1. Djoashi, Uziya na Djosiya akabatana no migariro ipi inoshupha?

 IMWIMWI makamborangaridza here kuti zviro zvaizonga zvakadini kudai maizogara mambo e aseenzi a Djehovha muri mwana mudoko kana kuti djaha riciri kukura! Maizoseenzesa kudini simba renyu rese uye no utongi wenyu wese? Bhaibheri rinoreketa ngezve madjaha akawanda akagara madzimambo e Adjudha. Ngo muezaniso, Djoashi wakagara mambo paainga ano makore 7 e kubarhwa, Uziya wakagara mambo paainga ano makore 16, uye Djosiya wakagara mambo paainga ano makore 8. Izvi zvainga zvisiripi nyore kaari! Kunyazi kuti zvainga zvisiripi nyore kaari, Djehovha no amweni akaabetsera kuti akunde matambudziko uye aite zviro zvakawanda zvakanaka.

2. Ngei zvinokosha maningi kuongorora miezaniso ya Djoashi, Uziya na Djosiya?

² Izvirokwazvo kuti atiripi madzimambo kana kuti mambokadzi, asi tingakwanisa kufunda zviro zvakawanda zvinokosha kubva kuna Djoashi, Uziya, na Djosiya. Awona akaita zvisananguro zvakanaka, asi akaitawo zvisananguro zvimweni zvakashata. Paticaongorora miezaniso yawo, ticaona kuti ngei tinodikana kusanangura shamwari dzakanaka, kurumbwa tecidzidodosa, uye kurumbwa tecipeta masimba kuti tikhwedere dhuze na Djehovha.

3. Djeoyadha wakabetsera kudini Mambo Djoashi kuti aite zvisananguro zvakanaka?

³ Teedzerai zvisananguro zvakanaka zva Djoashi. Paainga aciri djaha, Mambo Djoashi akaita cisananguro cakanaka. Iyena ainga asina baba, hino akatondoedza mazano a Djeoyadha, Mupristi Mukuru wainga akagondeka. Djeoyadha wakarera Djoashi hinga mwana wake kamare. Nge ndaa ye muezaniso wakanaka wa Djeoyadha, Djoashi wakasanangura kuseenzera Djehovha uye kubetsera aseenzi a Mwari kuti aite zvimwezvo. Djoashi ndiye kamare wakahwirinzazve kunamathwa ka Djehovha mu tempro.—2 Mak. 24:1, 2, 4, 13, 14.

4. Kana tikada Djehovha uye tozwira mitemo yake ticagara no mibairo ipi? (Zvierengo 2:1, 10-12)

 ⁴ Kana abereki enyu kana kuti munhu umweni uri kumufundisai ngezva Djehovha uye no zviro zvaanopfarira, imwimwi mungagara no rugondo rekuti izvona i cipo cinokosha kamuri. (Erengai Zvierengo 2:1, 10-12.) Abereki enyu angamufundisai nge mishobo yakasiyana-siyana. Onai kuti baba e hanzvadzi imweni inozwi Katya akaibetsera kudini kuti iite zvisananguro zvakanaka. Mazuwa ese paaiiperekedza ku cikora, awona aicedza ngezve tsamba ye zuwa irona. Katya unoti: “Makani aya aindibetsera kuti inini ndikwanise kukurira zvinetso zve zuwa irona.” Asi pamweni madzibaba enyu angagadza mitemo imweni yakatsamira mu Bhaibheri yekuti kamuri mitemo iyona yakanyanyisa. Pa nyaya yakadaro, cinyi cicamubetserai kuti muazwire? Hanzvadzi imweni inozwi Anastasia inobhuya kuti abereki ayo nguwa dzese aiipanganidzira kuti ngei ainga ecipasa mutemo. Iyona inoti: “Izvi zvaindibetsera kuti ndizwisise kuti awona ainga ecindipasa mutemo uu, haiwa kuti andionerere, asi ngekuti aindida uye kuti aida kundidziirira.”

5. Maitiro edu angabata-bata kudini abereki edu uye na Djehovha? (Zvierengo 22:6; 23:15, 24, 25)

⁵ Abereki enyu acapfara maningi kana imwimwi mukaseenzesa mazano e mu Bhaibheri aanonga amupasai. Asi, cinonyanya kukosha nge cekuti Djehovha acapfara maningi uye ushamwari wenyu naye ucatunhudzira kubamba. (Erengai Zvierengo 22:6; 23:15, 24, 25.) Izvi izvikonzero zvakanaka zve kuteedzera muezaniso wa Djoashi paainga aciri mudjaha.

6. Mumasure me kufa ka Djeoyadha, Djoashi wakatanga kuzwira mazano api, uye ngaupi wakazogara mugumisiro wakhona? (2 Makoronika 24:17, 18)

⁶ Fundai kubva pa zvisananguro zvakashata zva Djoashi. Mumasure mekuti Djeoyadha wafa, Djoashi wakatanga kugara no shamwari dzakashata. (Erengai 2 Makoronika 24:17, 18.) Iyena wakasanangura kutondoedza mazano o acinda e Mudjudha, ekuti ainga asikadi Djehovha. Pamweni imwimwi munotendera kuti Djoashi waidikana kugara kure no shamwari dzakaita hingana idzi. (Zvie. 1:10) Pane kudaro, iyena wakaita zvoupenzi uye wakasanangura kuzwira mazano asikazi kunaka e shamwaridzo. Uye kuti zvibambirire, pa nguwa yekuti Zakariya umwe we anyaukama ake akaedza kumubvunza kuti acinje, Djoashi wakatuma anhu kuti amuuraye. (2 Mak. 24:20, 21; Mat. 23:35) Zvainga zviri zviro zvakashata maningi! Djoashi wainga watanga zvakanaka, asi zvinotsukwarisa kuti iyena wakagara muphikisi uye muurai. Pakupedzesera, iyena wakauraiwa no aseenzi ake kamare. (2 Mak. 24:22-25) Zviro zvingadai zvisikazi kuguma pa kushata kudai iyena akarumbwa ecipurutana Djehovha uye kupurutana aya Anomuda! Mafundei kubva pa muezaniso wa Djoashi?

7. Munodikana kusanangura shamwari dzakaita kudini? (Onaiwo foto.)

⁷ Zviro zvatinofunda kubva pa zvisananguro  zvakashata zvakaizwa na Djoashi nge zvekuti tinodikana kusanangura shamwari dzinotibetsera kuti tiite zvakanaka—shamwari dzinoda Djehovha uye kumupfadza. Uye shamwari dzedu dzingagara dze mathunga akasiyana-siyana. Edzurirai kuti, Djoashi wainga aciri djaha maningi paakagara shamwari ya Djeoyadha. Pa nyaya yakaringana no shamwari dzenyu, dzibvunzisei kuti: ‘Kodi shamwari dzangu dzinondibetsera kubambisa kutenda kangu muna Djehovha here? Idzona dzinondikohomedzesa kuti ndirarama maererano no zviya zvinodiwa na Mwari here? Dzinoreketa ngezva Djehovha uye ngezve cokwadi ce Bhaibheri here? Dzinoreremedza zviya zvinodiwa na Djehovha here? Idzona dzinoreketa basi zviro kuti dzindipfadze here, kana kuti dzino ushingi we kundipasa mazano pandinonga ndecida rubetso?’ (Zvie. 27:5, 6, 17) Cokwadi nge cekuti shamwari dzisikadi Djehovha, imwimwi amudikani kudzida. Asi kana imwimwi muno shamwari dzinoda Djehovha, dzibatei no nyara mbiri—idzona dzicamubetserai nguwa dzese!—Zvie. 13:20.

8. Kana imwimwi meciseenzesa redhi sosiyari, munodikana kurangarira ngezvei?

⁸ Maredhi sosiyari angagara mushobo wakanaka we kucedza no hama uye no shamwari. Asi anhu akawanda anoseenzesa basi maredhi sosiyari kuti adzionese ku amweni nge kukanda mafoto uye mavhidiyo e zviro zvaanonga atenga kana kuti zviro zvaanonga aita. Kana imwimwi meciseenzesa redhi sosiyari, dzibvunzisei kuti: ‘Cinangwa cangu ngece kudzionesa kuno amweni here? Inini ndinokandawo mu redhi sosiyari zviro zvakanaka zvandakaita no amweni kana kuti ndinokanda zviro kuti ndidzikudze? Kodi zviro zvinokandwa no amweni mu maredhi sosiyari zvinobata-bata mushobo wangu we kurangarira, we kureketa, uye we kuita zviro nge mushobo wakashata here?’ Hama Nathan Knorr, akaseenza hinga nhengo ye Dare Rinotungamirira, akapasa zano rinoteera: “Musaedze kupfadza amweni, ngokuti mucazopedzesera maakukonerhwa kupfadza kana munhu umwe hake. Edzai kupfadza Djehovha, nge mushobo iwona imwimwi mucapfadza anhu ese aya anomuda.”

9. Djehovha akabetsera Uziya kuti aitei? (2 Makoronika 26:1-5)

⁹ Teedzerai zvisananguro zvakanaka zva Uziya. Mambo Uziya paainga aciri djaha, waidzidodosa. Iyena wakafundira “kuthya Mwari we cokwadi.” Uziya wakafa aano makore 68 uye pa makore akawanda e upenyu wake Djehovha akamukomborera. (Erengai 2 Makoronika 26:1-5.) Uziya wakanyisa madzinza akawanda uye wakaita kuti Djerusarema rigare rakanyasa kudziirirhwa. (2 Mak. 26:6-15) Zvezvirokwazvo, Uziya wakapfara maningi no zviro zvese zvaakakwanisa kuita no rubetso ra Djehovha.—Mup. 3:12, 13.

10. Ngazvipi zvakaitika na Uziya?

¹⁰ Fundai kubva pa zvisananguro zvakashata zva Uziya. Mambo Uziya wainga adjaira kubvunza amweni zviro zviya zvaaidikana kuita. Kodi izvi zvakaita kuti iyena atange kurangarira kuti waikwanisa kuita zvese zvaaida? Zuwa rimweni, Uziya wakapinda mu tempro ya Djehovha uye wakada kuedza kupisa cibairo pa artari, zviro zvekuti zvainga zvisikadikani kuizwa no madzimambo. (2 Mak. 26:16-18) Mupristi Mukuru Azariya wakaedza kumubvunza kuti asaite izvona, asi Uziya wakadzara no shungu. Zvinotsukwarisa kuti Uziya aazi kurumbwa wakagondeka kuna Djehovha uye wakaphanicwa na Djehovha nge mapere. (2 Mak. 26:19-21) Zviro zvingadai zvakahamba zvakanaka kudai wakarumbwa ecidzidodosa!

11. Ngazvipi zvingatibetsera kuti tirumbwe tecidzidodosa? (Onaiwo foto.)

¹¹ Uziya paakagara mwanarume uno simba, iyena wakakanganwa zviro zvese zvakanaka zvaainga aizirhwa na Djehovha. Tinofundei? Tinodikana nguwa dzese kuedzurira kuti makomborero ese uye ubaba wese watinawo unobva kuna Djehovha. Pane kuti tigare tecidzikudza nge ndaa ye zviro zvatakwanisa kuita, tinodikana kuita kuti  Djehovha akudzwe. b (1 Ako. 4:7) Kudarika izvona, tinodikana kudzidodosa uye kuziya kuti tiri anhu asikazi kukwana uye tinodikana kupangwa. Hama imweni ino makore 60 yakatara kuti: “Inini ndakafunda kuti andidikani kukasika kunyangadzwa kana kuti kuremba kana amweni akaziya ngezve zvishaishi zvangu. Nguwa dzimweni, inini ndinoshaisha pa zviro zvidoko uye ndinopaswa mazano pa nyaya idzi, kunyazi zvakadaro inini ndinoedza kuzvigadzirisa uye ndorumbwa ndeciseenzera Djehovha.” Patinozwira Djehovha uye torumbwa tecidzidodosa, tinogara anhu anopfara zvezvirokwazvo.—Zvie. 22:4.

12. Djosiya wakakhwedera dhuze na Djehovha paainga aciri djaha? (2 Makoronika 34:1-3)

¹² Teedzerai zvisananguro zvakanaka zva Djosiya. Djosiya wainga ano makore 16 paakatanga kukhwedera dhuze na Djehovha. Iyena waida kufunda zvakawanda ngezva Djehovha uye kuita kuda Kake. Asi upenyu wainga usiripi nyore nguwa dzese kuna mambo wecidjaha uu. Pa nguwa iyona, anhu akawanda ainamata anamwari e kunyepa uye Djosiya waidikana kugara no ushingi kuti akwanise kudziirira kunamata ke cokwadi. Uye ndizvo kamare zvaakaita! Iyena wainga ano makore 20 paakatanga kubvisa kunamata ke kunyepa mu nyika.—Erengai 2 Makoronika 34:1-3.

13. Kudzipira kuna Djehovha zvinoreyei kamuri?

¹³ Kunyazi imwimwi muciri djaha, mungakwanisa kuteedzera Djosiya uye kufunda ngezva Djehovha uye ngezve mawara Ake anoshamisa. Izvi zvicaita kuti mude kudzipira kuna Djehovha. Asi cisananguro ici cingabata-bata kudini upenyu wenyu we zuwa no zuwa? Luke, wakabhabhatidzwa paainga ano makore 14, unoti: “Kubvira zvino kuenda mberi, inini ndicakanda basa rangu kuna Djehovha pa mbuto yekutanga mu upenyu wangu uye ndicapeta masimba kuti ndipfadze mwoyo wake.” (Mark. 12:30) Mungagara no cokwadi cekuti mucakomborerhwa maningi kana mukasanangura kuita zvimwezvo!

14. Pasai muezaniso wekuti madjaha amweni ari kuteedzera kudini Mambo Djosiya.

¹⁴ Zvinetso zvipi zvamungabatana nazvo meciseenzera Djehovha pamunonga muri djaha? Johan, wakabhabhatidzwa paainga ano makore 12, unopanganidza ngezve kubambidzirhwa kaaiizwa no anhu aifunda naye kuti abheme sigaro eretroniko kana kuti vaping. Kuti agare  no simba rekukunda kubambidzirhwa uku, Johan unodziedzuririsa kuti masigaro eretroniko pane kukuwadza uthongo wake, angakwanisa kukuwadza ushamwari wake na Djehovha. Rachel wakabhabhatidzwa paainga ano makore 14, unopangidza zviro zvakamubetsera kuti akunde zvinetso zvaaibatana nazvo ku cikora. Iyena unoti: “Ndinoedza kubatanidza zvese zvandinoona no zviro zviri mu Bhaibheri. Ngo muezaniso, aula ye istoria ingakwanisa kundiedzuririsa ngezve ciro candakaerenga mu Bhaibheri kana kuti uphorofita. Uye pa nguwa dzimweni pandinonga ndecicedza no amweni ku cikora, inini ndinoedzurira tsamba uye ndinopangidza tsambeyo ku munhuwo.” Zvinetso zvamuri kubatana nazvo pamweni zvingagara zvakasiyana no zviya zvakabatana na Mambo Djosiya, kunyazi zvakadaro, imwimwi mungagara no ungwaru uye makagondeka hinga iyena. Kukunda zvinetso muciri djaha kucamubetserai kuti imwimwi muzokwanise kukunda zvicauya mune ramangwana.

15. Cinyi cakabetsera Djosiya kuti aseenzere Djehovha akagondeka? (2 Makoronika 34:14, 18-21)

¹⁵ Mambo Djosiya paainga ano makore 25, iyena wakatanga kugadzirisa tempro. Apa ndipo paakagumira “bhuku re Mutemo wa Djehovha, raakapasa eciseenzesa Mozesi.” Mambo paakazwa zvaibhuiwa no bhuku iri, iyena nokukasika wakaita cinjo kuti azwire zvainga zvakatarhwa mu bhukuro. (Erengai 2 Makoronika 34:14, 18-21.) Imwimwi makamboedza kuerenga Bhaibheri mazuwa ese here? Kana muri kuedza, zviri kukwanisika here? Imwimwi muno musambo we kutarira mavhersikuro angazomubetserai here? Luke wambobhuiwa nge zvake, unotara mu kadherno mafundo anokosha aanonga agumira pa kuerenga Bhaibheri. Pamweni kuita izvona zvingamubetserai kuti muedzurire ngezve mavhersikuro e Bhaibheri kana kuti mafundo amunonga maona. Pamunonga mecitunhudzira kuziya Bhaibheri uye kutanga kurida, mucatunhudzirawo kuda kuseenzera Djehovha. Kuita hinga kubetsera kakaita Soko ra Mwari kuna Djosiya kuti aite zviro zvakanaka, irona ricamubetseraiwo.

16. Ngei Djosiya wakaita cishaishi cakakura, uye tinofundei?

¹⁶ Fundai kubva pa zvisananguro zvakashata zva Djosiya. Paainga ano makore 39, Djosiya wakaita cishaishi cakaita kuti afe. Pane kupsvaka nhungamiriro  dza Djehovha, iyena wakasanangura kudzigonda. (2 Mak. 35:20-25) Iri i fundo rinokosha katiri. Azvinei no thunga ratinaro kana kuti nguwa yatinonga tapedza teciseenzera Djehovha, isusu tinodikana kurumbwa tiri dhuze na Djehovha. Ndiyo ndaa tinodikana kuita munamato kuna Djehovha nguwa dzese tecikumbira nhungamiriro dzake, kufunda Bhaibheri, uye kuzwira mazano e Akristu akakura pa kunamata. Kana mukaita kudaro, mucathurudza mikana ye kuita zvishaishi uye mucatunhudzira mukana we kupfara.—Tig. 1:25.

17. Mafundo api anokosha atafunda kubva ku madzimambo matatu e Djudha?

¹⁷ Pano zviro zvakawanda zvakanaka zvamungaita pamunonga muciri djaha. Ngano ya Djoashi, Uziya, uye Djosiya inopangidza kuti imwimwi mungakwanisa kuita zvisananguro zvakanaka uye kupfadza Djehovha kunyazi muciri djaha. Izvirokwazvo kuti awona akapedzesera aita zvishaishi, zvekuti zvakazopedzesera no migumisiro yakashata. Asi kana imwimwi mukateedzera zviro zvakanaka zvaakaita, uye moramba kuita zvishaishi zvaakaita, mucapfara maningi mu upenyu wenyu.

18. Miezaniso ipi ye mu Bhaibheri inopangidza kuti mungakwanisa kupfara maningi mu upenyu wenyu? (Onaiwo mufanikiso.)

¹⁸ Bhaibheri rinoreketa ngezve madjaha amweni akakhwedera dhuze na Djehovha, akagara no makomborero ake, uye akapfara. Dhavhidhi ndi umwe we madjaha aya. Paainga aciri djaha, Dhavhidhi wakasanangura kugara shamwari ya Djehovha uye nokuhamba ke nguwa wakagara mambo wakagondeka. Izvirokwazvo kuti Dhavhidhi wakaita zvishaishi zvinganani, asi Djehovha aimuona hinga museenzi akagondeka. (1 Mad. 3:6; 9:4, 5; 14:8) Zvakadini kufunda zvakawanda ngezve upenyu wa Dhavhidhi? Zvezvirokwazvo imwimwi mucabambiswa uye mucagara no cidaka-daka ce kuda kuseenzera Djehovha makagondeka. Kana kuti imwimwi mungafunda zvakawanda ngezve muezaniso wa Marko uye Timoti. Awona akatanga kuseenzera Djehovha aciri madjaha kamare uye akarumbwa akagondeka dakara ku mapeto ke upenyu wawo. Awona akatenderhwa na Djehovha; uye akapfara maningi nge ndaa yazvo.

19. Imwimwi munoda kuti upenyu wenyu ugare wakadini?

¹⁹ Mushobo wamunoseenzesa upenyu zvino, ucabata-bata zviya zvicaitika mu upenyu wenyu mune ramangwana. Kana imwimwi mukagonda Djehovha haiwa kudzigonda, iyena acamubetserai kuti nguwa dzese muite zvisananguro zvakanaka. (Zvie. 20:24) Imwimwi mungakwanisa kugara no upenyu unopfadza uye wakadzara no zviro zvakanaka. Asi edzurirai kuti Djehovha anokoshesa maningi zviya zvamunomuitira. Kuseenzesa upenyu kuti museenzere Baba edu ano rudo Djehovha, icisananguro cakanaka camungakwanisa kuita uye apana ciro cakanaka cinodarika kuita izvona.