1-2. Djesu muperekedzi wedu nge gwanza ripi? Pasai muezaniso.

RANGARIRAI mecihamba no shamwari dzenyu mu mbuto yakafungwa, inotyisa uye isikaoneki nge ndaa ye mhute. Asi imwimwi muno muperekedzi anonyasa kuziya gwanza. Paanonga ecihamba, iyena unosiya tsoka muya maanonga ecihamba. No kuhamba ke nguwa, munoona kuti amucakwanisi kuona munhu waimuperekedza! Kunyazi zvakadaro, amudikani kuvhunduka. Pane kudaro, imwimwi no shamwari dzenyu munohamba ne padhuze ne munotsikwa no munhu ari kumuperekedza!

² Nge mushobo umwewo, tese hedu hingana aKristu, tiri kuhamba mu mbuto yakafungwa uye inotyisa—nyika ino yakashata. Asi zvinopfadza kuziya kuti Djehovha akatipasa Muperekedzi akakwana—Mwana wake Djesu Kristu. Uye tingakwanisa kuteera takagondeka tsoka dza Djesu dzaakasiya. (1Pe. 2:21) Bhuku rimweni rinopanganidza nge zve Bhaibheri, rinobhuya kuti mu vhersikuro ii, Pedru wakaezanisa Djesu no muperekedzi. Kuita hingana muperekedzi anosiya tsoka pasi, Djesu akatisira miezaniso yekuti titeedzere. Mu fundo ino, ticanyasa kuzwisisa kuti zvinoreyei kuteera tsoka dza Djesu. Ticadaira mibvunzo inokwana kuita mitatu—cinyi? ngei? uye kudini?

3. Zvinoreyei kuteera tsoka dze munhu?

³ Zvinoreyei kuteera tsoka dze munhu? Pamweni paya, Bhaibheri rinoseenzesa masoko ekuti “kuhamba ” uye “tsoka” recida kureya mararamire anoita munhu upenyu wake. (Ge. 6:9; Zvie. 4:26) Muezaniso unosiiwa no munhu, ungakwanisa kuezaniswa no tsoka dzaanosiya paanonga ecihamba. Ndiyo ndaa tingabhuya kuti kuteera tsoka dze munhu, kunoreya kuteera muezaniso wake kana kuti kumuteedzera.

4. Zvinoreyei kuteera tsoka dza Djesu?

 ⁴ Kuteera tsoka dza Djesu zvirikuda kureyei? Nge masoko amweni, zvirikuda kureya kuteera muezaniso wake. Mu tsamba yakanyokorerhwa fundo ino, mupostori Pedru aida kureya maka-maka kuti Djesu muezaniso wakanaka wekushingirira kunyazi mu matambudziko; asi pano mishobo imweni yakawanda yatingateedzera nayo Djesu. (1Pe. 2:18-25) Zvezvirokwazvo upenyu wese wa Djesu, zvese zvaakareketa uye zvaakaita muezaniso wakanaka wekuti titeedzere.

5. Anhu asikazi kukwana angakwanisa kuteedzera muezaniso wa Djesu akakwana here? Panganidzai?

⁵ Isusu tiri anhu asikazi kukwana, tingakwanisa kamare kuteedzera muezaniso wa Djesu? Honde zvinoita. Edzurirai kuti Pedru unotikohomedzesa “kuti titeedzere muezaniso wa [Djesu] nge padhuze”—kana kuti atidikani kuteedzera muezaniso wa Djesu nge mushobo wakakwana. Asi tingakwanisa kupeta masimba ari ese kuti tikwanise kumuteedzera. Kana tikadaro tinonga teciteera zano re mupostori Juau rinoti: “Rumbwai mecihamba hingana muhambire wakaita [Djesu].”—1Ju. 2:6.

6-7. Ngei kuteera tsoka dza Djesu kecitikhwededza dhuze na Djehovha?

⁶ Kuteera tsoka dza Djesu kunotikhwededza dhuze na Djehovha. Ngei tecidaro? Cokutanga, Djesu akatisiira muezaniso wakakwana wekuti tingararama kudini nge mushobo unopfadza Mwari. (Ju. 8:29) Hino, kana tikateera tsoka dza Djesu ticakwanisa kupfadza Djehovha. Uyewo ticakwanisa kugara no rugondo rokuti Baba edu ekudenga acakhwedera padhuze na ese aya anopeta masimba kuti agare shamwari dzake.—Tg. 4:8.

⁷ Cecipiri, Djesu wakateedzera zvakakwana Baba ake. Ndiyo ndaa Djesu waikwanisa kureketa kuti: “Munhu wese anonga awona inini aonawo Baba.” (Ju. 14:9) Tingakwanisa kuteedzerawo mawara a Djesu uye mushobo waaibata  amweni—ngo muezaniso ayena akazwira usisi munhu wainga ano mapere, akapangidza usisi nge mukadzi wainga ecirhwarisa maningi, uyewo akazwirawo usisi anhu aya ainga afirhwa no adiwa awo. (Mk. 1:40, 41; 5:25-34; Ju. 11:33-35) Paya patinonga teciteedzera Djesu, tinonga teciteedzerawo Djehovha, uye patinorumbwa teciteedzera Djehovha, ticarumbwa tecikhwederawo dhuze naye.

8. Panganidzai kuti ngei kuteera tsoka dza Djesu kunotibetsera kuti tisapauswe nge nyika ino.

⁸ Kuteera tsoka dza Djesu kunotibetsera kuti tisapauswe nge nyika ino yakashata. Mu usiku wake wekupedzesera hingana munhu pasi pano, Djesu waikwanisa kureketa kuti: “Ndakunda nyika.” (Ju. 16:33) Djesu aazi kupauswa no marangariro, zvinangwa uye zviito zve nyika ino. Ayena aazi kusiya ciro cipi haco cecimupausa pa cinangwa caakawira pa nyika pano—kukudza Djehovha. Nyika nyamasi uno, inobudisa zviro zvakawanda zvinokwanisa kutipausa pakuseenzera Djehovha. Ndiyo ndaa kuita hingana Djesu tinodikana kukanda ndangariro dzedu pakuita kuda ka Djehovha. Kana tikadaro ticakwanisawo kureketa teciti “takunda” nyika.—1Ju. 5:5.

9. Ngazvipi zvatinodikana kuita kuti tirumbwe tiri mugwanza rinotiendesa ku upenyu usikaperi?

⁹ Kuteera tsoka dza Djesu zvinotiendesa ku upenyu usikaperi. Djaha mupfumi parakabvunzisa kuti unodikana kuitei kuti aone upenyu usikaperi, Djesu akadaira eciti: “Uya ugare muteeri wangu.” (Mt. 19:16-21) Paainga ecicedza ne aDjudha amweni ainga asikatendi kuti ayena ainga ari Kristu, Djesu akati: “Mabira angu . . . anonditeera. Ndinoapa upenyu usikaperi.” (Ju. 10:24-29) Uye paakacedza na Nikodhimo, nhai ye dare re Sanihedrimu Djesu wakareketa kuti “anotenda maari aizoona upenyu usikaperi.” (Ju. 3:16) Tingapangidza kudini kuti tinotenda muna Djesu? Ngekuseenzesa zviya zvaakafundisa uye nge kuteedzera muezaniso wake. Kana tikaita izvi ticarumbwa tiri mu gwanza rinotiendesa ku upenyu usikaperi.—Mt. 7:14.

10. Tinodikana kuitei kuti tinyase “kuziya” Djesu? (Juau 17:3)

¹⁰ Kuti tikwanise kuteera tsoka dza Djesu takanyasa kugondeka, tinodikana kuita ciro cimweni, kumuziya. (Erengai Juau 17:3.) “Kuziya Djesu” ciro catinodikana kurumbwa teciita. Tinodikana kuziya zvakawanda nge zvake—mawara ake, marangariro ake, uye zviya zvaanoteedzera. Kunyazi taano makore akawanda tiri mu cokwadi, tinodikana kupeta masimba kuti tirumbwe teciziya Djehovha na Djesu.

11. Tinogumirei mu maEvhangeri marongomuna?

¹¹ Djehovha akatipangidzira rudo, ngekutipasa ma Evhangeri kuti tinyase kuziya Mwana wake. Mabhuku aya marongomuna e Bhaibheri, anotipasa ngano ye upenyu uye basa ra Djesu. Ma Evhangeri aya anotibvunza zviro zvakareketwa uye zvakaizwa na Djesu. Uyewo anotipangidza kuti ayena aizwa kudini. Tecibetserhwa ne mabhuku aya marongomuna, tinokwanisa kunyasa “kurangarira” muezaniso wa Djesu.  (Ahe. 12:3) Mu maEvhangeri aya makatarhwa muezaniso watakasiirhwa na Djesu. Nge kudaro kana tecida kunyasa kuziya Djesu tinodikana kurumbwa teciafunda. Kana tikadaro ticakwanisa kuteera takagondeka tsoka dza Djesu.

12. Ngazvipi zvatinodikana kuita kuti tibetserhwe ne ma Evhangeri aya?

¹² Kuti tibetsereke ne ma Evhangeri aya tinodikana kuita zvakawanda pane basi kuwaerenga. Tinodikana kutora nguwa kuti tiafunde uye kunyasa kurangarira pa zvia zvatinonga tecifunda. (Ezanisai na Djoshuwa 1:8, masoko e pasi.) Ngationei mazano mairi angakwanisa kutibetsera kuti tikwanise kunyasa kurangarira ma Evhangeri uye tikwanise kuseenzesa zviya zvatinonga taerenga.

13. Mungazwisisa kudini ma Evhangeri?

¹³ Cokutanga, pasai upenyu ma Evhangeri. Seenzesai kurangarira, edzai kuona uye kuzwa zviya zvainga zveciitika. Kukwarakwatisa kungakwanisa kunyasa kutibetsera. Sangano ra Djehovha rinokwanisa kutipasa mafaramenta akawanda angakwanisa kutibetsera pa kufunda kedu. Edzai kuona zvinobatanidzwepo—zviro izvi zvisati zvaitika, kana kuti mu masure mekuti zvaitika pa zviya zvamunonga mecifunda. Psvakai masoko uye anhu anorekethwa mu mbuto dziya dzamunonga mecifunda. Onai kuti ngano yamunonga mecifunda inobatana kudini ne ma Evhangeri amweni. Pamweni paya atari amweni e Evhangeri aibatanidza mu maEvhangeri mawo zviro zvainga zvisikabatanidzwi no amweni.

14-15. Tingaseenzesa kudini mu upenyu wedu zviya zvatinonga tecifunda mu ma Evhangeri?

¹⁴ Cecipiri, seenzesai mu upenyu wenyu zviya zvamunonga mecierenga mu ma Evhangeri. (Ju. 13:17) Hino pamunonga manyasa kufunda ngano dziri mu maEvhangeri dzibvunzisei kuti: ‘Evhangeri iri pane zvarinondifundisa zvandingaseenzesa mu upenyu wangu here? Ndingaseenzesa kudini ngano ii pakubetserawo anhu amweni?’ Edzai kurangarira munhu wamucada kubetsera, pedzepo pa nguwa yakasisira mubvunzei nge upfawi uye ne rudo zviya zvamunonga mafunda.

¹⁵ Ngatione muezaniso wekuti tingaseenzesa kudini mazano aya. Uye ticafunda nge ngano ye  mufirhwakadzi wiya wakaonekwa na Djesu mu tempro.

16. Panganidzai zviro zvinoreketwa pana Marko 12:41.

¹⁶ Nyasai kuzwisisa zvinonga zvecireketwa. (Erengai Marko 12:41.) Edzai kurangarira zviya zvinonga zveciitika. Rainga riri zuwa re 11 ra Nisani, re gore ra 33 K.A.—painga pasara nguwa doko basi kuti Djesu auraiwe. Djesu anopedza nguwa yake yakareba ari mu tempro ecifundisa. Ayena anosongana ne kuphikiswa ne atungamiriri e magereja e pa nguwa iyona. Amweni akhona aishora simba ra Djesu. Amweni aiita mibvunzo dzinoshupha kuti akwanise kumubata. (Mk. 11:27-33; 12:13-34) Pa nguwa ino Djesu anoenda ku dii rimweni ro tempro. Ayena anokwanisa kuona makofre aiigirhwa mare mu tempro, hino pamweni ayena ari pa mbuto inozwi mbuto ye Anakadzi—ayena anogara pasi uye anotanga kunangira anhu ecikanda mipiro yawo mumakofre. Anoona apfumi akawanda eciiga mare imona. Pamweni ayena ainga ari padhuze zvokuti aikwanisa kuzwa barulha rekumbwera ke mare imona.

17. Cinyi cinoizwa ne mufirhwakadzi murombo unoreketwa pana Marko 12:42?

¹⁷ Erengai Marko 12:42. Paapadarika cinguwa pano ciro cinoitika, Djesu anoona “mufirhwakadzi murombo.” (Ru. 21:2) Mufirhwakadzi uyu uno upenyu unoshupha maningi; pamweni azviripi nyore kaari kuti akwanise kuona cekurhya ce zuwa ne zuwa. Kunyazi zvakadaro iyena unokhwedera padhuze ne kofre, uye ecizviita nokungwarira unodonhedzeremo zvimare zviiri. Zvimare izvi zvakadodoka maningi zvokuti azvizwiki barulha pazvinonga zvecimbwera mu kofre. Djesu anoziya zviya zvainga zvaiswa nge mufirhwakadzi uyu. Zvainga zviri zvimare zviiri zve lepton zvimare zvekuti zvainga zvakadodoka uye zvainga zvisina mutengo pa nguwa iyona. Mutengo wayo wakadodoka maningi zvokuti aitokwanisi kutenga cishiri cidoko cisikadhuri caikwanisa kutengwa nge munhu kuti arhye.

18. Maererano na Marko 12:43, 44, Djesu akareketei nge zve mupiro we mufirhwakadzi?

¹⁸ Erengai Marko 12:43, 44. Djesu anoshamiswa maningi ne mufirhwakadzi uyu. Ecidainza afundi ake, Djesu anopangidza mufirhwakadzi uye anoti: “Mufirhwakadzi uyu murombo wabvisa zvakawanda kudarika amweni ese akanda mare mu kofre ye kukandira mare.” Hino Djesu akapanganidza eciti: “Ese [kunyanya apfumi] abvisa pa mare yawo yakawandisa asi iyena ne urombo wake wakanda yese yaainga anayo, yese yaizomuraramisa.” Mufirhwakadzi uyu, paakakanda mare yake yaainga anayo mu kofre ye mu tempro iyena wakakandawo upenyu wake wese mu nyara dza Djehovha.

19. Tinofundei pa masoko akareketywa na Djesu nge zve mufirhwakadzi murombo?

¹⁹ Seenzesai mu upenyu wenyu zviya zvamunonga mafunda. Dzibvunzisei kuti ‘ndingafundei pa masoko a Djesu aakareketa ku mufirhwakadzi?’ Cimboimai uye rangarirai nge zve mufirhwakadzi. Pasina mubvunzo iyena waidawo kupasa Djehovha zvakawanda. Kunyazi zvakadaro mufirhwakadzi uyu waitawo zviya zvaaikwanisa. Iyena wakapasa Djehovha zvakanaka zvaainga anazvo. Uye Djesu aiziya kuti mupiro uyu waainga apasa wainga wecikosha maningi, apa pano ciro cinokosha catinokwanisa kufunda: Djehovha anopfara patinomupasa zvatinokwanisa pa basa redu re simba rese uye re mwoyo wese. (Mt. 22:37; Ako. 3:23) Djehovha anopfarawo paanotiona teciita zvese zvatinokwanisa! Zano iri ringaseenzawo pa nguwa yatinopedza uye simba ratinoseenzesa mu basa rekuparidzira, kuti tikwanise kupinda misangano uye tikwanise kuita zvakawanda pakunamata ayena.

20. Mungaseezesa kudini zviya zvamafunda pa ngano ye mufirhwakadzi? Pasai muezaniso.

²⁰ Mungaseenzesa kudini ngano ye mufirhwakadzi mu upenyu wenyu? Rangarirai nge zve hama dzamunoziya, pamweni, amweni akhona  angazwa akaora mwoyo nge ndaa yekuti aacakwanisi kuita zvakawanda kuna Djehovha. Ngo muezaniso pamweni munoziya hama kana hanzvadzi yakura ino uthongo usikazi kunaka uye aacina simba rekuita zvakawanda hingana zvaaiita kare mu basa rekuparidzira? Nge ndaa yazvo iyena ungakwanisa kuguma pakuzwa hingana uno ndaa kana kuti usikabetseri. Uyezve pamweni munoziya hama ino nhenda yagarisa uye inorhwadza, nge ndaa yekuti aacakwanisi kupinda misangano yese ku Nyumba yo Umambo, unokwanisa kuguma pakuzwa akaora mwoyo. Ngazvipi zvamungaita kuti muabetsere? Reketai nawo “soko rakanaka rinobambisa.” (Aef. 4:29) Cedzai nawo nge zve masoko anobambisa atinogumira mu ngano ye mufirhwakadzi murombo. Kana mukadaro, mucakwanisa kuabetsera kuti agare ne cokwadi cokuti Djehovha anopfara nge kupeta masimba kaari kuita kunyazi asikacakwanisi kuita zviro zvakawanda. (Zvie. 15:23; 1Ate. 5:11) Kana mukabambisa hama no hanzvadzi nge kuita zvaanokwanisa kuna Djehovha—munonga mecipangidza kuti muri kuteera tsoka dza Djesu makagondeka.

21. Mashinga kuitei?

²¹ Zvinopfadza kuziya kuti ma Evhangeri anotibvunza zvakawanda nge zve upenyu wa Djesu, awona anotibetsera kuti tikwanise kumuteedzera uye tikwanise kuteera tsoka dzake takagondeka! Madini kukhorovhera pa fundo yenyu ye munhu ega kana kuti pa Kunamata ke Mhuri kuti mufunde zvakawanda nge zve ma Evhangeri? Edzurirai kuti, kana mecida kunyasa kukhorovhera pa fundo yenyu yekufunda ma Evhangeri, munodikana kupasa upenyu zviya zvamunonga mecierenga uye mozviseenzesa mu upenyu wenyu. Asi azvikwani basi pakuteedzera zviya zvakaizwa na Djesu, tinodikanawo kuzwa zviya zvaakareketa. Mu fundo inoteera, ticada kuona kuti tingafundei kubva pa masoko a Djesu ekupedzesera paainga ari pasi pano.