Ngei Djesu akareketa masoko a Dhavhidhi ari pana Pisarema 22:1?

Pa masoko a Djesu ekupedzesera aakareketa asati afa, ainga akatarhwa pana Mateu 27:46 anoti: “Mwari wangu, Mwari wangu, mandisiya ngei?” Nokureketa izvi, Djesu akadzadzisa masoko a Dhavhidhi ari pana Pisarema 22:1. (Mk. 15:34) Zvainga zvisikazi kunaka kurangarira kuti Djesu akareketa masoko aya, nge kuti ainga aora mwoyo kana kuti ainga apererhwa ne kutenda. Djesu akanyasa kuzwisia cikonzero caiita kuti ngei aidikana kufa, uye ayena ainga akagadzirira kuzviita. (Mt. 16:21; 20:28) Djesu aiziawo kuti, pa nguwa yekufa kake, Djehovha aizobvisa “cidziiriro” cipi haco caizomudziirira. (Djo. 1:10) Ngekudaro Djehovha akatendera Djesu kuti apangidze pamhene kuti aizogara akagondeka, kunyazi ne mafire aaizoita.—Mk. 14:35, 36.

Hino ngei Djesu akareketa masoko e pisarema iri? Kunyazi tisina cokwadi nazvo, ngatimboongorora zvikonzero zvinganani. *

Nokureketa masoko aya, Djesu aireya kuti Djehovha ainga asikazopindiri pa rufu rake here? Djesu aidikana kuripa rusudzunuro pasina rubetso ra Djehovha. Ayena ainga ari munhu akakwana uye aidikana kufa kuti “araire rufu ku munhu wese.”—Ahe. 2:9.

Nokureketa masoko ari pana pisarema, Djesu ainga ecida kududza pisarema rese here? Mu mazuwa awona, zvainga zvakadjairika kuti aDjudha akande mapisarema akawanda mu musoro.  Paaiedzurirhwa nge zve vhersikuro imwe ya pisarema, zviri nyore kutanga kuedzurira pisarema rese. Kana zviri izvona zvainga mu nzero dza Djesu, angadai akabetsera ateeri ake e ciDjudha kuti aedzurire Uphorofita wakawanda uri pana pisarema rino zviro zvaizoitika nge zve kufa kake. (Pis. 22:7, 8, 15, 16, 18, 24) Kusiya izvona, panoperera pisarema, kukunda ke umambo wa Djehovha kunopanganidzwa hingana kureba dakara kumagumo e pasi.—Pis. 22:27-31.

Nokureketa masoko aya a Dhavhidhi, zviri kuda kureya kuti Djesu aibudisa pamhene kusagara kake ne ndaa here? Djesu asati afa, aidikana kushingirira kutongwa zvisiripi pa mutemo, akazomupumha ndaa yekutuka. (Mt. 26:65, 66) Dare iri rakakasika kuumbwa usiku uye zvaipesana ne mitemo. (Mt. 26:59; Mk. 14:56-59) Paaireketa masoko aya asikadi mhinduro, zvinoita hingana kuti Djesu ainga ecikweera ku cokwadi cokuti apana caakaita cakasisira kupanicwa kakadaro.

Djesu aiedzurirawo amweni kuti, kunyazi Dhavhidhi, mutari we pisarema iri, akatendera kutambudzwa, izvi zvinoreya kuti Dhavhidhi wainga asina kutenderhwa na Djehovha here? Mubvunzo wa Dhavhidhi wainga usikapangidzi kutama kutenda. Mu masure mekuita mubvunzo, iyena wakarumbwa ecipangidza kugonda simba ra Djehovha rekuponesa, uye Djehovha akarumbwa ecimukomborera. (Pis. 22:23, 24, 27) Zvimwezvoo, kunyazi Djesu, “Mwana wa Dhavhidhi,” ainga ecishuphika pa mutanda rekutambudzikira, izvi azvirei kuti Djehovha ainga asikacatenderi Djesu.—Mt. 21:9.

Djesu ainga ecipangidza kutsukwara kake kukuru, nge kuti Djehovha aidikana kubvisa cidziiriro kuitira kuti anyase kupangidza kugondeka kake here? Pakutanga, Djehovha aazi kuronga kuti Mwana ake atambudzike uye afe. Izvi zvakazoitika mu masure mekupanduka. Djesu ainga asikazi kushaisha ciro, asi ayena aidikana kushuphika uye kufa kuti adaire nyaya yainga yamutswa na Sathani, uye kuti ape mutengo we rusudzunuro unodikanwa kutenga zvainga zvapsvetwa ne munhu. (Mk. 8:31; 1Pe. 2:21-24) Izvi zvaikwanisa kuitika kana Djehovha akabvisa cidziiriro kubva kuna Djesu ke cinguwa cidoko mu upenyu wake.

Djesu aiedza kubetsera ateeri ake kuti azwisise cikonzero cakaita kuti Djehovha atendere kuti Djesu afe nge mushobo wakadai here? * Djesu aizia kuti rufu rakadai hingana tsotsi pa mutanda rekutambudzikira, raizogumbura anhu ajinji. (1Ako. 1:23) Kana ateeri ake akaringisa pacikonzero ici cekufa kake, aizozwisisa kukosha kwazvo. (Aga. 3:13, 14) Awona aibva amuona hingana Muponesi haiwa hingana tsotsi.

Azvinei ne cikonzero cakaita kuti Djesu arekete masoko awona, ayena akaona kuti zvaaizosongana nazvo zvainga zviri zvekuda ka Djehovha kaari. Papera cinguwa areketa masoko ari pana pisarema, Djesu akati: “Zvaitika!” (Ju. 19:30; Ru. 22:37) Honde kubviswa ke cinguwa cidoko ke dziiriro ya Djehovha, kakaita kuti Djesu akwanise kuita zvese zvainga atumwa kuzoita pa nyika pano. Uyewo zvakadzadzisawo zviro zvainga zvakatarhwa “mu Mutemo wa Mozesi uye ne mu Uphorofita uye mu ma Pisarema.”—Ru. 24:44.