KUBVIRA kare, aIsraeri ainga akadjaira kuita mupiro kuti abetsere kunamata kecokwadi. Asi musoho wakanesa maningi mu nguwa ya Djesu.

Mushobo wekubetsera kunamata kakacena mu tempro, mu Djudha wese wakura waidikana kuripa hafu yeshekeri (madhrakema mairi). Mu zana remakore rekutanga, mupiro waiseenzeswa pakugadzirisa zviro uye zvibairo zve mu tempro zvakagadzirhwa ndi Herodhi. ADjudha amweni abvunzisa Pedru kuti Djesu waiti kudiniwo nge zvazvo, uye Kristu aazi kuphikisa nge zve musoho. Wakatobvunza Pedru kuti atore mare kuti aripe musoho iwona.—Mt. 17:24-27.

Anhu a Mwari mazuwa iwona aidikana kupa cegumi, zvecienderana ne kupa cegumi ce zvirimwa kana zvekurogarisi. (Re. 27:30-32; Nu. 18:26-28) Afundisi e magereja aibambidzira kuti cegumi ici ciriphwe nge zvirimwa basi kunyazi ne “hortelã, endro uye cominho.” Djesu aazi kuzvishora, asi akashora muitire we atari ne Afarisi.—Mt. 23:23.

Pa nguwa iyona, aRoma atonga uye airongosa misoho yakawanda ku anhu. Musoho umwe wainga we minda, uye anokwanisa kuripa musoho iyona ne mare kana nge zviro. Zvinokarirhwa kuti pairongoswa musoho ingaita 20 dakara 25 kubva muzana. Paingawo pano musoho we musoro ku mu Djudha umwe na umwe. Uu ndiwona musoho wakabvunziswa Djesu nge Afarisi. Djesu wakaabvunza kuti: “Whirinzai zviro zva Cesar kuna Cesar, asi zviro zva Mwari kuna Mwari.”—Mt. 22:15-22.

Kaingawo kuno musoho ye zviro zvekutengesa zvaibuda kana kupinda mu mbuto dzinoripiswa musoho. Musoho uu wairipiswa pa zviteshi, mu mabhirigi, pamhararano kana panopindwa napo mu taundi kana mu ma bazari.

Musoho wese wairipiswa anhu nge aRoma wainyanya kushupha. Hingana mutari we zviro zvakaitika we ku Roma Tacitus, pa nguwa yekutonga ka Mambo Tiberius Djesu paainga ari pasi pano, “Siriya ne Djudhiya ainga aremba ne mitoro yawo, akakumbira kuteredzerwha misoho.”

Mutoro wakatotunhudzirika nge mushobo waaripiswa musoho. Citenderhwa cokuita izvi zvakagara basa guru maningi. Arongosi ainyasa kuziikanwa, awo aiona mare ndizvona, akapsvaka anhu kuti aabetsere pakurongosa musoho, kuitira kuti aone mare yakawanda. Zakeu anopangidza kuti wainga ne arongosi e musoho akadaro. (Ru. 19:1, 2) Zvinozwisisika kuti anhu aizvizonda uye ainga ano maonero akashata e aya airongosa musoho.