1-2. Maererano na Mateu 5:11, tinodikana kuona kudini miedzo?

DJESU akagondesa ateeri ake kuti aizopfara zvezvirokwazvo. Iyena akangwadzawo aya anomuda kuti aizosongana no miedzo. (Mt. 10:22, 23; Ru. 6:20-23) Tino mupfaro nge kugara afundi a Kristu. Asi tinozwa kudini patinoshorhwa no we mu mhuri medu, kuteererhwa no anyautongi, kana kubambidzirhwa kuita zviro zvakashata ne anhu atinoseenza nawo kana atinofunda nawo? Zvinozwisisika kuti zviro zvakadai zvinoita kuti tidzirhye mwoyo.

² Anhu aaoni kuteererhwa hingana mukana unoita kuti tipfare. Asi Soko ra Mwari rinotikohomedzesa kuti tiite izvona. Ngo muezaniso, mufundi Tiyago wakatara kuti pane kuti tizwe kurhwadziwa, tinodikana kupfara patinosongana no miedzo. (Tg. 1:2, 12) Uye Djesu akabhuya kuti tinodikana kupfara kunyazi patinoteererhwa. (Erengai Mateu 5:11.) Tingarumbwa kudini tecipfara kunyazi tecisongana no miedzo? Tingafunda zvakawanda patinorangarira tsamba dzakatarirhwa aKristu e pakutanga na Tiyago. Ticatanga kuongorora zvineso zvaakasongana nazvo.

3. Zvinyi zvakaitika mu masure mekuti Tiyago agara mufundi?

³ Mu masure mekuti munukuna wa Djesu, Tiyago agara mufundi, aKristu e ku Djerusarema akateererhwa. (Zvi. 1:14; 5:17, 18) Mufundi Estevão paakauraiwa, aKristu akawanda akatiza mu thaundiro uye “akabararika ku Djudhiya kese uye ku Samariya,” akazoguma kure hingana ku Chipre uye ku Antioquia. (Zvi. 7:58–8:1; 11:19) Afundi akasongana no matambudziko akawanda. Kunyazi zvakadaro, akaparidzira masoko anopfadza  ku mbuto dzese, uye ungano dzakawakwa mu nyika yese ye Roma. (1Pe. 1:1) Asi mu masure me zvese izvi, aona akasongana no matambudziko amwenizve.

4. Miedzo ipizve yakasongana no aKristu e pakutanga?

⁴ AKristu e pakutanga akasongana no miedzo yakawanda. Ngo muezaniso, mu gore ra 50 K.A., Mambo we ku Roma unozwi Cláudio wakapasa mutemo wekuti aDjudha ese abve mu nyika ye Roma. Hino, aDjudha ainga agara aKristu akabambidzirhwa kusiya nyumba dzawo uye kuti aende koogara ku mbuto dzimweni. Mu gore ra 61 K.A., mu phostori Pauro wakatara kuti hama dzake dze ciKristu dzakapumhwa, dzokandwa mu karaboso uye akabirhwa zviro zvawo. (Ahe. 10:32-34) Uye kuita hingana anhu amweni, aKristu akasongana no urombo uye nhenda dzakasiyana-siyana.—Aro. 15:26; Afi. 2:25-27.

5. Ticadaira mibvunzo dzipi?

⁵ Tiyago paakatara tsamba yake mu gore ra 62 K.A., wainyasa kuziya kuedzwa kaisongana no hama uye hanzvadzi dzake. Djehovha akafemera Tiyago kuti atarire aKristu aona kuti aapase mazano anoabetsera kuti arumbwe ecipfara kunyazi paanosongana no miedzo. Ngationgorore tsamba ya Tiyago uye ngatidaire mibvunzo idzi: Mupfaro upi wakatarhwa na Tiyago? Cinyi cingaita kuti muKristu asapfare? Ungwaru, kutenda uye ushingi zvingatibetsera kudini kuti tirumbwe tecipfara, kunyazi tecisongana no miedzo?

6. Maererano na Ruka 6:22, 23, ngei muKristu ecikwanisa kupfara kunyazi paanosongana no miedzo?

⁶ Anhu angarangarira kuti angapfara basi kana ano uthongo wakanaka, mare yakawanda uye kugara no runyararo mu mhuri. Asi  mupfaro wakareketwa na Tiyago unobva ku mwiya mucena wa Mwari haiwa pa mugarire we zviro zvatinazvo. (Aga. 5:22) Mu Kristu unopfara nge kuziya kuti uri kupfadza Djehovha uye uri kuteera muezaniso wa Djesu. (Erengai Ruka 6:22, 23; Ako. 1:10, 11) Mupfaro wedu ungaezaniswa no mboni ye ruju. Mboni inodziirirhwa pa mhepo kana pa mvura kuti irumbwe yecibaka. Tingarumbwawo tecipfara, pasinei no cingaitika mu upenyu wedu. Atiruzi mupfaro wedu patinorhwara kana patisina mare. Uye tinorumbwa tecipfara kunyazi patinosekwa, kunyazi tecizondwa nge we mu mhuri kana amweniwo. Mupfaro wedu unotunhudzirika anhu paanoedza kuita kuti tisapfare. Miyedzo yatinosongana nawo nge ndaa ye kutenda kedu inopangidza kuti tiri afundi a Kristu e cokwadi. (Mt. 10:22; 24:9; Ju. 15:20) Ndiyo ndaa Tiyago wakatara kuti: “Hama dzangu, pfarai, pamunosongana ne miedzo yakasiyana-siyana.”—Tg. 1:2.

7-8. Kutenda kedu kunobetserhwa kudini patinoedzwa?

⁷ Tiyago unopanganidza kuti ngei aKristu akagadzirira kushingirira miyedzo inoshupha. Iyena unoti: “Kutenda kenyu uku kukaedzwa kunobara kushingirira.” (Tg. 1:3) Miedzo ingaezaniswa no muriro unoseenzeswa no munhu unogadzira simbi. Simbi painopiswa yotonhodzwa ne mvura, inonyasa kubamba. Zvimwezvoo, patinoshingirira miedzo, kutenda kedu kunobambiswa. Ndiyo ndaa Tiyago wakatara kuti: “Kushingirira ngakupedze basa rako, kuti ugare wakakwana uye wakanaka pa zviro zvese.” (Tg. 1:4) Patinoona kuti miedzo yedu inobambisa kutenda kedu, tingaishingirira no mupfaro.

⁸ Mu tsamba yake, Tiyago unoreketa nge zve zvineso zvimweni zvingaita kuti tiruze mupfaro wedu. Miedzo ipi uye tingaishingirira kudini?

9. Ngei tecida ungwaru?

⁹ Cineso: Patisingazii zvekuita. Patinosongana no miedzo, tinodikana kukumbira rubetso ra Djehovha kuti tiite zvisananguro zvinopfadza uye zvinobetsera hama no hanzvadzi dzedu uye zvingatibetserawo kuti tirumbwe takagondeka. (Dje. 10:23) Tinoda ungwaru kuti tiziye zvekuita uye zvekureketa kuno anhu aya anotiphikisa. Kana tikatama kuziya zvekuita, tingaora mwoyo ngekuti atizii zvekuita uye tingaruza mupfaro wedu nokukasika.

10. Maererano na Tiyago 1:5, tinodikana kuitei kuti tione ungwaru?

¹⁰ Zvatinodikana kuita: Kumbirai ungwaru kuna Djehovha. Kana tecida kushingirira no mupfaro miedzo yatinosongana nayo, tinodikana kutanga takumbira Djehovha teciseenzesa munamato kuti atipase ungwaru  watinoda kuti tiite zvisananguro zvakanaka. (Erengai Tiyago 1:5.) Tinodikana kuitei kana tikaona kuti Djehovha aaripi kudaira munamato wedu nokukasika? Tiyago unoti tinodikana “kurumbwa tecikumbira” kuna Mwari. Djehovha aanyangadzwi patinorumbwa tecimukumbira ungwaru. Baba edu e kudenga “anotipasa” kana tikaita munamato tecikumbira ungwaru kuti tishingirire miedzo. (Pis. 25:12, 13) Ayena anoona miedzo yatinosongana nayo, anotizwira usisi uye anoda kutibetsera. Izvi zvinotipfadza zvezvirokwazvo! Asi Djehovha anotipasa kudini ungwaru?

11. Ngazvipi zvatinodikana kuitazve kuti tione ungwaru?

¹¹ Djehovha anotipasa ungwaru eciseenzesa Soko rake. (Zvie. 2:6) Kuti tione ungwaru uu, tinodikana kufunda Soko ra Mwari uye mabhuku anopanganidza Bhaibheri. Asi tinodikana kuita zvakawanda pane kundounganidza uzii basi. Tinodikana kuita kuti ungwaru wa Mwari useenze mu upenyu wedu, teciita maererano no mazano ake. Tiyago wakatara kuti: “Garai aiti e soko haiwa apurutani basi.” (Tg. 1:22) Patinoseenzesa mazano a Mwari, tinotunhudzira kugara no runyararo, kuzwisisa uye usisi. (Tg. 3:17) Mawara aya anotibetsera kushingirira miedzo tecipfara.

12. Ngei zvecikosha maningi kuti tinyase kuzia Bhaibheri zvakanaka?

¹² Soko ra Mwari rinoseenza hingana supea, recitibetsera kuziya uye kugadzirisa paya patinodikana kuseenzera. (Tg. 1:23-25) Ngo muezaniso, mu masure mekufunda Soko ra Mwari, tingaona kuti tinodikana kuonerera miitiro yedu. Tecibetserhwa na Djehovha, tinogara anhu ano upfawi kunyazi patinoizwirhwa zvakashata. Ne upfawi tinonyasa kukwanisana ne miedzo ingawiya. Tinokwanisa kurangarira uye kuita zvisananguro zvakanaka. (Tg. 3:13) Zvinokosha maningi kuti tinyase kuziya Bhaibheri zvakanaka!

13. Ngei tecidikana kufunda miezaniso ye anhu anoreketwa mu Bhaibheri?

 ¹³ Nguwa dzimweni tinofunda catisikadikani kuita mu masure mekuita ciro cakashata. Asi amushobopi wakanaka we kufundira. Mushobo wakanaka we kugara no ungwaru nge we kufunda kubva pa zviro zvakanaka uye zvakashata zvinoizwa no anhu amweni. Ndiyo ndaa Tiyago ecitikohomedzesa kuona miezaniso iri mu Bhaibheri yakadai hingana Abrahamu, Rakabhi, Djobo uye Eriya. (Tg. 2:21-26; 5:10, 11, 17, 18) Aseenzi aya a Djehovha akagondeka akakwanisa kushingirira miedzo yaikwanisa kuabira mupfaro. Miezaniso yawo yekushingirira inopangidza kuti no rubetso ra Djehovha tingakwanisa kuitawo zvimwezvo.

14-15. Ngei tecidikana kupsvaka mhinduro dze mibvunzo dzedu?

¹⁴ Cineso: Patinonga tisina cokwadi no zvatinotenda. Nguwa dzimweni tingakonerhwa kuzwisisa zviro zvimweni zvinorekethwa mu Bhaibheri. Kana kuti Djehovha angadaira minamato yedu nge mushobo watainga tisikakariri. Izvi zvingaita kuti tisagare no cokwadi. Kana tikatama kupsvaka zviya zvatisikazii, kutenda kedu kucaremba uye zvicakuwadza ukama wedu na Djehovha. (Tg. 1:7, 8) Uyewo zvicaita kuti tiruze kariro yedu ye ramangwana.

¹⁵ Mu phostori Pauro akaezanisa kariro yedu ye mberi ne âncora. (Ahe. 6:19) Âncora ciro cinotsigira bharko kuti risakukurhwe mu nguwa ye dutu. Asi rinobetsera basi kana korenti yakabatanidzwa no bharko ikatama kuguka. Kuita hingana furuju inorembesa korenti ye âncora, tikatama kupsvaka mhinduro dzatisikazii dze mibvunzo dzatinadzo, kutenda kedu kunorembawo. Hino, patinosongana no zvineso tingapsvetekerhwa ne kutenda kuti Djehovha acadzadzisa zvipikirhwa zvake. Patinopsvetekerhwa no kutenda kedu, tinopsvetekerhwawo no kariro yedu. Hingana zvinorekethwa na Tiyago, uya unopanikira “wakaezana no ma onda e mvura anothwarhwa no mhepo eciendeswa kese-kese.” (Tg. 1:6) Zviri pamhene kuti, munhu uri pamigarire wakadai aapfari!

16. Tinodikana kuitei kana tikagara no mibvunzo?

¹⁶ Zvamunodikana kuita: Itai kuti musagare ne mibvunzo; bambisai kutenda kenyu. Musagare no mwoyo miiri. Mu nguwa ye mu phorofiti Eriya, anhu a Djehovha ainga ano mwoyo miiri. Eriya akati kaari: “Mucarumbwa muine mwoyo miiri dakara riini? Kana Djehovha ari Mwari we cokwadi, muteerei; asi kana ari Bhaari, muteerei!” (1Mad. 18:21) Zviro izvi zvicirikuitika na nyamasi uno. Tinodikana kuita zviri zvese kuti tigare no cokwadi cekuti Djehovha ndi Mwari, kuti Bhaibheri i Soko rake uye kuti Apupuri a Djehovha ndiwo anhu ake. (1Ate. 5:21) Kana tikaita zviro zvese izvi, zvicaita kuti tisagare no mubvunzo uye zvicabambisa kutenda kedu. Kana tikada kubetserhwa pa kudaira mibvunzo dzatinadzo, tingabvunzisa akuru. Tinodikana kutora matanho akakura kana tecida kurumbwa tino mupfaro pakuseenzera Djehovha!

17. Cinyi cingaitika kana tikatama kugara no ushingi?

¹⁷ Cineso: Kuora mwoyo. Soko ra Mwari rinoti: “Wakaora mwoyo pa zuwa re dambudziko rako here, simba rako ricagara doko.” (Zvie. 24:10) Soko re ci Hebheru rakaturikirhwa rekuti “kuora mwoyo” riri kuda kureya “kuruza mupfaro.” Kana mukaruza ushingi, mucaruzawo mupfaro nokukasika.

18. Kushingirira kunoreyei?

¹⁸ Zvatinodikana kuita: Gondai Djehovha kuti amupasei ushingi uye kushingirira. Tinokwanisa kugara no mupfaro kunyazi patinonga tiri pa miedzo. (Tg. 5:11) Soko rakaseenzeswa na Tiyago rekuti “kushingirira”  rinopasa mazwiro e munhu unorumbwa akabamba pa mbuto yaanonga ari. Tingarangarira nge zve mu surudado unoima akashinga pa mbuto yake uye asingatizi muzondi paanomurhwisa.

19. Tingafundei kubva pa muezaniso wa Pauro?

¹⁹ Mu phostori Pauro wakapasa muezaniso wakanaka wekushinga uye kushingirira. Nguwa dzimweni iyena waizwa kupera simba. Asi wakakwanisa kushingirira ngekuti wakagonda Djehovha kuti amupase simba raaida. (2Ako. 12:8-10; Afi. 4:13) Tingaonawo simba uye ushingi kana tikatendera kuti tinoda rubetso ra Djehovha.—Tg. 4:10.

20-21. Tingagara no cokwadi cipi?

²⁰ Tingakwanisa kugara no cokwadi cekuti miedzo dzatinosongana nadzo akuphanicwapi na Djehovha. Tiyago unotigondesa kuti: “Munhu paanonga eciedzwa ngaasabhuye kuti: ‘Ndiri kuedzwa na Mwari.’ Ngekuti apana ungaedza Mwari no zviro zvakashata, uye ayena aaedzi munhu.” (Tg. 1:13) Patinogara no cokwadi nazvo, tinokwedera dhuze na Baba edu ekudenga ane rudo.—Tg. 4:8.

²¹ Djehovha “aacinji.” (Tg. 1:17) Ayena akatsigira aKristu e pakutanga paaisongana no miedzo uye acabetserawo umwe na umwe wedu. Kumbirai Djehovha no mwoyo wese kuti amupase ungwaru, kutenda uye ushingi. Ayena acadaira minamato yenyu. Ngokudaro, mucagara no cokwadi cekuti ayena acamubetsera kuti murumbwe mecipfara kunyazi pamunosongana no miedzo!