1. Migariro ipi yatinobatana nayo kucikora?

 MUNOZWA kudini mudoni wenyu we ku basa kana kuti we kucikora paanomuitai mibvunzo dzakaringana no zviya zvamunotenda? Mibvunzo dzakaita hingana idzi dzinotibetsera kuziya zviya zvaanorangarira uye dzinotipasa mukana wekureketa ngezve masoko akanaka. Asi nguwa dzimweni anhu anoita mubvunzo ngekuda kureketedzana basi, izvi azvitishamisi. Anhu akawanda anozwa masoko ekunyepa ngezve zviya zvatinotenda. (Zvii. 28:22) Kubhuya zvazviri, isusu tiri kurarama “mumazuwa e kupedzesera” nguwa yekuti anhu akawanda “aadi kupindirana no amweni” uye “anotothyisa.”—2 Ti. 3:1, 3.

2. Ngei tecida kugara anhu ano upfawi?

² Pamweni mungarangarira kuti: ‘Ndingarumbwa kudini ndakaterama paya pekuti munhu urikuda kureketedza na inini ngezve nyaya yemu Bhaibheri?’ Munoziya kuti cinyi cingamubetserai? Upfawi. Munhu uno upfawi aanyangadzwi nokukasika. Pano kudaro, iyena unokwanisa kudzibata kunyazi paya paanoambirhwa kana paya paasikazii cekudaira. (Zvie. 16:32) Asi izvirokwazvo kuti izvi zviri nyore kureketa, asi zvingashupha kuzviita. Mungaita kudini kuti mutunhudzire upfawi wamunawo? Mungadaira kudini no upfawi paya pekuti munhu uri kumuitai mubvunzo ngezve zviya zvamunotenda? Uye kana imwimwi muri baba kana mai, mungabetsera kudini ana eyu kuti adziirire kutenda kawo no upfawi? Ngationei izvi mu fundo ino.

3. Ngei tingabhuya kuti kupangidza upfawi i cipangidzo cekuti isusu takabamba, haiwa kuremba? (2 Timoti 2:24, 25)

³ Kugara no upfawi akurei kuti takaremba, asi wara iri ngere anhu akabamba. Tinodikana kugara takabamba ngecemukati kuti tirumbwe takaterama paya patinonga tecibatana no  mugariro unoshupha. Upfawi unobatanidzwa pa “zvibereko zve mwiya.” (Aga. 5:22, 23) Soko re Cigrego rekuti “upfawi” raiseenzeswa pakupanganidza ngezve kavharo yemushango yainga yaakuseenzeswa no munhu. Mumasure mekuti iyona yaakuseenzeswa no munhu kavharo ii inorumbwa yakaterama uye isikanetseki, asi iyona inorumbwa ino simba. Asi isusu, tingagara kudini no upfawi uye panguwa imweyo takabamba? Atidikani kuita izvona tega. Tinodikana kuita munamato tecikumbira mwiya mucena wa Mwari uye kukumbira rubetso kuti tikwanise kugara no wara iri rakanaka. Pano miezaniso yakawanda inopangidza kuti zvinokwanisika kufundira kugara no upfawi. Hama no hanzvadzi dzakawanda dzinosorumbwa dzakaterama kunyazi paya padzinonga dzeciambirhwa, uye dzinotosiya miezaniso yakanaka ku aya anonga ari kuringira. (Erengai 2 Timoti 2:24, 25.) Mungaita kudini kuti upfawi ugare rimwe re wara ramunonyanya kuziikanwa naro?

4. Cinyi cakabetsera Izaki kuti agare munhu ano upfawi?

⁴ Bhaibheri rino ngano dzakawanda dzinopangidza kuti upfawi iwara rinokosha maningi. Onai muezaniso wa Izaki. Iyena paakaenda koorarama ku nharaunda ye Gerar, anyacigarisano ake ainga ari afiristiya. Afiristiya aya ainga ano tsumbi naye uye awona akafushira zvimbo zvainga zvacerhwa no aranda a baba ake. Asi pano kurhwisana kuti aedze kugarazve no zvimbozvo, Izaki no mhuri yake akacinja oenda koogara kure uye akacera zvimbo zvimweni ikona. (Gen. 26:12-18) Asi Afiristiya akareketa kuti mvura ye zvimbo izvi zvipsva yainga iri yawo. Kunyazi zvakadaro, Izaki wakarumbwa akaterama. (Gen. 26:19-25) Asi Izaki wakakwanisa kurumbwa kudini wakaterama kunyazi anhu eciita zviri zvese kuti amuambire? Zvezvirokwazvo iyena wakaona muezaniso ye abereki ake, uye wakafunda zvakawanda no muezaniso wa baba ake Abrahamu uwo wainga ano upfawi uye wakafunda no muezaniso wa Sara uwo wainga “akaterama uye no upfawi.”—1 Ped. 3:4-6; Gen. 21:22-34.

5. Miezaniso dzipi dzatinadzo dzinopangidza kuti abereki angakwanisa kubetsera ana awo kuti agare no upfawi?

⁵ Abereki, imwimwi mungakwanisa kufundisa ana enyu kuti agare no upfawi. Onai muezaniso wa Maxence, wainga ano makore 17. Kucikora uye mu basa re kuparidzira iyena wakabatana no anhu ainga ano madziyo. Uye abereki ake akamupangidzira mwoyo unononoka kutsamwa uye akamufundisa kuti iyena apangidzewo upfawi. Abereki a Maxence akati: “Maxence wakaona kuti zviri nyore kuita zvecisimba paya patinonga teciambirhwa, asi munhu wakabamba zvezvirokwazvo anorumbwa akaterama.” Zvinopfadza kuti wara ro upfawi ndiro rakazonyanya kuziikanwa na Maxence.

6. Munamato ungabetsera kudini pakupangidza upfawi?

⁶ Tinodikana kuitei paya patinoambirhwa no munhu ecireketa zvakashata ngezva Djehovha kana kuti ngezve Bhaibheri? Tinodikana kunamata kuna Djehovha tecikumbira mwiya mucena uye ungwaru kuti tirumbwe takaterama. Asi ngazvipi zvatinodikana kuita kana tikaona kuti zviya zvataita andizvopi zvataidikana kuita? Tinodikanazve kuita munamato uye torangarirazve kuti kana tikabatana no mugariro wakaita hingana uu, ngazvipi zvatinodikana kucinja? Kana tikaita izvona Djehovha acatipasa mwiya mucena wake, uye acatibetsera kuti tikwanise kudzibata uye kurumbwa takaterama.

7. Rubetso ripi ratinaro kuti tidzibate pazviya zvatinoreketa uye zvatinoita pa migariro inoshupha? (Zvierengo 15:1, 18)

⁷ Tsamba dzakawanda dze mu Bhaibheri dzinotibetsera kureketa takaterama pa mugariro unoshupha. Mwiya mucena ungakwanisa kutibetsera kuedzurira tsamba idzona. (Juau 14:26) Ngo muezaniso, mazano atinogumira mu bhuku ra Zvierengo angatibetsera kurumbwa takaterama. (Erengai Zvierengo 15:1, 18.) Bhuku iri rinopangidza kuti ngei zvakanaka kupangidza upfawi pa mugariro unothyisa.—Zvie. 10:19; 17:27; 21:23; 25:15.

8. Ngei tecidikana kunyasa kurangarira tisati tadaira munhu uri kutibvunzisa ngezve zviya zvatinotenda?

⁸ Kuzwisisa kungakwanisawo kutibetsera. (Zvie. 19:11) Munhu anozwisisa anokwanisa kudzibata paya paanoizwa mibvunzo ngezve zviya zvaanotenda. Anhu anoita mibvunzo no kureketa zviro zvinganani ngekuti pamweni paya zviripo zvaari kuda kuziya. Munhu paanotiita mibvunzo ngezve zviro zvinganani zvinocokuita no zviya zvatinotenda, zvinoshupha kuziya kuti ngei uri kutiita mibvunzo idzona. Ndiyo ndaa, zvakanaka kuti tisati tamudaira tiedzurire kuti atizii cikonzero camuitisa kuti aite mubvunzo uwona.—Zvie. 16:23.

9. Gidhiyoni wakapangidza kudini ungwaru uye upfawi paakareketa no anarume eku Efraimu?

⁹ Onai kuti Gidhiyoni wakaitei anarume e ku Efraimu paakauya kuzoreketa naye akanyangadzwa. Awona aida kuziya kuti ngei Gidhiyoni wainga asikazi kuadainza kuti aende ese koorhwisana no azondi a Israeri. Asi ngacipi cikonzero kamare cakaaitisa kuti awona arekete akanyangadzwa maningi? Pamweni aidzikudza. Azvinei hazvo kuti ngacipi cikonzero cakhona, Gidhiyoni wakapangidza kuti wainga ari munhu anozwisisa. Iyena wakaedza kuzwisisa kuti ngei anarume aya ainga anyangadzwa, uye wakaadaira akaterama. Ngaupi mugumisiro wakhona? Bhaibheri rinoti, “awona akaterama.”—Ato. 8:1-3.

10. Cinyi cicatibetsera kuziya kuti tingadaira kudini aya anotiita mibvunzo ngezve zviya zvatinotenda? (1 Pedru 3:15)

 ¹⁰ Pamweni mudoni wedu we kubasa kana we kucikora ungatibvunzisa kuti ngei mecirumbwa meciteerera mitemo ye Bhaibheri. Patinomudaira isusu ticaita zviri zvese kuti tidziirire kutenda kedu uye pa nguwa imweyo ticapangidza kuti tinoreremedza maonero ake. (Erengai 1 Pedru 3:15.) Pane kuona mubvunzo wake hingana kuti iyena uri kutirhwisa, zvakanaka maningi kuona mubvunzo uwona hinga mukana wekuziya kuti ngazvipi kamare zvinokosha kaari. Pasinei kuti ngacipi kamare camuitisa kuti aite mubvunzo uwona, isusu tinoda kudaira nguwa dzese takaterama uye no upfawi. Mhinduro yedu ingakwanisa kubetsera munhuwo kuti amborangarirezve ngezve nyaya iyona kunyazi ecitidaira no shungu kana ecitiseka, isusu tinoda kumudaira no upfawi nguwa dzese.—Aro. 12:17.

11-12. (a) Ngazvipi zvatinodikana kutanga tamborangarira tisati tadaira mibvunzo dzinoshupha? (Onaiwo foto.) (b) Mumasure mekurangarira nge zvazvo tinodikana kudaira kudini munhuwo?

¹¹ Pamweni mudoni wenyu wekubasa uri kuda kuziya kuti, ngei imwimwi musikapembereri zuwa renyu rekubarhwa? Cimboimai morangarira kuti: Kodi iyena uri kurangarira kuti isusu tinosodziwaraidza kana kuti haiwa? Kana kuti pamweni iyena uri kurangarira kuti ngekutama kenyu kupemberera zuwa rekubarhwa imwimwi munonga mecipingaidza ushamwari unooneka pa emprezepo. Isusu tingasimba mudoni wedu we kubasa ngekurangarira kaanoita amweni uye ushamwari unooneka pa empreza. Uye tingamubvunza kuti isusu tinodawo kuseenza pa mbuto ino ushamwari. Ngokudaro, tingakwanisa kuthurudza kunetseka ke adoni edu e kubasa uye pamweni zvingatiitisa kuti tikwanise kufungura mukana we kucedza nawo ngezve Bhaibheri panyaya dzinocokuita no kupemberera zuwa rekubarhwa.

¹² Tingakwanisawo kuita zvimwezvo kana pakamuka nyaya dzimweni dzinonetsa anhu akawanda. Ngo muezaniso, pamweni mudoni wedu wekucikora ungabhuya kuti Apupuri a Djehovha anodikana kucinja maonero awo pano cokuita no magei. Kodi iyena uri kureketa zviro izvona izvi ngokuti aana masoko e zvirokwazvo anocokuita no Apupuri a Djehovha? Kana kuti pamweni iyena uri kureketa zviro izvi ngekuti shamwari yake kana kuti anyaukama ake ndi gei? Kodi iyena uri kurangarira here kuti isusu tinozonda munhu unowakana no munhu we nhengo imweyo no yake? Zvecida isusu tingamupanganidzira kuti tinoda anhu ese, tinoareremedza uye tinozwisisa kuti munhu umwe na umwe unocitenderhwa cekuita zvisananguro zvake. b (1 Ped. 2:17) Pamweni tingatogara no mukana we kupangidza kuti kuzwira mazano e Bhaibheri kungabetsera kuti upenyu wedu unyase kupfadza.

13. Mungabetsera kudini munhu unorangarira kuti azvina musoro kutenda kuti Mwari ariyo?

¹³ Patinoreketa no munhu ano maonero akasiyana kamare no edu panyaya dzinganani, atidikani kurangarira kuti tinoziya kuti ngei iyena uri kureketa izvona. (Tito 3:2) Ngo muezaniso, ngazvipi zvamungaita kana mudoni wenyu we kucikora akabhuya kuti azvina musoro kutenda kuti Mwari ariyo? Kodi maizotorangarira here kuti iyena anotendera ngezve kuphinduka-phinduka uye anonyasa kuziya ngezve kuphinduka-phinduka? Pamweni iyena unonga ari kutophinda hake zviya zvaakambozwa zvecirekethwa uye aasati akambogara uye orangarira nge zvazvo. Pano kutotanga kureketa ngezve kuphinduka-phinduka, edzai kubvunza mudoni wenyu we kucikora ciro cicazoita kuti iyena arangarire. Pamweni imwimwi mungamupangidza masoko manganani anocokuita no kusikwa anooneka mu jw.org. Uye pamweni zuwa rimweni mungacedza naye ngezve artigo kana vhidhiyo yaanonga aona imona. Kana isusu tikadaira no rureremedzo, zvicaita nyore kuti  anhu ade kuziya zvakawanda ngezve zviya zvinorekethwa no Bhaibheri.

14. Niall wakaseenzesa kudini saiti yedu ye jw.org kuti abetsere mudoni wake we kucikora kuti zviya zvinorekethwa no anhu ngezve Apupuri a Djehovha azvirokwazvopi?

¹⁴ Mudjaha umweni unozwi Niall wakaseenzesa jw.org kuti apangidze kuti zviya zvinorekethwa no anhu ngezve Apupuri a Djehovha azvirokwazvopi. Iyena unoti: “Mudjaha umweni we kucikora waindorumbwa ecindibvunza kuti inini anditenderi siensiya ngo kuti ndinotendera zviri mu bhuku ‘rakatarhwa’ no anhu pane kutendera zviro zvakadjeka zve siensiya.” Ngokuti mudjaha uu we kucikora wainga asikatodi kupurutana zviya zvaida kurekethwa na Niall, iyena wakamubvunza kuti apinde mu saiti ye jw.org uye aone dii rakazwi “Siensiya uye Bhaibheri.” Niall wakazoona kuti mudoni wake we kucikora wainga apinda mu saiti. Uye zvino zvainga zvaa nyore kucedza naye ngezve kusikwa, zviro izvi zvingaitikawo na imwimwi.

15. Abereki angabetsera kudini ana awo kuti adaire no unaki paya paanoizwa mibvunzo dzakaringana no zviya zvaanotenda?

¹⁵ Abereki angabetsera ana awo kuziya kuti angadaira kudini no upfawi paya pekuti munhu unoita mubvunzo ngezve zviya zvaanotenda. (Tig. 3:13) Abereki anganani angaroedza ana awo pa nyaya dzakaita hingana idzi pakunamata ke mhuri. Awona anofunda nyaya dzinganani dzingakwanisa kuoneka kucikora uye anotoita miezaniso opangidza kuti angadaira kudini. Anofundisawo ana awo kuti adaire no upfawi uye anoafundisawo kudaira nge mushobo unoita kuti amweni ade kuziya zvakawanda.—Onai bhokisi rakazwi: “ Gadzirirai no Mhuri Yenyu.”

16-17. Madjaha angabetsereka kudini kana akadziroedza asati adaira munhu?

¹⁶ Kumbodzirowedza pacino nguwa kungabetsera madjaha kupanganidzira adoni awo ngezve zviya zvaanotenda uye kugara akagutsikana kuti anozvikonzero zvakawanda kuti atende zvinorekethwa  no Bhaibheri. Pa mbuto yakazwi: “Vechidiki Vanobvunza Kuti” iri mu saiti ye jw.org ino matii manganani angabetsera madjaha. Mbuto idzona dzinobetsera madjaha kuti abambise kutenda kawo uye dzinoabetsera kuti apase mhinduro eciseenzesa masoko awo. Mhuri padzinofunda pamwepo ma artigo aya, ese anofundira kuti angadziirira kutenda kawo nge mushobo uno upfawi uye unoita kuti anhu ade kupurutana.

¹⁷ Mudjaha umweni unozwi Matthew unopangidza kuti kurowedzwa uku kakamubetsera kudini. Pakunamata ke mhuri Matthew no abereki ake akapsvakisisa ngezve nyaya dzaizooneka kucikora. Iyena unoti: “Isusu tairangarira ngezve mibvunzo dzinganani dzaizoizwa no adoni angu e kucikora uye taipsvakisisa kuti tione kuti inini ndaizoadaira kudini. Paya pandainyasa kuziya kuti ngei ndecitenda mu Bhaibheri, inini ndaiona kuti zvainyasa kundiitira nyore kudaira anhu no upfawi paya paaindiita mibvunzo.”

18. Akorosi 4:6 inotifundisei?

¹⁸ Izvirokwazvo kuti kunyasa kupanganidza nyaya andizvopi basi zvinoita kuti anhu agutsikane. Asi kureketa zvakanaka uye no upfawi kunganyasa kubetsera. (Erengai Akorosi 4:6.) Kureketa ngezve zviya zvatinotenda kungaezaniswa no kucaira bhora munhu umweni. Isusu tingamucaira ngo mushobo wakanaka kana no simba. Kana tikatama kucaya bhora no simba rakawanda, zvinoita nyore kuti munhu watacairewo abate bhorero uye arumbwe ecicaya. Ngo mushobo umwewo, kana isusu tikareketa ngo mushobo wakanaka uye no upfawi, zvicaita nyore kuti anhu atipurutane uye arumbwe ecicedza nesu. Izvirokwazvo kuti kana munhu akada kureketedzana kana kureketa zvakashata ngezve zviya zvatinotenda, isusu atibambidzirhwi kurumbwa tecicedza naye uye kumudaira mibvunzo dzake. (Zvie. 26:4) Asi anhu akawanda aazoiti izvona; kubhuya zvirokwazvo akawanda acatipurutana.

19. Cinyi cinodikana kutiitisa kuti tipangidze upfawi paya patinodziirira zviya zvatinotenda?

¹⁹ Zviri pamhene kuti kugara no upfawi zvinobetsera maningi. Hino namatai kuna Djehovha mecimukumbira kuti iyena amupasei simba rekurumbwa no upfawi paya pamudikana kudaira munhu anonga ari kumuitai mibvunzo dzakaringana no zviya zvamunotenda kana paya pamunonga meciizirhwa hasha. Edzurirai kuti mhinduro dzamungapasa no upfawi dzingabetsera kuti musazopedzesere maakureketedzana. Mhinduro inopaswa no upfawi ingabetsera anganani kuti ade kutipurutana uye kucinja maonero awo anocokuita na isusu uye Bhaibheri. Garai “makagadzirira nguwa dzese kuti mudziirire” zviya zvamunotenda “mecizviita no upfawi uye no rureremedzo rakakura.” (1 Ped. 3:15) Garai makashinga kupangidza upfawi nguwa dzese uye kupangidza kuti imwimwi muri munhu wakabamba!