ZVAKAITIKA MU UPENYU
“Zvino Ndaakupfarira Basa Rekuparidzira!”
NDAKAKURIRA mu thaundi re Balclutha, ku citsuwa ce Katemaidumba ku Nova Zelândia. Ndiciri mudoko, ndaizwa ndiri padhuze na Djehovha uye ndakatanga kuda cokwadi. Kupinda misangano rainga risiripi basa rakakura, uye ungano yainga iri mbuto ye kutizira kandaizwa ndakacengeteka uye ndecipfara. Kunyazi hazvo ndainga ndisina ushamwari we kusikwa nawo, ndaipfadzwa nge kuenda mu basa re kuparidzira sumana imwe na imwe. Ndakaparidzira anhu andaifunda nawo uye no anhu amweni. Ndaidada ngo kugara umwe we Apupuri a Djehovha, uye no makore 11 e kubarhwa ndakapira upenyu wangu kuna Djehovha.
NDAKARUZA MUPFARO WANDAINGA NDINAWO
Zvinotsukwarisa kuti pandainga ndaakamusikana, ushamwari wangu na Djehovha wakacinja. Adoni angu e cikora aiita hingana kuti ainga ano rusununguko rakakura risina parinogumira, uye ndaiona hingana kuti ndiri kusarira. Ndaizwa ndakaremerhwa no mitemo ye abereki angu no tsika dzeciKristu, uye kuita zvekunamata kaiita hingana kuti i basa rinoshupha. Kunyazi hazvo ndisina kumbobvira ndabvunzisa kuti Djehovha ariyo here, ndakatanga kuzwa hingana ndisikabetseri pakunamata.
Zvaa zvadaro, ndakaita kuti ndisagare munhu asikacaiti basa ngo kuitira Djehovha basa re kupangidzira. Ndaienda mu basa rekuparidzira ndisikazi kumbogadzirira, hino zvaindishuphira maningi kutanga kucedza no munhu kana kuita kuti makani aenderere mberi. Migumisiro yazvo, basa rangu re kuparidzira rainga risikabudiriri uye risikapfadzi, izvi zvakatunhudzira pa ndangariro dzangu dzakashata. Ndaidzibvunzisa kuti, ‘Munhu ungakwanisa kudini kuita basa iri mwedzi no mwedzi, uye sumana no sumana?’
Pandakaita makore 17, ndainga ndino cido cakakura cekugara no rusunungungo. Hino ndakarongedza zviro zvangu, ndakabuda pamuzi uye ndakaenda ku Austrália. Zvakarhwadzisa maningi abereki angu kundiona ndecibuda panyumba. Awona ainga ecinetseka, asi akarangarira kuti ndaizorumbwa ndeciita zviro zvekunamata.
Ku Austrália, kutenda kangu kakatererazve maningi. Ndainga ndisikacapindi misangano nguwa dzese. Ndaiteedzera zvaiizwa no madjaha uye asikana amweni ainga ano thunga rangu, aipfadzwa ngo kuenda kumisangano usiku umwe uye usiku waiteera aibuda kuti aende komwa no kutamba mu mabhare. Pandinoringira sure, ndinoona kuti ndainga ndino murenje umwe mu cokwadi umweni mu nyika, asi ndainga ndisikanyasi kuziya kandainga ndakatsamira.
FUNDO RINODIKANWA RISIKAKARIRHWI
Paa padarika makore mairi, ndakaziyana no hanzvadzi imweni, ndisikariri, iyona yakandibetsera kuti ndirangarire nge zve kaienda upenyu wangu. Ndaigara no hanzvadzi shanu dzisikazi kuwakwa panyumba imweyo, uye takapika muonereri we nharaunda no mukadzi wake Tamara, kuti agare sumana imwe kunyumba kedu. Mwamuna wake paaionerera zviro zvinocokuita no ungano, Tamara aipedza nguwa yakareba na isusu uye aipfara maningi na isusu. Ndakazvipfarira. Iyena munhu wakaterama uye ari nyore kucedza naye. Ndakashamisika kuti munhu akakura mune zvekunamata angapfadza zvakadaro.
Tamara akadzara no mupfaro. Kuda kake cokwadi uye basa re kuparidzira kaiita kuti amweni aripfarirewo. Iyena waipfara ngo kupasa Djehovha zvakanaka zvake, nepo inini ndainga ndisikapfari ngo kuitira Djehovha basa re kupangidzira. Unhu wake wakanaka uye mupfaro wake we zvirokwazvo zvakacinja upenyu wangu. Muezaniso wake wakaita kuti ndirangarire nge zve cokwadi ciri muzvitarhwa cinoti: Djehovha anoda kuti tese timuseenzere “tecipfara” uye “tecipemberera no mupfaro.”—Pis. 100:2.
KUTANGAZVE KUPFADZWA NO BASA RE KUPARIDZIRA
Inini ndaidawo mupfaro wainga una Tamara, asi kuti ndione mupfaro uu, ndaidikana kuita cinjo dzakakura. Zvakatora nguwa, asi pakupedzesera ndakatanga kutora matanho madoko. Ndakatanga kugadzirira pakubuda mu basa re kuparidzira, uye ndakagara pionera we betsero, we nguwa dzese. Izvi zvakandibetsera kubvisa kutya kangu uye kuzwa “ndakadzigonda”. Ngo kuseenzesa Bhaibheri kakawanda mu basa re kuparidzira, ndakatanga kuzwa mupfaro we zvirokwazvo. Pasikazi kudarika nguwa yakareba, ndainga ndaa pionera we betsero mwedzi dzese.
Ndakatanga kuda kushamwaridzana no madzishamwari e mathunga ese aibudirira mu cokwadi uye aipfadzwa ngo kuseenzera Djehovha. Muezaniso wawo wakanaka wakandibetsera kuongorora zviro zvandaikanda pa mbuto ye kutanga uye kugara no urongwa wakanaka we kunamata. Ndakatanga kupfadzwa no basa rekuparidzira, uye ndakapedzesera ndaa pionera we nguwa dzese. Ke kutanga mu makore ese, kuzwa ndakagutsikana, kupfara uye kuzwa ndiri pa nyumba mu ungano.
NDAKAGUMIRA MUDONI WANGU MUPIONERO
Papera gore, ndakaziyana na Alex, munhu ane usisi, aida Djehovha uye kuparidzira. Iyena waiseenza hingana museenzi anobatira uye wainga aseenza hinga mupionero ke makore matanhatu. Alex wainga amboseenza ke nguwa doko kaidiwa aparidzi ku Malawi. Ari ikona, akashamwaridzana no mamisiyonario akamukohomedzesa kuti arumbwe ecikanda zviro zvinocokuita no Umambo pa mbuto yekutanga.
Muna 2003, Inini na Alex takacata, uye kubvira ipona, takarumbwa tiri mu basa re nguwa yakadzara. Takafunda zviro zvakawanda zvakanaka uye Djehovha akatikomborera ngo mishobo yakasiya-siyana.
MUKANA WE KUONA MAKOMBORERO AMWENI
Ndiri mu basa re kuparidzira ku Gleno, Timor-Leste
Mu gore ra 2009, takapikwa kuti tiende kooseenza hingana mamisiyonario ku Timor-Leste, nyika doko iri muzvitsuwa zve Indonésia. Takacema, takapfara uye takatya pa nguwa imwe-imweyo. Papera mwedzi mishanu, takaguma mu thaundi guru re nyika ye Dili.
Kufuruka uku kaibatanidza cinjo dzakakura mu upenyu wedu. Taidikana kudjairana no tsika ipsva, mureketero, zvekurhya, uye mararamiro. Tiri mu basa rekuparidzira, kajinji taisongana no anhu ainga ano dambudziko re kutama zviro, fundiso dziri pasi uye kudzvinyirirhwa. Uye takaona anhu akawanda ainga aciri no mbonje mu muiri uye mundangariro aikonzerhwa ge hondo uye no bongozozo. *
Kuparidzira kaishamisa! Ngo muezaniso, Ndakambosongana no musikana umweni we makore 13 anozwi Maria. * Mai ake ainga afa makore ainga adarika uye wainga asikaonani kakawanda na baba wake. Kuezana no ana amweni akawanda e thunga rake, Maria wainga asina ke kwenda mu upenyu. Ndinoedzurira nguwa imweni paakacema ecibvisa mazwiro ake. Pakutanga ndainga tisikazwisisi zvaainga ecireketa, nge ndaa yekuti ndainga ndisikanyasi kureketa mureketero wake. Ndakanamata kuna Djehovha, ndecimukumbira kuti ndikwanise kumubambisa, uye ndakatanga kumuerengera tsamba dzinobambisa. Makore manganani akazoteera, ndakaona cokwadi cecicinja unhu wa Maria uye upenyu wake. Akabhabhatidzwa uye zvino, ari kuitisa fundo dzake dze Bhaibheri. Nyamasi, Maria ane mhuri yakakura ye anamati uye waano cinangwa mu upenyu.
Djehovha akakomborera basa ku Timor-Leste. Kunyazi hazvo aparidzi akawanda akazobhabhatidzwa makore gumi adarika, akawanda awo ari kuseenza hinga mapionero, aseenzi anobatira, kana kuti akuru. Amweni awo ari kuseenzera kuma shikiritoriyo e kuturukira uye anobetsera pakugadzira zvekurhya zve kunamata mu mareketero e nyika yawo. Ndakapfara maningi ngo kuwazwa eciemba ku misangano, kuona hope dzawo dzecisekerera uye kuwaona ecikura pakunamata.
Na Alex, tecienda ku ndima isikazi kukowaniswa mupiko we Cirangaridzo
NDAINGA NDISIKAKWANISI KURANGARIRA UPENYU UNOPFADZA KUDAI
Basa redu ku Timor-Leste rainga rakasiyana maningi no upenyu we ku Austrália, asi ndainga ndisikakwanisi kurangarira upenyu unopfadza kudai. Nguwa dzimweni, tairongedzwa mu karu doko yakadzara no anhu pamwepo no howe dzakaomeswa no murhwi dze muriyo dzaiendeswa kubazari. Mazuwa amweni, taiitisa fundo ye Bhaibheri mu cinyumba cidoko caipisa uye makatota, pasi pakadzurhwa no mataka, ukuwo huku dzecigogomerana. Pasinei no zvitsinzwa izvi, kajinji ndairangarira kuti, ‘Izvi zvinoshamisa!’
Tiri mugwanza tecienda ku ndima yedu
Ndeciringira sure, ndinotenda abereki angu akaita zvese zvaanokwanisa kuti andifundise nge zva Djehovha uye ngo kunditsigira, kunyazi paudoko wangu wakashupha. Zvierengo 22:6 yakagara ye zvirokwazvo kandiri. Mai na baba anodada neni uye na Alex; anopfara ngo kutiona teciseenzeswa na Djehovha. Kubvira muna 2016 tainga teciseenza hingana muonereri we nharaunda mu ndima ye ku Australasia.
Ndecipangidza vhidhiyo ya Kuda na Saru ku ana anopfara e ku Timor-Leste
Zvinoita hingana kuti zvinoshupha kuzvitendera kuti ndakamboona basa re kuparidzira hingana kuti rainga riri basa rakakura. Zvino ndaakupfarira basa re kuparidzira! Ndakaona kuti pasinei no zvitsinzwa zve upenyu, mupfaro we zvirokwazvo unobva pakuseenzera Djehovha no mwoyo wese. Zvezvirokwazvo, makore 18 adarika teciseenzera Djehovha na Alex ainga ari makore anopfadza maningi e upenyu wangu. Zvino ndinozwisisa cokwadi ciri pana Pisarema cakarekethwa na Dhavhidhi kuna Djehovha: “Ese anotizira kamuri acapfara, acapemberera no mupfaro. . . . Uye ese anoda zina renyu acamupfarirai.”—Pis. 5:11.
Mupfaro mukuru kufunda Bhaibheri no anhu anodzidodosa!
