Pauro wakatara kuti: “Peciseenzeswa mutemo ndakafa kumutemo, kuti ndigare mupenyu kuna Mwari.”—Aga. 2:19.

Pauro wakatara zvaipindirana ne zvaainga eciita ku ungano dze ku Roma. AKristu amweni ipona ainyeperhwa nge afundisi e kunyepa. Anhu akadaro, aifundisa kuti, kana munhu ecida kuponeswa waidikana kucengeta Mitemo ya Mozesi, yakaita hingana kuita ucekeri. Asi Pauro waiziya kuti Mwari wainga asikakumbiri kuti awona aite ucekeri. Nekunyasa kurangarira, akaramba mafundisire ekunyepa uye akakohomedzesa kutenda ke hama mu cibairo cerusudzunuro ca Kristu Djesu.—Aga. 2:4; 5:2.

Bhaibheri rinobhuya pamhene kuti, munhu paanondofa, apacina caacazwa kana kubatwa nge zviro zvakasiyana-siyana zvinanga zvakamutendera. (Mup. 9:5) Pauro paakati: “Ndakafa kumutemo,” iyena waida kureya kuti Mutemo wa Mozesi wainga usisina simba paari. Asi Pauro wainga ano cokwadi cekuti nokutenda kake mucibairo cerusudzunuro, iyena wainga ari “mupenyu kuna Mwari.”

Kucinja uku ka Pauro kakakitika “peciseenzeswa mutemo.” Zvingaitika kudini? Iyena wainga apedza kupanganidza kuti “munhu unozwi munatsi, haiwa nge mabasa e mutemo, asi nge kutenda mu rusudzunuro ra Djesu Kristu basi.” (Aga. 2:16) Zvirokwazvo kuti Mutemo wakaita basa rakakura maningi. Pauro wakapanganidza ku Agaratiya eciti Mutemo: “Wakatunhudzirhwa kuti zvishaishi zvibudiswe pamhene, dakara mwana aguma, uyo ainga agondeswa.” (Aga. 3:19) Honde, Mutemo wakadjekesa kuti anhu asikazi kukwana anoshaisha aakwanisi kucengeta Mutemo zvakakwana uye kuti aida cibairo cakakwana. Ndiyo ndaa, Mutemo wakaendesa anhu ku “mwana,” Kristu. Munhu paanopangidza kutenda muna Kristu, ungakwanisa kuzwi munatsi ndi Mwari. (Aga. 3:24) Pauro wakaguma apona ngekuti peciseenzeswa Mutemo, iyena wakaguma pakutenda muna Djesu. Ndiyo ndaa, Pauro “wakafira kumutemo” uye ogara “mupenyu kuna Mwari.” Mutemo wainga usisina simba paari, asi kuna Mwari.

Pauro wakareketa murangariro wakaezana mu tsamba yake ku a Roma. Iyena akati: “Hama dzangu, imwimwi makafira mu mutemo nge muwiri wa Kristu . . . Takasudzunurhwa pa Mutemo ngekuti takafa ku zviro zvaitikoneresa.” (Aro. 7:4, 6) Pana Agaratiya 2:19, Pauro wainga asikareketi nge zve kufa ke mushaishi unonga asikazi kucengeta Mutemo. Pane kudaro, iyena wainga ecireketa nge zve kusudzunurhwa. Mutemo wainga usisina simba paari pamwepo ne amweni akaita hingana iyena. Awona ainga akasudzunurhwa nge kutenda murusudzunuro ra Kristu.