1. Ngei aseenzi a Djehovha angakwanisa kuzwa ari ega nguwa dzimweni?

AKAWANDA edu tinosozwa hingana tiri tega nguwa dzimweni. Ku hama dzimweni, muzwiro iwona unodarika nokukasika. Asi ku hama dzimweni, muzwiro wakadai unopedza nguwa yakareba. Ku hama dzedu dzimweni, zvingaashuphira kudjairana no ungano ipsva. Hama dzimweni dzinobva mu mhuri yakanyasa kubatana, asi ngekuthutha kaakaita ecienda nhambo, angapedzesera oozwa hingana ari oga. Uye amweni anozwa cisuwo ce mudiwa wawo unonga akafa. Uye amwenizve, kajinji aya aciri apsva mu cokwadi anozwa ari oga paanorambwa kana kuteererhwa nge anyaukama awo uye shamwari dzawo dzekare dzisiripi aKristu.

2. Mibvunzo dzipi dzicadairhwa mu fundo ino?

² Djehovha unoziya uye unozwisisa zvese zvakaringana na isusu. Iyena unoziya patinozwa tiri tega uye unoda kutibetsera kuti tikunde muzwiro wakadaro. Asi Djehovha unotibetsera kudini? Tingaitei kuti tidzibetsere pacedu isusu? Uye tingabetsera kudini amweni ari mu ungano anozwa hingana ari ega? Ngatione mhinduro dze muibvunzo idzi.

3. Djehovha wakapangidzira kudini kuti waizwira usisi Eriya?

³ Djehovha unoda kuti aseenzi ake ese apfare. Iyena uri dhuze ku umwe na umwe wedu uye unozwisisa patinozwa takaora mwoyo. (Pis. 145:18, 19) Onai kuti Djehovha wakapangidza kudini kuti waizwira usisi muphorofita Eriya. Mwanarume uu wakagondeka, wakararama mu nguwa yainetsa mu nguwa ye aIsraeri. Aseenzi a Djehovha mu nguwa iyona, aishuphwa uye aiteerhwa, uye Eriya ndiyena wainyanya kudiikanwa nge azondi a Djehovha. (1Mad. 19:1, 2) Kusiya izvona, Eriya wairangarira  kuti wainga asara ega basi hingana muphorofita wa Djehovha. Izvi zvakaita kuti iyena atobambirire kuora mwoyo. (1Mad. 19:10) Mwari wakakasika kubetsera Eriya. Djehovha wakatuma ngirozi kuti agondese muphorofita wake kuti iyena wainga asiripi ega—aIsraeri akawanda ainga eciseenzera Djehovha akagondeka!—1Mad. 19:5, 18.

4. Tsamba ya Marko 10:29, 30 inopangidza kudini kuti Djehovha unozwira usisi aseenzi ake anozwa hingana ari oga?

⁴ Djehovha unoziya kuti tizogume pa kumuseenzera, amweni edu akasiya sure zviro zvakawanda. Zvingaita kuti takaruza rubetso re anyaukama uye madzishamwari e kare asiripi aKristu. Pamweni Pedru ecinetseka wakabvunzisa Djesu kuti: “Takasiya zviro zvese kuti timuteere, ticawineyi?” (Mt. 19:27) Djesu wakagondesa afundi ake kuti ungano yaizogara hingana mhuri kaari. (Erengai Marko 10:29, 30.) Uye Djehovha Baba edu e kudenga, unogondesa kuti ucabetsera ese anoda kumuseenzera. (Pis. 9:10) Ngationei zviro zvimweni zvamungaita kuti mukunde muzwiro wekuzwa hingana muri mwega.

5. Ngei zvakanaka kugara mecirangarira kubetserhwa kamuri kuizwa na Djehovha?

⁵ Rangarirai kubetswa kamuri kuizwa na Djehovha. (Pis. 55:22) Kana mukadaro, mucakwanisa kugara no maonero ari pakati no pakati nge nyaya yenyu. Hanzvadzi imweni isikazi kuwakwa inozwi Carol *, uye iri yoga mucokwadi, inoti: “Ndikaringira sure uye ndonyasa kurangarira nge zve mabetserhwe e ndakaizwa na Djehovha mu nguwa dzainetsa, zvinoita kuti ndigare no rugondo rekuti andiripi ndega uye kuti Djehovha acarumbwa ana inini.”

6. 1 Pedru 5:9, 10 ingabambisa kudini aya akawora mwoyo?

⁶ Rangarirai mabetsere ari kuita Djehovha hama dzimweni dzirikuzwawo hingana dziri dzoga. (Erengai 1 Pedru 5:9, 10.) Hiroshi, hama iri yoga mucokwadi mu mhuri yake inoti: “Munokwanisa kuona kuti mu ungano, apana munhu urikurarama upenyu wakakwana. Kuziya kuti hama dzese dzirikuita  zviro zvese kuti dzipfadze Djehovha, zvingabambisa aya akaita hingana inini, ari oga mu cokwadi.”

7. Munamato ungamubetsera kudini?

⁷ Garai makabatikana pa zviro zvekunamata. Izvi zvinobatanidza kubvunza Djehovha zvese zvamuri kuzwa kamare. (1Pe. 5:7) Onai zvakareketwa nge djaha rimweni Mupupuri wa Djehovha unozwi Massiel. Ngekuti iyena wainga ari ega basi mu mhuri make wakasanangura kuseenzera Djehovha, iyena waizwa hingana ari ega. Iyena unoti: “Ciro cakandibetsera kuti ndisazwe hingana ndiri ndega, kunamata kuna Djehovha no mwoyo wese. Djehovha wakagara Baba kamare kandiri. Ndainamata kaari mazuwa ese uye kakawanda pazuwa ndecimubvunza mazwire andainga ndeciita.”

8. Kuerenga no kunyasa kurangarira Soko ra Mwari, zvingamubetsera kudini?

⁸ Erengai Soko ra Mwari ma zuwa ese uye nyasai kurangarira ngano dze Bhaibheri dzinonyasa kupanganidza rudo ra Djehovha kamuri. Bianca, hanzvadzi inoshingirira masoko e kushorhwa nge anhu e mu mhuri make, inoti: “Kuerenga ngano dze Bhaibheri dze aseenzi a Djehovha akabatana ne migariro yakaita hingana yangu, zvinondibetsera maningi.” AKristu amweni anokanda tsamba dze Bhaibheri mu musoro, kajinji tsanba dzinonyaradza dzakaita hingana Pisarema 27:10 uye Isaya 41:10. Amweni anoti, kuzwa audhiyo dze Bhaibheri dzakagaravharhwi uye ne mabhuku anofundwa pa misangano, zvinoabetsera kuti asazwe ari ega.

9. Ngei kupinda misangano kecimubetsera?

⁹ Petai masimba ari ese kuti mupinde misangano nguwa dzese. Mucazwa kubambiswa nge urongwa we kunamata uye mucanyasa kuziyana no hama. (Ahe. 10:24, 25) Massiel, wamborekethwa nge zvake, unoti: “Kunyazi ndiri munhu wakanyararisa, ndakasanangura kuti ndipinde misangano yese uye kutodairawo pa misangano. Izvi zvakandibetsera kuti ndizwe ndiri imwe nhayi ye ungano.”

10. Ngei zvecikosha kushamwaridzana no hama ne hanzvadzi dzedu?

¹⁰ Shamwaridzanai no hama dze ungano. Psvakai kushamwaridzana ne hama dze mu ungano dzinomiezaniso yakanaka, dzingaita hama dzidoko kana dzakura kana kuti hama dzekunze ke nyika. Bhaibheri rinotiedzurira kuti ‘uzii unooneka pakati pe acemberi.’ (Djo. 12:12) Asi hama dzakura dzingakwanisa kufundawo zvakawanda no hama dze cidjaha. Dhavhidhi wainga ari mudoko maningi kupinda Djonatani, asi izvona azvizi kuaitisa kuti asagare no ushamwari. (1Sa. 18:1) Dhavhidhi  na Djonatani aitsigirana kuti arumbwe eciseenzera Djehovha kunyazi mu matambudziko akakura. (1Sa. 23:16-18) Irina, hanzvadzi iri yoga mu mhuri mayo hingana Mupupuri wa Djehovha, inoti: “Hama no hanzvadzi dzedu mu ungano, dzingakwanisa kugara madzibaba uye madzikoma no madziyaya katiri. Djehovha unokwanisa kuita kuti awona agare mhuri yatinoda.”

11. Munodikana kuitei kuti mugare no shamwari dze padhuze?

¹¹ Zvingashupha kuita shamwari dzitswa, maka-maka kana muri munhu wakanyararisa. Ratna hanzvadzi yakanyararisa uye yakafunda cokwadi kunyazi nokuphikiswa kakakura, unoti: “Inini ndakaguma pakutendera kuti ndaidikana kupaswa rubetso no mhuri yangu yekumwiya.” Zvingakwanisa kutishuphira kureketa mazwiro edu ku munhu umweni, asi kana mukazviita zvingakwanisa kumubetsera kuti mugare no ushamwari wakabamba. Shamwari dzenyu dzinoda maningi kumukohomedzesa uye kumubetsera, asi imwimwi mungakwanisa kuabetsera kuti aziye kuti angazviita kudini.

12. Kuparidzira kungamubetsera kudini kuti muite ushamwari wakanaka?

¹² Mushobo wakanaka we kuita ushamwari, nge we kubuda mu basa rekuparidzira no aKristu amweni akagondeka kuna Djehovha. Carol wamboreketwa nge zvake, unoti: “Kubuda mu basa rekuparidzira nokuita ma basa amweni e kumwiya no hama ne hanzvadzi dze mu ungano, zvakandibetsera kuti hanzvadzi dzakawanda. Nge kuhamba ke makore, Djehovha akaseenzesa shamwari idzi kuti andibetsere.” Zvezvirokwazvo, kupeta masimba katinoita kuti tiite ushamwari upsva no aseenzi a Djehovha akagondeka, kunobetsera. Djehovha anoseenzesa shamwari idzi kuti atibetsere kuitira kuti tikwanisane no matambudziko, akaita ingana kuzwa muri mwega.—Zvie. 17:17.

13. Tese mu ungano tino ubaba wei?

¹³ Ese ari mu ungano, ano ubaba wekubetsera kuti mugare mbuto ye runyararo uye kubetsera amweni kuti asazwe hingana ari oga. (Ju. 13:35) Masoko edu uye zviito zvedu zvingakwanisa kubetsera amweni! Onai zvakareketwa no hanzvadzi imweni: “Pandakafunda cokwadi, ungano yakagara mhuri yangu. Ndainga ndisikazokwanisi kugara Mupupuri wa Djehovha pasina rubetso rawo.” Zvinyi zvamungaita kuti mubetsere aya ari oga mucokwadi kuti azwe hingana nhengo ye ungano?

14. Mungatei kuti muite shamwari ipsva?

¹⁴ Tangai ndimwi kuita ushamwari no hama ipsva. Tingatanga isusu wene kutora matanho ekutambira no mupfaro hama dzipsva dzinonga dzeciwuya mu ungano. (Aro. 15:7) Ngokudaro, zvinobatanidza zvakawanda pane basi kuwacungamidza. Nge kuhamba ke nguwa, tinodikana kuumba ushamwari wakakura nawo. Hino, garai no upfawi uye pangidzai kuti zvezvirokwazvo munowapfarira. Edzai kuziya zvaari kusongana nazvo, asi musapindire mu nyaya dzawo. Edzurirai kuti zvingashuphira amweni kuti arekete mazwiro awo. Hino ngwarirai kuti musaabambidzire, asi kuti muziye zvaari kuzwa, mungakwanisa kuita mibvunzo no upfawi uye mecingwarira, uye edzai kuzwa mhinduro dzawo no mwoyo unononoka kutsamwa. Ngo muezaniso, mungakwanisa kuwaita mubvunzo wakaita hingana uu, makaziya kudini cokwadi.

15. Hama dzakakura pakunamata dzingabetsera kudini ungano?

¹⁵ Kana hama dzakakura pakunamata, kajinji  akuru e ungano paanopangidza rudo rawo kune amweni, ungano yese inogara yakabamba. Melissa, wakarerhwa mu cokwadi ndi mai ake unoti: “Andikwanisi kutenda zvandakaizirhwa nge hama no hanzvadzi ke makore akadarika, awona ainga abereki kandiri. Awona aindipangidzira rudo uye aipedza nguwa na inini. Pese pandaida kucedza, awona ainga akasudzunuka kucedza na inini.” Mauricio, waizwa hingana ari ega mufundisi wake paakasiya cokwadi unoti: “Akuru akapangidza kuti aindida uye zvakandibetsera maningi. Awona aibudawo neni mu basa rekuparidzira, aindipanganidzira mafundo aakapfarira pa fundo ye Bhaibheri ye munhu ega uye aitambawo bhora neni.” Nyamasi uno, Melissa na Mauricio ari kuseenzera Djehovha mu nguwa yakadzara.

16-17. Tingaiteizve kuti tibetsere amweni?

¹⁶ Abetserei. (Aga. 6:10) Leo, unoseenza hingana misionariyo kure ne mhuri yake unoti: “Kajinji ciro caunoda ngecekupangidzirhwa rudo pa nguwa kwayo. Ndiciri kuedzurira zuwa randakabatana no tsawona ye karu. Pandakazokwanisa kuguma kumba, ndainga ndaakupisika maningi musoro. Ndipona pandakapikwa nge kazado imweni kuti timborhya tese. Anditomborangariri zvatakarhya, asi andikanganwi kundipurutana kaakandiita. Kubvira apona, ndakatanga kuzwa zvakanaka!”

¹⁷ Tese isusu tinoda kupinda misangano mikuru yakaita hingana magungano ne magungano e mutanha. Mu zviitiko zvakadai tingakwanisa kugara ne hama dzedu uye kucedza zvakaringana ne mharidzo. Asi onai zvakareketa Carol, iyena unoti: “Magungano ne magungano e mutanha zvaindinetsera maningi.” Ngei? “I cokwadi kuti ndainga ndakatendererhwa nge hama dzakawanda, asi kuona munhu wese ne mhuri yake, zvainga zvisiripi nyore kandiri. Ii ndiyona nguwa yandainyanya kuzwa ndiri ndega.” Amweni anonetserhwa kupinda misangano mikuru ari ega mumasure mekufirhwa nge mukadzi kana mwamuna. Pano wamunoziya uri kusongana ne mugariro wakadai here? Zvakadini kumbomupika kuti mupinde mwese gungano kana kuti gungano re mutanha rinoteera pamwepo ne mhuri yenyu?

18. Tingaseenzesa kudini tsamba ya 2 Akorinti 6:11-13 patinonga tecitambira hama?

 ¹⁸ Pedzai nguwa nawo. Edzai kupedza nguwa no hama uye hanzvadzi dzakasiyana-siyana, kunyanya aya anozwa hingana ari ega. Tinoda “kufungura mwoyo [wedu],” kunyanya ku hama idzi. (Erengai 2 Akorinti 6:11-13.) Melissa wamboreketwa nge zvake unoedzurira kuti: “Zvaipfadza hama padzaitipika kuti tiende kumba kawo kana kuvhiajari pamwepo no mhuri yawo.” Munokwanisa kurangarira nge zve hama kana hanzvadzi iri mu ungano yenyu yamungakwanisa kutambira ku nyumba kenyu?

19. Ndipapi patinodikana kupedza nguwa no hama dzedu?

¹⁹ Mu nguwa dzimweni, hama dzedu dzicada rubetso redu. Ngo muezaniso, mu mazuwa ekuzorora zvingaashuphira kugara padhuze no anyaukama awo asikatendi. Amweni, pamweni angazwa akatsukwara maningi pa zuwa rakafa hama yawo. Patinoita zviri zvese kuti tigare no hama dzedu pa nguwa idzi dzinonesa, tinonga tecipangidza kuti “tinowada.”—Afi. 2:20.

20. Masoko a Djesu ari pana Mateu 12:48-50 angatibetsera kudini patinozwa tiri tega?

²⁰ Hingana zvetawona, kune zviro zvakawanda zvinoita kuti muKristu azwe ari ega nguwa dzimweni. Asi atidikani kukanganwa kuti Djehovha anozwisisa zvatirikuzwa. Kupinda izvona, iyena unotipasa rubetso ratinoda, kajinji eciseenzesa hama dzedu. (Erengai Mateu 12:48-50.) Uye kuti tipangidze Djehovha kuti tinotenda nge ungano, tinodikana kuita zviri zvese kuti titsigire mhuri yedu yekumwiya. Pasinei no zvamunozwa nguwa dzimweni, imwimwi amuripi mwega. Djehovha acarumbwa ana imwimwi!