YOMARA no hama dzake mbiri—Marcelo na Hiver—anogara kumutanha we ku Guatemala. Yomara wakatanga kufunda Bhaibheri no Apupuri a Djehovha, uye pakupedzisera, hama dzake dzakatangawo kufunda. Asi painga pano cinetso. Hama dzake nhatu mapofu uye ainga asikakwanisi kuerenga ci Braille. Ngekudaro hama yaiitisa fundo yaierenga mandima no mavhersikuro e Bhaibheri mu fundo imwe na imwe.

Kuenda ku misangano cainga ciri cinetso kaari. Awona ega ainga asikazokwanisi kuita rhwendo re miseswa 40 kuenda ku Nyumba ye Umambo yainga iri padhuze. Asi hama dzaiyabetsera kuti apinde misangano yese. Paakatanga kuita matii awo pa misangano, hama dzakaabetsera kuti matii awo agare mu musoro.

Mu mwedzi wa Mayo wa 2019, misangano yakatanga kuizwa mu mutanha maaigara. Mu nguwa iyona, kazado imweni ye mapionero e nguwa dzese akaenda koogara ikona. Awona akagara no cinangwa cekubetsera hama idzi nhatu kufundira kuerenga nokutara ci Braille, asi kazado ii yainga isikazii ci Braille. Hino, awona akaenda ku bhibhirioteka koofundira ci Braille uye akafunda mushobo wekufundisawo amweni.

Mumwedzi minganani yakazoteera, hama nhatu idzi dzainga dzaakutokwanisa kunyasa kuerenga ci Braille uye izvona zvakaabetsera kuti abudirire pakunamata. a Zvino Yomara, Marcelo, na Hiver aamapionero e nguwa dzese. Marcelo waa mubati anoseenzera. Awona anobatikana pa zviro zvinocokuita nokunamata pa ma sumana ese. Mupfaro wawo unobata-bata anhu akawanda.

Hama nhatu idzi dzinotenda maningi rubetso raari kupaswa no ungano. Yomara unoti: “Kubvira patakaziya Apupuri a Djehovha aona ari kutipangidzira rudo re ciKristu.” Marcelo unotunhudzira eciti: “Isusu tino shamwari dzinoshamisa mu ungano uye tingakwanisa kubhuya kuti tiri dii re mhuri ye nyika yakabatana nge rudo.” Yomara no hama dzake ari kuda maningi kuona zuwa ricacinja nyika kuti igare paraizo.—Pis. 37:10, 11; Isa. 35:5.