Inini ndakatanga kuseka—ngekuti kandiri shamwari yangu yainga isikaiti zvekunamata. Pedzepo inini ndakamubvunzisa kuti: “Iwewe unoziyei ngezve Bhaibheri?” Iyena wakaedza kucinja nyaya. Asi pedzepo, wakazobhuya kuti mai ake Mupupuri wa Djehovha, uye iyena wainga afunda zvinganani na mai ake. Ngekuda kuziya, inini ndakamuita mibvunzo yakawanda.

Takacedza dakara pakati pe usiku. Shamwari yangu yakandibvunza kuti Bhaibheri rinobhuya kuti Sathani ndiye uri kutonga nyika. (Juau 14:30) Pamweni imwimwi mainga mozviziya, asi kandiri izvi zvainga zviri zvipsva kamare. Hino ndakagara no cido cekuda kuziya, inini ndainga ndafunda kuti Mwari ano rudo ndiyena ari kuonerera nyika. Ngekuti inini ndaiona zviro zvakawanda zvakashata zveciitika uye kandiri zvainga zvisina musoro. Inini ndainga ndaano makore 26 uye ndainga ndaona zviro zvaindibata-bata maningi.

Baba angu ainga ari mutekenyi we ndeka ye Anyahondo ku Estados Unidos. Kubvira ndiciri mudoko, inini ndainga ndoozviziya kuti hondo yo mabhomba yaikwanisa kuitika tisikakariri. Hondo yo Vietnã yakaitika pandainga ndiri ku univhersidhadhi ku Califórnia. Inini no adoni angu e ku cikora takatanga kuita bongozozo. Maporisiya ainga ano zvigomba akatanga kutiteera uye takabuda tecigogoma, takabuda tisikakwanisi kuona zvakanaka uye tisikakwanisi kufema zvakanaka nge ndaa ye gaji racrimogenio. Iyi yainga iri nyika inoshupha uye yainga ino apanduki akawanda, anhu akawanda ezvematongerhwo e nyika akauraiwa uye aiita mabongozozo akawanda, munhu wese wainga ano maonero akasiyana. Uye zviro zvese zvaivhiringidza.

Muna 1970, Inini ndakaona basa ku kosta yo kakutsi ku Alasca uye ndakaona mare yakawanda. Pedzepo ndakaenda ku Londres, ndotenga karu yangu, uye ndotanga kuhamba mugwanza pasina kandaienda. Asi ndakazoguma ku África. Pandaiita rhwendoro, ndakasonganawo no anhu amweni akawanda aitiza zvinetso zvaaisongana nazvo.

Pazvese zvandainga ndaona uye ndafunda zvekuti nyika iri kuonererhwa nge munhu wakashata zvainga  zvinomusoro. Hino pa zvese izvi Mwari ainga arikupi? Ndizvona zvandaida kuziya.

Mu mwedzi wakazoteera, inini ndakaona mhinduro. Nokuhamba ke nguwa inini ndakaguma pakuziya uye kuda hama no hanzvadzi dzakawanda dzakarumbwa dzakagondeka kuna Mwari umwe we zvirokwazvo pa mugariro upi hawo.

Pandakahwirira ku Londres, ndakacedza na mai o shamwari yangu iya uye aona akandipasa Bhaibheri. Nokuhamba ke nguwa, pandakaenda ku Amsterdã, hama imweni yainga Mupupuri wa Djehovha yakandiona ndecierenga Bhaibheri mugwanza uye iyona yakadzipira kuti indibetsere kuzwisisa Bhaibheri. Pedzepo, inini ndakaenda ku Dublin, uye ndakaona Bheteri ro kweneyo. Uye ndakagogodza musuwo wo mberi. Ndipona pandakaziya Artur Mateus, hama ino uzii no maeshiperiensiya akawanda. Ndakakumbira fundo yo Bhaibheri uye iyena wakatanga kufunda neni.

Inini ndaikoshesa zvandaifunda uye ndakatanga kuerenga mabhuku ese e sangano. Zviri pamhene kuti inini ndaitoerengawo Bhaibheri. Zvese zvaindidakadza maningi! Pa misangano ye ungano, ndaiwona ana adoko ecidaira mibvunzo dzekuti anarume ano uzii ainga asina mhinduro dze mibvunzo idzona ke makore akawanda: ‘Ngei panyika pano peciitika matambudziko akawanda? Mwari ndiyani? Cinyi cinoitika patinofa?’ Shamwari dzangu dzese dzainga dziri Apupuri a Djehovha ngekuti mu nyikeyo yese apana wandaiziya. Awona akandibetsera kuti ndikhwedere dhuze na Djehovha uye ndimude.

Ndakazobhabhatidzwa muna 1972. Uye mu masure me gore rimwe ndakagara mu pionero, uye ndakatanga kubetsera ungano doko yoku Newry Irlanda do Norte. Inini ndakarugari nyumba ku mbuto isina anhu akawanda dhuze no dunhu. Painga pano n’mbe padhuze pangu uye ndaigadzirira mharidzo yangu ndeciringira n’mbe idzona. Dzaiita hinga dzainyasa kupurutana padzaitsenga asi dzainga dzisikakwanisi kundibvunza paya pandaidikana kugadzirisa. Asi idzona dzakandibetsera maningi kukwanisa kuringisana no apurutani. Muna 1974, ndakagadzwa kuti ndiseenze hinga mu pionero espesiyari pamwepo na hama Nigel Pitt, isusu takagara shamwari tsika ndi tsikewo.

Nge ndaa ye kutama kupindirana ke Irlanda do Norte, “ubvinga” wainga wakawanda maningi. Amweni akatanga kudainza Irlanda do Norte kuti “i nyika ye mabhomba no kuridzwa ke pfuti.” Anhu aifurhwa uye karu dze mabhomba dzaiputika. Nyaya yakhona yainga iri yezvematongerhwo e nyika  uye yo magereja. Asi aya aiita mabongozozo uye no e Katorika aiziya kuti Apupuri a Djehovha aapindiri mu hondo, hino takakwanisa kuparidzira takasudzunuka uye takacengeteka. Aya ataiparidzira ainga aakutoziya zuwa no mbuto yaizoitika zvecisimba izvona, ndiyo ndaa aitotiziisa paciino nguwa.

Asi zviro zvimweni zvakashupha maningi. Zuwa rimweni, inini no mupionero umweni unozwi Denis Carrigan, taiparidzira thaundi rimweni rainga riri padhuze nesu rainga risina Apupuri a Djehovha uye isusu tainga takaparidzireyo kamwe basi. Mwanakadzi umweni wakatipumha kuti isusu tainga tiri masurudado eku bhritaniko ainyepedzera kuparidzira, uye pamweni mwanakadziwo wakabhuya izvona ngekuti apana na umwe wedu waireketa no sotaki ye ci irlandês. Izvi zvakatityisa maningi. Ngekuti kugara basi munhu wakanaka zvaiita kuti uuraiwe kana kufurhwa mumabvi. Patainga teciimira shapa tiri tega uye kecitonhora, takaona karu yakaima panorhyirhwa patakapumhwa no mwanakadzi wiya. Iyena wakabuda kunza woreketa no mutekenyi wo karuyo ecitipangidzira. Mutekenyiwo wakatanga kuhambisa karu padoko-padoko dakara patainga tiri, wakatanga kuita mubvunzo ngezve nguwa yo karuyo. Payakaguma shapa awona akatanga kureketa no mutekenyi wo shapeyo, asi isusu tainga tisikakwanisi kuzwa zvaibhuiwa. Mainga musina munhu mu shapemo, hino takarangarira kuti aipangana kutiuraya kunza ke thaundi. Asi izvona azvizi kuitika. Patakacita mu shapa, inini ndakabvunzisa mutekenyiwo kuti: “Anarume aya zviripo zvaaida kuziya ngezvedu?” Mutekenyiwo wakati: “Inini ndinoziya kuti imwimwi ndimwi ani. Iyena wakatizve musanetseke. Inini ndinoziya kuti imwimwi makacengeteka.”

Muna 1976 pa gungano re dhistrito a mu Dublin, inini ndakaziya Paulina Lomax, mupionera espesiari wainga abva ku Inglaterra. Iyona yainga iri hanzvadzi inodzidodosa, yakakura pane zvekunamata uye ino rudo, iyena no hama yake Ray, akaziya cokwadi kubvira aciri ana adoko. Mu masure me gore rimwe, inini na Paulina takacata uye takarumbwa teciita basa redu ro upionero espesiyari ku Ballymena, Irlanda do Norte.

Isusu takaseenza hinga muonereri we nharaunda kecinguwa teciseenzera hama ku Belfast, Londonderry, uye ku mbuto dzimweni dzinothyisa. Isusu takabambiswa maningi nge kutenda kainga kuno hama, akasiya fundiso dze magereja uye rusananguro no uzondi, zvese izvi kuti aseenzere Djehovha. Uye iyena wakaadziirira uye wakaakomborera maningi!

Inini ndakagara mu Irlanda ke makore 10. Asi pedzepo muna 1981 takapikwa kuti tiite kurso ye cikora ce Giriyadhi turma 72. Patakapedza ku gradhuwarhwi takaenda ku África Ocidental.

Isusu taigara panyumba yo mamisionariyo no anhu anokwana kuita 11 ainga akanaka. Hino taidikana kusiirana mbuto yokubikira, mbuto nhatu dzekusambira, mashuvhero mairi, no thurufunu imwe, mucini umwe we kuphadza, uye no umwe wokuomesa. Kakawanda kakhona kainga kusina magetsi. Makonzo aibora nyumba uye nyoka dzaipinda mu muparo.

Mugariro wakhona wainga usikazi kunyasa kunaka, asi basa rekuparidzira raidakadza. Anhu aireremedza masoko e mu Bhaibheri uye ainyasa kuapurutana. Anhu akawanda akatanga kutenda kuparidzirhwa uye akatanga kufunda Bhaibheri. Anhu e mu nharaundemo akatanga kundidainza kuti: “Aroberto.” Uye mukadzi wangu Paulina waitodaidzwawo kuti: “Aroberta.” Asi no kuhamba ke nguwa inini ndakazogara ku Bheteri ke nguwa yakareba  uye ndainga ndisina nguwa yakawanda ye kuparidzira. Ngokudaro, anhu akazopedzesera aakudainza Paulina kuti: “Apaulina.” Uye inini ndakagara: “Apaulino.” Paulina wakapfarira maningi izvona!

Hama dzakawanda dzainga dziri arombo uye Djehovha aidzipasa zvekudziriritira nazvo uye nguwa dzimweni nge mushobo unoshamisa. (Mat. 6:33) Inini ndicirikuedzurira hanzvadzi imweni yainga ino mare yaikwana kutenga zvokurhya no ana ayo zve zuwa irona basi. Asi iyona yakakwanisa kudusa mare yaainga anayo kuti ibetsere hama yaida mutombo we marariya. Asi pazuwa rimwero, asikakariri pakaguma mwanakadzi wakaipasa mare kuti igadzirise tsitsi rayo. Zviro izvi zvakaitika kakawanda.

Takagara ku Serra Leoa ke makore anokwana 9. Pedzepo takazocinjwa toenda ku Bheteri re ku Nigéria. Pari zvino tiri ku Bheteri rakakura maningi. Basa rangu rainga rakatodzana no randaiita ku Serra Leoa, asi ku mukadzi wangu Paulina, zviro zvakacinja maningi. Kareko iyena waipedza nguwa dzinokwana 130 mu basa rekuparidzira pa mwedzi, uye wainga uno fundo dzakawanda dze Bhaibheri dzaibudirira. Asi zvino iyena wainga acinjwa kuti aite basa rekusona macira. Zvakatora nguwa yakawanda kuti adjairane nazvo. Zvakamubetsera, kuziya kuti anhu akawanda aikoshesa zvaaita uye iyena wainga ano mukana we kubambisa Mabheterita doni ake.

Tsika ye ku Nigéria yainga iri ipsva katiri, painga pano zvakawanda zvataidikana kufundira. Zuwa rimweni, hama imweni yakauya mandaiseenzera uye yakandipangidza hanzvadzi yainga yabva kuguma pa Bheteri. Pandakaicungamidza, iyona yakagodama, yohwarara mberi kangu. Izvi zvakandibata-bata maningi! Matarhwa mairi akauya mundangariro mangu: Zviito 10:25, 26 uye Zvakapangidzwa 19:10. Ndakarangarira kuti: ‘Ndinodikana kuibvunza kuti isaite izvona?’ Asi pa nguwa imweyo inini ndakarangarirazve kuti iyona yakatenderhwa kuti iuye pa Bheteri, uye inonyasa kuziya zvinofundiswa no Bhaibheri.

Inini ndakapererhwa, uye ndakagara ndisikacazii cokuita, pedzepo ndakaenda kookwarakwatisa. Ndakafunda kuti hanzvadzi ii yaiita izvi maererano no tsika dze mutanha dze nyika iyona. Kunyazi anarume ainga atorinadzoo tsika idzona dze kuhwarara. Uu wainga uri mushobo we kureremedza haiwa kunamata munhu. Tino muezaniso wakadaro mu Bhaibheri. (1 Sam. 24:8) Ndakapfara maningi kuti  nge kutama kuziya zvakawanda ngezve tsika ye hanzvadzi ii andizi kureketa zviro zvekuti zvaizoipsverusa.

Isusu takaziya hama dzakawanda dze ku Nigéria, zvekuti ke makore akawanda awona akapangidza kutenda kakakura kuna Djehovha. Muezaniso umweni wakhona ngewe we hama Isaiah Adagbona. b Iyona yakafunda cokwadi payainga iciri mudjaha, asi pedzepo yakazobathwa no mapere. Iyona yakazoendeswa ku mbuto yairaphwa anhu ano mapere, uye ndiyo yega yainga iri Mupupuri wa Djehovha. Kunyazi no kuphikiswa, Isaiah wakabetsera anhu anodarika 30 kuti atende cokwadi uye wakatanga ungano ku colônia.

Muna 1996 takaendeswa ku Bheteri ro Quênia. Iri rainga riri rhwendo rangu rekutanga kwenda ku nyika yangu, kubva paya pandakabuda ndisati ndaa Mukristu. Pakati pe anhu aiuya kootivhakacira paisouyawo no matede. Matedewo “aibvukira” micero dzainga dzakathwarhwa no hanzvadzi. Zuwa rimweni, Mubheterita umweni wakasiya janera ro kwartu rakafununguka. Paakahwirira, wakagumira matede akawanda ari mu kwartu, ecirhya zvekurhya zvaainga asiya. Iyena wakakhuwa uye wakabuda ecigogoma ngo pa musuwo. Matedewo akakhuwawo uye otiza ngo pa janera.

Inini na Paulina takaenda koobetsera ungano ye ci Suaíli. Mu nguwa doko, ndakagadzwa kuti ndiitise Fundo ye Bhuku ye Ungano (zvino yaakuziikanwa hinga Fundo ye Bhaibheri ye Ungano). Asi inini ndaireketa ci Suaíli hinga cimwana cidoko. Inini ndainyasa kugadzirira kuti ndizokwanise kuita mibvunzo. Asi kana hama ikapasa mhinduro, yoreketa zviro zvimweni zvisikazi kutarhwa, inini ndainga ndisikacazwi ciro. Zvaitondivhiringidza! Uye ndaitozwira usisi hama no hanzvadzi. Asi zvakandishamisa usisi uye kudzidodosa kawo kandiri.

Takagara ku Quênia ke gore rimwe. Muna 1997 takapikwa kuti tiende kooseenzera ku Bheteri ro Brooklyn, Nova Yorki. Asi zvino, taa muthaundi rekuti anhu ano zviro zvakawanda zvekunyama uye izvona zvingakwanisa kuita kuti paoneke zvinetso. (Zvie. 30:8, 9) Kunyazi zvakadaro, kutenda ke hama no hanzvadzi kainga kakakura maningi. Idzona dzinoseenzesa nguwa yadzo, zvadzinazvo haiwa kuti dzigare no upfumi asi kuti dzibetsere basa rinoizwa nge sangano ra Djehovha.

Pa makore ese aya takaona kuti hama no hanzvadzi dzedu dzainga dzakagondeka pasinei no mugariro wadzaisongana nadzo. Ku Irlanda, takaona kugondeka ke hama pasinei no bvinga raioneka. Ku África, takaona kutenda pasinei no urombo uye kugara ku nharaunda isina anhu akawanda. Ku Estados Unidos, kutenda pasinei no upfumi. Djehovha, zvezvirokwazvo anopfara maningi paanoona anhu ake ecipangidza rudo raanaro kaari pasinei no mugariro upi hawo.

Makore adarika “nokukasika kupinda cirukiso ce muruki.” (Djobo 7:6) Asi zvino tiri kuseenza tiri mu sedhi mundiyari ku Warwick, Nova Yorki, uye tino mupfaro mukuru kuseenza no hama no hanzvadzi dzinodanana. Isusu tiri kupfara nge kuita zviri zvese kuti tibetsere Mambo wedu Djesu Kristu, nokukasika Iyena acapasa mubairo aya anorumbwa akagondeka.—Mat. 25:34.