1. Ngei mecitenda Bhaibheri?

 ISUSU tinotenda maningi Mwari wedu Djehovha ngekutipasa Bhaibheri! Nge ndaa ye Bhaibheri, tinokwanisa kurarama kunyazi no zvinetso zvatinosongana nazvo nyamasi uno. Uye irona rinotipasa kariro yakanaka ye ramangwana. Djehovha anoseenzesa Bhaibheri kuti atifundise zvakawanda nge zvake. Kunyasa kurangarira ngezve unhu wa Djehovha kunobaya mwoyo yedu uye kunotiitisa kuti tide kukhwedera dhuze naye.—Pis. 25:14.

2. Djehovha akaseenzesei kuti abetsere anhu kumuziya?

² Djehovha anoda kuti anhu amuziye. Mu nguwa dze kare, iyena akaseenzesa hope, zviono uye ngirozi kuti abetsere anhu kumuziya. (Num. 12:6; Zvii. 10:3, 4) Asi zvaizoshupha kufunda ngezve hope, zviono uye masoko e ngirozi kudai asikazi kutarhwa. Ndiyo ndaa iyena akafundisa anarume aya kuti “atare zviya zvaaida” kuti isusu tizviziye. (Djer. 30:2) Tingagonda hedu kuti mushobo wakasanangurhwa na Djehovha wekureketa na isusu wakanaka maningi uye unobetsera ngekuti “gwanza ra Mwari wedu rakakwana.”—Pis. 18:30.

3. Djehovha akaitei kuti Bhaibheri ricengetedzwe? (Isaya 40:8)

³ Erengai Isaya 40:8. Soko ra Mwari ririkubetsera anarume no anakadzi akagondeka ke makore akawanda. Asi izvona zvirikuitika kudini? Bhaibheri rakatarhwa ke makore akawanda adarika pa zviro zvisikazi kubamba, ndiyo ndaa mipumburu yakatarhweyo akucina mazuwa ano. Asi Djehovha akaita kuti paizwe makopiya. Izvirokwazvo kuti aikopiyariwo ainga asikazi kukwana, asi awona ainyasa kungwarira paaigadzira makopiyewo. Ngezve Matarhwa e Cihebheru, muzii umweni wakatara  kuti: “Tingabhuya no rugondo kuti akuna matarhwa e kare akanyasa kutarhwa hinga aya.” Izvirokwazvo kuti Bhaibheri rakatarhwa kare pa zviro zvainga zvisikazi kubamba, uye kuti makopiyewo akaizwa nge anhu asikazi kukwana, asi tingagonda kuti masoko atinoerenga mu Bhaibheri redu nyamasi uno anobhuya ngezve marangariro e Muridzi waro, Djehovha.

4. Ticaonei mu fundo ino?

⁴ Djehovha ndiyena Manyuku e “zviro zvese zvakanaka uye zvipo zvese zvakakwana.” (Tig. 1:17) Bhaibheri ndicimwe ce cipo cakanaka maningi catakapaswa na Djehovha. Zvinoita kuti tiziye kuti munhuwo unonyasa kutiziya uye unoziya zvatinoda nge mushobo we cipo caanonga atipasa. Ndizvo zvimwezvoo no uya Akatipasa Bhaibheri. Irona rinotifundisa zvakawanda ngezva Djehovha. Nge ndaa yaro, isusu tinokwanisa kuona kuti ayena anotiziya uye kuti anoziya zvatinoda. Mu fundo ino ticaona kuti Bhaibheri rinotifundisei ngezve mawara matatu a Djehovha: uzii wake, unatsi, uye rudo. Ngatitange ngekuona kuti Bhaibheri rinopangidza kudini uzii wa Mwari.

5. Bhaibheri rinopangidza uzii wa Mwari nge mushobo upi?

⁵ Djehovha unoziya kuti tinoda maningi mazano ake ano uzii. Uye cipo ce Bhaibheri cakadzara no uzii wake. Bhaibheri rino simba rekucinja upenyu we anhu. Bhuku rekutanga parakatanga kutarhwa, Mozesi wakabvunza Aisraeri kuti: “Iri asokopi ramakandobvunzwawo basi, asi rinomuponesai.” (Dhe. 32:47) Munhu unotondowedza zvinorekethwa no Bhaibheri ungabudirira uye ungagara no upenyu unopfadza. (Pis. 1:2, 3) Kunyazi Bhaibheri rakatarhwa kare, irona ricino simba rekucinja upenyu we anhu. Ngo muezaniso, mu jw.org, padii rakazwi: “Bhaibheri Rinochinja Upenyu,” mungaona zviro zvakaitika kamare mu upenyu we anhu anodarika 50 akaita cinjo mu upenyu wawo ngekuti ‘akatanga kuseenzesa’ zvaaifunda mu Bhaibheri.—1 Ate. 2:13.

6. Ngei tingabhuya kuti akuna bhuku rakaezana no Bhaibheri?

⁶ Akuna bhuku ringaezaniswa no Soko ra Mwari. Ngei? Ngekuti Muridzi waro ndi Djehovha, iyena ngewe masimba ese nokusikaperi uye ano uzii kupinda zviro zvese. Mabhuku amweni anogara maningi kudarika aridzi awo, asi nokuhamba ke nguwa mazano ari mu mabhuku awona anonga asikacabetseri. Asi zvokwadi zvisikacinji zve Bhaibheri zvinogara nokusikaperi uye izvona zvirikubetsera anhu ke makore akawanda. Patinoerenga bhuku iri cena uye tonyasa kurangarira zviya zvatiri kufunda, Djehovha anoseenzesa mwiya wake mucena kuti utibetsere kuona kuti tingaseenzesa kudini mazano ari mu Bhaibheri mu upenyu wedu. (Pis. 119:27; Mara. 3:16; Aheb. 4:12) Zvezvirokwazvo, Muridzi we Bhaibheri, unoda maningi kumubetserai. Uye izvona zvinotiitisa kuti tide kuerenga Bhaibheri mazuwa ese!

7. Bhaibheri rakabatanidza kudini anhu a Mwari mu nguwa yo kare?

⁷ Ciripo cimwenizve cinopangidza kuti Bhaibheri rino uzii wa Mwari. Irona rinobetsera anhu a Mwari kuti arumbwe akabatana. Aisraeri paakapinda mu Nyika Yakapikirhwa, awona akaenda ku mbuto dzakasiyana-siyana. Amweni ainga ari aedzi e howe, amweni ainga ecipfuya zvipfuyo, uye amweni airima zviro zvakasiyana-siyana. Zvaizoita nyore kuti Aisraeri aigara ku mbuto imweni asashamwaridzane no Aisraeri aigara ku mbuto imweni yo nyika. Asi Djehovha akabhuya kuti aona  aidikana kuti aungane kuti azwe kuerengwa nokupanganidzwa ke Soko rake. (Dhe. 31:10-13; Nee. 8:2, 8, 18) Cimborangarirai kuti Muisraeri waizwa kudini paaiguma ku Djerusarema pa ciitiko ici, pamweni oona mamiriyonji e anamati a Djehovha ecibva ku matii amweni e nyika! Nge ndaa yazvo, Djehovha akabetsera anhu ake kuti arumbwe akabatana. Nokuhamba ke nguwa, ungano ye Cikristu peyakatangwa, mu ungano mainga muno anhu aireketa mireketero yakasiyana-siyana, uye amweni ainga akapfuma uye amweni ainga ari arombo. Asi awona ese aida maningi Matarhwa uye izvona zvakaabatanidza pakunamata Mwari wawo we zvirokwazvo. Aya aigara Akristu aikwanisa kuzwisisa Soko ra Mwari no rubetso re anhu a Mwari uye ngekuungana nawo.—Zvii. 2:42; 8:30, 31.

8. Bhaibheri rinobetsera kudini anhu a Djehovha kuti arumbwe akabatana mazuwa ano?

⁸ Djehovha anoseenzesa Bhaibheri kuti afundise anhu ake uye kuti arumbwe akabatana. Bhaibheri rinotibvunza cokwadi cese catinodikana kuziya cakaringana na Djehovha. Isusu tinoungana nguwa dzese ku nyumba ye umambo, uye ku nyumba dze magungano kuti tifundiswe zvinobva mu Bhaibheri. Ndiyo ndaa tingabhuya kuti Bhaibheri ndiwona mushobo wakanaka unoseenzeswa na Djehovha kuti anamati ake “amuseenzere akabatana.”—Zef. 3:9.

9. Iwara ripi rinodikanwa kuti tizwisise tsamba dze Bhaibheri? (Ruka 10:21)

⁹ Onai ciro cimweni cinopangidza uzii wa Djehovha. Matii akawanda e Bhaibheri, akatarhwa nge mushobo wekuti anhu anodzidodosa ndiwona anokwanisa kuzwisisa. (Erengai Ruka 10:21.) Anhu e ku mbuto dzese angaerenga Bhaibheri. Asi muzii umweni wakati Bhaibheri “aibhukupi rinoerengwa no akawanda basi, asi rinoerengwawo nokungwarira kupinda mabhuku amweni ese.” Asi aya anodzidodosa angakwanisa kuzwisisa uye kuseenzesa zvinorekethwa no Bhaibheri.—2 Ako. 3:15, 16.

10. Bhaibheri rinopangidza mushobo upizve umweni ngezve uzii wa Djehovha?

¹⁰ Bhaibheri rinotifundisa ngezve uzii wa Djehovha nge mushobo umweni. Djehovha aandoseenzesi basi Bhaibheri kuti atifundise hinga cikwata, asi kuti afundise uye kunyaradza umwe na umwe wedu. Pamunoerenga Bhaibheri mungakwanisa kuona kuti Djehovha anomukoshesai zvakadini. (Isa. 30:21) Pamakasongana no matambudziko, kangana kamakaerenga Bhaibheri uye mobhuya kuti tsamba ii yakatarirhwa inini kamare? Ngekudaro, Bhaibheri rinobaya mwoyo ye mamiriyonji e anhu. Hino zvingaitika kudini kuti Bhaibheri rigare no masoko anonyasa kupindirana kamare no zviya zvamunoda? Izvona zvinoitika ngekuti Muridzi we Bhaibheri uno uzii nokusikaperi.—2 Ti. 3:16, 17.

11. Djehovha akapangidza kudini kuti aasananguri Bhaibheri paraitarhwa?

¹¹ Wara rimwenizve ra Djehovha ndi unatsi. (Dhe. 32:4) Unatsi unobatanidzwa no wara rekusama kusanangura, uye Djehovha aasananguri. (Zvii. 10:34, 35; Aro. 2:11) Isusu tinozwisisa kusama kusanangura ka Djehovha nge mireketero yakaseenzeswa pakutara Bhaibheri. Ngo muezaniso, mabhuku 39 ekutanga e Bhaibheri akatarhwa mu Cihebheru, mureketero wairekethwa no anhu a Djehovha mu nguwa iyona. Asi mu nguwa ye Akristu ekutanga K.A., mureketero we Cigrego ndiwona wainyanya kurekethwa. Ndiyo ndaa, mabhuku 27 ekupedzesera e Bhaibheri akazotarhwa mu mureketero iwona. Djehovha aazi kuseenzesa mureketero umwe basi kuti Bhaibheri ritarhwe. Mazuwa ano, anhu anokwana mabhiriyonji 8 mu nyika yese, anoreketa mureketero dzakasiya-siyana. Hino, anhu akawanda kudai aizofunda kudini ngezva Djehovha?

12. Dhanyeri 12:4 yakadzadzika nge mushobo upizve mazuwa ano?

¹² Pa uphorofita wa Dhanyeri tinoerenga kuti Djehovha akapikira kuti mu mazuwa ekupedzesera “ruziyo re zvirokwazvo” ratinogumira mu Bhaibheri “raizowanda.” Kana kuti anhu akawanda aizorizwisisa. (Erengai Dhanyeri 12:4.) Umwe we mushobo urikudzadzika uphorofita iwona mazuwa ano ngewekuoneka Bhaibheri no mabhuku anotsamira mu Bhaibheri. Mazuwa ano Bhaibheri ndirona bhuku riri kuturikirhwa uye kukowaniswa mu nyika. Asi turikiro dze Bhaibheri dzinoizwa no maempreza dzinodhura maningi. Asi nge dii rimweni anhu a Djehovha akaturikira Soko ra Mwari mu mireketero inodarika 240, uye munhu wese ungaona Bhaibheri asikaripi ciro. Mugumisiro wakhona ngewe kuti anhu e madzinza ese arikutenda “masoko akanaka e Umambo” mugumo usati wauya. (Mat. 24:14) Mwari wedu uno unatsi unoda kuti munhu wese agare no mukana wekumuziya nge kuerenga Soko rake. Djehovha akaita izvona ngekuti anotida maningi.

13. Ngei tingabhuya kuti Bhaibheri rinopangidza kuti Mwari anotida? (Juau 21:25)

¹³ Bhaibheri rinotibetsera kuzwisisa wara guru ra Djehovha—rudo. (1 Juau 4:8) Izvi zvinooneka patinoona masoko akasanangurhwa ndi Djehovha kuti akandhwe mu Bhaibheri no masoko aasikazi kusanangura. Bhaibheri rinonyasa kupangidza zviya zvatinodikana kuita kuti tigare no ushamwari na Djehovha, kuti tigare no upenyu unopfadza zvino uye kuti tigare no upenyu usikaperi. Asi ngekuti anotida, Djehovha aazi kutiremesera no zviro zvakawanda pa zviya zvatinodikana kuita kuti timuseenzere.—Erengai Juau 21:25.

14. Ciro cipi cimwenizve catinogumira mu Bhaibheri cinopangidza kuti Djehovha anotida?

¹⁴ Mushobo wakatarhwa Bhaibheri unopangidza kuti Djehovha anotida. Tiri kubhuya kudaro ngekuti Bhaibheri aritipasi mundandanda we zviro zvatinodikana kuita recionerera kaciro kadoko-doko katinoita mu upenyu wedu. Pane kudaro, Djehovha anotibetsera kuti tinyase kurangarira eciseenzesa ngano dzakaitika mu upenyu kamare, uphorofiti unoshamisa, uye mazano anobetsera. Ngekudaro, Soko rake rinotiitisa kuti timude uye timuteerere zvecibva pa mwoyo.

15. (a) Bhaibheri rinopangidza kudini kuti Djehovha anotikoshesa? (b) Pa mufanikiso, miezaniso dzipi dze mu Bhaibheri dzirikunyasa kurangarirhwa no kamusikana, djaha, uye hanzvadzi yakura? (Gen. 39:1, 10-12; 2 Mad. 5:1-3; Ruka 2:25-38)

¹⁵ Bhaibheri rinopangidza kuti Djehovha anotikoshesa. Ngei tecibhuya kudaro? Bhaibheri, Soko rake rakadzara no ngano dzinopangidza mazwiro e anhu. Tingakwanisa kuzwisisa anhu anorekethwa mu Bhaibheri ngekuti  awona ainga ari anhu “ano mazwiro akaezana no edu.” (Tig. 5:17) Cinonyanya kukosha kupinda izvona, ngecekuti patinoona mabatire aaita anhu ano mazwiro akaezana no edu, tinokwanisa kunyasa kuzwisisa kuti “Djehovha ano usisi wakakura uye ano nyasha.”—Tig. 5:11.

16. Tinofundei ngezva Djehovha patinoerenga mu Bhaibheri ngezve anhu akaita zvishaishi? (Isaya 55:7)

¹⁶ Bhaibheri rinopangidza rudo ra Djehovha katiri ngo mushobo umweni. Bhaibheri rinotigondesa kuti Mwari aambotisii paya patinoita cishaishi. Aisraeri akashaishira Djehovha kakawanda maningi, asi kunyazi zvakadaro awona paakacinyuka zvezvirokwazvo, Djehovha akaarekerera. (Erengai Isaya 55:7.) Akristu ekutanga aitoziyawo kuti Djehovha aiyada maningi. Djehovha akafemera muphostori Pauro kuti akohomedzese hama no hanzvadzi kuti “arekerere uye abambise” mwanarume wainga aita citema cakakura, asi wainga acinyuka. (2 Ako. 2:6, 7; 1 Ako. 5:1-5) Zvinoshamisa kuti Djehovha aazi kuramba aseenzi ake ngekuti ainga aita zvitema! Pane kudaro, ecizviita no rudo, ayena akaabetsera, akaasumurura, uye akaatendera kuti agarezve shamwari dzake. Djehovha anogondesa kuitawo zvimwezvo mazuwa ano ku aya anonga aita cishaishi asi ocinyuka.—Tig. 4:8-10.

17. Ngei Bhaibheri cipo cakanaka maningi?

¹⁷ Djehovha akatipasa cipo cakanaka maningi. Ngei Bhaibheri recikosha maningi? Hingana zvataona, Bhaibheri rinopangidza kuti Mwari ano uzii, ano unatsi uye ano rudo. Bhuku iri rinopangidza kuti Djehovha anoda kuti timuziye. Iyena anoda kuti tigare shamwari dzake.

18. Tingapangidza kudini kuti tinokoshesa Bhaibheri “cipo cakanaka” catakapaswa na Djehovha?

¹⁸ Isusu atidi kusiya kutenda “cipo ici cakanaka” ce Soko ra Mwari. (Tig. 1:17) Ngekudaro, ngatirumbwe tecirikoshesa. Tingaita izvona ngekuerenga soko iri cena uye kunyasa kurangarira nge zvaro. Ngekuita kudaro, tingagara norugondo rekuti Djehovha Muridzi we Bhaibheri acakomborera kupeta kedu masimba uye isusu “ticakwanisa kuona uzii wa Mwari.”—Zvie. 2:5.