1. Pedru wakazwa kudini Djesu paakaita cishamiso uye paakamubetsera kuti abate howe dzakawanda?

 PEDRU wakapedza usiku wese eciedza howe asikabati ciro. Hino iyena wakashamisika maningi Djesu paakamubvunza kuti: “Endai pakadzika, mukhandire maricera enyu kuti mubate howe.” (Ruka 5:4) Pedru wainga asikazvitenderi kuti waizobata howe, asi kunyazi zvakadaro iyena wakaita zvaakakumbirhwa na Djesu. Pedzepo, paakakhandira maricera awona akatanga kumweka ngekuti mainga muno howe dzakawandisa. Paakaona kuti izvi zvainga zviri zvishamiso, Pedru no amweni aainga nawo “akashamiswa maningi.” Paakaona izvi Pedru wakati: “Tenzi, garai kure na inini, ngokuti ndiri mushaishi.” (Ruka 5:6-9) Pamweni Pedru wairangarira kuti wainga asikazi kusisira kugara padhuze na Djesu.

2. Ngei zvakanaka maningi kufunda ngezve muezaniso wa Pedru?

² Pedru wainga ari mugwanza ngokuti iyena “wainga ari munhu mushaishi.” Bhaibheri rinopangidza kuti pamweni paya Pedru waireketa no kuita zviro asikazi kurangarira, zvaizomuita kuti iyena acinyuke. Makambozwawo hinga Pedru here? Imwimwi muri kuda here kugadzirisa ciro pa unhu wenyu kana kuti kukunda pamakarembera? Kana zviripo, kufunda ngezve muezaniso wa Pedru kungamubetsera kuti musaruze kariro. Kuita kudini? Rangarirai zvinoteera: Kudai Djehovha naainga asikadi, iyena ainga asikadi kuita kuti zvishaishi zva Pedru zvitarhwe mu Bhaibheri. Asi izvona zvakatarhwa mu Bhaibheri kuitira kuti tikwanise kufunda ndizvo. (2 Ti. 3:16, 17) Kufunda ngezve mwanarume uu wainga akaremba uye uno mazwiro hingana edu, kunotibetsera kuona kuti Djehovha aaetseri kukwana kedu. Djehovha anoda kuti  isusu tisarembe kunyazi tecirhwisana no kutama kukwana kedu.

3. Ngei tisikadikani kuremba?

³ Ngei zvecikosha maningi kuti tisarembe? Pano cierengo cimweni cinoti, Kurowedza kunoita kuti tinyase kubudirira. Ngo muezaniso: Muembi ungatora nguwa yakareba kuti anyase kukwanisa kuridza. Pa nguwa yese iyona ii, iyena ungakwanisa kushaisha kakawanda, asi kana akarumbwa ecidzirowedza iyena ungakwanisa kubudirira. Uye kunyazi iyena waakunyasa kutokwanisa kuridza, pamweni paya ungakwanisa kutoshaisha. Kunyazi zvakadaro, iyena aarembi. Asi unorumbwa ecidzirowedza kuti anyase kukwanisa kuridza. Ngo mushobo umwewo, kunyazi tikakwanisa kukunda patakarembera, nguwa dzimweni tingakwanisa kuhwirirazve kuita zviro zvakashata. Kunyazi zvakadaro, tinorumbwa tecipeta masimba kuti tibudirire. Tese isusu tingareketa uye kuita zviro zvingazoita kuti ticinyuke, asi cinokosha ngecekuti isusu tisarembe, ngo kuita kudaro, Djehovha anozotibetsera kuti tibudirire. (1 Ped. 5:10) Ngatione zvino muezaniso we kushingirira wa Pedru. Usisi wakapangidza Djesu kuna Pedru kunyazi no zvishaishi zvake ungatibetsera kuti tirumbwe teciseenzera Djehovha.

4. Pedru waidziona kudini, asi Djesu akamubetsera kudini? (Ruka 5:5-10)

⁴ Bhaibheri aribhui kuti ngei Pedru waidziona hinga “mushaishi” uye zvishaishi zvipi zvaaida kureya. (Erengai Ruka 5:5-10.) Asi pamweni iyena wainga akaita zvishaishi zvakakura. Djesu akaona kuti Pedru waithya, pamweni Pedru waidziona kuti wainga asikazi kusisira. Asi Djesu aizviziya kuti Pedru waizorumbwa akatendeka. Hino Djesu no upfawi akabvunza Pedru kuti “asathye.” Masoko aya aipangidza kuti Djesu aigonda Pedru uye izvi zvakacinja upenyu wake. No kuhamba ke nguwa, Pedru no hama yake Andree akasiya bhizi rawo rokutengesa howe uye otanga kuhamba na Djesu eciita basa rekuparidzira, nge ndaa yazvo, awona akatambira makomborero akawanda a Djehovha.—Mark. 1:16-18.

5. Pedru wakatambira makomborero api nge ndaa ye kukunda kuthya uye kutenda mupiko wa Djesu?

⁵ Hinga muteeri wa Kristu, Pedru wakagara no upenyu unoshamisa. Iyena wakaona Djesu eciporesa airhwara, ecidzingira madhimoni uye ecitomutsa akafa. b (Mat. 8:14-17; Mark. 5:37, 41, 42) Pedru wakaonawo cipangidzo ca Djesu hinga Mambo we Umambo wa Mwari mu nguwa yo mberi uye izvi zvakamubambisa maningi. (Mark. 9:1-8; 2 Ped. 1:16-18) Pedru wakaona zviro zvaainga asikazombooni kudai naainga asikazi kugara muteeri wa Djesu.  Zvezvirokwazvo iyena waipfara maningi ngekukwanisa kukunda kaakaita zvido zvake zvakashata uye kugara no mukana we kutambira makomborero akawanda!

6. Pedru wakakunda kuremba kake no kukasika here? Panganidzai.

⁶ Kunyazi wakaona no kuzwa zviro zvakawanda zvakanaka paainga ana Djesu, Pedru wairumbwa ecirhwisana no kutama kukwana kake. Ngatione miezaniso minganani. Djesu paakabhuya kuti waidikana kutambudzika no kufa kuti adzadzise uphorofita we mu Bhaibheri, Pedru wakabvunza Djesu kuti izvi azvizomboitiki. (Mark. 8:31-33) Nguwa dzimweni, Pedru no amweni ake aireketedzana ecida kuziya kuti ndiani waikosha pakati pawo. (Mark. 9:33, 34) Usiku umwe Djesu asati afa, Pedru wakaita zviro asikazi kurangarira uye wakagura nzee ye mwanarume umweni. (Juau 18:10) Pa usiku uwona kamare, Pedru wakathya maningi zvekuti wakaguma pakuramba katatu kese kuti wainga ari shamwari ya Djesu. (Mark. 14:66-72) Izvi zvakaita kuti iyena aceme maningi.—Mat. 26:75.

7. Mumasure mekuti Djesu amutswa akapasa Pedru mukana upi?

⁷ Pedru wakadzinyangadzirhwa ega kamare, asi kunyazi zvakadaro Djesu aazi kumuramba. Mumasure mekumutswa, Djesu akapasa Pedru mukana wekuti apangidze rudo rake kaari. Djesu akapasa basa ripsva Pedru rokuti agare muushi anodzidodosa uye kuriritira mabira ake. (Juau 21:15-17) Pedru wakaita zviya kamare zvaakakumbirhwa na Djesu. Pedru wainga ari ku Djerusarema pa zuwa re pentekoste uye wakagara umwe we akatanga kudzodzwa no mwiya mucena.

8. Pedru wakaita cishaishi cipi cakakura paainga ari ku Antiyokiya?

⁸ Kunyazi mumasure mekugara mu Kristu wakadzodzwa, Pedru waidikana kurhwisana no kutama kukwana. Mu gore 36 K.A., Mwari akatuma Pedru kuti aende kuna Korneriyo uwo wainga asiripi mu Djudha. Pedzepo, Korneriyo wakadzodzwa no mwiya mucena uye zvakagara pamhene kuti “Mwari aasananguri” nge kuita kuti aya ainga asiripi Adjudha agare nhengo ye ungano ye Cikristu. (Zvii. 10:34, 44, 45) Mumasure mazvo Pedru wakatanga kurhya no Adjudha, zviro zvekuti iyena wainga asati akambozviita mu upenyu wake. (Aga. 2:12) Asi Akristu amweni e Cidjudha airangarira kuti Adjudha no aya ainga asiripi Adjudha ainga asikadikani kurhya pamwepo. Uye Akristu amweni airangarira kudaro paakaenda ku Antiyokiya, Pedru wakaima kurhya no hama dzimweni dzainga dzisiripi Adjudha, pamweni nge kuthya kukuhunyisa hama dze Cidjudha. Muphostori Pauro wakaona kuti Pedru wainga oogara mucengedzi uye wakamusumurura pamberi pe anhu akawanda. (Aga. 2:13, 14) Kunyazi no cishaishi ici, Pedru aazi kuima kupeta masimba kuti acinje. Asi cinyi cakamubetsera?

9. Juau 6:68, 69 inopangidza kudini kuti Pedru wainga akagondeka?

⁹ Pedru wainga akagondeka; iyena aazi kusiya kuti ciro cipi kana kuti munhu upi hake amuitise kuti asiye kuteera Djesu. Ngo muezaniso, iyena wakapangidza kugondeka Djesu paakabhuya zviro zvekuti afundi amweni aazii kuzvizwisisa. (Erengai Juau 6:68, 69.) Anhu akawanda aiteera Djesu akasiya kuita izvona uye aatozi kuetsera kupanganidzirhwa zvaaida kureya. Asi Pedru aazi kuita kudaro. Iyena wainga akagondeka uye wakabhuya kuti Djesu basi ndiyena wainga ano “masoko e ruponeso.”

10. Djesu akapangidza kudini kuti waigonda Pedru? (Onaiwo mufanikiso.)

¹⁰ Djesu aazi kusiya Pedru. Pa usiku wake we kupedzesera panyika pano, Djesu aizviziya kuti Pedru pamwepo no afundi amweni aizomusiya. Kunyazi zvakadaro, Djesu akabvunza Pedru  kuti aizviziya kuti iyena waizorumbwa akatendeka. (Ruka 22:31, 32) Djesu aizviziya kuti “mwiya unoda asi nyama aina simba.” (Mark. 14:38) Ndiyo ndaa, Djesu aambozi kuda kusiya muphostori wake unodiwa kunyazi iyena wainga akambobhuya kuti aamuzii. Uye zvese zvinopangidza kuti mumasure mekuti Djesu amutswa, iyena akadzipangidza kuna Pedru ari ega. (Mark. 16:7; Ruka 24:34; 1 Ako. 15:5) Izvi zvakabambisa maningi Pedru ngokuti iyena wainga akatsukwara nge ndaa ye zviro zvaainga aita!

11. Djesu akagondesa kudini Pedru kuti Djehovha aizomuriritira?

¹¹ Djesu akagondesa Pedru kuti Djehovha aizomucengeta. Mumasure me kumutswa, Djesu akaitazve kuti Pedru no aphostori ake amweni abatezve howe dzakawanda ngo mushobo unoshamisa. (Juau 21:4-6) Cishamiso ici cakaita kuti Pedru azwisise kuti Djehovha aizomupasa zvekurarama nazvo zvese zvaaida. Pamweni Pedru wakaedzurira masoko a Djesu paakabhuya kuti Djehovha anoriritira aya ‘anotanga kupsvaka Umambo.’ (Mat. 6:33) Zvese izvi zvakabetsera Pedru kuti akande basa rake re kuparidzira pa mbuto ye kutanga, haiwa basa rekutengesa howe. Iyena wakagara mwanarume ano ushingi uye wakaparidzira pa zuwa re pentekoste 33 K.A., ecibetsera anhu akawanda kuti atende masoko akanaka. (Zvii. 2:14, 37-41) Uye pa nguwa yakazoteera, iyena wakabetsera Asamariya uye no aya ainga asiripi Adjudha kuti afunde zvakawanda ngezva Kristu. (Zvii. 8:14-17; 10:44-48) Zvezvirokwazvo Djehovha akabetsera Pedru kuti aunzise mu ungano anhu e mishobo yese.

12. Muezaniso wa Pedru ungatibetsera kudini kana tecirhwisana no kutama kukwana kedu ke nguwa yakareba?

¹² Djehovha anotibetsera kuti tishingirire. Izvirokwazvo kuti azviripi nyore kurumbwa tecienderera mberi, maka-maka paya patinonga tecirhwisana no kutama kukwana kedu ke nguwa yakareba. Nguwa dzimweni, zvinetso zvedu zvinoita hinga zvinoshupha maningi kupinda zviya zvakabatana na Pedru. Asi Djehovha anotipasa simba ratinoda kuti tisarembe. (Pis. 94:17-19) Ngo muezaniso, onai muezaniso we hama imweni yairumbwa yeciita zve pamaponde no munhu we nhengo imweyo ke makore akawanda. Iyona yakacinja upenyu wayo uye yorarama maererano no zvinobhuya Bhaibheri. Kunyazi zvakadaro, iyona nguwa dzimweni inodikana kurhwisana no cido cakakura cekuita zvakashata. Asi cinyi cinoibetsera kuti  ishingirire? Iyona inoti: “Djehovha anondibambisa.” Inoenderera yeciti: “No rubetso re mwiya mucena . . . , Inini ndakafunda kuti zvinobvira [kurumbwa] ndiri mugwanza re cokwadi . . . Kunyazi no kutama kukwana kangu Djehovha anondiseenzesa uye anorumbwa ecindibambisa.”

13. Maererano na Zviito 4:13, 29, 31, tingateedzera kudini muezaniso wa Pedru? (Onaiwo mufanikiso.)

¹³ Hinga zvataona, Pedru wakaitazve cishaishi nge ndaa ye kuthya munhu. Asi Pedru waiita munamato ecikumbira simba uye wakakwanisa kugara no ushingi. (Erengai Zviito 4:13, 29, 31.) Isusu tingakwanisawo kukunda kuthya. Onai muezaniso wa Horst, hama ye cidjaha yakararama ku Alemanha pa nguwa yaiitika Hondo ye Nyika Yecipiri. Pa nguwa iyona anhu aibambidzirhwa kuseenza mushobo wekucungamidza waiti “Hitler ucatiponesa.” Hino Horst wakatenda kubambidzirhwa uku ku cikora uye wakapedzesera ati “Hitler ucatiponesa!” Iyena paakapanganidzira abereki ake, awona aazi kureketedzana naye. Pane kudaro, akaita munamato kuna Djehovha ecikumbira kuti amupase ushingi waaida. No rubetso re abereki ake uye no kugonda Djehovha, Horst wakakwanisa kugara no simba raaida uye kurumbwa akabamba. Pa nguwa yakazoteera iyena wakati: “Djehovha aazi kumbondisiya.” c

14. Aushi ano rudo angabetsera kudini aya akaora mwoyo?

¹⁴ Djehovha na Djesu aazombotisii. Mumasure mekuti Pedru waramba Djesu, iyena waidikana kuita cisananguro cinokosha. Iyena waizosiya kugara muteeri wa Djesu here kana kuti waizorumbwa ecishingirira? Djesu akadeketera kuna Djehovha ecikumbira kuti kutenda ka Pedru kusarembe. Djesu akapanganidzira Pedru kuti ainga aita munamato uwona uye Djesu aigonda  kuti Pedru waikwanisa kubambisa hama dzake. (Ruka 22:31, 32) Pamweni Pedru waibambiswa maningi pese paya paaiedzurira zvakabhuiwa ndi Djesu! Ngo mushobo umwewo, paya patinonga taita cisananguro cinokosha, Djehovha anotibetsera kuti tirumbwe takatendeka. Iyena angaita izvona nge kuseenzesa aushi ano rudo. (Aef. 4:8, 11) Hama imweni inozwi Paul inoseenza hinga mukuru ke nguwa yakareba inoedza kuita izvona. Munhu paanoedza kusiya Djehovha, Paul unomuedzurira kuti Djehovha akamukweera kudini ku cokwadi. Pedzepo iyena unomuedzurira kuti rudo Rake rakagondeka arizomuiti kuti asiye munhuwo. Paul unoti: “Inini ndakamboona hama dzakawanda dzakaora mwoyo, asi dzakakwanisa kushingirira no rubetso ra Djehovha.”

15. Muezaniso wa Pedru no wa Horst unopangidza kudini kuti tingagonda zvinobhuiwa pana Mateu 6:33?

¹⁵ Kuitawo hinga Djehovha akapasa zvekurarama nazvo Pedru kutobatanidzawo no aphostori amweni, Iyena anokwanisawo kutipasa zvekurarama nazvo kana tikakanda Umambo wa Mwari pa mbuto ye kutanga. (Mat. 6:33) Horst wamborekethwa ngezvake wakatanga kurangarira ngezve kugara mu pioneiro Hondo ye Cipiri ye Nyika Yese payakapera. Asi iyena wainga ari murombo uye wairangarira kuti wainga asikazokwanisi kurumbwa ari pioneiro we nguwa dzese. Zvinyi zvaakaita? Iyena wakasanangura kuda kuona kuti zvezvirokwazvo Djehovha anomuriritira uye pa nguwa yaaivhakacirhwa no muonereri we nharaunda, iyena wakabuda mu basa rekuparidzira sumana yese. Mukupera ke sumana iyona, iyena wakashamisika maningi muonereri we nharaunda paakamupasa envheropi yakadzara ngo mare yaibva ku hama imweni isikazi kududza zina rayo. Mare iyona yaikwana kuti iyena adziriritire eciseenza hinga mu pioneiro ke mwedzi yakawanda. Horst wakaona cipo ici hinga cipangidzo cekuti Djehovha aizomuriritira. Iyena wakazorarama upenyu wake wese ecikanda Umambo pa mbuto ye kutanga.—Mara. 3:10.

16. Ngei zvakanaka maningi kufunda ngezva Pedru uye zvaakatara mu tsamba dzake?

¹⁶ Pedru pamweni wakapfara maningi, ngokuti Djesu aazi kumusiya hinga zvaakambokumbira pa nguwa imweni! Djesu akarumbwa ecirowedza Pedru kuti agare muphostori wakatendeka uye kuti agare muezaniso wakanaka ku Akristu. Isusu tingafunda zviro zvinokosha kubva pa rowedzo yakapaswa Pedru. Iyena kamare wakatara zvimweni zvakhona mu tsamba dzake mbiri dzaakatarira ku ungano ye muzana re makore rokutanga. Mu fundo inoteera, ticaona zviedzuriro zvinganani zve tsamba idzona uye kuti tingazviseenzesa kudini nyamasi uno.