Marko 10:17-22, Djesu wakabvunza mwanarume mupfumi kuti aitei uye ngei?

⁵ Betserai mufundi wenyu kuti aite cinjo dzakasiyana mu upenyu. (Erengai Marko 10:17-22.)  Djesu waiziya kuti zvaizoshupha kuti mwanarume mupfumi atengese zviro zvake zvese. (Mk. 10:23) Kunyazi zvakadaro, Djesu wakabvunza mwanarume uya kuti aite cinjo ii yakakura mu upenyu wake. Ngei? Ngekuti Djesu akamuzwira usisi. Nguwa dzimweni, isusu atikohomedzesi mufundi kuti aseenzese zviya zvaanofunda ngekuti tinoona hingana kuti aasati agadzirira kuti aite cinjo. Zvirokwazvo kuti kusiya miitiro yekare uye wopfeka unhu upsva, ciro cinotoda nguwa. (Ako. 3:9, 10) Asi, kana mukakasika kureketa ngezvazvo no mufundi wenyu, ucaitawo cinjo nokukasika. Pamunocedza no mufundi wenyu zvakaringana na izvi, munonga mecipangidza kuti munomuda.—Pis. 141:5; Zvie. 27:17.

6. Ngei tecidikana kuseenzesa mibvunzo dzakaringa no maonero?

⁶ Zvinokosha kuti tibvunzise mufundi wedu zvaanorangarira nge zve nyaya imweni. Seenzesai mibvunzo dzakaringana no zvaanorangarira kuti muziye zvinozwisiswa uye zvinotendwa no mufundi wenyu. Kana mukadaro, zvicamuitira nyore kuti muzocedze naye nge zve nyaya dzinoshupha. Bhuku ra Pfadzwai ne Upenyu Nokusikaperi! rino mibvunzo dzakawanda dzakaringana ne maonero. Ngo muezaniso, fundo 04 ino mubvunzo unoti: “Munorangarira kuti Djehovha anozwa kudini paya pamunoseenzesa zina rake?” Fundo 09 ino mubvunzo unoti: “Imwimwi maizoda kunamatira nge zviro zvipi?” Pa kutanga, pamweni mufundi wenyu angatoda nguwa yekuti akwanise kudaira mubvunzo wakaringana nge zve maonero. Asi imwimwi mungamufundisa kurangarira. Ngo muezaniso, itai kuti mufundi wenyu arangarire nge zve tsamba dze Bhaibheri kana kuti mafoto ari mu fundo yakhona.

7. Tingaseenzesa kudini maeshiperiensiya e anhu amweni kuti tibetsere mufundi?

⁷ Kana mufundi wenyu akazwisisa nge zve cinjo dzaanodikana kuita, seenzesai maeshiperiensiya akaitika mu upenyu kuti mu mukohomedzese kuzviita. Ngo muezaniso, kana mufundi wenyu eciona hingana kuti zvinoshupha kupinda misangano, mupangidzei vhidhiyo inoti Jehovha Akava Nehanya Neni iri padii rinozwi “Ziyai zvakawanda” mu fundo 14. Mu fundo dzakawanda dze bhuku ra Pfadzwai ne Upenyu Nokusikaperi! mucagumira maeshiperiensiya akaitika mu upenyu pa dii rakazwi “Fundai Zvakawanda” uye “Ziyai zvakawanda”. * Garai makangwarira kuti musaezanise mufundi wenyu no anhu amweni, mecibhuya zviro zvakaita hingana: “Kana iyena akakwanisa kuita izvi, imwimwi mucazvikwanisawo.” Siyai kuti mufundi agume pakurangarira kudaro. Ciro cakanaka nge cekubhuya zviro zvakabetsera munhu we mu vhidhiyo kuti aseenzese mazano e mu Bhaibheri. Pamweni mungabhuya tsamba kana kuti ciro cakaizwa no munhu wakhonewo. Pese pazvinobvira, bhuyai mabetserhwe akaizwa munhu uu ndi Djehovha.

8. Tingabetsera kudini mufundi wedu kuti ade Djehovha?

⁸ Betserai mufundi wenyu kuti ade Djehovha. Mungazviita kudini? Pese panomuka mukana, bhuyai nge zve unhu wa Djehovha. Betserai mufundi wenyu kuti aone kuti Djehovha ndi Mwari anopfara uye kuti iyena ari ku dii re aya anomuda. (1Ti. 1:11; Ahe. 11:6) Pangidzai mufundi kuti kuseenzesa zvinoreketwa ne Bhaibheri kunobetsera uyewo kuti rubetso iri cipangidzo cokuti Djehovha anomuda. (Isa. 48:17, 18) Mufundi paanonyanya kuda Djehovha, iyena ucazwa ecida kuita cinjo dzinodikana muupenyu.—1Ju. 5:3.

9. Maererano na Marko 10:29, 30, cinyi cingabetsera mufundi we Bhabibheri kuti aite cinjo kuti agare mufundi wakabhabhatidzwa?

⁹ Kuti mufundi we Bhaibheri agume pakubhabhatidzwa, iyena unodikana kuita cinjo mu upenyu wake. Kuita hingana mwanarume mupfumi wamboreketwa nge zvake, afundi amweni anodikana kusiya zviro zvimweni zvokunyama. Ngo muezaniso, kana eciseenza no ciro cimweni cisikapindirani no Bhaibheri, pamweni awona anodikana kucinja basa. Kupinda izvona, afundi akawanda pamweni anodikana kusiya sure shamwari dzisikadi Djehovha. Amweni angarambwa nge e mu mhuri asikapfariri Apupuri a Djehovha. Djesu waitozviziya kuti kuita cinjo dzakadaro zvainga zvisiripi nyore ku anhu amweni. Asi iyena wakapikira kuti, aya aizosanangura kumuteera, aazogumi pakutsumba. Awona aizokomborerhwa maningi nge mhuri yekumwiya ino rudo. (Erengai Marko 10:29, 30.) Mungaitei kuti mufundi wenyu we Bhaibheri atambire cipo icona?

10. Mafundei kubva pa eshiperiensiya ya Manuel?

¹⁰ Garai shamwari ye mufundi wenyu. Zvinokosha kuti mupangidze ku mufundi wenyu kuti munomuda. Ngei? Onai zvakareketwa na Manuel, unogara ku México. Ecirangarira pa nguwa yaainga aciri mufundi we Bhaibheri, iyena unoti: “Tisati tafunda, mufundisi wangu waipsvaka kuziya kuti ndinotamba here. Iyena waindibetsera kuti ndigare ndakasudzunuka uye waindisiya kuti ndirekete nge zve nyaya ipi hayo. Inini ndaikwanisa kuona kuti zvezvirokwazvo waindida.”

11. Ngei zvakanaka kuti mufundi apedze nguwa nomufundisi wake?

¹¹ Djesu waitora nguwa kuti acedze no afundi ake. Itai zvimwezvo no mufundi wenyu. (Ju. 3:22) Kana iyena ecibudirira, zvakadini kumupika kuti mumborhya mwese, kana kuti mumboona mwese urongwa we pamwedzi we JW broadcasting? Izvi zvingabetsera mufundi wenyu kunyanya mu mazuwa ekuzorora, ngekuti  ungakwanisa kuzwa ari ega mu mazuwa awona. Kazibwe unogara ku Uganda unoti: “Andizi kufunda nge zva Djehovha pa nguwa yekufunda basi, asi pa nguwa yendaitamba nokucedza no mufundisi wangu. Inini ndakakwanisa kuona kuti, Djehovha anodadi aseenzi ake uye awona anopfara zvezvirokwazvo. Zviro izvi ndizvona zvandaida kamare mu upenyu wangu.”

12. Ngei zvakanaka kuti tipike aparidzi akasiyana-siyana ku fundo ye Bhaibheri?

¹² Pikai aparidzi akasiyana-siyana ku fundo ye Bhaibheri. Nguwa dzimweni, zvingaita nyore kuenda tega koitisa fundo kana kurumbwa tecitora muparidzi umwe-umweo basi kuti tiende naye. Kunyazi kuita izvi kusikazi kushata, asi kana tikapika aparidzi akasiyana-siyana, kucabetsera maningi afundi e Bhaibheri. Dmitrii unogara ku Moldávia unoti: “Muparidzi umwe na umwe waiuya no mufundisi wangu ku fundo, waipanganidza zviro nge mushobo wakasiyana. Izvi zvakandibetsera kuti ndiwone zviro nge mushobo umweni. Kupinda izvona, zuwa randakatanga kupinda misangano, andizi kupsveruka maningi nge kuti ndainga ndaakuziya hama no hanzvadzi dzakawanda.”

13. Ngei tecidikana kubetsera mufundi kuti apinde misangano?

¹³ Betserai mufundi wenyu kuti apinde misangano. Ngei? Ngekuti Djehovha akati anamati ake aungane. Izvi zvinobatanidzwa pakunamata katinoita. (Ahe. 10:24, 25) Kupinda izvona, hama no hanzvadzi dzedu i mhuri yedu ye ku mwiya. Patinonga tiri tese ku misangano, zvinoita hingana kuti tirikurhya tese pamwepo zvokurhya zvinonaka. Zvinokosha kuti mubetsere mufundi wenyu kuti apinde misangano, ngekuti iri idanho rinokosha ringamubetsera kuti agume pakubhabhatidzwa. Nge dii rimweni, zvingaita kuti mufundi wenyu unocinetso cokukonerhwa kupinda misangano. Kana zviri izvona, bhuku ra Pfadzwai ne Upenyu Nokusikaperi! ringamubetsera kudini?

14. Tingakohomedzesa kudini mufundi wedu kuti apinde misangano?

¹⁴ Seenzesai fundo 10 ye bhuku ra Pfadzwai ne Upenyu Nokusikaperi! kuti mubetsere mufundi wenyu. Bhuku iri risati rabudiswa, aparidzi amweni akapikwa kuti aongorore fundo ii. Awona akati fundo ii yakaseenza ngomwazvo uye yakabetsera afundi awo kuti atange kupinda misangano. Asi zviripamhene kuti amudikani kuimira dakara pa fundo 10 kuti mupike mufundi wenyu kuti apinde misangano. Zviitei nokukasika, uye rumbwai mecimupika nguwa dzese. Mufundi umwe na umwe unosongana ne zvinetso zvakasiyana-siyana. Ndiyo ndaa, ngwarirai kuti muone zvinetso zviri kusongana ne mufundi wenyu, uye onai kuti mungamubetsera kudini. Kunyazi ecinonoka kupinda misangano, musaore mwoyo. Garai ne mwoyo unononoka kutsamwa, asi rumbwai mecimupika.

15. Zviro zvipi zvingaita kuti mufundi wedu atye?

¹⁵ Imwimwi makazwa kutya pamakagara Mupupuri wa Djehovha here? Pamweni maiona hingana kuti mainga musikazombokwanisi kuparidzira anhu amweni. Kana kuti maitya kuti e mu mhuri yenyu uye shamwari dzenyu dzainga dzisikazomupfariri. Kana zviri izvona, pamweni mungazwisisa mufundi wenyu. Djesu waizviziya kuti anhu amweni pamweni aizotya. Asi iyena wakakohomedzesa afundi ake kuti asasiye kutya keciapingaidza kuseenzera Djehovha. (Mt. 10:16, 17, 27, 28) Djesu wakaitei kuti abetsere afundi ake kuti asatye? Uye mungamuteedzera kudini?

16. Tingafundisa kudini mufundi kuti aparidzire?

¹⁶ Fundisai mufundi wenyu kuti aparidzire. Djesu paakatuma afundi ake kuti aparidzire, pamweni awona akatya. Asi Djesu akaabetsera. Akazviita kudini? Iyena wakabvunza afundikaaidikana kuparidzira uye masoko aanodikana  kuparidzira. (Mt. 10:5-7) Mungateedzera kudini Djesu? Betserai mufundi wenyu kuti aziye kaangaparidzira. Ngo muezaniso, mubvunzisei kuti: ‘Pano munhu waunoziya waizopfara nge kuziya cokwadi ici ce Bhaibheri here?’ Hino betserai mufundi wenyu kuti arangarire mushobo uri nyore wekuti arekete no munhu uyu. Kana zvecibvira, mungafundira naye meciseenzesa misoro inoteedzana inoti: “Anhu Amweni Anoti” uye “Kana Munhu Akabvunzisa”, munozvigumira mu bhuku ra Pfadzwai ne Upenyu Nokusikaperi!. Uye pamunonga meciita izvi, fundisai mufundi wenyu kuti aseenzese Bhaibheri kuti apase mhinduro iri nyore uye no upfawi.

17. Tingaseenzesa kudini Mateu 10:19, 20, 29-31 kuti tibetsere mufundi wedu kuti agonde Djehovha?

¹⁷ Betserai mufundi wenyu kuti agonde na Djehovha. Djesu wakagondesa afundi ake kuti Djehovha anoada uye ndiyo ndaa aizorumbwa eciabetsera. (Erengai Mateu 10:19, 20, 29-31.) Edzurirai mufundi wenyu kuti Djehovha acamubetserawo. Mushobo umweni wekubetsera mufundi wenyu kuti agonde na Djehovha, nge we kuita munamato naye nge zve zvinangwa zvake. Franciszek unogara ku Polônia, unoti: “Mufundisi wangu wairumbwa ecireketa nge zve zvinangwa zvangu paiita minamato. Pandakawona kuti Djehovha aidaira minamato yemufundisi wangu, ndakatangawo kuita minamato. Ndakaona kuti Djehovha wakandibetsera pandakapsvaka basa rimweni uye pendakakumbira mazuwa amweni kuti ndipinde misangano ne magungano.”

18. Djehovha anorangarirei nge zve basa rinoizwa no afundisi e Bhaibheri?

¹⁸ Djehovha anorangarira nge zve afundi edu e Bhaibheri. Uye iyena anoda maningi afundisi ngekuti anoziya nge zve kupeta masimba kaanoita kuti afundise amweni nge zve cokwadi cakaringa na Mwari. (Isa. 52:7) Zvingaita kuti pa nguwa ino, imwimwi amuripi kuitisa fundo. Hino, khorovherai mikana ii yekuperekedza aparidzi amweni paanoenda koitisa fundo ye Bhaibheri. Nge kudaro, imwimwi mucabetserawo kuti afundi aya agume pakubhabhatidzwa.