MUSORO WE KUFUNDA 7
Kuzwisisa nge zve Musoro mu Ungano
“Ngokuti Kristu zvaari musoro we ungano, ndiye muponesi we mwuiri uu.”—VAEF. 5:23.
NGOMA 134 Ana i Nhaka ya Mwari
ZVATICAFUNDA *
1. Cinyi cinoita kuti mhuri ya Djehovha igare yakabatana?
TINOPFARA nge kugara nhai ye mhuri ya Djehovha. Ngei mhuri yedu ino runyararo uye yakabatana? Cinoita kuti zvidaro nde cekuti tese isusu tinoita zviri zvese kuti tireremedze musoro wakagadzwa na Djehovha. Zvezvirokwazvo, patinonyasa kuzvisisa nge zve urongwa we kutungamirira, ticatunhudzira kukabatana.
2. Mibvunzo dzipi dzaticadaira mu fundo ino?
2 Mu fundo ino, ticafunda nge zve umusoro kuseenza kaunoita mu ungano. Pakutunhudzira, ticadaira mibvunzo dzinoteera: I basa ripi re hanzvadzi? Izvirokwazvo here kuti hama imwe nga imwe i musoro we hanzvadzi imwe nga imwe? Akuru ano simba rimwero ku hama no hanzvadzi hingana simba rino musoro we mhuri ku mukadzi uye no ana ake here? Cokutanga, ngatitangei taongorora kuti tinodikana kuona kudini hanzvadzi?
TINODIKANA KUONA KUDINI HANZVADZI?
3. Tingatunhudzira kudini rukudzo ratinaro pa basa rinoizwa no hamzvadzi dzedu?
3 Tinoreremedza hanzvadzi dzedu nge basa rakakura raari kuitira mhuri dzawo, pa kuparidza masoko anopfadza, uye no kutsigira kaanoita ungano. Tinokwanisa kutunhudzira rukudzo redu kaari ngo kufunda nge zve maonerhwe aanoizva na Djehovha uye na Djesu. Ticabetserhwawo nge kufunda kuti muphostori Pauro waibata kudini anakadzi.
4. Bhaibheri rinopangidza kudini kuti Djehovha unokoshesa anakadzi hingana zvaanoita ku anarume?
4 Bhaibheri rinopangidza kuti Djehovha unokoshesa anarume pamwepo no anakadzi. Ngo muezaniso, tinoona kuti munguwa ye aKrstu e kutanga, Djehovha akapasa mwiya mucena anarume pamwepo no anakadzi uye akaapasa simba re kuita mabasa anoshamisa, hingana kureketa mireketero yakasiyana-siyana. (Zvi. 2:1-4, 15-18) Awona ainga akadzodzwa o mwiya mucena uye ainga ano kariro ye kutonga na Kristu. (Aga. 3:26-29) Anarume pamwepo no anakadzi acatambira mubairo we kurarama nokusikaperi pa nyika. (Zva. 7:9, 10, 13-15) Uyewo anarume kutobatanidzawo no anakadzi akapaswa basa re kuparidzira uye no re kufundisa masoko anpfadza. (Mt. 28:19, 20) Zvezvirokwazvo, bhuku rinoreketa nge zve basa raiizwa no hanzvadzi imweni inozwi Prisira, pamwepo no mwamuna wake, Akira, akabetsera mwanarume waizwi Aporo wainga akafunda maningi kuti anyase kuzwisisa cokwadi.—Zvi. 18:24-26.
5. Ruka 10:38, 39, 42 inopangidza kudini nge zve mabatire aiita Djesu anakadzi?
5 Djesu aipasa anakadzi rukudzo uye no rureremedzo. Ayena ainga asikateedzeri tsika ye Afarisi, aionera pasi anakadzi uye awona ainga asikareketi nawo pakadzara nge anhu, kana kuti kutocedza nawo nge Matarhwa. Kusiyana na izvi, ayena aiyabatanidzawo pese paaicedza nge zve zviro zve kumwiya zvakadzika no afundi ake amweni. * (Erengai Ruka 10:38, 39, 42.) Ayena akatenderawo kuti anakadzi ahambe naye pa rwendo rake re kuparidzira. (Ru. 8:1-3) Uyewo Djesu akaapasa ropapfadzo ye koziisa aphostori kuti ainga amutswa kubva ku akafa.—Ju. 20:16-18.
6. Zwinyi zvakaizwa na Pauro zvaipangidza kuti aireremedza anakadzi?
6 Muphostori Pauro akaedzirira Timoti kuti akudze anakadzi. Pauro akamungwadza kuti anodikana kubata “hanzvadzi dzakakura hingana mai” uye aone “hanzvadzi dzecidjaha hingana madziyaya.” (1Ti. 5:1, 2) Pauro akaita zviri zvese pakubetsera Timoti kuti akure pa kunamata, asi iyena aitendera kuti mbuya uye no mai wake ndiwona akatanga kufundisa Timoti “matarhwa akacena.” (2Ti. 1:5; 3:14, 15) Pauro akacungamidza hanzvadzi ecitara mazina adzo mu tsamba yaakatarira Aroma. Iyena aazi kuguma pa kuziya mabasa aiita basi, asi akaasimba eciadaidza hinga aseenzi e ciKristu.—Aro. 16:1-4, 6, 12; Afi. 4:3.
7. Mibvunzo dzipi dzaticadaira zvino?
7 Hingana zvarekethwa mu ndima dzadarika, apana tsamba iri mu Bhaibheri inoita kuti tirangarire kuti hanzvadzi adzikoshi kupinda hama. Hanzvadzi dzedu dzatinoda uye dzino rupo dzinokosha maningi, uye akuru anoda rubetso rawo pa kuita kuti ungano irumbwe ino runyararo uye yakabatana. Asi pano mibvunzo dzimweni dzinoda kudairhwa. Ngo muezaniso: Ngei pamweni paya Djehovha unoda kuti hanzvadzi isunge dhuku mu musoro? Ngokuti hama basi ndidzo dzinokwaniriswa kugara akuru, uye no abati anoseenzera, izvi zviri kuda kureya kuti hama imwe nga imwe ndi musoro we hanzvadzi imwe nga imwe mu ungano here?
HAMA IMWE NGA IMWE I MUSORO WE HANZVADZI IMWE NGA IMWE HERE?
8. Maererano no Aefeso 5:23, hama imwe nga imwe i musoro we hanzvadzdi imwe nga imwe here? Panganidzai.
8 Mhinduro iri nyore ndeye kuti haiwa! Hama imusoropi we hanzvadzi imwe nga imwe iri mu ungano; asi Kristu ndiye. (Erengai Aefeso 5:23.) Mu mhuri, mwamuna ano simba pa mukadzi wake. Mwana we mwanarume akabhabhatidzwa aamusoropi we mai wake. (Aef. 6:1, 2) Uye mu ungano, akuru simba rawo pano parinogumira kuno hanzvadzi uye ku hama. (1Ate. 5:12; Ahe. 13:17) anakadzi asikazi kuwakwa asikararami pamwepo no madzibaba awo anorumbwa ecireremedza madzibaba awo uye no akuru. Ngokudaro, hingana anarume mu ungano, iwona ano musoro umwe basi, Djesu.
Aya asati awakwa anonga asikacararami no madzibaba awo, anonga ari pasi pe kutungamirira ka Djesu (Onai ndima 8)
9. Ngei pamweni paya hanzvadzi inodikana kusunga dhuku mu musoro?
9 Izvirokwazvo, ngokudaro, basa rakapaswa mwanarume na Djehovha i kufundisa uye no kuonerera kunamata mu ungano, Uye ayena aazi kupasa anakadzi basa rimwero. (1Ti. 2:12) Ngei? Nge mushobo umwewo kuti ayena akagadza Djesu hinga musoro we mwanarume—kuti mhuri yake igare yakarongeka. Nge ndaa ye magarire e zviro, hanzvadzi painonga yecida kuita basa raidikana kuizwa no hama, Djehovha unokumbira kuti iyona isunge dhuku mu musoro mayo. * (1Ako. 11:4-7) Djehovha unokumbira izvona ku hanzvadzi, haiwa kuti adzidodose, asi kuti aapase mushobo we kupangidza rukudzo pa mutemo we musoro. Tecirangarira izvi zvataakuziya, ngatidairei zvino mubvunzo unoti: Simba rakadini rino misoro ye mhuri uye akuru?
BASA RE MISORO YE MHURI UYE NO RE AKURU
10. Ngei mukuru angakwanisa kuguma pa kukanda zvimitemo ku ungano?
10 Akuru anoda Kristu, uye awona anodawo “mabira” aakapaswa na Djehovha uye na Djesu kuti aatungamirire. (Ju. 21:15-17) Nge zvido zvakanaka, mukuru ungakwanisa kudziona hingana musoro we ubaba mu ungano. Iyena ungakwanisa kurangarira kuti kana musoro we mu mhuri ane citenderhwa ce kukanda mitemo yekucengetedza mhuri yake, mukuru unokwanisawo kukanda mitemo yake yaanorangarira kuti icacengetedza mabira a Mwari. Uye hama no hanzvadzi dzingakwanisa kukohomedzesa akuru kuti aite hingana ari misoro yawo ye ku mwiya eciita kuti iwona awasanangurire. Asi akuru e mu ungano ano simba rimwero hingana rino misoro ye mhuri here?
Akuru anoita zviri zvese kuti acengetedze pa zvinodikanwa zve kumwiya uye no zve mundangariro ku ungano. Djehovha akaapasa simba re kuita kuti ungano irumbwe yakacena pa muhambiro (Onai mandima 11-12)
11. Simba rino misoro ye mhuri uye no rino akuru rakaezana papi?
11 Muphostori Pauro akaita kuti tizwisise kuti pano kutodzana pa basa re musoro we mhuri no re mukuru. (1Ti. 3:4, 5) Ngo muezaniso, Djehovha unoda kuti nhengo imwe nga imwe ye mhuri azwire musoro we mu mhuri. (Ako. 3:20) Uye anodawo kuti ese ari mu ungano azwire akuru. Djehovha unoetsera kuti misoro ye mhuri uye no kutobatanidzawo akuru kuti agare no zvirokwazvo zvekuti ese aanoonerera agare no uthongo wakanaka pakunamata. Ese ano basa re kupasa zvinodikanwa zve ese aya aanoonga ecionerera. Uye hingana musoro we mhuri akanaka, akuru anoitawo zviri zvese kuti ese aya aanoga ecionerera aone rubetso pa nguwa ye kukonerhwa. (Tg. 2:15-17) Mukutunhudzira, Djehovha unoda kuti akuru uye no misoro ye mhuri atsigire mitemo yake haiwa “kuita zviro zvinodarika zviya zvakatarhwa” mu Bhaibheri.—1Ako. 4:6.
Musoro we mhuri akapaswa simba na Djehovha kuti atungamirire mhuri yake. Asati aita cisananguro, musoro we mhuri ano rudo anombobvunzisawo mukadzi wake (Onai ndima 13)
12-13. Hingana zvinorekethwa pana Aroma 7:2, mabasa anoizwa no misoro ye mhuri uye no e akuru akasiyana papi?
12 Ngokudaro, pane kusiyanawo pa simba rino akuru uye no simba rino misoro ye mhuri. Ngo muezaniso, Djehovha akagadza akuru aite hingana atongi, uyewo akaapasa ubaba we kubvisa mushaishi mu ungano.—1Ako. 5:11-13.
13 Nge dii rimweni, Djehovha akapasa simba misoro ye mhuri rakasiyana no raakapasa akuru. Ngo muezaniso, ayena akatendera kuti musoro we mhuri kuti aite uye agadze mitemo ku mhuri yake. (Erengai Aroma 7:2.) Ngo muezaniso, musoro we mhuri uno citenderhwa ce kugadza kuti inguwai yekuti an ake yaanodikana kuguma pa nyumba co usiku. Ayena akaapasawo simba re kupangira ana ake, pese paanoputsa mutemo uu waakagadza. (Aef. 6:1) Zviri pamhene kuti, misoro ye mhuri ino rudo anobvunzisa akadzi awo pese paanonga asati ainta cisananguro; kana tikada kuona, aona airi i “nyama imwe.” *—Mt. 19:6.
KUDZAI KRISTU HINGANA MUSORO WE UNGANO
Djesu, ecitungamirirhwa na Djehovha hinga musoro, anopasa nhungamiririo ku ungano ye ciKristu (Onai ndima 14)
14. (a) Hingana zvinorekethwa pana Marko 10:45, ngei zvakasisira kuti Djehovha agadze Djesu hinga musoro we ungano? (b) I basa ripi rino Dare Rinotungamirira? (Onai bhokisi rakazwi “ Basa re Dare Rinotungamirira.”)
14 Nge ndaa ye rusudzunuro, Djehovha akatenga upenyu we umwe nga umwe ari mu ungano, uye kutobatanidzawo anhu e pasi. (Erengai Marko 10:45; Zvi. 20:28; 1Ako. 15:21, 22) Ngokudaro, zvakasisira kuti akagadza Djesu, uyo akapasa upenyu wake hingana rusudzunuro, hinga musoro we ungano. Hingana musoro wedu, Djesu ano simba re kuita uye no re kukanda mitemo ye muhambiro wakanaka ku munhu umwe nga umwe, ku mhuri, uye ku ungano yese. (Aga. 6:2) Asi Djesu unoita zvakawanda kupinda kugadza mitemo basi. Ayena unoriritira uye unokoshesa umwe nga umwe wedu.—Aef. 5:29.
15-16. Mafundei nge zve masoko arekethwa no anzvadzi inozwi Marley uye no hama inozwi Bhenjamii?
15 Hanzvadzi dzinopangidza kuti dzinoreremedza Kristu, padzinopurutana nhungamikriro dzaanopaswa no amuna awo akagadzawa kuti aacengete. Hanzvadzi inozwi Marley, inorarama ku Estados Unidos, inoreketa nge zve maonero e hanzvadzi dzakawanda. Iyona inoti: “Ndinokoshesa mbuto yangu mu ungano hingana mukadzi uye hanzvadzi. Ndaidikana kupeta masimba ari ese kuti ndigare no maonero akanaka nge zve urongwa wa Djehovha we musoro. Asi mwamuna wangu uye no hama dziri mu ungano akaita kuti izvona zvigare nyore kandiri, ngokuti awona anondireremedza uye anopangidza kutenda pa mabasa andinoita.”
16 Hama dzinopangidza kuti dzinozwisisa nge zve urongwa we musoro nge kureremedza uye kukudza hanzvadzi. Bhenjamii, hama inorarama ku Inglaterra, inoti: “Ndinofunda zvakawanda nge mhinduro dzinopaswa no hanzvadzi pa misangano uye nge zve mazano awo ekuti mungafundisa kudini uye mungabudirira mu basa re mumunda. Ndinorangarira nge zve basa raanoita kuti rinokosha maningi.”
17. Ngei tecidikana kureremedza mutemo we kugara musoro?
17 Kana ese ari mu ungano—amuna, anakadzi, misoro ye mhuri uye no akuru—kana akazwisisa uye no kureremedza basa re musoro, mu ungano mucagara no runyararo. Uye zvinonyanya kukosha nde zve kuti, tese tinokudza Baba wedu we kudenga, Djehovha.—Pis. 150:6.
NGOMA 130 Ngatirekererane
^ par. 5 I basa ripi re hanzvadzi mu ungano? Hama dzese I musoro we hanzvadzi dzese here? Akuru uye no misoro ye mhuri ano simba rimwero here? Fundo ino, icadaira mibhunzo ii uye icaongorora miezanoiso yakawanda yatinogumira mu Soko ra Mwari.
^ par. 5 Onai ndima 6 ye musoro unoti “Betserai Hanzvadzi dze mu Ungano Yenyu,” we Murindiri wakabudiswa mu Mavhavhu 2020.
^ par. 9 Onai bhokisi rakazwi “ Hanzvadzi Inodikana Kusunga Dhuku Musoro Riini?”
^ par. 13 Kuti muziye zvakawanda nge zvekuti ndiyani unodikana kuita cisanaguro cekuti mhuri imwe nga imwe inodikana kupinda no ungano ipi, onai mandima 17-19 e musoro unoti “Remekedza Munhu Mumwe Nemumwe Ari Muungano,” we Murindiri wakabudiswa mu mwedzi wa Katutu gore ra 2020, mu ciShona.
^ par. 59 Kuti mukwanise kuziya zvakawanda, onai bhokisi re bhuku rinozwi “Rambai Muri Murudo rwaMwari”, riri pa mapaji. 209-212, mu ciShona.
^ par. 64 Kuti mukwanise kuziya zvakawanda nge zve basa re Dare Rinotungamirira, onai Murindiri wakabudiswa mu mwedzi wa Khunguru ya 15 ya 2013, mapaji. 20-25, mu ciShona.
