1-2. Cinyi cinozwi rusudzunuro, ngei tecida kusudzunurhwa?

ADHAMU paakashaisha, wakaruza mukana we kurarama no kusikaperi pasi pano, haiwa basi iyena, asi ku ana ake ese aizoteera. Citema cakaizwa ndi Adhamu cainga cisikarekererwi. Iyena wakasanangura kuita citema, ndiyo ndaa wainga akasisira kufa. Asi ku ana ake? Awona ainga asina ndaa pa citema cakaizwa ndi Adhamu. (Aro. 5:12, 14) Asi pano ciro caizokwanisa kuizwa here caizowasudzunura pa rufu? Honde! Mumasure mekuti Adhamu aita citema, Djehovha akapangidza padoko no padoko zviya zvaizoita kuti asudzunure mamirionji e ana a Adhamu pa citena uye pa rufu. (Ge. 3:15) Paizoguma nguwa yakasisira, Djehovha aizotuma Mwana wake kubva kudenga kuti “ape upenyu wake kuitira kuti asudzunure anhu akawanda.”—Mk. 10:45; Ju. 6:51.

² Cinyi cinozwi rusudzunuro? Mu Matsamba e ciGrego e ciKristu, rusudzunuro ndimutengo wakariphwa na Djesu kuti ahwirinze zviya zvakaruzwa na Adhamu. (1Ako. 15:22) Ngei tecida rusudzunuro? Nge ndaa ye Mutemo we unatsi wa Djehovha. Mutemo wakapaswa aIsraeri na Djehovha waireketa kuti upenyu unodikana kutsiiwa no upenyu. (Eki. 21:23, 24) Adhamu wakaruza upenyu wakakwana. Hino, kuti padzadzike mutemo uu we unatsi wa Mwari, Djesu wakapira upenyu wake wakakwana. (Aro. 5:17) Nge mushobo uu, ayena akagara “Baba Nokusikaperi” kuno ese aya anotenda mu rusudzunuro.—Isa. 9:6; Aro. 3:23, 24.

3. Maererano na Juau 14:31 uye 15:13, ngei Djesu ainga akagadzirira kupira upenyu wake wakakwana?

³ Djesu unoda maningi Baba wake e kudenga uye unodawo maningi umwe na umwe wedu, ndiyo ndaa, ayena ainga akagadzirira kupa upenyu wake wakakwana. (Erengai Juau 14:31; 15:13.) Ecindudwa nge rudo, Djesu ainga akashinga kurumbwa akagondeka dakara kumugumo ke upenyu wake uye kuita kuda ka  Baba wake. Nge mushobo uu, cinangwa ca Djehovha ngekuda ke anhu uye no nyika caizokwanisa kudzadziswa. Mu fundo ino, ticaona kuti ngei Mwari akatendera kuti Djesu asongane no rufu rinorhwadza. Pedzepo, ticada kuonawo muezaniso we mutari umweni we Bhaibheri aikoshesa rusudzunuro. Uye ticaonawo kuti tingapangidza kudini kutenda kedu mu rusudzunuro. Pakupedzesera, ticada kufunda kuti tingatunhudzira kudini kutenda kedu mu rusudzunuro ratakapaswa na Djehovha uye na Djesu.

4. Panganidzai kuti Djesu akafa kudini.

⁴ Rangarirai zuwa re kupedzesera re upenyu wa Djesu pasi pano. Ayena, waitokwanisa kudainza ngirozi dzakawanda kuti dzimudziirire, asi akasiya kuti masurudado e ciRoma amusunge uye amuponde asikamuzwiri usisi. (Mt. 26:52-54; Ju. 18:3; 19:1) Masurudado akaseenzesa mushobo umweni we mushamu waibvisa nyama ya Djesu paaimuponda. Pedzepo, kunyazi hazvo Djesu wainga ano maronda akawanda kumusana, masurudado akamubambidzira kuthwara mutanda wairema maningi. Djesu wakatanga kukwekweredza mutanda uu dakara pa mbuto yaizouraiwa, asi pa nguwa doko, masurudado akaita kuti mwanarume umweni amuthwarire mutanda uu. (Mt. 27:32) Djesu paakazoguma pa mbuto yaaizouraiwa, masurudado akakhomera nyara dzake uye no tsoka dzake pa mutanda. Kurema ke mwuiri wa Djesu zvaiita kuti maronda akakonzerhwa no maperego atunhudzirike. Madzishamwari ake anorhwadziwa uye mai ake anocema, asi aDjudha anotanga kumuseka. (Ru. 23:32-38; Ju. 19:25) Pa nguwa imwe na imwe zvinobambirira kurhwadza. Mazazu uye no mwoyo wake zvinotanga kuremba, zvekuti kufema kunotanga kumunetsa. Ecifema ke kupedzesera, Djesu unoita munamato wake we kupedzesera. Ecikotamisa musoro, unopa upenyu wake. (Mk. 15:37; Ru. 23:46; Ju. 10:17, 18; 19:30) Pasina mubvunzo rufu ra Djesu rakaitika padoko no padoko, rinorhwadza uye rinopsverudza!

5. Cinyi cakanyanya kurhwadzisa Djesu kudarika kufira kake pa mutanda?

⁵ Cakarhwadzisa Djesu amafirepi aakaita, asi cakaita kuti aneseke ikupumhwa kaakaita kuti auraiwe. Ayena akapumhwa ecinyeperhwa kuti mutuki—munhu wainga asikareremedzi Mwari kana kuti zina ra Mwari. (Mt. 26:64-66) Nge kupumhwa basi kaakaizwa kuti ainga ari mutuki kairhwadzisa maningi Djesu, zvekuti ayena akakumbira Baba wake kuti amubetsere pa kupsverudzwa uku. (Mt. 26:38, 39, 42) Ngei Djehovha akasiya kuti Mwana wake waaidisa maningi atambudzike uye afe kudaro? Ngationei zvikonzero zvitatu.

6. Ngei Djesu aidikana kuturikwa pa mutanda we kutambudzikira?

⁶ Cokutanga, Djesu waidikana kufa pa mutanda wekutambudzikira, kuitira kuti akwanise kununura aDjudha pa kutukwa. (Aga. 3:10, 13) ADjudha akagara pasi pe kutukwa nge ndaa yekuti awona akatendera kupurutana mitemo ya Mwari, asi awona aazi kuita maererano no zviya zvaainga apika. Nge ndaa yazvo, pane basi kuti atongerhwe rufu nge ndaa yekuti ari ana a Adhamu, aDjudha ainga ari pasi pe kutukwa. (Aro. 5:12) Mutemo wa Mwari ku aIsraeri waibhuya kuti kana munhu akaita citema cinosisira kuuraiwa iyena waidikana kuuraiwa. Pedzepo, mutumbi wake waidikana kuturikwa pa mutanda. * (Dhe. 21:22, 23; 27:26) Nge kuturikwa pa mutanda, Djesu akaita kuti dzinza riya rainga rarambwa ritambirewo makomborero e cibairo cake.

7. Cikonzero cipi cecipiri cakaita kuti Mwari atendere kuti Mwana ake atambudzike?

 ⁷ Onai cikonzero cecipiri cakaita kuti Mwari atendere kuti Mwana wake atambudzike. Djehovha wainga ecirowedza Djesu pa basa rake raaizomupasa hingana Mupristi. Djesu wakazwa munyama yake kamare kurhwadza kakunoita kuzwira Mwari paainga ecipinda pa miedzo dzakakura. Kurhwadziwa kakaita Djesu kainga kakakura maningi zvekuti ayena akaita munamato ecikumbira kuti Mwari amubetsere “ecizviita nge kucema ne misodzi.” Zviri pamhene kuti, no dambudziko rakakura rakasongana na Djesu, ayena anokwanisa kutizwisisa uye “anokwanisa kutibetsera” patinonga “tiri pa muedzo.” Zvinopfadza kuziya kuti Djehovha akatipasa Mupristi anotizwira usisi uye anokwanisa “kuzwisisa kusakwana kedu”!—Ahe. 2:17, 18; 4:14-16; 5:7-10.

8. Cikonzero cipi cecitatu cakaita kuti Mwari atendere kuti Mwana wake asongane no miedzo yakakura?

⁸ Cecitatu, Djehovha akatendera kuti Djesu asongane no miedzo yakakura kuitira kuti adaire mubvunzo unokosha, unoti: Munhu ungakwanisa kurumbwa akagondeka paanonga ari pa miedzo yakakura here? Sathani unoti haiwa! Iyena unoreketa kuti anhu anoseenzera Mwari nge zvikonzero zvakashata. Uye Sathani unotiwo anhu—kuita hingana baba awo Adhamu—aadi Djehovha. (Djo. 1:9-11; 2:4, 5) Asi Djehovha aigonda kutendeka ke Mwana wake, ndiyo ndaa akatendera kuti Djesu aedzwe dakara pasikazokwanisi kushingirirhwa nge munhu. Djesu akarumbwa akagondeka uye akabudisa pamhene kuti Sathani i munyepi.

9. Mupostori Juau wakasiya muezaniso upi katiri?

⁹ AKristu akawanda akagara no kutenda kakabamba nge ndaa ye fundiso ye rusudzunuro. Awona akarumbwa eciparidzira kunyazi no kuteerhwa, uye awona akasongana no miedzo yakawanda kunyazi no thunga raainga anaro. Onai muezaniso we mupostori Juau. Iyena akaparidzira akagondeka cokwadi nge zva Kristu uye nge zve rusudzunuro, pamweni ke makore anokwana kuita 60. Paainga oda kugumisa makore 100, Utongi Unosimba we Roma wakaona hingana kuti aipandukira utongi, zvekuti akamutora uye akamuendesa mukaraboso ku citsuwa ce Patmos. Ndaa yakhona? “Nge ndaa ye kureketa nge zva Mwari uye kupupurira nge zva Djesu.” (Zva. 1:9) Zvezvirokwazvo, uu imuezaniso wakanaka we kutenda uye we kushingirira!

10. Mabhuku e Bhaibheri akatarhwa na Juau, anopangidza kudini kuti iyena aikoshesa rusudzunuro?

¹⁰ Mabhuku akatarhwa na Juau anopangidza pamhene kuti iyena aida maningi Djesu uye kuti aitenda kudini rusudzunuro. Mabhuku ake ano masoko anokwana kuita 100 anoreketa nge zve rusudzunuro uye kubetsereka katingaizwa naro. Ngo muezaniso, Juau wakatara eciti: “Kana munhu akashaisha, tino mubetseri ari kuna Baba: Djesu Kristu, munatsi.” (1Ju. 2:1, 2) Mabhuku akatarhwa na Juau anopangidza kukosha ke “kupupurira nge zva Djesu.” (Zva. 19:10) Pasina mubvunzo, Juau waikoshesa maningi rusudzunuro. Isusu tingaitawo kudini zvimwezvo?

11. Cinyi cingatibetsera kuti tishingirire miedzo?

¹¹ Shingirirai muedzo we kuita citema. Kana tikatenda rusudzunuro, atizogumi pa kurangarira kuti: ‘Ngei ndecidikana kupeta masimba ari ese kuti ndishingirire muedzo, ndingakwanisa kuita citema, pedzepo ndokumbira kurekererhwa.’ Pane kudaro, patinonga tiri pa muedzo we kuita ciro cakashata, tingakwanisa kureketa: ‘Haiwa! Ngei ndecirangarira kuita zviro zvakashata mumasure me zvese zvandakaizirhwa na Djehovha uye na Djesu?’ Kana tikagara no murangariro wakadaro, ticakwanisa kukumbira Djehovha kuti atipase simba, uye  ticadeketerawo teciti: ‘Ndapota, musandisiye ndecipinda mu muedzo.’—Mt. 6:13.

12. Tingateera kudini zano riri pana 1 Juau 3:16-18?

¹² Idai hama dzenyu. Kana tikapangidza rudo, tinonga tecipangidzawo kuti tinotenda rusudzunuro ratakapaswa. Ngei? Ngekuti Djesu akapa upenyu wake haiwa basi katiri, asiwo ku hama dzedu. Kana ayena ainga akagadzirira kuwafira, zviri pamhene kuti awona, anokosha kaari. (Erengai 1 Juau 3:16-18.) Mushobo watingapangidza kuti tinoda hama dzedu, nge we kuwabata zvakanaka. (Aef. 4:29, 31–5:2) Ngo muezaniso, tingakwanisa kuwabetsera paanonga ecirhwara kana kuti paanonga ecisongana no migarire ye zviro yakashata, yakadai hingana ngozi dzinoitika dzega. Asi, ngazvipi zvatinodikana kuita kana hama yedu ikaita ciro cingatigumbura?

13. Ngei tecidikana kurumbwa tecirekerera anhu amweni?

¹³ Munoona hingana kuti zvinoshupha here kurekerera hama dzenyu padzinonga dzamushaishirai? (Re. 19:18) Kana zvikadaro, teerai zano iri rinoti: “Rumbwai mecizwisisana uye mecirekererana ne mwoyo wese kunyazi kana pano ciro caakashaishirhwa nge munhu umweni. Ngekuti Djehovha akakurekererai no mwoyo wese, imwimwiwo itaiwo izwona.” (Ako. 3:13) Pese patinorumbwa tecirekerera hama no hanzvadzi dzedu, tinonga tecipangidza kuna Baba edu e kudenga kuti zvezvirokwazvo tinotenda mu rusudzunuro. Asi, ngazvipi zvatinodikana kuita kuitira kuti tipangidze kuti tinotenda cipo ici catakapaswa na Mwari?

14. Tingatunhudzira kudini kutenda kedu mu rusudzunuro?

¹⁴ Tendai Djehovha nge rusudzunuro. Joana, hanzvadzi ino makore 83 inogara ku Índia, inoti: “Ndinoona hingana kuti zvinokosha maningi kubatanidza rusudzunuro pese pandinoita munamato uye kutenda Djehovha nge zvaro.” Pa minamato yenyu yamunoita muri mwega, edzai kurangarira zvishaishi zvamunonga maita pa zuwa irona, pedzepo, kumbirai Djehovha kuti amurekererei. Zviri pamhene kuti, kana maita citema cakakura, munodikana kukumbira rubetso re akuru. Awona acanyasa kumupurutanai, uye acamupasai mazano e rudo akawakirhwa mu Soko ra Mwari. Awona acanamata na imwimwi uye acakumbira Djehovha kuti amurekererei eciseenzesa rusudzunuro ra Djesu. Nge mushobo uu, mucakwanisa kuraphwa ku mwiya uye kugarazve ne ushamwari na Mwari.—Tg. 5:14-16.

15. Ngei mecidikana kutora nguwa kuti muerenge ngezve rusudzunuro uye kuti munyase kurirangarira?

 ¹⁵ Nyasai kurangarira nge zve rusudzunuro. Rajamani hanzvadzi ino makore 73, inoti: “Pandinoerenga nge zve kushuphika kakaita Djesu, madziso angu anodzara ne misodzi.” Imwimwiwo mungakwanisa kuona kuti zvinorhwadza kurangarira kutambudzika kakaita Mwana wa Mwari. Pamunonyasa kurangarira nge zve rusudzunuro ratakapaswa na Djesu, kuda kenyu Djehovha uye na Djesu kucarumbwa kecitunhudzirikawo. Kuti mubetsereke kunyasa kurangarira nge zve rusudzunuro, madini kubatanidza nyaya ii pa fundo yenyu ye munhu ega?

16. Ngei zvakanaka maningi kubvunzawo amweni nge zve rusudzunuro? (Onai foto ye pa kapa.)

¹⁶ Fundisai amweni nge zve rusudzunuro. Patinofundisa amweni nge zve rusudzunuro, kutenda kedu mariri kucarumbwa kecitunhudzirikawo. Tino mafaramenta akawanda angatibetsera kufundisa amweni nge ndaa yekuti ngei Djesu aidikana kutifira. Ngo muezaniso, tingakwanisa kuseenzesa fundo 4 ye bhurushura rinozwi Masoko Anopfadza Anobuda Kuna Mwari! Fundo ii ino musoro unoti “Djesu Kristu Ndiyani?” Tingakwanisa kuseenzesawo fundo ye 5 ye bhuku rinozwi Kodi Bhaibheri Rinotifundisei? Musoro we fundo ii, unoti “Rusudzunuro—Cipo Cikuru ca Mwari.” Gore rimwe na rimwe tingakwanisa kupangidza kutenda kedu mu rusudzunuro nge kupinda Cirangaridzo ce rufu ra Djesu Kristu, uye kupeta masimba ari ese kupikawo amweni pa ciitiko ici cinokosha. Tinotenda maningi nge cikomborero cetakapaswa na Djehovha ce kufundisawo amweni nge zve Mwana wake!

17. Ngei rusudzunuro i cipo cikuru ca Mwari ku anhu?

¹⁷ Pasina mubvunzo, tino zvikonzero zvakawanda zvekuti titende mu rusudzunuro uye kuti tirumbwe teciritenda. Nge ndaa ye rusudzunuro, tinokwanisa kugara no ushamwari we padhuze na Djehovha, kunyazi tiri anhu asikazi kukwana. Nge ndaa ye rusudzunuro, zvezvirokwazvo mabasa a Sathani acaparadzwa. (1Ju. 3:8) Nge ndaa ye rusudzunuro, cinangwa ca Djehovha ngekuda ke nyika cicadzadziswa. Nyika yese icagara paradhizo. Anhu ese amucaziya acada uye acaseenzera Djehovha. Ndiyo ndaa zuwa rimwe na rimwe, petai masimba mupangidze kutenda kenyu pa cipo cikuru ca Mwari ku anhu—rusudzunuro!