ASIKANA airi ecihamba pamwepo mu mutanha unoita zve kutengeserana we thaundi re Baguio, ku Filipinas. Awona akaona ngoro inoseenzeswa pa kuparidzira, asi aazi kukhwedera padhuzepo. Helen, hanzvadzi yakaima pa cingoro, yakanyemwerera eciaringira. Asikanewo anorumbwa ecihamba, asi anoshamiswa no kunyemwerera kunopfadza ka Helen.

Pedzepo, asikana aya paainga ecihwirira ari mu karu, akaona cipangidzo ce jw.org cakakura ciri pa madziro e Nyumba ye Umambo. Awona akaedzurira kuti zvainga zvakatarhwepo ndizvo zvimwezvo zvaainga awona pa cingoro ce mabhuku. Awona akacita mu karu uye akatanga kuona urongwa we nguwa ye misangano ye ungano dzese wainga uri pa musuwo we Nyumba ye Umambo.

Asikana airi aya akapinda musangano waiteera. Munoziya kuti ndiyani waakaona paakapinda mu Nyumba yo Umambo? Ndi Helen! Awona akakasika kumuziya hinga munhu anonyemwerera. “Awona paakakhwedera padhuze neni,” unodaro Helen, “ndakambotya padoko. Ndairangarira kuti pamweni pano ciro cakashata candainga ndaita.” Asi asikana aya akapanganidzira Helen zvainga zvaitika.

Asikana aya akapfarira misangano uye no kubatana ke hama no hanzvadzi; awona akazwa hingana ari pa nyumba. Paakaona kuti anhu aicenesa mu Nyumba yo Umambo mumasure me misangano, awona akabvunzisa kuti zvingaita kuti tibetserewo here. Umwe we musikana akafuruka mu thaundiro, asi umweni wakhona uri kupinda misangano nguwa dzese uye akatanga kufunda Bhaibheri—zvese nge ndaa yo kunyemwerera basi.