1. Djehovha anoziyei ku anhu ake?

DJEHOVHA MWARI “anopfarira anhu ake.” (Pis. 149:4) Zvakanaka maningi kuziya izvi! Djehovha anoziya mawara edu, anoona zvatinokwanisa kuita uye anotibetsera kuti tigare shamwari dzake. Uye kana tikarumbwa takagondeka kuna Djehovha, ayena acagara shamwari yedu nokusikaperi!—Ju. 6:44.

2. Ngei zvecishupha kune amweni kutendera kuti anodiwa na Djehovha?

² Anhu amweni anoti, ‘Inini ndinoziya kuti Djehovha anoda anhu ake, asi cinyi cinogondesa kuti ayena anondida?’ Ngei anhu amweni ecisama kugara no cokwadi? Oksana *, wakaneseka maningi paudoko wake unoti: “Pandakabhabhatidzwa ndakapfara maningi uye ndakatanga kuseenza hingana mu pionera we nguwa dzese. Asi paa padarika makore 15, zviro zvaiitika ndiciri mwana mudoko zvakatanga kundinesa. Inini ndakazopedzesera kurangarira kuti Djehovha ainga asikacandidi uye inini ndainga ndisikacasisiri rudo rake.” Yua, mu pionera we nguwa dzese uye wakanesekawo paainga aciri mwana mudoko, unoti: “Inini ndakadzipira kuna Djehovha ngokuti ndaida kumupfadza. Asi inini ndainga ndino rugondo rekuti Djehovha ainga asikazombondidi.”

3. Ticaonei mu fundo ino?

³ Hingana zvakaitika ku hanzvadzi mbiri dzadudzwa, imwimwi mungakwanisa kugara no rudo rukuru kuna Djehovha, asi mosama kugara no cokwadi cokuti ayena anomuda. Mu fundo ino, ticada kuona mhinduro dze mibvunzo miiri dzinoti: Ngei  mecidikana kugara no rugondo rokuti Djehovha anomuda? Uye cinyi cicamubetsera kuti musagare ne marangariro akadaro? Ngationgorore mhinduro dze mibvunzo idzi.

4. Ngei zvino ngozi kusama kugara no cokwadi co rudo ra Djehovha katiri?

⁴ Rudo i simba rakakura rinoita kuti tiite ciro. Kugara no cokwadi cekuti Djehovha anotida uye anotibetsa, zvinotiita kuti timuseenzere no mwoyo wese kunyazi tecisongana no matambudziko mu upenyu wedu. Asi i cokwadiwo kusiyana na izvona, kana tikarangarira kuti Mwari aatidi, “simba redu ricapera.” (Zvie. 24:10) Uye kana tikaora mwoyo, toruza kutenda kedu mu rudo ra Mwari, tinowira pa mirau ya Sathani.—Aef. 6:16.

5. Cinyi cakaitika ku hama dzimweni nge kusama kugara no cokwadi ne rudo ra Djehovha?

⁵ Kusama kugara no cokwadi, kakaparadza kutenda ke hama dzedu dzimweni. Mukuru umweni unozwi James unoti: “Inini ndaiseenza pa Betheri uye ndaibetsera ungano ye mureketero umweni. Asi ndakatanga kudzibvunzisa kuti Djehovha aitendera basa rangu here. Inini ndakazoguma pakudzibvunzisa kuti, Djehovha arikupurutana minamato yangu here.” Evha, uri mubasawo re nguwa yakadzara, unoti: “Inini ndinoona kuti zvino ngozi kusama kugara no cokwadi co rudo ra Djehovha, ngokuti zviro izvi zvinopedza simba renyu pa zviro zve ku mwiya uye mupfaro wenyu mu basa ra Djehovha.” Michael, mukuru uye anoseenza hingana mupiyonero we nguwa dzese, unoti: “Kana imwimwi musikatendi kuti Mwari anomuda, imwimwi mucapedzesera mamusiya.”

6. Tinodikana kuitei, kana tikatanga kutama kugara no cokwadi no rudo ra Mwari?

⁶ Zvakaitika ne hama idzi zvinopangidza kuti marangariro asiriwopi angakwanisa kuparadza kutenda kedu. Asi tinodikana kuitei kana marangariro akadai akatanga kutiwira mu musoro medu? Tinodikana kumaramba ciriporipoco! Kumbirai kuti Djehovha amubetse kucinja “marangariro anomunesa”, nge ‘runyararo ra Mwari rinorinda mwoyo ne ndangariro.’ (Pis. 139:23; Afi. 4:6, 7) Uye edzurirai kuti imwimwi amuripi mwega. Hama ne hanzvadzi dzakagondega, dzirikurhwisanawo no marangariro akadaro. Kunyazi assenzi a Djehovha e mu nguwa dze kare, akatosonganawo ne matambudziko amuri kubatana nawo. Onai zvatingafunda no muezaniso we mupostori Pauro.

7. Pauro wakasongana no matambudziko api?

⁷ Imwimwi munosoozwa hingana makadzarirhwa nge zviro zvekuita uye munoona hingana zvecimushuphira kuzviita zvese here? Kana zvakadaro imwimwi mucazwisisa mugariro wainga una Pauro. Iyena wakaneseka haiwa nge ungano imwe basi, asi “nge ungano dzese.” (2Ako. 11:23-28) Imwimwi muno nhenda yagarisa iri kupedza mupfaro wenyu here? Pauro wainga ano “munzwa mu nyama,” pamweni cineso ce uthongo caimunesa maningi. Pauro waida maningi kuti cineso icona cidarike. (2Ako. 12:7-10) Kusama kukwana kenyu kunomuita kuti imwimwi muore mwoyo here? Nguwa dzimweni Pauro waizwawo kudaroko. Iyena wakati “ndino nhamo” ngekuti nguwa dzese wairhwisana nokusama kukwana kake.—Aro. 7:21-24.

8. Cinyi cakabetsera Pauro kuti akwanisane ne matambudziko ake?

⁸ Pauro wakasongana no migariro yakamuedza uye yakamuodza mwoyo, asi iyena wakarumbwa eciseenzera Djehovha. Cinyi cakamupasa simba re kuti azviite? Kunyazi hake ecinyasa kuziya kusama kukwana kake, Pauro wainga ano kutenda kakabamba murusudzunuro. Iyena waiziyawo cipikirhwa ca Djesu cekuti “munhu wese anotenda muna [Djesu] . . . aizoona upenyu usikaperi.” (Ju. 3:16; Aro. 6:23) Zvezvirokwazvo Pauro wainga ano kutenda mu rusudzunuro. Iyena wainga ano rugondo rokuti Djehovha anoda maningi kumurekerera, kunyazi aya akaita zvishaishi zvakakura asi akazocinyuka.—Pis. 86:5.

9. Tinofundei no masoko a Pauro ari pana Agaratiya 2:20?

⁹ Pauro wainga ano rugondo rese rokuti waidiwa maningi ndi Mwari, ngekuti waiziya kuti Mwari ainga atuma Djesu kuti amufire. (Erengai Agaratiya 2:20.) Onai masoko a Pauro anobambisa ari panoperera vhersikuro ii: “Mwana wa Mwari . . . akandida uye akandifira.” Pauro wainga asikarangariri kuti rudo ra Mwari raindoseenzera basi ku anhu anganani, ‘iyena wainga asikarangariri kuti, zviri nyore kuona rudo ra Djehovha ku hama dzangu, asi ayena ainga asikazokwanisi kuzondida.’ Pauro wakaedzurira Aroma kuti: “Kristu akatifira kunyazi patainga tiri ashaishi.” (Aro. 5:8) Rudo ra Djehovha katiri arina magumo!

10. Tinofundei mu bhuku ra Aroma 8:38, 39?

¹⁰ Erengai Aroma 8:38, 39. Pauro wainga ano rugondo nge zve rudo ra Mwari kaari. Iyena wakatara kuti “apana cinokwanisa kutiparadzanisa mu rudo ra Mwari.” Pauro waiziya kuti Djehovha ainga apangidza mwoyo unononoka kutsamwa maningi ku aIsraeri, uye iyena  waiedzurirawo mapangidzirhwe e usisi wa Djehovha kaari. Tingagurisira masoko a Pauro ari pana Aroma nge mushobo unoteera: ‘Kana Djehovha akatuma Mwana wake kuti andifire, angakonerhwa kundidawo here?’—Aro. 8:32.

11. Kunyazi mumasure mekuita zvishaishi zviri pana 1 Timoti 1:12-15, ngei Pauro wainga ano rugondo rokuti Djehovha aimuda?

¹¹ Erengai 1 Timoti 1:12-15. Pamweni Pauro waineseka nge ndaa ye zviro zvaakaita mu nguwa dze kare. Ngekuti iyena wakati, inini ndini mushaishi “mukuru”! Asati aziya cokwadi Pauro waiteera aKristu mu thaundi rimwe na rimwe, ecikanda akawanda mumakaraboso uye ecitendera kuuraiwa ke amweni. (Zvi. 26:10, 11) Makamborangarira here kudai Pauro agumira djaha, rainga rasara nherera nge ndaa yake? Zvezvirokwazvo Pauro waizoneseka maningi, Pauro waicinyuka pa zvishaishi zvake zvaakaita, asi apana zvaikwanisa kuita kuti acinje zviro zve kare. Iyena waitenda basi kuti Kristu wainga afa nge ndaa yake, Pauro wakatara kuti: “Nyasha dza Mwari dzakaita kuti ndigare hingana zvandiri.” (1Ako. 15:3, 10) Tinofundei? Tenderai kuti Kristu wakamufira uye wakaita kuti imwimwi mukwanise kugara no ushamwari we padhuze na Djehovha. (Zvi. 3:19) Pamweni imwimwi mungadzipasa ndaa nge zvishaishi zvemakaita kare uye kunyazi maamagara Mupupuri wa Djehovha, asi edzurirai kuti Djehovha anoona zviro zvatinoita zvinounoku uye zvaticaita mune ramangwana haiwa mu zvishaishi zvetakaita kare.—Isa. 1:18.

12. Kana tikaona hingana tisikabetseri uyewo kana tikaona hingana kuti atisisiri kudiwa, tingabetserhwa kudini no tsamba ya 1 Juau 3:19, 20?

¹² Pamunoona kuti Djesu akafa kuti tirekererhwe zvishaishi zvedu, pamweni imwimwi mungati, ‘Inini andisisiri cipo ici cinokosha.’ Ngei imwimwi mecizwa kudaro? Mwoyo wedu usikazi kukwana ungakwanisa kutinyepera, uye woita kuti tione kuti isusu atizi kusisira kudiwa.  (Erengai 1 Juau 3:19, 20.) Kana tikatanga kurangarira kudai, tinodikana kuedzurira kuti, “Mwari mukuru kudarika mwoyo yedu.” Rudo ne rurekerero ra Baba edu e kudenga, zvinosimba maningi kudarika muzwiro upi hawo watingagara nawo. Tinodikana kufunda kutendera kuti Djehovha anotida. Kuti zvidaro tinodikana kufunda Soko rake nguwa dzese, kuita munamato kaari nguwa dzese, uye kukhorovhera rubetso ratinopaswa nge hama dzedu. Ngei kuita izvi kecikosha?

13. Kufunda Bhaibheri kungatibetsera kudini? (Onai bhokisi rakazwi “ Soko ra Mwari Rakaabetsera Kudini.”)

¹³ Fundai Soko ra Mwari zuwa no zuwa, kana mukadaro imwimwi mucanyasa kufunda zvakawanda nge zve mawara akanaka a Djehovha. Imwimwi mucazwisisa kuti ayena anomuda maningi. Kunyasa kurangarira nge zve tsamba iri mu Soko ra Mwari zuwa no zuwa, zvingamubetsa “kugadzirisa marangariro” ari mu nzero ne mu mwoyo menyu. (2Ti. 3:16) Mukuru unozwi Kevin wakarhwisana ne mirangariro ye kusama kudzikoshesa, iyena unoti: “Kuerenga Pisarema 103 uye kunyasa kurangarira nge zvayo, zvinondibetsa kunyasa kurangarira ngo mwazvo uye kuzwisisa kuti zvezvirokwazvo Djehovha anondirangarira.” Evha, wadudzwa mukutanga unoti: “Panopera zuwa inini ndinotora nguwa yekurangarira zviro zvinokosha kuna Djehovha. Uye izvi zvinondipasa runyararo mu mwoyo uye zvinotunhudzira kutenda kangu.”

14. Munamato unotibetsa kudini?

¹⁴ Rumbwai mecinamata. (1Ate. 5:17) Kana tecida kugara no ushamwari wakabamba no munhu umweni, tinodikana kurumbwa tecicedza naye tecireketa mazwire edu ari mu mwoyo. Ndizvonawo zvinoitika no ukama wedu na Djehovha. Patinonamata kuna Djehovha tecimubvunza zviri mundangariro, mazwiro uye zviro zviri kutinesa, tinopangidza kuti isusu tinogonda naye uye tinoziya kuti ayena anotida. (Pis. 94:17-19; 1Ju. 5:14, 15) Yua, wamboreketwa ngezvake unoti: “Pandinonamata, inini ndinoita zvakawanda pane kupanganidza zvandinonga ndaita zuwero. Inini ndinofungura mwoyo wangu kuna Djehovha uye ndopanganidza muzwiro wandiri kuita. Padoko ne padoko, ndiri kufundira kuona Djehovha haiwa hingana muridzi we empreza huru, asi hingana Baba anoda ana awo.”—Onai bhokisi rinoti “ Makambozvierenga Here Izvi?”

15. Djehovha anopangidza kudini kuti anoda umwe na umwe wedu?

¹⁵ Khorovherai rubetso re hama dzedu; aona cipo cinobva kuna Djehovha. (Tg. 1:17) Baba edu e kudenga anopangidza kuti anoda umwe na umwe wedu, ngekutipasa hama ne hanzvadzi dzekumwiya, dzinopangidza “rudo nguwa dzese.” (Zvie. 17:17) Mu tsamba yake ku Akorosi, Pauro wakareketa nge zve aKristu amweni  ainga amubetsa. Pauro wakati aona ainga ari ‘abambisi akuru kaari.’ (Ako. 4:10, 11) Kunyazi Djesu, akada rubetso re shamwari, kunyazi re ngirozi kutobatanidzawo no re anhu uye ayena akatenda maningi nge rubetso irona.—Ru. 22:28, 43.

16. Hama dzingatibetsera kudini kuti tigare no ushamwari wakabamba na Djehovha?

¹⁶ Muri kukhorovhera zvipo zvetakapaswa na Djehovha here? Kupanganidza zvinetso zvenyu ku hama yakura, acipangidzopi cekuremba, asi zvinodziirira. Onai zvakareketwa ndi James wamboreketwa nge zvake, unoti: “Kugara ne ushamwari wakanaka ne hama dzakura, rubetso rakakura maningi kandiri. Pandinozwa ndakaremba nge mirangariro yakashata, shamwari idzi dzinokosha dzinondizwa no mwoyo unononoka kutsamwa uye anondibvunza kuti anondida maningi. Peciseenzeswa aona, ndinokwanisa kuona zvezvirokwazvo kuti Djehovha anondida.” Zvezvirokwazvo, zvakanaka maningi kuti tishamwaridzane no hama no hanzvadzi dzedu!

17-18. Tinodikana kuzwira ani uye ngei?

¹⁷ Sathani anoda kumuona mecisiya kuita zvakanaka. Iyena unoda kuti imwimwi mutendere kuti Djehovha aamudi, uye kuti imwimwi amukoshi. Asi hingana zvetaona, zvese izvi manyepo.

¹⁸ Djehovha anomuda maningi. Kana mukamuzwira “mucarumbwa muri mu rudo rake” nokusikaperi hingana zvakaizwawo ndi Djesu. (Ju. 15:10) Hino musapurutane Sathani uye musazwewo mwoyo wenyu paunoedza kumutongesa. Kusiyana na izvona, purutanai Djehovha anoona zvakanakira ku umwe na umwe. Garai henyu no rugondo rokuti Djehovha “anopfarira anhu ake,” uye imwimwi munopfarirhwawo naye!