1. Ngei aseenzi akagondeka e kare akakwanisa kugara akabamba?

 KAKAWANDA kakhona, Bhaibheri rinobhuya kuti anarume akagondeka e kare hingana ano simba uye akabamba. Asi, kunyazi aya ekuti ainga akabamba nguwa dzimweni awona ainga asikazwi hingana akabamba. Ngo muezaniso, pa mugariro umweni Mambo Dhavhidhi waizwa “akabamba hingana dunhu,” asi panguwa dzimweni iyena “waithya maningi.” (Pis. 30:7) Uye pa nyaya ya Samusoni, iyena wainga ano simba nge ndaa ye mwiya mucena wa Mwari. Kunyazi zvakadaro, iyena waiziya kuti asina rubetso iri, “waizoruza simba, waizoremba uye waizogara akatodzana no anarume amweni ese.” (Ato. 14:5, 6; 16:17) Anarume aya ainga akabamba basi ngekuti Djehovha akaapasa simba.

2. Ngei Pauro wakareketa kuti wainga akaremba uye akabamba? (2 Akorinti 12:9, 10)

² Muphostori Pauro, waiziyawo kuti waida simba ra Djehovha. (Erengai 2 Akorinti 12:9, 10.) Kuita hingana akawanda edu, Pauro waibatanawo no cinetso co uthongo. (Aga. 4:13, 14) Uye nguwa dzimweni, iyena waidikana kuseenza no simba kuti aite zviro zvakanaka. (Aro. 7:18, 19) Uyezve nguwa dzimweni, iyena waithya zviro zvaizoitika kaari. (2 Ako. 1:8, 9) Kunyazi zvakadaro, Pauro paainga akaremba iyena waizwa akabamba. Izvi zvaiitika ngekuti Djehovha aimupasa simba raaida kuti akurire zvinetso.

3. Mibvunzo dzipi dzaticadaira mu fundo ino?

³ Djehovha anogondesawo kuti acatipasa simba ratinoda kuti tishingirire. (1 Ped. 5:10) Asi kuti titambire rubetso iri, tinodikanawo kuita dii redu. Ngo muezaniso, motori ndiwo unoita kuti karu ihambe. Kana motorista akatama kutsika asereradhori, karu aizobudi pa mbuto. Nge mushobo umwewo, Djehovha anoda kutipasa simba ratinoda, asi isusu tinodikanawo kuita  dii redu. Djehovha anotipasei kuti atibambise? Uye ngazvipi zvatinodikana kuita kuti titambire simba iri? Ngatione mhinduro dze mibvunzo ii, patinonga teciongorora kuti Djehovha akabambisa kudini—muphorofita Djona, Mariya mai a Djesu uye muphostori Pauro. Ticaonawo kuti Djehovha anorumbwa kudini ecibambisa aseenzi ake o mazuwa ano.

4. Tingatambira kudini simba ra Djehovha?

⁴ Umwe we mushobo wekuti titambire simba ra Djehovha, ngewe kuita munamato. Djehovha acadaira minamato yedu ngekutipasa “simba rakatunhudzirika.” (2 Ako. 4:7) Tingatambirawo simba ratinoda patinoerenga Bhaibheri uye kunyasa kurangarira zviya zvataerenga. (Pis. 86:11) Masoko a Djehovha ari mu Bhaibheri, “ano simba” katiri. (Aheb. 4:12) Pamunonamata kuna Djehovha uye moerenga Soko rake, imwimwi mucatambira simba ramunoda kuti mukwanise kushingirira, murumbwe makapfara uye kuita basa rinoshupha ramakapaswa. Parizvino ngationei kuti Djehovha akabambisa kudini muphorofita Djona.

5. Ngei Djona waida simba?

⁵ Muphorofita Djona waida ushingi. Djona wakatiza ecienda kure mumasure mekupaswa basa rinoshupha na Djehovha. Ndiyo ndaa, iyena wainga aa dhuze kuti aruze upenyu wake pa dutu rakaitika uye wakakanda upenyu wake pa ngozi. Atekenyi e bharko paakamuthusira mu bahari, iyena wakaenda kooguma mu mbuto yaainga asikakariri—mundani me howe yakakura maningi. Imwimwi munorangarira kuti Djona wakazwa kudini? Kodi iyena wakarangarira kuti Djehovha waizomusiya here? Zvinoita hingana kuti Djona wakadzirhya mwoyo maningi.

6. Cinyi cakabambisa Djona paainga ari mundani me howe? (Djona 2:1, 2, 7)

⁶ Djona wakaitei kuti atambire simba paainga ari ega ari mundani me howe iyona? Ciro cekutanga caakaita i kunamata kuna Djehovha. (Erengai Djona 2:1, 2, 7.) Djona wainga asikazi kuzwira Djehovha, asi iyena wainga ano cokwadi cekuti Djehovha aizopurutana munamato wake wekucinyuka wekudzidodosa. Iyena wakarangaridzawo ngezve ngano dzinganani dze mu Matarhwa. Asi tinozviziya kudini izvona? Ngekuti pa munamato wake wakatarhwa mu kapituro 2 ye bhuku ra Djona, iyena unoseenzesa kakawanda masoko atinogumira mu bhuku ra Pisarema. (Ngo muezaniso, ezanisai Djona 2:2, 5 na Pisarema 69:1; 86:7.) Zvinobuda pamhene kuti Djona wainyasa kuziya matarhwa. Paairangarira ngezve mavhersikuro aya paainga eciedzwa, Djona wakagara no cokwadi cekuti Djehovha waizomubetsera. Djehovha akaponesa upenyu wa Djona uye no kuhamba ke nguwa iyena wainga akagadzirira kuti akwaniriswe pa basa raainga apaswa na Djehovha kuti aite.—Djona 2:10–3:4.

7-8. Cinyi cakabambisa Zhiming paaibatana no miedzo?

⁷ Muezaniso wa Djona ungatibetsera patinonga tecibatana no mugariro unoshupha. Ngo muezaniso, hama iri ku Taiwan, inozwi Zhiming, b iri kubatana no zvinetso zvakawanda zve uthongo. Kusiya izvona, amweni e mu mhuri mayo anoibata nge mushobo usikazi kunaka ngekuti iyona ndi Mupupuri wa Djehovha. Asi, iyena unotambira simba ra Djehovha nge kuita munamato uye nge kufunda. Iyena unoti: “Nguwa dzimweni matambudziko paanoita hingana kuti aazoperi, inini ndinonetseka maningi uye andikwanisi kukanda ndangariro dzangu pakuita fundo yo munhu ega.” Kunyazi zvakadaro, Zhiming aasii. Iyena  unopanganidza kuti: “Ciro cokutanga pa zvese ndinonamata kuna Djehovha, pedzepo ndinokanda maskuta dzangu uye ndotanga kupurutana ngoma. Nguwa dzimweni, inini ndinotoemba no izwi riri pasi-pasi dakara ndaterama, mumasure mazvo ndipo pandinotanga kufunda.”

⁸ Fundo ye munhu ega yakabetsera maningi Zhiming. Paainga ecipora mumasure mekuizwa operasau, enfermeira umweni wakamubvunza kuti iyena waidikana kutunhudzirhwa ngazi ngekuti ma glóbulos vermelhos ake ainga akaterera maningi. Asi nge ceusiku zuwa ro operasau risati raguma, Zhiming wakaerenga ngezve hanzvadzi imweni yainga yakabatana no mugariro wakaezana no wake. Ma glóbulos vermelhos ayo ainga akaterera maningi kudarida ake. Kunyazi zvakadaro, hanzvadziyo aizi kutenda kutunhudzirhwa ngazi uye yakakwanisa kutamba. Esperiensiya ii, yakabambisa Zhiming uye iyena wakarumbwa akagondeka.

9. Kana imwimwi mukanetseka nge ndaa ye mugariro unoshupha, ngazvipi zvamungaita? (Onaiwo mafoto.)

⁹ Zvakamboitikawo kamuri here pamaibatana no mugariro unoshupha uye mokonerhwa kupanganidzira Djehovha mazwiro enyu? Zvakamboitikawo kamuri here kupererhwa maningi uye kuguma padanho rekuti mainga musikakwanisi kufunda? Edzurirai kuti Djehovha anoziya zvamuri kubatana nazvo, hino kunyazi mukaita munamato uri nyore garai no cokwadi cekuti Djehovha acamupasa zvese zvamuri kuda. (Aef. 3:20) Marhwadzo e mu mwiri kana kuti e mundangariro akaita kuti imwimwi mukonerhwe kufunda uye kuerenga Bhaibheri, edzai kupurutana magravhasau e audhiyo e Bhaibheri uye e mabhuku amweni e Bhaibheri. Zvingabetserawo kupurutana ngoma kana kuti kuona vhidhiyo mu jw.org. Pamunonga meciita munamato uye mecipsvaka mhinduro dze mu Bhaibheri uye dziri mu mabhuku amweni, zvinoita hingana kuti imwimwi muri kutopika kuti Djehovha amubambise uye iyena acaita izvona.

10. Hama no hanzvadzi dzedu dzingatibambisa kudini?

¹⁰ Djehovha angaseenzesa hama no hanzvadzi dzedu kuti atibambise. Awona angakwanisa  kugara “mbuto ye runyaradzo rikuru” patinonga tecibatana no zvinetso kana kuti patinonga tecibatana no dambudziko rokutama kukwanisa kuita basa ratinonga tapaswa. (Ako. 4:10, 11) Isusu tinoda shamwari maka-maka “panguwa dzekutsukwara.” (Zvie. 17:17) Patinozwa takaremba, hama dzedu dzingatibetsera kuti tibambe panyama, mundangariro uye pakunamata. Ngatione kuti Mariya mai a Djesu akabambiswa kudini no amweni.

11. Ngei Mariya waida simba?

¹¹ Mariya waida simba kuti aite zvaidiwa na Djehovha. Rangaridzai kuti iyena wakazwa kudini mumasure mekupaswa basa riya raishupha no ngirozi Gabrieri. Iyena wainga asikazi kuwakwa asi wainga ano pamwiri. Iyena wainga asina esperiensiya ye kurera ana, asi iyena waidikana kuriritira mwana waizogara Mesiya. Uye ngekuti wainga ari mhandwe, Mariya waizopanganidza kudini mugariro wake ku mwanarume waizogara mwamuna wake, Zuzee?—Ruka 1:26-33.

12. Maererano na Ruka 1:39-45, Mariya wakakwanisa kudini kugara no simba raaida?

¹² Mariya wakakwanisa kugara kudini no simba kuti akwanise kuita basa riya raishupha raakapaswa? Iyena wakapsvaka rubetso re amweni. Nge muezaniso, iyena wakakumbira ku ngirozi Gabrieri masoko akadzara nge ndaa ye basa raaidikana kuita. (Ruka 1:34) Pasikazi kutora nguwa yakareba, iyena wakaita rhwendo ecienda “ku mutanha we matunhu” e Djudha kuti avhakacire hama yake Erizabheti. Kuvhakacira uku kakamubetsera. Erizabheti wakatenda maningi Mariya uye wakafemerhwa na Djehovha kuti arekete ngezve uphorofita wakaringana ngezve mwana wa Mariya. (Erengai Ruka 1:39-45.) Mariya wakabhuya kuti Djehovha ainga “amupasa simba no nyara yake.” (Ruka 1:46-51) Djehovha akaseenzesa Gabrieri na Erizabheti kuti abambise Mariya.

13. Cinyi cakaitika kune hanzvadzi ye ku Bolívia payakakumbira rubetso ku hama no hanzvadzi?

¹³ Kuita hingana Mariya, imwimwi mungakwanisawo kugara no simba kubva ku amweni enyu anonamata Mwari. Dasuri, hanzvadzi ye ku Bolívia , yaida simba. Baba ayo paakaoneka kuti ano nhenda inouraya, uye paakaradzikwa mu cipitari, Dasuri wakagara no ubaba we kuaonerera no cido cese. (1 Ti. 5:4) Asi kuita izvona zvainga zvisiripi nyore nguwa dzese. Iyena unopanganidza kuti: “Nguwa yakawanda inini ndaizwa kuti ndainga ndisikacakwanisi.” Kodi iyena wakakumbira rubetso here? Pakutanga aazi kukumbira. Iyena unoti: “Inini ndainga ndisikadi kunetsa hama dzangu. Inini ndairangarira kuti: ‘Djehovha ndiyena acandipasa simba randinoda.’ Asi pedzepo inini ndakaona kuti kugara kure no hama, ndainga ndeciedza kugadzirisa matambudziko ndiri ndega.” (Zvie. 18:1) Dasuri wakasanangura kutarira shamwari dzake ecipanganidza ngezve mugariro wake. Iyena unopanganidza kuti: “Inini andina masoko akawanda ekureketa pakubetserhwa kandakaizwa no hama dzangu dze Cikristu. Awona akaunzisa cokurhya ku cipitari uye akandierengera matsamba manganani e Bhaibheri. Zvakandipfadza kuziya kuti ndainga ndisiripi ndega. Isusu tiri dii re mhuri yakakura ya Djehovha—mhuri yakagadzirira kubetsera, kucema nemwi uye kurhwa pamwepo nemwi.”

14. Ngei tinodikana kutenda rubetso re akuru?

¹⁴ Mushobo umweni unoseenzeswa na Djehovha kuti atipase simba, akuru. Awona i cipo ca Djehovha caanotipasa kuti atibambise uye aite kuti zvinetso zvedu zvigare nyore. (Isa. 32:1, 2) Hino, kana imwimwi mukatanga kudzirhya mwoyo panganidzirai akuru zviro zviri kumunetsai. Paanonga ecida kumubetserai, musarambe. Eciseenzesa akuru, Djehovha angamubambisai.

15. Akristu ese ano kariro ipi?

¹⁵ Kariro yedu inobva mu Bhaibheri ingatipasa cido uye simba rakakura. (Aro. 4:3, 18-20) Akristu ese, ano kariro inoshamisa yekurarama nokusikaperi—zvingadai kurarama pa nyika pano mu Paraizo kana kuti mu Umambo we kudenga. Kariro yedu inotibetsa kuti tishingirire zvinetso, tiparidzire masoko akanaka uye tiite basa ripi haro ratinonga tapaswa mu ungano. (1 Ate. 1:3) Kariro ii ndiyo yakabambisa muphostori Pauro.

16. Ngei Pauro waida simba?

¹⁶ Pauro waida simba rakakura. Mutsamba yake yaakatarira Akorinti, iyena wakazviezanisa no hari ye dongo isikazi kubamba. Iyena “wakabambidzirhwa,” “wakapererhwa no mazano,” “wakateererhwa,” uye “wakawisirhwa pasi.” Uye kakawanda kakhona wakatoshota padoko kuti auraiwe. (2 Ako. 4:8-10) Pauro wakatara masoko aya pa rhwendo rake recitatu re umisiyonariyo. Iyena wainga asikazii kuti kubva ipona waizobatana no migariro yaishupha kudarika yaakabatana nayo. Iyena waizopondwa no cikwata ce anhu, waizosungwa, bharko raizondondomera uye waizogara mu karaboso ke nguwa yakareba.

17. Muphostori Pauro paaibatana no matambudziko, cinyi caimubambisa? (2 Akorinti 4:16-18)

¹⁷ Pauro wakagara no simba raaida kuti ashingirire ngekuti wakakanda ndangariro dzake pa kariro. (Erengai 2 Akorinti 4:16-18.) Iyena wakabvunza Akorinti kuti mwiri wake “waizopera,” asi kunyazi zvakadaro iyena wainga asikazoori mwoyo. Pauro waikanda ndangariro dzake mune ramangwana. Kariro yake ye kudenga ye kurarama nokusikaperi yainga “yakakura zvinoshamisa,” ndiyo ndaa, zvainga zviri nani kubatana no dambudziko ripi haro kana kuti cinetso. Pauro wainyasa kurangarira ngezve kariro ii uye ndiyo ndaa iyena nge cemukati “waizwa wakabamba zuwa no zuwa.”

18. Kariro yakabambisa kudini Tihomir no mhuri yake?

¹⁸ Kariro ye ramangwana ndiyo yakabambisa hama ye ku Bulgária inozwi Tihomir. Makore manganani adarika hama yake mudoko inozwi  Zdravko yakafa pa tsawana. Ndiyo ndaa, Tihomir waizwa akatsukwara maningi. Kuti akurire kurhwadziwa uku, iyena no mhuri yake akatanga kurangaridza kuti rumuko raizonga rakadini. Iyena unoti: “Ngo muezaniso, isusu taigara tecirangaridza mbuto yataizoonana na Zdravko, zvekurhya zvataizomubikira, anhu ataizopika pa mutambo we kutanga iyena paaizohwirira uye zviro zvataizomupanganidzira zvakaringana no mazuwa ekupedzesera.” Tihomir unobhuya kuti kukanda ndangariro pa kariro, ndizvo zvakabetsera mhuri yake kuti irumbwe yecishingirira uye yecietsera nguwa yekuti Djehovha acamutsa hama yawo.

19. Mungaitei kuti mubambise kariro yenyu? (Onaiwo foto.)

¹⁹ Imwimwi mungabambisa kudini kariro yenyu? Kana kariro yenyu iri ye kurarama pa nyika pano, erengai ngezve ngano dze Bhaibheri dzinoreketa ngezve paraizo uye nyasai kuzvirangarira. (Isa. 25:8; 32:16-18) Rangaridzai kuti upenyu unonga wakadini mu nyika ipsva uye rangaridzai mutorimo. Ngo muezaniso, muri kuona ani? Zviro zvipi zvamuri kukwanisa kuzwa zvecirira? Murikuzwa kudini pa nguwa iyona? Kuti mubetsereke kurangaridza ngezve paraizo, onai mifanikiso minganani dziri mu mabhuku edu kana kuti onai mavhidhiyo e ngoma akadai hingana, Nyika Itsva, Yatosvika, kana kuti Rangaridzai Muri mu Paradhizo. Kana nguwa dzese tikabvisa nguwa kuti tirangarire ngezve mushobo ucagara upenyu mu nyika ipsva, matambudziko edu acagara e “nguwa doko uye ari akareruka.” (2 Ako. 4:17) Kariro yatakapaswa na Djehovha ndiyo icaita kuti tigare takabamba.

20. Kunyazi tecizwa takaremba, tingagara kudini no simba?

²⁰ Kunyazi panguwa yatinozwa takaremba, tinoziya kuti “ticagara no simba nge ndaa ya Mwari.” (Pis. 108:13) Djehovha anotipasa zvese zvatinoda kuti titambire simba rinobva kaari. Hino, pamunonga mecida rubetso kuti mukwanise kuita basa ramunonga mapaswa, kukurira dambudziko kana kuti murumbwe mecipfara, dururai mwoyo wenyu kuna Djehovha nge munamato uye psvakai nhungamiriro dzake ngekuita fundo yo munhu ega. Tendai rubetso uye kubambiswa ke hama. Nguwa dzese psvakai mukana wekurangaridza kuti upenyu unonga wakadini mune ramangwana. Ngekuita kudaro imwimwi ‘mucabambiswa no simba rese maererano no simba ra [Mwari] rinokudzwa kuti mukwanise kushingirira zviro zvese no mwoyo unononoka kutsamwa uye no mupfaro.’—Ako. 1:11.