1. Upenyu wedu unokosha zvakadini kuna Djehovha?

 CIMBORANGARIRAI kuti shamwari yenyu yamupasa cipo ce kwadru ye arte inokosha maningi. Asi icona cakakwengeka-kwengeka, cakakuwadzika padoko, uye kunyazi zvakadaro, kwadru iyona inodhura maningi. Zviri pamhene kuti taizoita zviri zvese kuti ticengetedze kwadru iyona. Ngo mushobo umwewo, Djehovha akatipasa cipo cinokosha maningi, upenyu. Kubhuya zvazviri, Djehovha anokoshesa maningi upenyu wedu ngekupasa kaakaita Mwana wake hinga rusudzunuro nge ndaa yedu.—Juau 3:16.

2. Maererano na 2 Akorinti 7:1, Djehovha anoetserei ku umwe na umwe wedu?

² Djehovha ndi Manyuku e upenyu. (Pis. 36:9) Muphostori Pauro wakatendera cokwadi ici paakati: “Nge ndaa yake tino upenyu, tinohamba uye tiripo.” (Zvii. 17:25, 28) Ndiyo ndaa tingabhuya kuti upenyu wedu i cipo cakabva kuna Mwari. Djehovha anotida, ndiyo ndaa anotipasa zvese zvatinoda kuti tirumbwe tecirarama. (Zvii. 14:15-17) Asi mazuwa ano, Djehovha aaiti cishamiso kuti tirumbwe tecirarama. Pano kudaro, iyena anoetsera kuti umwe na umwe wedu apete masimba kuti acengetedze upenyu wake we kunyama uye we kumwiya. (Erengai 2 Akorinti 7:1.) Ngei tecidikana kucengetedza upenyu wedu no uthongo wedu, uye tingazviita kudini?

3. Zvikonzero zvipi zvatinazvo zvekuti ticengetedze upenyu?

³ Tino zvikonzero zvakawanda zvekuti tipete masimba kuti tigare no uthongo wakanaka. (Mark. 12:30) Cimwe ce zvikonzero izvi ngecekupasa “muiri wedu hinga cibairo cipenyu uye cicena cinotambirhwa na Mwari.” Ndiyo ndaa atidikani kuita zviro zvatinoziya kuti zvicakuwadza uthongo wedu. (Aro.  12:1) Zviri pamhene kuti nguwa dzimweni, kunyazi nokupeta masimba katinoita, tinokwanisa kurhwara. Asi tinodikana kuita zvese zvatinokwanisa kuti tigare no uthongo wakanaka. Ngekudaro, ticapangidza Baba edu ekudenga kuti tinokoshesa cipo ce upenyu.

4. Mambo Dhavhidhi waida kuitei?

⁴ Mambo Dhavhidhi wakapanganidza kuti ngei waiona upenyu hingana cipo cinobva kuna Mwari. Iyena wakatara kuti: “Zvinobetserei kuti ndife? Guwa ringamukudza here? Ringareketa ngezve kugondeka kenyu here?” (Pis. 30:9) Pamweni Dhavhidhi wakatara masoko aya paainga aadhuze kuda kufa. Kunyazi zvakadaro, iyena wainga akashinga kurumbwa ecirarama uye ano uthongo wakanaka kuti arumbwe eciseenzera Djehovha. Apana mubvunzo kuti isusu tese tinoda kuitawo zvimwezvo.

5. Tese isusu tingaitei pasinei no thunga redu uye uthongo wedu?

⁵ Zvingaitika kuti nge ndaa ye kurhwara kana kuti thunga redu, tingakonerhwa kuita zviro zvataiita kare. Izvona zvingaita kuti tigare takavhiringidzika uye takatsukwara. Kunyazi zvakadaro, isusu atidikani kusiya kucengetedza uthongo wedu. Ngei? Ngekuti isusu tingakudza Djehovha hingana zvaiizwa na Mambo Dhavhidhi pasinei no thunga redu kana kuti zvakaita uthongo wedu. Zvinotinyaradza maningi patinoona kuti Mwari anotikoshesa kunyazi tiri anhu asikazi kukwana! (Mat. 10:29-31) Uye kunyazi tikafa, Djehovha acazoda maningi kutimutsa. (Djobo 14:14, 15) Tinoda kuita no patinokwanisa napo kucengetedza upenyu wedu ticitori apenyu kudai.

6. Djehovha anoetserei ku umwe na umwe wedu panyaya ye zvekurhya uye kumwa doro?

⁶ Bhaibheri aibhukupi rino zvimitemo zvinobhuya ngezve uthongo wedu uye zvatinodikana kurhya, asi irona rinobhuya ngezve maonero a Djehovha nge nyaya iyona. Ngo muezaniso, Djehovha anotibvunza kuti tisaseenzese “zviro zvinokuwadza” uthongo wedu uye muiri wedu. (Mup. 11:10) Bhaibheri rinotibvunza kuti atidikani kuita zviro zvimweni zvinokanda upenyu wedu pa ngozi, zvakaita hingana kurhya maningi, uye kumwisa doro. (Zvie. 23:20) Djehovha anoetsera ku munhu umwe na umwe kuti agare no maonero ari pakati no pakati pa zviro zvaacarhya uye zvaacamwa.—1 Ako. 6:12; 9:25.

7. Zvierengo 2:11 inotibetsera kudini kuti tiite zvisananguro zvakanaka ngezve uthongo wedu?

⁷ Tingakwanisa kuita zvisananguro zvakanaka zvinopangidza kuti tinokoshesa upenyu. Nge kurangarira teciseenzesa ndangariro dzedu. (Pis. 119:99, 100; erengai Zvierengo 2:11.) Ngo muezaniso, ticanyasa kurangarira ngezve zviro zvaticada kurhya. Kana isusu tecipfarira zvekurhya zvimweni teciziya kuti azvipindirani no muiri wedu, zviri nani kutama kuzvirhya. Isusu tinopangidzawo kuti tino uzii ngekunyasa kuwata nguwa inodiikanwa, ngekugara teciita maezersisiyo, nge kudzicenesa isusu pacedu, uye nge kugara no nyumba yakacena.

8. Djehovha ano maonero api akaringana no kucengeteka?

⁸ Djehovha akapasa Aisraeri Mutemo waizoadziirira ari pa nyumba uye kubasa. (Eki. 21:28, 29; Dhe. 22:8) Kunyazi munhu waiuraya umweni wake nge tsaona, paizomuka zvinetso. (Dhe. 19:4, 5) Mutemo waibhuya kuti kunyazi kana munhu asikadi akaita ciro cinokuwadza mwana unonga ari mundani ma mai ake, waidikana kuphanicwa. (Eki. 21:22, 23) Bhaibheri rinopangidza kuti Djehovha anoda kuti tikoshese kucengeteka kedu.

9. Tinodikana kuitei kuti tisaite tsaona? (Onai mifanikiso.)

 ⁹ Isusu tinopangidza kuti tinokoshesa cipo ce upenyu catakapaswa na Mwari ngekuita zviro zvinoita kuti tigare takacengeteka tiri pa nyumba uye ku basa. Ngo muezaniso, kana tecida kupsveta zviro zvinoceka, maprodutu kimiko ano vheneno, uye mitombo, isusu tinozviita nge mushobo usikazokuwadzi amweni, uye tinoita zviri zvese kuti ana adoko asazvigumire. Isusu tinongwarirawo patinoseenzesa muriro, zviro zvinopisa, uye maferamenta e magetsi, uye tinongwarira kuti tisasiye zviro izvona pasina munhu unozvionerera. Atitekenyi karu mumasure mekumwa mutombo kana doro, kana kuti patinonga tecizwa maningi hope, uye atiseenzesiwo thurufunu patinonga tecitekenya.

10. Tinodikana kuitei tsaona isati yaitika uye yaakuitika?

¹⁰ Nguwa dzimweni atikwanisi kuita kuti zviro zvakashata zvisaitike. Ngo muezaniso atikwanisi kuonerera tsaona dzinoitika dzega, matenda, uye kurhwisana kecisimba. Asi pano zvatingaita kuti tidzicengetedze paya panoitika  tsaona dzakadai. Isusu tinoteerera zvinorekethwa no anyautongi ngezve kubuda mu mbuto dzino ngozi uye nhungamiriro dzimweni dzaangatipasa. (Aro. 13:1, 5-7) Nguwa dzimweni, zvinokwanisika kuziya ngezve tsaona dzimweni dzicaitika. Mu migariro yakadai, tinodikana kuteerera nhungamiriro dzatinopaswa nge anyautongi e mu nharaunda medu kuti tigadzirire. Ngo muezaniso, pamweni zviri nani kugara no zvigarafa zve mvura, zvekurhya zvisikakasiki kuora uye cipasta cinogara no zviro zvaticazoda kuseenzesa.

11. Tinodikana kuitei kana kukaitika nhenda inobararika nokukasika?

¹¹ Hino zvakadini kana katinogara kukaitika nhenda inobararika nokukasika? Tinodikana kuteerera nhungamiriro dze anyautongi dzakaita hingana kukarawa nyara, kugara takataraukirana no amweni, kupfeka maskara uye kugara mu kwarentena. Patinoita izvona, tinopangidza kuti tinokoshesa cipo ce upenyu catakapaswa na Mwari.

12. Cokwadi cisikacinji ciri pana Zvierengo 14:15 cinotibetsera kudini kuti tiziye masoko atinodikana kutendera tsaona painonga yeciitika?

¹² Tsaona painonga yeciitika zvingaita kuti shamwari dzenyu, anyacigarisano, no internet angabararisa masoko ekunyepa nge zvazvo. Pane kuti mutende “masoko ese-ese” zvakanaka maningi kuti imwimwi muteerere masoko anobva ku mbuto yakagondeka. (Erengai Zvierengo 14:15.) Dare Rinotungamirira uye matare e firiyari mu nyika yese anopeta masimba kuti ateerere nhungamiriro yakagondeka asati aita zvisananguro zvakaringana no misangano uye basa rekuparidzira. (Aheb. 13:17) Patinotondowedza nhungamiriro idzona, tinodzidziirira isusu kamare uye no amweni. Kupinda izvona, tinopasa upupuri wakanaka ngezve sangano redu.—1 Ped. 2:12.

13. Kutondowedza mutemo wa Djehovha wakaringana no ngazi kunopangidza kudini kuti tinokoshesa upenyu?

¹³ Apupuri a Djehovha anoziikanwa nge kutenda kuti ngazi icena. Isusu tinotondowedza mutemo wa Djehovha wakaringana no ngazi ngekuramba kukandhwa ngazi, kunyazi zviri izvona zvinonga zvecidikanwa no mamedhiko pa nguwa iyona. (Zvii. 15:28, 29) Asi izvona azvidi kureya kuti tinoda kufa. Kusiyana nazvo, isusu tinokoshesa maningi cipo ce upenyu catakapaswa na Mwari. Isusu tinopsvaka rubetso re mamedhiko agara no basa akagadzirira kutirapa asikaseenzesi ngazi.

14. Tingathurudza kudini mukana wekuizwa operasau kana kuraphwa kunoshupha?

¹⁴ Kana tikacengetedza zvakanaka uthongo wedu, ticakwanisa kuthurudza mikana yekurapa inoshupha. Kana tikapeta masimba kuti tigare no uthongo wakanaka zvicaita kuti tikasike kutamba mumasure me operasau yatinonga taizwa. Tingathurudzawo ngozi yekuita operasau ngekuita kuti nyumba yedu uye basa redu zvigare zvakacengeteka uye ngekutondowedza mitemo ye mumakwanza.

15. (a) Ngei zvecikosha kuti dhokumento redu rakazwi diretivas antecipadas rigare rakaatuwarizarhwi? (Onai mufanikiso.) (b) Maererano no vhidhiyo, tingaita kudini zvisananguro zvakaringana nokuraphwa pasikaseenzeswi ngazi?

¹⁵ Isusu tinokoshesa upenyu. Ndiyo ndaa takadzadzisa dhokumento rakazwi (diretivas antecipadas) uye atibudi pa nyumba tisina dhokumentoro. b Pa dhokumento tinosiya pamhene zvisananguro zvedu zvekusama kukandwa ngazi uye mishobo imweni yekuraphwa. Dhokumento renyu rakazwi diretivas antecipadas rakaatuwarizarhwi here? Kana imwimwi mecida kudzadzisa dhokumento iri kana  kuriatuwarizari, zviitei nokukasika. Kutara zviro izvi kucatibetsera kuti tisapedze nguwa yakareba tecipanganidza ngezve zvisananguro zvedu kuna medhiko. Uye zvicatidziirirawo kuti tisaraphwe nge mushobo ungakanda uthongo wedu pa ngozi. c

16. Mungaitei kana zvecimushuphira kudzadzisa dhokumento rakazwi diretivas antecipadas?

¹⁶ Kunyazi muciri madjaha uye muno uthongo wakanaka, tese isusu tingasongana no tsaona kana kurhwara pa nguwa yatisikakariri. (Mup. 9:11) Ndiyo ndaa kaizonga kuri kupangidza ungwaru kana isusu tese tikadzadzisa dhokumento rakazwi diretivas antecipadas. Kana zvecimushuphira kudzadzisa dhokumento iri, kumbirai rubetso ku akuru e ungano. Awona angamubetsera kuti muzwisise zvinonga zvecirekethwa no dhokumentoro uye kuti mungaridzadzisa kudini. (Aga. 6:4, 5) Asi awona aamusananguriri marapirhwe amunodikana kuizwa.

17. Tingapangidza kudini kuti tino maonero ari pakati no pakati ngezve uthongo wedu?

¹⁷ Zvisananguro zvakawanda zvatinoita zvakaringana no uthongo wedu uye nokuraphwa zvakawakirhwa pa zviya zvatinofunda mu Bhaibheri. (Zvii. 24:16; 1 Ti. 3:9) Patinoita zvisananguro  uye tocedzawo nge zvazvo no amweni, tinodikana kuedzurira cokwadi ciri pana Afiripi 4:5 inoti: “Kuzwisisa kenyu ngakuziikanwe no anhu ese.” Kana tino maonero ari pakati no pakati atizonyanyi kunetseka ngezve uthongo wedu, uye atizoedziwo kubambidzira amweni kuti aite cisananguro catinonga taita ngezve nyaya iyona. Isusu tinoda uye tinoreremedza hama no hanzvadzi dzedu kunyazi paya paanoita cisananguro cakasiyana no cedu.—Aro. 14:10-12.

18. Tingapangidza kudini kuti tinotenda nge cipo ce upenyu?

¹⁸ Isusu tinopangidza kuti tinotenda Djehovha, Manyuku e upenyu, ngekumupasa zvakanakisisa zvedu uye ngekucengeta zvakanaka cipo caakatipasa. (Zvak. 4:11) Pa nguwa ino tiri kurarama tecibatana no matenda uye tsaona. Asi uu andiwopi upenyu waidiwa no Musiki wedu katiri. Mbai-mbai pano, iyena acatipasa upenyu usikaperi waticazogara tisikarhwadziwi uye tisikafi. (Zvak. 21:4) Dakara zuwa iri raguma, ngatirumbwe tecikoshesa upenyu watakapaswa na Djehovha uye teciseenzera Baba edu ano rudo ekudenga!