1. Zviro zvipi zvingakwanisa kurangarirhwa no anarume pa kugara musoro?

SOKO rekuti “musoro” rinoreyei kamuri? Anarume amweni anotendera kuti tsika, kana kuti marererhwe aakaizwa, aabetsere pa mabatiro aanoita akadzi ne ana awo. Onai zvakarekethwa na Yanita, hanzvadzi inogara ku Europa, iyona yakati: “Kuno kandinogara, kuno maonero ano nzinde dzakakura e kuti anakadzi akadodoka kupinda anarume uye anodikana kuonekwa hingana aranda.” Uye hama inozwi Ruka, inorarama ku Estados Unidos, inoti: “Madzibaba amweni anofundisa ana awo e anarume kuti akadzi anodikana kuoniwa basi haiwa kuwazwa, nge kuti maonero awo aakoshi.” Ngokudaro, miitiro ii aipangidzi makwanza a Djehohva aanoda kuti anarume agare musoro wakanaka. (Ezanisai na Marko 7:13.) Hino, mwanarume angaita kudini kuti afundire kugara musoro we mhuri wakanaka?

2. Musoro we mhuri unodikana kuziyei, uye ngei?

² Kuti agare musoro wakanaka, mwanarume unodinakana kutanga azwisisa kuti ngazvipi zvinodikanwa na Djehovha kaari. Uye unodikana kuzwisisa kuti ngei Djehovha akamugadza hingana musoro, uye ungateedzera kudini muezaniso unopangidzwa na Djehovha uye Djesu. Ngei zvakanaka maningi kuti mwanarume aziye izvi? Ngokuti Djehovha akapasa simba musoro wese we mhuri uye anoda kuti awona ariseenzese ngo mwazvo.—Ru. 12:48b.

3. Tingafundei nge zve musoro unorekethwa pana 1 Akorinti 11:3?

³ Erengai 1 Akorinti 11:3. Vherisikuro ii inopanganidza kuti Djehovha akaronga kudini mhuri yake ye pasi rese. Musoro unobatanidza zviro zviiri—simba uye kudzidairira. Djehovha ndi “musoro,” kana kuti ano simba kupinda ese, uye ana ake ese, kubatanidza ngirozi uye anhu ari pasi pake. (Aro.  14:10; Aef. 3:14, 15) Djehovha akapasa simba Djesu pamusoro pe ungano, asi Djesu anodzidairira kuna Djehovha nge mushobo waanotibata. (1Ako. 15:27) Djehovha akapasawo simba mwanarume pa mukadzi wake uye ana, asi mwanarume acadzidairira kuna Djehovha uye na Djesu nge mushobo waanobata ndiwona mhuri yake.—1Pe. 3:7.

4. Djehovha uye Djesu ano simba rekuitei?

⁴ Musoro we mhuri ye pasi rese Djehovha, ano simba rekukanda mutemo wekuti ana enyu anodikana kugara zvakadini, uye ayena ano simba rekuita kuti izvi zviitike. (Isa. 33:22) Hingana musoro we ungano ye ciKristu, Djesu, ano citenderhwa ce kugadza mutemo.—Aga. 6:2; Ako. 1:18-20.

5. Musoro we mhuri ye ciKristu ano simba rakadini, asi ndepapi parinogumira?

⁵ Eciteedzera mutemo wakagadzwa na Djehovha uye Djesu, musoro we mhuri ye ciKristu ano simba re kugadza mutemo mu mhuri yake. (Aro. 7:2; Aef. 6:4) Asi, simba raanaro pano parinogumira. Ngo muezaniso, mitemo yake inodikana kutsamira pa mitemo iri mu Soko ra Mwari. (Zvie. 3:5, 6) Uye musoro we mhuri aana citenderhwa cekugadza mutemo ku munhu asiripi we mhuri yake. (Aro. 14:4) Kupinda izvi, ana ake paanokura uye obuda pa nyumba, awona anorumbwa ecimureremedza, asi anonga asiripi pasi pe mutemo wake.—Mt. 19:5.

6. Ngei Djehovha akagadza musoro?

⁶ Djehovha anotungamirira mhuri yake no rudo. I cipo katiri. Kugara musoro kunoita kuti mhuri ya Djehovha igare yakabatana uye yakarongeka. (1Ako. 14:33, 40) Kudai painga pasina urongwa we musoro, mhuri ya Djehovha yaizogara isikazi kurongeka uye isikapfari. Ngo muezaniso, apana waida kuziya kuti ndiyani waizoreketa masoko e kupedzesera uye kuti ndiyani waizodikana kuonerera pa kuizwa ke zviya zvinonga zvasanangurhwa.

7. Maererano na Aefeso 5:25, 28, Djehovha aida kuti anarume adzvinyirire anakadzi here?

⁷ Kana gadziriro ya Mwari yekugadza musoro we mhuri iri cirongwa cakanaka, ngei akadzi ajinji nyamasi uno anozwa hingana ari kudzvinyirirhwa ne amuna awo? Izvi zviri kuitika nge ndaa yekuti anarume akawanda anoramba kuseenzesa nhungamiriro dza Djehovha mu mhuri dzawo uye anosanangura kuteera tsika no zvinoizwa mu nharaunha yaanogara. Ngo muezaniso, mwamuna ungakwanisa kuita zviri zvese kuitira kuti mukadzi wake amureremedze kana kuti apangidzire anhu kuti iyena “mwanarume kamare.” Iyena ungakwanisa kuguma pa kurangarira kuti aakwanisi kuita kuti mukadzi wake amude, asi ungakwanisa kuita kuti amuthye. Iyena ungaseenzesa ruthyo iri kuti akwanise kumuonerera. * Murangariro no miitiro yakadai zvezvirokwazvo ingakwanisa kupingaidza citenderhwa ce anakadzi ce kukudzwa ne ce kureremedzwa, uye izvona azvienderani no zviya zvinodiwa na Djehovha.—Erengai Aefeso 5:25, 28.

8. Mwamuna angafundira kudini kugara musoro we mhuri wakanaka?

⁸ Mwamuna ungakwanisa kugara musoro we mhuri akanaka nge kuteedzera mushobo unoseenzesa Djehovha na Djesu hinga musoro. Ngationei unhu una Djehovha na Djesu, uye onai kuti musoro we mhuri ungapangidzawo  kudini unhu uu paanotungamirira mhuri, mukadzi uye ne ana ake.

9. Djehovha anopangidza kudini kuti anodzidodosa?

⁹ Kudzidodosa. Djehovha ndiyena munhu ano uzii kupinda ese; kunyazi zvakadaro, ayena anopurutanawo maonero e aseenzi ake. (Ge. 18:23, 24, 32) Ayena akatendera kuti anhu ainga ari pasi pe simba rake areketewo maonero awo. (1Mad. 22:19-22) Djehovha akakwana, asi pa nguwa ino, ayena aetseri kuti isusu tigare anhu akakwana. Ngo muezaniso, ayena anobetsera anhu asikazi kukwana kuti amuseenzere zvinobudirira. (Pis. 113:6, 7) Zvezvirokwazvo, Bhaibheri rinopanganidza Djehovha hingana “mubetseri.” (Pis. 27:9; Ahe. 13:6) Mambo Dhavhidhi wakatendera kuti aizokwanisa basi kuita basa rakakura raainga apaswa kuti aite nge ndaa ye kudzidodosa ka Djehovha.—2Sa. 22:36.

10. Djesu akapangidza kudini kuti akadzidodosa?

¹⁰ Onai muezaniso wa Djesu. Kunyazi ainga ari Tenzi uye Mesiya ku afundi ake, ayena akakhwidza tsoka dzawo. Nge ndaa yei Djehovha akaita kuti ciitiko ici cirumbwe ciri mu Bhaibheri? Pasina mubvunzo, kuti abetsere misoro ye mhuri uye no amweni, kuti ateedzere muezaniso uu. Djesu pacake akati: “Ngekuti ndamupangidza muezaniso, kuti zvandamuitira, muitewo izvona kamare.” (Ju. 13:12-17) Pasina mubvunzo, ayena ainga ano simba rakakura, Djesu ainga asikaetseri kuti anhu amuseenzere. Kusiyana na izvona, ayena aiseenzera amweni.—Mt. 20:28.

11. Misoro ye mhuri ingafundirei ngo muezaniso we kudzidodosa wa Djehovha na Djesu?

¹¹ Zvatinofunda. Misoro ye mhuri ingakwanisa kupangidza kudzidodosa nge makwanza akawanda. Ngo muezaniso, awona aetseri kuti akadzi ne ana awo agare akakwana pa nguwa ino. Awona anopurutana maonero e umwe na umwe uri mu mhuri, kunyazi awona asikapindirani pa zviro zvimweni. Marley, unogara ku Estados Unidos, wakati: “Mwamuna wangu neni pamweni paya tinogara no maonero akasiyana. Asi ndinoona kuti iyena unondikoshesa uye unondireremedza ngokuti unondibvunzisa maonero andiinawo uye unonyasa kuarangarira asati aita cisananguro.” Kupinda izvi, mwamuna unodzidodosa wakasudzunuka kuita mabasa e pa nyumba, kunyazi kaanogara zvecioneka hingana kuti mabasa awona anodikana  kuizwa no mukadzi. Asi zvingakwanisa kuti shuphei padoko. Ngei? “Uri wekupi,” inodaro hanzvadzi inozwi Rachel, “kana mwamuna ecibetsa mukadzi wake kusuka maparatu kana kucenesa mumba, anyacigarisano uye no mhuri yake angakwanisa kubvunzisa kuti ‘kodi mwanarume uu aazi kukandwa mugarafa here.’ Awona angakwanisa kurangarira kuti iyena aakwanisi kutonga mukadzi wake.” Izvi zvinosoitikawo here kamunogara, edzurirai kuti Djesu wakakwidza tsoka dze afundi ake, kunyazi zvaionekwa hingana basa rinoizwa ngo muranda. Musoro we mhuri akanaka unobatikana, haiwa pakuti iyena pacake adzione hingana akanaka, asi kuita kuti mukadzi ne ana ake azwe akasudzunuka. Kupinda kudzidodosa, i wara ripi rinodikanwa maningi kuti musoro we mhuri agare akanaka?

12. Rudo rinoita kuti Djehovha na Djesu aitei?

¹² Rudo. Zvese zvinoizwa na Djehovha zvinotsamira pa rudo. (1Ju. 4:7, 8) Ayena anotipasa zvinodikanwa zvedu zve ku mwiya eciseenzesa Soko rake—Bhaibheri—uye sangano rake. Ayena anotipasa zvinodikanwa zvedu zve mu ndangariro, nge kutigondesa kuti anotida. Uye zvakadiniwo no zvinodikanwa zvedu zve ku nyama? Djehovha “anotipasa zviro zvese zvinotipfadza.” (1Ti. 6:17) Patinoshaisha, ayena anotigadzirisa, asi anorumbwa ecitida. Kunyazi nge zve rudo, Djehovha akatipasa rusudzunuro. Uyewo Djesu, ayena anotida maningi zvekuti akapasa upenyu wake nge ndaa yedu. (Ju. 3:16; 15:13) Apana cingapingaidza rudo ra Djehovha na Djesu kune aya akagondeka kaari.—Ju. 13:1; Aro. 8:35, 38, 39.

13. Ngei zvecikosha kuti musoro we mhuri apangidze rudo ku mhuri yake? (Onai bhokisi rakazwi “ Mwamuna Wabva Kucata Ungaguma Kudini pa Kureremedza Mukadzi Wake?”)

¹³ Zvatinofunda. Zviro zvese zvinoizwa no misoro ye mhuri zvinotsamira pa rudo. Ngei izvona zvakanaka maningi? Mu phostori Juau unodaira eciti: “Nge kuti kana munhu asikadi hama yake [kana kuti mhuri yake], iya yaanoona, aangambodi Mwari, uya waasikazi kumboona.” (1Ju. 4:11, 20) Ndiyo ndaa, kana amuna ecida mhuri yawo uye ecida kuteedzera  muezaniso wa Djehovha na Djesu, acariritira mhuri yawo nge zvinodikanwa zve kumwiya, zve mundangariro uye no zve kunyama. (1Ti. 5:8) Iwona anofundisa uye anopangira ana awo. Awona acarumbwa ecifundira kuita zvisananguro zvinokudza Djehovha uye zvinobetsera mhuri yawo. Ngationei cimwe na cimwe ce zviro izvi uye onai kuti musoro we mhuri ungakwanisa kuteedzera kudini Djehovha na Djesu.

14. Musoro we mhuri angapasa kudini zvinodikanwa zve ku mwiya mhuri yake?

¹⁴ Kupasa mhuri yake zvinodiwa zve ku mwiya. Eciteedzera Baba ake, Djesu, airumbwa akabatikana pa kupasa zvekurhya zve ku mwiya ese aya ainga ari pasi pake. (Mt. 5:3, 6; Mk. 6:34) Zvimwe-zvimwezvoo, musoro we mhuri anokanda pa mbuto yekutanga kupasa mhuri yake zvinodikanwa zve ku mwiya. (Dhe. 6:6-9) Anoita izvi nge kuita kuti iyena no mhuri yake aerenge uye afunde Soko ra Mwari, kupinda misangano, kuparidzira masoko anopfadza, uye kuwaka no kuita kuti arumbwe ano ushamwari wakanaka na Djehovha.

15. Musoro we mhuri ungacengeta kudini zvinodiwa zve mundangariro zve mhuri yake?

¹⁵ Kupasa mhuri yake zvinodiwa zve mundagangariro. Djehovha akareketa pamhene kuti aida Djesu. (Mt. 3:17) Djesu akapangidza pamhene kuti aida afundi ake nge zviya zvaiita no zvaireketa. Pakupedzesera, ayena akareketa pamhene kuti aiyada. (Ju. 15:9, 12, 13; 21:16) Musoro we mhuri ungakwanisa kupangidza ku mukadzi ne ana ake kuti anowada nge zviya zvaanoita, hingana kufunda nawo Bhaibheri. Iyena ungakwanisa kuwabvunzawo kuti anowada no kuakoshesa, paanoasimbawo pamberi pe anhu amweni.—Zvie. 31:28, 29.

16. Ngazvipi zvinodikanwazve kuizwa no musoro we mhuri, uye ungazviita kudini kuti zvigare pakati no pakati?

¹⁶ Kupasa mhuri yake zvinodiwa zve kunyama. Djehovha aipasa zvaidikanwa no aIsraeri, kunyazi paaiphanicwa nge kutama kupurutana. (Dhe. 2:7; 29:5) Nyamasi uno, ayena anotipasawo zviya zvatinoda. (Mt. 6:31-33; 7:11) Nge mushobo umwewo, Djesu aipasawo zvekurhya ateeri ake. (Mt. 14:17-20) Ayena akaabetserawo pa uthongo wawo. (Mt. 4:24) Kuti apfadze Djehovha, musoro we mhuri unodikana kupasa zvekurhya mhuri yake. Ngo kudaro, iyena unodikana kugara ari pakati no pakati. Iyena aadikani kubatikana maningi pa basa re nyika kuti ariritire mhuri yake zvokuti anokonerhwa kuriritira mhuri yake mune zve kunamata uye zve mundangariro.

17. Djehovha na Djesu anotipa muezaniso upi pa kufundisa no kupanga kaanotiita?

¹⁷ Kuwafundisa. Djehovha anotifundisa uye anotipangira maererano no zvido zvedu. (Ahe. 12:7-9) Hingana Baba ake, Djesu anofundisa  ne rudo anhu ese ari pasi pe simba rake. (Ju. 15:14, 15) Ayena akabamba asi ano usisi. (Mt. 20:24-28) Ayena anotizwisisa kuti tiri anhu asikazi kukwana uye kuti tinoshaisha.—Mt. 26:41.

18. Musoro we mhuri wakanaka unoedzurirei?

¹⁸ Musoro we mhuri ungateedzera kudini Djehovha na Djesu pa mabatire aanoita nhai dze mhuri. Iyena ‘aanyangadzirhwi maningi’ no mukadzi wake kana kuti ku ana ake. (Ako. 3:19) Pano kudaro, iyena unoseenzesa cokwadi cisikacinji ciri pana Agaratiya 6:1 uye unoedza kuagadzirisa no “upfawi,” eciedzurira kuti iyena munhu asikaziwo kukwana. Kuita hingana Djesu, iyena unozwisisa kuti mushobo wakanaka wekufundisa ngewe kupangidza nge muezaniso.—1Pe. 2:21.

19-20. Musoro we mhuri ungateedzera kudini Djehovha na Djesu pakuita zvisananguro?

¹⁹ Kuita zvisananguro zvisikabetseri iyena basi. Djehovha anoita zvisananguro zvinobetsera munhu wese. Ngo muezaniso, Djehovha akasanangura kusika upenyu, haiwa kuti zvibetsere ayena pacake, asi kuti atipase mupfaro we kurarama. Apana munhu akamubambidzira kuti atume Mwana wake kuti auye kuzotisudzunura pa citema. Djehovha nokuda kake akasangura kupa cibairo kuti tibetserhwe. Djesu akaitawo zvisananguro zvakabetsera amweni. (Aro. 15:3) Ngo muezaniso ayena akasiya sure cido cekuda kuzorora kuti afundise anhu.—Mk. 6:31-34.

²⁰ Musoro we mhuri wakanaka unoziya kuti ciro cinonyanya kushupha nge cekuita zvisananguro zvino ungwaru ku mhuri yake uye kaakuzvitondowedza. Iyena aaedzi kuita zvisananguro ne musoro wecipisa. Pano kudaro, iyena unotendera kuti Djehovha amuroedze. * (Zvie. 2:6, 7) Zvaa zvadaro, iyena ucaita zviro zvicabetsera amweni.—Afi. 2:4.

21. Ticaongororei mu fundo inoteera?

²¹ Djehovha akapasa misoro ye mhuri basa guru, uye anoita kuti adzidairire nge ndaa ye zvisananguro zvaanoita. Asi kana mwanarume akaedza kuteedzera muezaniso wakasiiwa ndi Djehovha na Djesu, iyena ucagara musoro we mhuri wakanaka. Uye kana mukadzi akaitawo basa rake, mucato wawo ucapfadza. Mukadzi unodikana kuona kudini musoro uye anosongana no matambudziko api? Fundo inoteera icaongorora mubvunzo iwona.