1. Djehovha akaitei ku umwe na umwe wedu?

DJEHOVHA akaita kuti umwe na umwe wedu auye kaari. (Ju. 6:44) Rangarirai kuti izvi zvinoreyei. Djehovha paaiongorora mabhirioni ese e anhu mu nyika ino, akaona ciro cinokosha kamuri—mwoyo wakagondeka unokwanisa kukura uye kumuda. (1 Mak. 28:9) Djehovha anomuziya, anomuzwisisa uye anomuda. Izvi zvinobambisa!

2. Djesu akaezanisira kudini kupfarira kunoita Djehovha bira rimwe na rimwe?

² Djehovha anomurangarira uye anorangarirawo hama no hanzvadzi dzenyu dzeciKristu. Kuti tiezanise fundo ii, Djesu akaezanisa Djehovha no muushi. Kana bira rimwe pa 100 rikabuda pano mabira amweni, muushi ucaitei? Iyena “ucasiya 99 mu matunhu uye oenda koopsvaka bira riya rapsveteka.” Kana Iyena akarigumira, iyena aangarituki ngekuti rainga rabuda pano mabira amweni. Iyena ucapfara. Ngaripi fundo? Bira rimwe na rimwe rinokosha kuna Djehovha. Djesu wakati: “ndizvona zvinoizwawo na baba angu ari kudenga, aadi kuti kunyazi umwe basi we adoko aya aparare.”—Mt. 18:12-14.

3. Ticafundei mu fundo ino

³ Atidi kuita kuti hama no hanzvadzi ipi hayo iore mwoyo. Tingaitei kuti tisanyangadzise amweni? Uye cinyi catingaita kana munhu akatirhwadzisa? Ticadaira mibvunzo ii mu fundo ino. Asi ticatanga nge kufunda nge zve “adoko aya” anoreketwa mu kapituro ya Mateu 18.

4. “Adoko aya” ndianani?

⁴ “Adoko aya” afundi aDjesu e mathunga akasiyana-siyana. pasinei nothunga rawo rokunyama, awona akaita hingana  “ana adoko” pakuti anoda kufundiswa na Djesu. (Mt. 18:3) Kunyazi ecibuda kumbuto dzakasiyana-siyana, ku tsika dzakasiyana-siyana uye aino maonero no unhu wakasiyana-siyana, ese anotenda muna Kristu. Uye iyena unowada maningi.—Mt. 18:6; Ju. 1:12.

5. Djehovha anozwa kudini munhu paanokuhunyisa kana kukuwadza umwe we anhu ake?

⁵ “Adoko ese aya” anokosha kuna Djehovha. Kuti muzwisise kuti unozwa kudini, rangarirai kuti tinozwa kudini nge zve ana. Aona anokosha katiri. Tinoda kuadziirira ngekuti anokonerhwa simba, ruziyo uye ungwaru we anhu akuru. Zvezvirokwazvo, isusu atipfariri patinoona munhu ecikuwara —uye tinotoshatirhwa—patinoona munhu ecibata mwana zvisikazi kunaka. Nge mushobo umwewo, Djehovha anoda kutidziirira uye unonyangadzwa—nekutoshatirhwa—munhu paanokuhunyisa kana kukuwadza umwe we anhu ake!—Isa. 63:9; Mk. 9:42.

6. Maererano na 1 Akorinti 1:26-29, nyika inoona kudini afundi a Djesu?

⁶ Afundi a Djesu akaita hingana “ana adoko” nge gwanza ripizve? Ndiyani munhu unoonekwa hingana unokosha mu nyika? Anhu ano upfumi, ano mbiri uye ano masimba. Mukusiyana na izvona, afundi a Djesu anoonekwa hingana “adoko” asikakoshi, uye hingana asikabetseri. (Erengai 1 Akorinti 1:26-29.) Asi Djehovha anoakoshesa.

7. Djehovha unoda kuti tizwe kudini no hama no hanzvadzi dzedu?

⁷ Djehovha unoda aseenzi ake ese, kunyazi aya ano makore akawanda ecimuseenzera pamwepo no apsva. Hama no hanzvadzi dzese anokosha kuna Djehovha, uye anokoshawo katiri. Isusu tinoda ‘kugara no rudo ku sangano rese re hama,’ haiwa ku anganani awo basi. (1Pe. 2:17) Tinodikana kuita zvatinokwanisa kuti tiadziirire uye tiacengete. Kana tikaona kuti tarhwadzisa munhu, atidikani kugara hingana tisikazi kuita ciro tecirangarira kuti munhuwo ucadzionera pacake. Cinyi cinoitisa kuti anhu amweni agumbuke? Pamweni kaakarererhwa, hama ne hanzvadzi dzimweni dzinodziningisira pasi. Amweni apsva mu cokwadi, aasati afundira kukwanisana nge kusama kukwana ke anhu amweni. Kunyazi pakaitikei, tinodikana kuita zviri zvese kuti tigadzirise zviro. Kusiya izvona, munhu unosonyanya kugumbuka nge nda ye anhu amweni, unodikana kuziya kuti uno wara rakashata raanodikana kugadzirisa. Iyena unodikana kuzviita kuti agare murunyararo pacake ega, uyewo nokugara zvakanaka ke amweni.

8. Marangariro api akashata akapingaidza afundi a Djesu?

⁸ Cinyi cakaita kuti Djesu arekete nge zve “adoko aya”? Afundi ake akamubvunzisa kuti: “Ndiani mukuru kudarika amweni ese mu Umambo we kudenga?” (Mt. 18:1) ADjudha akawanda mu nguwa iyona aiwona cigaro hingana cinokosha maningi. Mufundi umweni wakati: “Anhu akararama uye akafa ecipsvaka kukudzwa, mbiri, kutenderhwa uye kureremedzwa.”

9. Afundi a Djesu aidikana kuitei?

⁹ Djesu waiziya kuti aseenzi ake aidikana kuseenza no simba kuti abvite mwiya we makwikwi wainga wakadzika midzi mu tsika ye aDjudha. Wakaabvunza kuti: “Mukuru pakati penyu unodikana kugara mudoko pa ese, uye uya ari kutungamirira unodikana kuseenzera amweni.” (Ru. 22:26) Isusu tinoita hingana “madjaha” patinoona “amweni hingana akuru” katiri. (Afi. 2:3) Patinorumbwa tecisakurira unhu uu, kashoma kuti tikuhunyise amweni.

10. I zano ripi ra Pauro ratinodikana kubata nge nyara mbiri?

 ¹⁰ Hama no hanzvadzi dzedu dzakatikurira nge mushobo wakasiyana-siyana. Azvishuphi kana tikakanda ndangariro dzedu pa unhu wawo wakanaka. Tinodikana kubata no nyara mbiri zano rakapasa Pauro ku Akorinti, rinoti: “Ndiani unoita kuti usiyane ne umweni? Cinyi caungati unaco causikazi kupaswa? Hino kana wakaizwa zvekupaswa, ngei urikudzipasa mbiri hingana kuti auzi kuita zvekupaswa?” (1Ako. 4:7) Tinodikana kungwarira muedzo upi hawo wekudzipa mbiri, kana kudziona hingana tiri akuru kudarika amweni. Kana hama ikaita mharidzo yakanaka maningi kana kuti hanzvadzi inocipo cekukasika kutanga fundo ye Bhaibheri, awona anodikana kukasika kupasa rukudzo Djehovha.

11. Ngacipi cainga ciri cinangwa pa muezaniso wa Djesu wakaringana na mambo no museenzi wake?

¹¹ Mu masure mekuti Djesu apedza kungwadza afundi ake zvakaringana nge kukuhunyisa amweni, iyena wakapa muezaniso wakaringana na mambo no museenzi. Mambo wakagura magaa ainga asikazombokwanisi kuripwa nge museenzi. No kuhamba ke nguwa, museenzi umwe-umweo wainga asikadi kurekerera magaa akashomeka ku mudoni wake. Pakupedzesera, mambo wakakanda mu karaboso museenzi uya wainga usina usisi. Tinofundei? Djesu wakati: “Baba angu e kudenga acamuitiraiwo zvimwezvo kana umwe na umwe wenyu asikakanganwiri hama yake zvecibva pa mwoyo.”—Mt. 18:21-35.

12. Kana tikaramba kurekerera, tinokuwadza kudini amweni?

¹² Zviito zve museenzi azvizi kukuwadza iyena basi, asi zvakakuwadza amweniwo. Kutanga iyena wakakuwadza mudoni wake nge “kumuendesa mu karaboso dakara aakukwanisa kuripa magaa aainga anawo.” Kecipiri, iyena wakakuwadza aseenzi amweni ainga aona zvaainga aita. “Aseenzi amweni paakaona zvainga zvaitika, akarhwadziwa maningi.” Nge mushobo umwewo, zvatinoita zvinopingaidzawo amweni. Kana munhu umweni angatishaishira isusu toramba kumurekerera cinyi cingaitika? Cekutanga, tinomurhwadzisa nge kuramba kumurekerera, kusama kumupurutana uye ngekusama kumupangidza rudo. Cecipiri, tinoita kuti amweni ari mu ungano asazwe zvakanaka paanoona kuti atina runyararo no munhuwo.

13. Mafundei pa eshiperiyensia ye mu piyonera umweni?

¹³ Patinorekerera hama no hanzvadzi dzedu, tinodzibetsera isusu wene no amweni. Ndizvona zvakaitikawo kune mupionera umweni unozwi Crystal. Iyena wakarhwadziswa no hanzvadzi imweni ye mu ungano. Crystal unoedzurira kuti: “Nguwa dzimweni, masoko ake asina rudo aindibaia hingana banga. Mu basa rekuparidzira, inini ndainga ndisikadi kukandwa mu grupu raipakira mu karu imweyo naye. Ndakatanga kuruza mupfaro wangu pakuparidzira.” Crystal waizwa hingana uno zvikonzero zvakanaka zvekugara akanyangadzwa. Asi iyena wakaseenza no simba kuti asacengete bundu uye kuti asadzizwire usisi. Iyena wakadzidodosa uye wakaseenzesa zano re Bhaibheri riri pa musoro unoti “Kanganwira Nomwoyo Wako Wose” mu Murindiri ya Cikunyana 15 ya 1999. Iyena wakarekerera hanzvadzi iya. Crystal unoti: “Zvino ndaakuona kuti tese taakuseenza no simba kuti tipfeke unhu upsva uye kuti Djehovha unotirekerera tisikaripi ciro mazuwa ese. Ndinozwa hingana ndabviswa mutoro pa musoro pangu. Inini ndakazoonazve mupfaro.”

14. Maererano na Mateu 18:21, 22, mupostori Pedru wakasongana no cinetso cipi, uye cinyi cicatibetsera kana tikasongana no migariro yakadaro?

 ¹⁴ Isusu tinoziya kuti tinodikana kurekerera, uye ndizvona zvatinodikana kuita. Kunyazi zvakadaro kurekerera kungashupha maningi. Pamweni muphostori Pedru wakazwawo kudaro panguwa dzimweni. (Erengai Mateu 18:21, 22.) Cinyi cicamubetsera pamucasongana no mugarire wakadaro? Cekutanga, rangarirai kuti Djehovha wakamurekerera kangana. (Mt. 18:32, 33) Kunyazi tisikasisiri, Djehovha wakagadzirira kutirekerera. (Pis. 103:8-10) Pa nguwa imweyo, tinodikana kuedzurira kuti, “isusuwo tinobambidzirhwa kuti tidanane.” Hino kurekerera aciropi cekusanangura kuita, ciro catinodikana kuita ku hama dzedu. (1Ju. 4:11) Cecipiri, rangarirai zvinoitika pamunorekererana. Imwimwi munobetsera munhu washaisha, munoita kuti ungano ibatane, zvinocengetedza ukama wenyu na Djehovha uye zvinoita kuti mupfare. (2Ako. 2:7; Ako. 3:14) Cecitatu, namatai kuna uya anotikumbira kuti tirekerere. Musambotendere kuti Sathani apedze runyararo ratinaro no hama dzedu. (Aef. 4:26, 27) No rubetso ra Djehovha imwimwi amuzowiri pa murau wa Dhiyabhorosi.

15. Maererano na Akorosi 3:13, tinodikana kuitei kana takagumbuka no hama imweni?

¹⁵ Asi kana hama ye mu ungano ikamurhwadzisa, munodikana kuitei? Itai zviri zvese kuti paoneke runyararo. Dururai mwoyo wenyu kuna Djehovha. Mukumbirei kuti akomborere munhu uya wamurhwadzisa. Mukumbireiwo kuti amubetsere kuona unhu wakanaka we munhuwo—unhu unonyanya kudiwa na Djehovha paari. (Ru. 6:28) Kana musikakwanisi kukanganwa zvakaitika, rangarirai mushobo wakanaka we kucedza no munhuwo. Tinodikana kutendera mu mwoyo medu kuti iyena aazi kuzviita no cinangwa cekutirhwadzisa. (Mt. 5:23, 24; 1Ako. 13:7) Munodikana  kuedzurira izvi pamunoenda koocedza naye. Zvakadini kana iyena akaramba kuti pakati penyu pagare no runyararo? “Rumbwai mecishingirirana.” Garai no mwoyo unononoka kutsamwa. (Erengai Akorosi 3:13.) Uye cinonyanya kukosha, musambocengete bundu. Izvi zvingakuwadza ushamwari wenyu na Djehovha. Musasiye kuti ciro cipi haco cimukuhunyise. Ngekudaro, munonga mecipangidza kuti rudo renyu kuna Djehovha rukuru kudarika zvese.—Pis. 119:165.

16. Umwe na umwe wedu uno basa rekuitei?

¹⁶ Tinoona ciri cikomborero cikuru kuseenzera Djehovha takabatana, hingana “mabira ecikwata cimweco,’’ “no muushi umwe”! (Ju. 10:16) Bhuku ra Takarongwa Kuti Tiite Zvinoda Jehovha, pajina 165, inoti: “Zviri pamhene kuti imwimwi munobetserhwawo ngekubatana uku, pano zvamunodikana kuitawo kuti rubatano rirumbwe riripo.” Hino, tinodikana “kufunda kuona hama dzedu hingana maonero aanoizwa na Djehovha.” Tese tinokosha kuna Djehovha. Ndiwo maonero amunoita hama no hanzvadzi dzenyu here? Djehovha anoona uye anokoshesa zvese zvatinoita kuti tiabetsere nokuacengeta.—Mt. 10:42.

17. Tashinga kuitei?

¹⁷ Isusu tinoda hama dzedu. Ndiyo ndaa “tashinga kusama kukanda pamberi pawo ciro cinoakuhunyisa kana kuti cinoita kuti asahambe.” (Aro. 14:13) Tinoona hama dzedu hingana akuru katiri uye tinoda kuarekerera zvecibva pa mwoyo. Musasiye kuti munhu upi hake amukuhunyise. Pane kudaro, rumbwai “meciita zviro zvinoita kuti paoneke runyararo uye zvinoita kuti tibambisane.”—Aro. 14:19.