1-2. Djesu wainga ari pa mugariro upi paakareta masoko ake ekupedzesera.

MACIBESI e zuwa reci 14 re mwedzi wa Nisani mu gore ra 33 K.A. Djesu anopumbwa zviro zvaasikazi kuita uye unotongerhwa ndaa yaasikazi kuita. Izvi zvaazvaitika ayena anosekwa, anotambudzwa zvino utsinye uye anokhomerhwa pa danda rokutambudzikira. Prego dzinobora nyara ne tsoka dzake. Djesu anorhwadziwa paanofema no kureketa. Asi ayena anodikana kureketa—ngekuti ano zviro zvinokosha zvaanodikana kureketa.

² Ngationgorore masoko ekupedzesera a Djesu paainga ari pa danda rokutambudzikira, uye tione zvatingafunda. Nge masoko amweni, “ngatimupurutane.”—Mt. 17:5.

3. Djesu aireketa nge zvaani paakareketa masoko okuti: “Baba, arekererei”?

³ Djesu akatii? Paainga ari pa danda rokutambudzikira, Djesu akanamata eciti: “Baba, arekererei.” Asi Djesu aida kuti Baba ake arekerere ani? Masoko a Djesu anoteera anotipasa gwanza, ayena akati: “Awona aazii zvaarikuita.” (Ru. 23:33, 34) Pamweni Djesu aireketa nge zve masurudado e ku Roma ainga akhomera nyara ne murenje dzake pa danda rokutambudzikira. Awona ainga asikazii kuti Djesu Kristu ainga ari ani. Uye zvingaitawo kuti Djesu, ainga ecirangarira anhu aya akakumbira kuti ayena auraiwe, asi no kuhamba ke nguwa, aizotenda maari. (Zvi. 2:36-38) Djesu aazi kusiya kuti zvaakashaishirhwa, zvimuitise munhu ano shungu uye ano bundu. (1Pe. 2:23) Kusiya izvona, ayena akakumbira Baba ake kuti arekerere anhu aya ainga amutongera rufu.

4. Tingafundei nge zve cido ca Djesu cekurekerera azondi ake?

 ⁴ Tingafundei ne masoko a Djesu? Kuita hingana Djesu, tinodikana kugara takagadzirira kurekerera amweni. (Ako. 3:13) Anhu amweni, kutobatanidzawo abereki edu, pamweni angatizonda nge ndaa yekusama kuzwisisa zviro zvatinotenda uye mararamiro edu. Pamweni, awona angapanganidza masoko ekunyepa akaringana nge zvedu, otipsverudza pamberi pe anhu, omwesamwesa mabhuku edu kunyazi kutotityisidzira kutiponda kamare. Pano kugara no bundu, tingakumbira Djehovha kuti afungure mwoyo yawo kuti akwanise kufunda cokwadi. (Mt. 5:44, 45) Nguwa dzimweni kurekerera akuripi nyore, kajinji kana teciizirhwa zviro zvisina unatsi. Asi kana tikasiya kuti mbeu yekutsamwa uye ye bundu ikure mu mwoyo medu, ticadzikuwadza. Hanzvadzi imweni yakapanganidza kuti: “Inini ndakazwisisa kuti kurekerera, akurei kupindirana no miitiro yakashata inoizwa no anhu anondishaishira, kunyazi kutotendera kuti awona andikhorovhere. Izvona zvinoreya kuti ndakasanangura kusama kuiga bundu.” (Pis. 37:8) Patinorekerera, tinonga tasanangura kuti maeshiperiensiya akashata asatiite munhu anogara akatsamwa.—Aef. 4:31, 32.

5. Djesu akapikirei ku mbavha yainga yakakhomerhwa pa dii pake, uye ngei ayena akaibvunza zviro izvi?

⁵ Djesu akatii? Mbavha mbiri dzainga dzakakhomerhwawo pa danda rokutambudzikira pamuceto pa Djesu. Mukutanga, airi aya akatuka Djesu. (Mt. 27:44) Asi no kuhamba ke nguwa, umwe wawo wakacinja muitiro. Iyena wakazwisisa kuti Djesu, ainga asikazi kuita “ciro cakashata.” (Ru. 23:40, 41) Uye kupinda izvona, iyena wakapangidza kuti Djesu, waizopurumutswa uye ozogara mambo. Iyena wakati kuna Djesu: “Mundirangarirewo kana mapinda mu Umambo wenyu.” (Ru. 23:42) Mwanarume uu wakapangidza kutenda kakakura! Djesu akamudaira eciti: “Zvezvirokwazvo, ndinokubvunza nyamasi: Ucagara neni [haiwa mu Umambo, asi] mu Paradhizo.” (Ru. 23:43) Onai kuti Djesu wakaita cipikirhwa ici hingana cake, ayena akaseenzesa masoko okuti “inini,” “iwewe,” uye “neni.” Djesu aikwanisa kupasa kariro mbavha ii yainga iri dhuze no kufa ngokuti aiziya kuti Baba ake ano nyasha.—Pis. 103:8.

6. Tingafundei pa masoko a Djesu aakabvunza ku mbavha?

⁶ Tingafundei no masoko a Djesu? Djesu anoteedzera kukwana ka Baba ake. (Ahe. 1:3) Djehovha anoda maningi kutirekerera uye kupangidzira nyasha ku umwe na umwe wedu. Asi ayena acazviita kana isusu tikacinyuka no mwoyo wese pa zviro zviya zvakashata zvetakaita mu nguwa yakapera, uye kana tikapangidza kuti tinotenda mu rusudzunuro ra Djesu. (1Ju. 1:7) Pamweni zvingashupha ku anhu amweni kutendera kuti Djehovha angarekerera zvishaishi zvawo zvaakaita kare. Kana imwimwi mecizwa kudaro, rangarirai zvinoteera: Djesu asati afa, akapangidza nyasha ku mbavha yainga yatemerhwa rufu, yainga yecitangisa hayo kupangidza kutenda. Hino, tingakwanisa kugonda kuti Djehovha, acapangidza nyasha dzakakura ku aseenzi ake akagondeka, arikuita zvese zvaanokwanisa kuti ange ecitondowedza mitemo yake!—Pis. 51:1; 1Ju. 2:1, 2.

7. Maererano na Juau 19:26, 27, Djesu akabvunzei kuna Mariya na Juau, uye ngei?

⁷ Djesu akabhuyei? (Erengai Juau 19:26, 27.) Djesu aineseka ndi mai ake, pamweni  ainga asara ari mufirhwakadzi. Anukuna a Djesu aikwanisa kuriritira zvekunyama zva mai ake. Asi ndiyani aizowapasa zvekumwiya? Apana cinopangidza kuti anukuna a Djesu ainga agara afundi. Asi Juau, wainga ari mupostori wakagondeka wa Djesu uye shamwari yake ye pa mwoyo. Kuna Djesu, aya anoseenzera Djehovha pamwepo naye, ndiwona mhuri yake yekumwiya. (Mt. 12:46-50) Djesu aida Mariya, uye aida kugara no rugondo rokuti awona aizonyasa kuriritirhwa. Ndiyo ndaa, ayena akakumbira Juau kuti ariritire mai ake. Djesu aiziya kuti Juau aizobetsera Mariya kuti arumbwe eciseenzera Djehovha. Ayena akati kuna mai ake: “Uu ndiye mwana wako!” Uye akati kuna Juau: “Aya ndiwo mai  ako!” Kubvira apona, Juau waizogara mwana wa Mariya uye aizomuriritira hingana mai ake kamare. Mariya wainga acengeta Djesu no rudo rese kubvira aciri mwana mudoko, uye akazogara pa dii pa Djesu parufu rake. Djesu ainga ano zvikonzero zvakakura zvokuda maningi mwanakadzi uu!

8. Tingafundei no masoko a Djesu aakabvunza Mariya uye na Juau?

⁸ Tingafundei no masoko a Djesu? Ushamwari watinawo no hama dzedu pakutenda, ungakura kudarika ushamwari watinawo ne anyaukama edu. Anyaukama edu angatizonda uye kunyazi kutotisiya, asi Djesu akapikira kuti, kana tikabatisisa Djehovha pamwepo no sangano Rake, isusu taizotambira makomborero “akapetwa ka 100” kudarika etakaruza. Hama jinji dzaizogara katiri hingana mwana we rume, mwana we kadzi, baba uye mai. (Mk. 10:29, 30) Tiri nhengo ye mhuri yekumwiya yakabatana pakutenda ne rudo​—rudo kuna Djehovha uye ku umwe na umwe. Imwimwi munozwa kudini no zviro izvi?—Ako. 3:14; 1Pe. 2:17.

9. Masoko a Djesu ari pana Mateu 27:46 anotifundisei?

⁹ Djesu akatii? Djesu asati afa akati: “Mwari wangu, Mwari wangu, mandisiya ngei?” (Mt. 27:46) Bhaibheri aribhuyi cikonzero cakaita kuti Djesu arekete masoko aya. Asi masoko awona anotibvunza zviro zvakawanda. Ngo muezaniso, ngekureketa masoko aya, Djesu ainga ecidzadzisa uphorofita wakatarhwa pana Pisarema 22:1. * Kusiya izvona, masoko aya anopangidza pamhene kuti Djehovha aazi kukanda “cidziiriro cinotenderedza” Mwana wake. (Djo. 1:10) Kusiyana nazvo, Ayena akatendera kuti Mwana ake aedzwe kutenda kake nge azondi dakara pakufa uye Djesu aizwisisa zviro izvi. Uu wainga uri muedzo wakakura—akuna munhu wakambosongana no muedzo wakadaro. Masoko a Djesu aya, anopangidza kuti Djesu ainga ano rugondo rokuti ayena ainga asikazi kupara ndaa uye ainga asikazi kusisira kufa.

10. Tingafundei no masoko a Djesu aakareketa kuna Baba ake?

¹⁰ Tingafundei no masoko a Djesu? Ciro catingafunda nge cekuti, atidikani kuemera kuti Djehovha acatidziirira pa zvineso zvinoedza kutenda kedu. Kuita hingana Djesu akaedzwa dakara pakufa, isusu tinodikanawo kugara takagadzirira kupangidza kugondeka kedu dakara pa rufu kana zvecidikanwa. (Mt. 16:24, 25) Asi Mwari anotigondesa kuti atizoedzwi kudarika zvatinokwanisa kushingirira. (1Ako. 10:13) Ciro cimweni catinofunda nge cekuti, kuita hingana Djesu, isusu ticabatwa zvisina unatsi. (1Pe. 2:19, 20) Aya anotizonda, anoita izvi haiwa ngekuti isusu tinanga taita ciro cakashata, asi ngekuti atiiti dii ro nyika uye ngekuti tinotsigira cokwadi. (Ju. 17:14; 1Pe. 4:15, 16) Djesu akazwisisa kuti ngei Djehovha akatendera kuti ayena ashuphike. Asi hama dzimweni dzakagondeka padzinosongana no matambudziko, nguwa dzimweni anodzibvunzisa kuti ngei Djehovha ecitendera kuti ndisongane na izvi. (Abha. 1:3) Mwari wedu ano usisi uye anononoka kutsamwa ku hama idzi. Djehovha anozwisisa kuti muitiro wakadai we hama idzi, acipangidzopi cekusama kutenda, asi anoda runyaradzo rinobva kuna Mwari.—2Ako. 1:3, 4.

11. Ngei Djesu akareketa masoko ari pana Juau 19:28?

¹¹ Djesu akatii? (Juau 19:28.) Ngei Djesu akareketa masoko okuti: “Ndinomukaha”?  Ayena akareketa masoko aya “kuti adzadzise matarhwa”—kana kuti, zvainga zvakatarhwa pana Pisarema 22:15, inoti: “Simba rangu raoma hingana biya re hari; Rurumi rangu ririkunamirira matadza angu.” Zviri pamhene kuona kuti ngei Djesu ainga ano mukaha wakakura, ayena ainga ashingirira matambudziko anorhwadza, kubatanidzawo kurhwadziwa pa danda rokutambudzikira. Uye pa mugariro waainga ari, ayena waida rubetso re amweni kuti apedze mukaha wake.

12. Tinofundei no masoko a Djesu okuti “Ndinomukaha”?

¹² Tingafundei no masoko a Djesu? Djesu ainga asikaoni kuti kureketa muzwiro waaita, cainga ciri cipangidzo ce munhu asina simba. Isusu atidikani kurangarirawo kudaro. Mu nguwa jinji ye upenyu wedu, tinosanangura kusama kubvunza anhu pa zviro zviya zvatinonga tecida. Asi kana tikasama kukwanisa kuzviita tiri tega, atidikani kutya kukumbira rubetso re amweni. Ngo muezaniso, patinonga tacembera kana kuti patinonga tecirhwara, pamweni tinodikana kukumbira shamwari kuti itibetserewo no karu kuti tiende ku bazari, kana kuti kucipitari. Patinonga takatsukwara kana kuora mwoyo, tingakumbira kuti mukuru kana kuti muKristu akakura pakunamata atipurutane uye atibvunze “soko rakanaka” rinopfadza mwoyo wedu. (Zvie. 12:25) Ngatiedzurire kuti hama no hanzvadzi dzedu dzinotida, uye dzinoda kutibetsa “panguwa dzekutambudzika.” (Zvie. 17:17) Asi awona aangafemberi. Awona aangakwanisi kuona zvatiri kuda kana tisikazi kuabvunza.

13. Djesu akaitei ngekurumbwa kake akagondeka dakara pa rufu?

¹³ Djesu akatii? Panguwa nhatu dzemasikati ya Nisani 14, Djesu akareketa no izwi guru eciti: “Zvaitika!” (Ju. 19:30) Masoko a Djesu asati afa, anotifundisa kuti ayena aiziya kuti kuda ka Djehovha kainga kaitika. Uye nokurumbwa akagondeka dakara pa rufu, Djesu akaita zviro zvakawanda. Cokutanga, ayena akapangidza kuti Sathani munyepi. Djesu akapangidza kuti munhu wakakwana, angarumbwa akagondeka kunyazi no zviro zvingaizwa na Sathani. Cocipiri, Djesu akapa upenyu wake hingana rusudzunuro. Ngekupa upenyu wake, Djesu akaita kuti anhu asikazi kukwana agare shamwari dza Mwari uye agare no kariro yokuzorarama nokusikaperi. Cocitatu, Djesu akapangidza kuti Djehovha mutongi ane unatsi, uye akadziirira nge zve unhu wake.

14. Tinodikana kurumbwa tecirarama kudini mukati me upenyu wedu? Panganidzai.

¹⁴ Tingafundei ne masoko a Djesu? Tinodikana kushinga kurumbwa takagondeka zuwa no zuwa. Onai zvakarekethwa ndi hama Maxwell Friend, akaseenza hingana mufundisi we cikora ce Girihedhi. Mu gungano rimweni renyika, hama Maxwell akareketa masoko anoteera mu mharidzo yawo yakaringana nge zve kugondeka: “Musasiire mangwana zviro zviya zvamunokwanisa kuita nyamasi. Munorugondo rokuti mangwana munonga muri mupenyu here? Raramai zuwa rimwe na rimwe hingana mukana wenyu wekupedzesera wekupangidza kuti imwimwi makasisira kurarama upenyu usikaperi.” Tinodikana kurarama zuwa no zuwa hingana mukana wedu wekupedzesera wekupangidza kuti takagondeka kuna Djehovha! Hino, kunyazi tinganangisana no rufu, tinokwanisa kuzoti, “Djehovha, inini ndaita zvese zvandinokwanisa kuti ndirumbwe ndakagondeka, kuti ndipangidze kuti Sathani munyepi, uye kutsigira ucangamiri wa Tenzi!”

15. Maererano na Ruka 23:46, rugondo ripi rainga rina Djesu?

¹⁵ Djesu akatii? (Erengai Ruka 23:46.) Ne rugondo rese Djesu akati: “Ndinokanda mwiya wangu munyara dzenyu.” Djesu aiziya kuti ramangwana rake rainga riri mu nyara dza Djehovha, uye ayena ainga ano rugondo rokuti Baba ake aizomurangarira.

16. Mafundei no muezaniso we djaha rimweni rino makore 15?

¹⁶ Tingafundei no masoko a Djesu? Shingai kukanda upenyu wenyu mu nyara dza Djehovha. Kuti mukwanise kuita izvi, imwimwi munodikana “kugonda Djehovha ne mwoyo wenyu wese.” (Zvie. 3:5) Onai muezaniso wa Djoshuwa, Mupupuri wa Djehovha ano makore 15 uno nhenda isikarapiki. Iyena wakaramba kurapwa kupi hako kusikapindirani no mitemo ya Mwari. Iyena asati afa, wakabvunza mai ake kuti: “Mai, inini ndiri munyara dza Djehovha. . . . Ndiri kureketa izvi no rugondo rese, mai: Ndinoziya kuti Djehovha acandipurumutsa. Ayena aona zviri mu mwoyo mangu, uye zvezvirokwazvo inini ndinomuda.” * Umwe na umwe wedu anodikana kudzibvunzisa kuti: ‘Kana ndikasongana no ciro cinoedza upenyu wangu uye cinoedza kutenda kangu, inini ndaizokanda upenyu wangu munyara dza Djehovha ndino rugondo rokuti ayena aizondirangarira here?’

17-18. Tinofundei? (Onai mu bhokisi rinoti “ Tinofundei Kubva pa Masoko a Djesu Ekupedzesera.”)

¹⁷ Hingana zvetaona, masoko a Djesu ekupedzesera anotifundisa zviro zvakawanda! Tinoedzurira kuti tinodikana kurekerera amweni uye togara no rugondo rokuti Djehovha acatirekererawo. Tino cikomborero cokugara no hama ne hanzvadzi mukutenda dzakagadzirira kutibetsa. Asi tinodikana kukumbira rubetso rawo kana zvecidikanwa. Djehovha acatibetsera kuti tikwanisane no cineso cipi haco cinonga camuka. Taona kuti zvinokosha kurarama upenyu wedu we zuwa no zuwa, hingana mukana wekupedzesera wekupangidza kugondeka kedu. Tinodikana kugonda kuti kana tikakanda upenyu wedu munyara dza Djehovha, tinonga takadziirirwa.

¹⁸ Zvezvirokwazvo, tingakwanisa kufunda zvakawanda no masoko a Djesu paainga ari pa danda rokutambudzikira! Ecireketa nge zve Mwana ake, Djehovha akati: “Mupurutanei.”(Mt. 17:5) Kana tikaseenzesa zvetaona mu fundo ino, tinonga tecinyasa kuita zviro zvetakabvunzwa na Djehovha.