1. Djesu akabhuyei ngezve mazuwa ekupedzesera, uye akapasa ngwadzo ipi ku afundi ake?

 MAZUWA manganani Djesu asati afa, afundi arongomuna ake akamubvunzisa kuti: “Ndicipi cipangidzo . . . cokuti nyika yaakuda kupera?” (Mat. 24:3) Zvinoita hingana kuti awona aida kuziya kuti aizoziya kudini kuti Djerusarema no tempro zvaakuda kuparadzwa. Pa mhinduro yake, Djesu aazi kubhuya basi ngezve kuparadzwa ke Djerusarema, asiwo “ngezve kupera ke nyika ino” yatiri kurarama nyamasi uno. Djesu akareketa ngezve mugumo paakabhuya kuti: “Apana munhu anoziya ngezve zuwa kana nguwa iyona, kunyazi ngirozi dze kudenga kana Mwana, asi Baba basi ndiwo anozviziya.” Mumasure mekubhuya ngezve masoko aya, Djesu akangwadza afundi ake nge kuabvunza kuti “garai makamuka” uye “rumbwai makarinda.”—Mark. 13:32-37.

2. Ngei zvaikosha kuti Akristu airarama mu nguwa ye aphostori arumbwe akangwarira?

² Akristu e Cidjudha airarama mu nguwa ye aphostori aidikana kurumbwa akangwarira, uye upenyu wawo waitsamira pakuita izvona. Djesu akaabvunza zvaaidikana kungwarira kuti akwanise kuona kuti Djerusarema raakuda kuparadzwa. Iyena akati: “Pamunoona Djerusarema ratenderedzwa ngo zvikwata zve masurudado, ziyai kuti raakuda kuparadzwa.” Akristu paaizoona izvi zveciitika, aidikana kuita zvaakabvunzwa ndi Djesu uye “otizira ku matunhu.” (Ruka 21:20, 21) Aya akapurutana ngwadzo yaakapaswa na Djesu ndiwo akapona masurudado e Roma paakaparadza Djerusarema.

3. Ticaonei mu fundo ino?

 ³ Mbai-mbai pano, nyika ino yakashata icapera. Asi dakara izvona zvaitika, isusu tinodikana kurumbwa takamuka uye takarinda. Mu fundo ino ticaona kuti tingagara kudini no maonero ari pakati no pakati patinozwa ngezve zviro zviri kuitika mu nyika. Ticaonawo kuti tingadzingwaririra kudini pacedu kamare, uye kuti tinganyasa kuseenzesa kudini nguwa yasara.

4. Ngei tingada kuziya zviri kuitika mu nyika uye kuti zvirikudzadzisa kudini uphorofita we mu Bhaibheri?

⁴ Tino zvikonzero zvakanaka zvekuda kuziya zviri kuitika mu nyika uye toona kuti izvona zviri kudzadzisa kudini uphorofita we mu Bhaibheri. Djesu akabhuya zviro zvinganani zvaizoitika zvaizotibetsera kuona kuti nyika ino ya Sathani yaakuda kuparadzwa. (Mat. 24:3-14) Muphostori Pedru wakareketa kuti tinodikana kungwarira kudzadzika ke uphorofita uu kuti tigare nokutenda kakabamba. (2 Ped. 1:19-21) Bhuku rekupedzesera re mu Bhaibheri rinotanga no masoko ekuti: “Zvakapangidzwa na Djesu Kristu, zvaakapaswa na Mwari, kuti apangidze aranda ake zviro zvinodikana kuitika nokukasika.” (Zvak. 1:1) Hino azvitishamisi kugara no cido cekuda kuziya zviri kuitika uye toona kuti zviri kudzadzisa kudini uphorofita we Bhaibheri. Uye isusu tingatogara no cidaka-daka cekubvunzawo amweni izvona.

5. Cinyi catinodika kungwarira, uye tinodikana kuitei? (Onai mifanikiso.)

⁵ Patinocedza no amweni ngezve zviro zviri kuitika mu nyika, tinodikana kungwarira kuti tisaedze kufembera zvicaitika mu nguwa ye mberi. Ngei? Ngekuti zviya zvatinoreketa zvingakwanisa kukuwadza rubatano re ungano. Ngo muezaniso, pamweni imwimwi mungazwa kuti anyautongi e nyika ari kugadzirisa nyaya icaita kuti mu nyika mugare no runyararo uye kucengeteka. Pano kuedza kufembera kuti ndiko kudzadzika ke uphorofita uri pana 1 Atesaronika 5:3, zvaizonga zviri nani kupsvaka kurumbwa teciziya mazwisisiro akapedzesera kubudiswa. Makani edu anodikana kutsamira pa zviya zvinobudiswa no sangano ra Djehovha. Ngekudaro, ticabetsera kuti ungano igare yakabatana “pa mushobo umwewo wekurangarira.”—1 Ako. 1:10; 4:6.

6. Tingafundei kubva pazviro zvatinoerenga pana 2 Pedru 3:11-13?

⁶ Erengai 2 Pedru 3:11-13. Muphostori Pedru unotibetsera kugara no maonero ari pakati no pakati patinocedza ngezve uphorofita we Bhaibheri. Iyena wakatibvunza kuti tinodikana kuetsera uye tonyasa kuziya “kuoneka ke zuwa ra Djehovha.” Ngei? Haiwa ngekuti tinoda kuziya “zuwa no nguwa” yekuti Djehovha acaunzisa Amagedhoni, asi ngekuti tinoda kukhorovhera nguwa yasara kuti tigare anhu “akacena pa muhambiro wedu uye tecidzipira kuna Mwari.” (Mat. 24:36; Ruka 12:40) Ngo masoko amweni, tinoda kuita zviro nge mushobo wakanaka uye togara no rugondo rekuti zvese zvataita mu basa ra Djehovha tazviita nge ndaa ye rudo rikuru kaari. Asi kana tecida kukwanisa kuita izvona, tinodikana kudzingwaririra isusu pacedu kamare.

7. Tinopangidza kudini kuti tiri kudzingwaririra pacedu kamare? (Ruka 21:34)

⁷ Djesu akabvunza afundi ake kuti aidikana kudzingwaririra haiwa basi pa zviitiko zve mu nyika, asiwo pacawo kamare. Izvi zvinopangidzwa pamhene pano zvakatarhwa pana Ruka 21:34. (Erengai.) Onai zvakarekethwa na Djesu: “Dzingwaririrei imwimwi pacenyu.” Munhu unodzingwaririra iyena pacake, unongwaririra zviro zvingakuwadza ushamwari wake na Djehovha, uye unoita ciito kuti agare kure no zviro  izvona. Ngo mushobo iwona, iyena unorumbwa ari mu rudo ra Mwari.—Zvie. 22:3; Djud. 20, 21.

8. Pauro wakapasa ngwadzo ipi ku Akristu e ku Efeso?

⁸ Muphostori Pauro wakabvunza Akristu kuti anodikana kudzingwaririra pacawo. Ngo muezaniso, ku Akristu e ku Efeso, iyena wakaabvunza kuti: “Ngwarirai kuti musahambe hingana mapenzi asi hingana anhu ano ungwaru.” (Aef. 5:15, 16) Sathani uri kuedza nguwa dzese kuparadza ushamwari wedu na Djehovha. Ndiyo ndaa Bhaibheri rinotikohomedzesa kuti “tizwisise kuti ngacipi cido ca Djehovha” ngekuti kana tikadaro, ticakwanisa kudzidziirira pakurhwiswa ndi Sathani.—Aef. 5:17.

9. Tingazwisisa kudini cido ca Djehovha katiri?

⁹ Bhaibheri aribhui ciro cimwe na cimwe cingashaishidza ushamwari wedu na Djehovha. Kakawanda kakhona tinodikana kuita zvisananguro ngezve nyaya yekuti Bhaibheri aribhui nge mushobo wakananga nyaya yakhona. Kuti tiite cisananguro cakanaka, tinodikana kuziya kana kuti kuona kuti ngacipi “cido ca Djehovha.” Tinokwanisa kuita izvona, kana tikafunda Bhaibheri nguwa dzese uye tonyasa kurangarira. Kunyazi Bhaibheri risikapasi nhungamiriro yakananga ngezve nyaya imwe na imwe, isusu tingahamba hinga “anhu akangwara.” Ciro cicatibetsera kuita cisananguro cakanaka ngecekupeta masimba kuti tizwisise cido ca Djehovha uye togara no “marangariro a Kristu.” (1 Ako. 2:14-16) Mirau imweni iri nyore kuiwona, asi imweni inoshupha.

10. Ngaipi mirau minganani yatinodikana kutiza?

¹⁰ Pa mirau yatinodikana kungwarira inobatanidza kutamba no mwoyo we munhu, kumwisa, kurhyisa, kubhuya zviro zvinokuwadza amweni, kuona pornografiya, kuona mafirme uye maprograma anopangidza zvecisimba, no zvimweniwo. (Pis. 101:3) Muzondi wedu, Dhiyabhurosi uri kupsvaka nguwa dzese mushobo wekuparadza ushamwari wedu na Djehovha. (1 Ped. 5:8) Kana tikasama kungwarira, Sathani ungasima mu ndangariro no mu mwoyo medu mbeu ye bibvu, kusama kugondeka, makharo, uzondi, kudzikudza, uye bundu. (Aga. 5:19-21) Pakutanga pamweni mazwiro awona anonga asikazi kubamba. Asi kana tikasama kungwarira kuti tibvite mazwiro awona nge pa nzinde, awona acarumbwa ecikura hingana kamuti kano vheneno kanouraya zvese zviri mumuceto.—Tig. 1:14, 15.

11. Murau upi watisikakwanisi kuona nokukasika watinodikana kungwarira, uye ngei?

¹¹ Murau umweni watingakonerhwa kuwona ishamwari dzakashata. Rangaridzai kuti imwimwi munoseenza no munhu usiripi Mupupuri wa Djehovha. Asi imwimwi munoda kuti iyena aone zvakanaka Apupuri a Djehovha, ndiyo ndaa munomupangidzira unaki no upfawi. Pamweni paya, munotorhya pamwepo no mudoni wenyu we basa, asi nokuhamba ke nguwa imwimwi munogara mecizviita nguwa dzese, uye pamweni paya makani enyu anocokuita no zviro zvisikazi kucena. Pakutanga imwimwi amuzwi makasudzunuka uye amuzvidi, asi nokuhamba ke nguwa imwimwi amucina basa nazvo. Mudoni wenyu unozomupikai kuti mumbomwe padoko mumasure mekuseenza, uye imwimwi munotenda. Mugumisiro wakhona nokuhamba ke nguwa, imwimwi maakutorangarirawo hingana mudoni wenyu we basa. Azvitori nguwa yakareba, imwimwi maakutoitawo zviro hingana iyena. Izvirokwazvo kuti tinoda kupangidza unaki uye upfawi ku anhu ese, asi tinodikana kuedzurira kuti tingakwanisawo kuteedzera zviya zvinoizwa no anhu atinohamba nawo. (1 Ako. 15:33) Kana tikadzingwaririra pacedu kamare hinga zvakabhuiwa na Djesu, atizogari padhuze no anhu asikateereri nhungamiriro dza Djehovha. (2 Ako. 6:15) Tinoona murau uye togara kure nawo.

12. Afundi a Djesu aidikana kuitei paaietsera kupera ke mugariro we zviro we Cidjudha?

¹² Djesu ainga asikaetseri kuti afundi ake agare akasenga nyara eciimira kupera ke mugariro we zviro we Cidjudha. Djesu akaapasa basa kuti awona aite. Iyena akaabvunza kuti awona aidikana kuparidzira masoko akanaka “mu Djerusarema, mu Djudhiya mwese ne mu Samariya, uye dakara ku mbuto dziri kure dze nyika.” (Zvii. 1:6-8) Zviro zvaakabvunzwa kuti aite zvaibatanidza basa rakakura! Ngekugara akabatikana mu basa rekuparidzira, awona akakwanisa kunyasa kuseenzesa nguwa yawo nge mushobo wakanaka.

13. Ngei tecidikana kuseenzesa nguwa yedu nge mushobo wakanaka? (Akorosi 4:5)

¹³ Erengai Akorosi 4:5. Kuti tidzingwaririre isusu pacedu, tinodikana kuziya kuti tiri kuseenzesa kudini nguwa yedu. “Zviro zvatisikakariri” zvingakwanisa kuitika ku umwe na umwe wedu. (Mup. 9:11) Ndiyo ndaa upenyu wedu ungakwanisa kupera pa nguwa yatisikakariri.

14-15. Tingaseenzesa kudini zvakanaka nguwa yedu? (Ahebheru 6:11, 12) (Onai mufanikiso.)

¹⁴ Isusu tingaseenzesa nguwa yedu nge mushobo wakanaka ngekuita kuda ka Djehovha uye kubambisa ushamwari wedu naye. (Juau 14:21) Tinodikana ‘kugara takabamba, tisikazununguki,  nguwa dzese tinodikana kugara no zvakawanda zvekuita mu basa ra Tenzi.’ (1 Ako. 15:58) Hino kana mugumo ukaguma—kunyazi mugumo we nyika ino kunyazi mugumo we upenyu wedu—isusu atizotsumbi.—Mat. 24:13; Aro. 14:8.

¹⁵ Mazuwa ano, Djesu ari kurumbwa ecitungamirira aseenzi ake paanonga eciparidzira masoko akanaka ngezve Umambo mu nyika yese. Iyena akagondesa afundi ake kuti aizorumbwa anawo dakara mugumo wauya. Nyamasi uno iyena ari kurumbwa ecidzadzisa zvaakabhuya. Iyena ari kutungamirira afundi ake paanonga eciparidzira masoko akanaka mu nyika yese. Eciseenzesa sangano ra Djehovha, isusu tinofundiswa kuti tingaita kudini basa irona. (Mat. 28:18-20) Isusu tiri kuita zviya zvatinoetserhwa na Djesu kuti tiite. Tiri kuita zvese zvatinokwanisa mu basa rekuparidzira nokufundisa, uye tinorumbwa takangwarira tecietsera Djehovha paacaunzisa mugumo we nyika ino. Ngekuseenzesa ngwadzo yatinogumira pana Ahebheru 6:11, 12, isusu ticarumbwa takabatisisa kariro yedu “dakara ku mugumo.”—Erengai.

16. Tinodikana kushinga kuitei?

¹⁶ Djehovha akasanangura kare zuwa raacaunzisa mugumo we nyika ino ya Sathani. Kana zuwa irona rikaguma, Djehovha acadzadzisa zvese zvaakabhuya kuti acaita. Izvirokwazvo kuti pamweni paya tingarangarira kuti mugumo uri kunonoka kuuya. Asi zuwa ra Djehovha “arizombononoki!” (Abha. 2:3) Hino tinodikana “kurumbwa takarinda tecietsera Djehovha,” uye atidikani kuremba “kuetsera Mwari [wedu] we ruponeso.”—Mik. 7:7.