1. Cinyi cinopangidza kuti Djesu aikoshesa Matarhwa?

 RANGARIDZAI kuti ainga ari makomborero akadini kuzwa Djesu ecifundisa. Nguwa dzese ayena aitobhuya ngezve Matarhwa Macena ngo musoro! Kubhuya zvazviri, masoko ake ekutanga akatarhwa mu masure mekuti abhabhatidzwa uye masoko ake ekupedzesera asati afa, Djesu akabhuya masoko ari mu Matarhwa. b (Dhe. 8:3; Pis. 31:5; Ruka 4:4; 23:46) Pa makore matatu no hafu paaita basa rake rekuparidzira, Djesu akaerenga uye akabhuya nokupangidza Matarhwa akawanda pakadzara anhu.—Mat. 5:17, 18, 21, 22, 27, 28; Ruka 4:16-20.

2. Cinyi cakabetsera Djesu kuti anyase kuziya Matarhwa? (Onai foto ye pa kapa.)

² Asati atanga basa rekuparidzira pa nyika pano, Djesu wakaerenga uye wakazwa Soko ra Mwari kakawanda. Zvezvirokwazvo, iyena wakazwa Mariya na Zuzee ecipanganidza Matarhwa paaicedza pa nyumba se mhuri. c (Dhe. 6:6, 7) Tingagonda hedu kuti Djesu waienda ku sinagoga mu ma Sabudu ese no mhuri yake. (Ruka 4:16) Matarhwa paaierengwa ikona, zvingaita kuti iyena wainyasa kupurutana. Nokuhamba ke nguwa, iyena wakazofunda kuerenga ega Matarhwa Macena. Ngokudaro, Djesu aazi basi kuguma pakuziya Matarhwa, asi kuada uye kuseenzesa  zviya zvaaifunda. Ngo muezaniso, muciri kuedzurira zvakaitika paainga ano makore 12. Afundisi ainga ari mu tempro, aitoziya kamare Mutemo wa Mozesi “akashamisika nokuzwisisa ka [Djesu] uye no mhinduro dzake.”—Ruka 2:46, 47, 52.

3. Ticaonei mu fundo ino?

³ Isusuwo tinganyasa kuziya Soko ra Mwari no kurida patinoerenga Bhaibheri mazuwa ese. Hino tinganyasa kubetsereka kudini no zvatinoerenga? Tingafundira zvakawanda kubva pano zvakarekethwa na Djesu ku aya aiziya Mutemo, kutobatanidzawo atari, Afarisi uye Asadhusi. Atungamiriri aya e magereja aierenga Matarhwa mazuwa ese, asi awona ainga asikabetsereki nawo. Djesu akabhuya zviro zvitatu zvainga zvisikaizwi no anarume aya kuti asabetsereke no zvaaierenga mu Matarhwa. Masoko aakaabvunza acatibetsera paya patinoerenga Bhaibheri (1) kuzwisisa zvatiri kuerenga, (2) kugumira upfumi we kumwiya, uye (3) kusiya kuti Soko ra Mwari ritiumbe.

4. Ruka 10:25-29 inotifundisei ngezve mushobo watinodikana kuerenga Soko ra Mwari?

⁴ Isusu tinoda kuzwisisa kuti zviya zvatinoerenga mu Soko ra Mwari zvinoda kureyei. Kana tikasama kudaro, atizobetsereki no zviya zvatinonga tecierenga. Ngo muezaniso, onai kucedzesana kakaita Djesu no “mwanarume wainyasa kuziya Mutemo.” (Erengai Ruka 10:25-29.) Mwanarume uu paakabvunzisa kuti waidikana kuitei kuti aone upenyu usikaperi, Djesu wakamubvunzisawo eciseenzesa Soko ra Mwari eciti: “Mu Mutemo makatarhwei? Unoerenga kudini?” Mwanarumewo wakapasa mhinduro yakanaka inopindirana no Matarhwa ngezve kuda Mwari uye mudoni wake. (Rev. 19:18; Dhe. 6:5) Asi onai zvaakazobvunzisa: “Zvezvirokwazvo mudoni wangu ndiyani?” Izvi zvinopangidza kuti mwanarumewo wainga asikazwisisi kuti zviya zvaaierenga zvaireyei kamare. Ndiyo ndaa iyena wainga asikazvizii kuti waizoseenzesa kudini matarhwa aya mu upenyu wake.

5. Kuita munamato uye kuerenga tisikagogomeki kungatibetsera kudini kuti tizwisise zviya zvatinonga tecierenga?

⁵ Kuti tinyase kuzwisisa Bhaibheri tinodikana kusakurira mishobo yakanaka yekurierenga. Onai zviro zvingamubetserai. Itai munamato musati matanga kurierenga. Isusu tinoda rubetso ra Djehovha kuti tizwisise Bhaibheri, ndiyo ndaa itai munamato mecikumbira mwiya mucena kuitira kuti mukande ndangariro dzenyu pa zviya zvamuri kuerenga. Pedzepo, erengai musikagogomeki. Kuita izvona kucamubetserai kuti muzwisise zviya zvamunonga mecierenga. Kana mukapurutana ma audhiyo e kuerengwa ke Bhaibheri uye moaona pa phepha, izvona zvingamubetsera kuti muzwisise, muedzurire uye mufunde zvakawanda kubva pazviya zvamaerenga mu Soko ra Mwari. (Djs. 1:8) Kana mukapedza, itaizve munamato kuti mutende Djehovha nge cipo ici cakanaka ce Soko rake uye mukumbirei kuti amubetsere kuseenzesa mu upenyu wenyu zviya zvamapedza kuerenga.

6. Ngei kudziita mubvunzo uye kutarira kucamubetserai pamunonga mecierenga Bhaibheri? (Onai mufanikiso.)

⁶ Onaizve zviro zviiri zvicamubetserai kuti munyase kuzwisisa Bhaibheri. Dzipasei mibvunzo pa zviya zvamapedza kuerenga. Pamunoerenga ndima ye Bhaibheri dzibvunzisei kuti: ‘Ndiyanani ari kunyanya kurekethwa ipona? Ndiyani urikureketa? Iyena urikureketa nani, uye ngei? Izvona zviri kuitika kupi uye  riini?’ Mibvunzo idzi dzicamubetserai kuti murangarire uye muzwisise mafundo makuru e ndima iyona. Tarirai zviya zvinokosha pamunonga mecierenga. Pamunonga mecitarira zvinoita hingana kuti muri kutora masokoo mecikanda mu ndangariro dzenyu, uye izvona zvinomubetsera kuti muzwisise nyayeyo. Kutara kunoita kuti musakanganwe zviya zvamunonga maerenga. Imwimwi mungatara mubvunzo, zvamunonga makwarakwatisa, mafundo makuru, zviro zvekuti mungaseenzesa kudini zvamunonga maerenga, kana kuti mazwa kudini pamaierenga ndima iyona. Kuita izvona, kucamubetsera kuti muone Bhaibheri hingana tsamba yabva kuna Mwari yauya kamuri.

7. Iwara ripi ratinodikana kugara naro patinonga tecierenga Bhaibheri, uye ngei? (Mateu 24:15)

⁷ Djesu akabhuya wara ratinodikana kugara naro kuti tizwisise Soko ra Mwari—kuzwisisa. (Erengai Mateu 24:15.) Cinyi cinozwi kuzwisisa? I kukwanisa kuona kuti fundo iri rinobatana kudini no rimweni uye kuti fundo irona rinosiyana kudini no fundo rimweni, uye kuona zviya zvisikazi kudjeka. Kusiya izvona, hinga zvakarekethwa na Djesu, tinodikana kuzwisisa kuti tione zviitiko zviri kudzadzisa uphorofita we Bhaibheri. Zvinokosha maningi kuti tigare no wara iri kuti tinyase kubetsereka no zviya zvatinoerenga.

8. Tingaerenga kudini nokuzwisisa?

⁸ Djehovha anopa aseenzi ake kuzwisisa. Ndiyo ndaa itai munamato kaari uye kumbirai rubetso rake kuti musakurire wara iri. (Zvie. 2:6) Mungaitei kuti muite maererano no zviya zvamunonga makumbira pa munamato? Erengai musikagogomeki uye edzai kuzwisisa kuti zvamuri kuerenga zvinobatana kudini no zvamaakuziya. Kuti zvimubetsere, onai mabhuku edu anobetsera pakufunda Bhaibheri akaita hinga Bhuku Rinobatsira Zvapupu zvaJehovha Pakutsvakurudza. Mabhuku aya acamubetsera kuti muzwisise dii re Bhaibheri ramuri  kuerenga uye mushobo wamungazviseenzesa mu upenyu wenyu. (Aheb. 5:14) Uye kana mukakanda ndangariro dzenyu pakurierenga, mucazokwanisa kurizwisisa.

9. Asadhusi akasiya cokwadi cipi ciri mu Matarhwa?

⁹ Asadhusi ainyasa kuziya mabhuku mashanu ekutanga e Matarhwa e Cihebheru, asi awona aazi kutendera cokwadi cinokosha cainga ciri mu mabhuku awona. Ngo muezaniso, edzai kuona Asadhusi paakaita mubvunzo kuna Djesu uno cokuita nokumutswa. Djesu akaabvunzisa kuti: “Imwimwi amuzi kuerenga mu bhuku ra Mozesi, panobhuya ngezve pfiba, apo Mwari paakati: ‘Inini ndiri Mwari wa Abrahamu, Mwari wa Izaki na Mwari wa Djakobo’?” (Mark. 12:18, 26) Zvezvirokwazvo, Asadhusi ainga akamboerenga ngezve nyaya ii kakawanda. Mubvunzo wakabhuiwa na Djesu unopangidza pamhene kuti awona ainga asiya cokwadi cinokosha ciri mu Bhaibheri pa nyaya ii.—Mark. 12:27; Ruka 20:38. d

10. Patinoerenga Bhaibheri tinodikana kungwarirei?

¹⁰ Cinyi catingafunda? Patinoerenga Bhaibheri tinodikana kunyasa kuzwisisa kuti nyaya ii irikuda kubhuyei. Isusu atidi basi kufunda mafundo e pamusoro-soro, asiwo cokwadi cakaigika cinoda kuti tipete masimba akakura kuti tiuone.

11. Maererano na 2 Timoti 3:16, 17, mungagumira kudini upfumi we kumwiya pakuerenga kenyu Bhaibheri?

¹¹ Imwimwi mungaona kudini upfumi we kumwiya pakuerenga kenyu Bhaibheri? Onai zvinorekethwa pana 2 Timoti 3:16, 17. (Erengai.) Tsamba ii inoti: “Matarhwa ese . . . anobetsera” (1) pakufundisa, (2) pakusumurura, (3) pakugadzirisa zviro, uye (4) pakupanga zve unatsi. Mungabetsereka no mafundo marongomuna aya kunyazi mu tsamba dze Bhaibheri dzamusikanyanyi kuseenzesa. Erengai musikagogomeki ngano idzi dze mu Bhaibheri uye edzai kuona kuti ngano idzi dzinomufundisei ngezva Djehovha, ngezve cinangwa cake kana kuti zvokwadi zvisikacinji zvo Bhaibheri. Edzai kuona kuti ngano iyona ingamusumururai kudini. Ngei tecidaro? Ngokuti tsamba yo Bhaibheri ingatibetsera kuona marangariro no maitiro akashata uye toaramba kuti tirumbwe takagondeka kuna Djehovha. Edzai kuona kuti ngano iyona ingamubetsera kudini kuti mugadzirise uye munatsirise maonero akashata, pamweni ku munhu uya wamunonga maona mu basa rekuparidzira. Pamunonga mecierenga psvakai mupango ungamubetserai kuti mukwanise kuona zviro mu maonero a Djehovha. Kana imwimwi mukagara no mafundo aya marongomuna mu ndangariro dzenyu, mucagumira upfumi we kumwiya ucamubetserai pakuerenga kenyu Bhaibheri.

12. Ngei Djesu akabvunzisa Afarisi kuti: “Amuzi kuerenga here?”

¹² Djesu wakaabvunzisawo kuti: “Amuzi kuerenga here?” kupangidza kuti Afarisi ainga ano maonero akashata ngezve Matarhwa. (Mat. 12:1-7) e Pa nguwa iyona, Afarisi akapumha afundi a Djesu kuti ainga asikacengeti Sabudu. Eciadaira, Djesu wakabhuya miezaniso miiri dze Bhaibheri uye wakabhuya tsamba imwe ye muphorofita Hosiya kuti apangidze kune Afarisi kuti ainga asikazwisisi mutemo we Sabudu uye ainga asikapangidzi usisi. Asi ngei anarume aya aierenga Bhaibheri asikazi kuumbwa naro? Ngekuti awona airierenga no cinangwa cokushora uye kudzikudza. Maitiro awona aiaitisa kuti asazwisise zviya zvaaierenga.—Mat. 23:23; Juau 5:39, 40.

13. Miitiro ipi yatinodikana kugara nayo patinonga tecierenga Bhaibheri, uye ngei?

¹³ Masoko a Djesu anotifundisa kuti tinodikana kuerenga Bhaibheri no cinangwa cakanaka. Atidi kuita hingana Afarisi, pane kudaro, tinoda kudzidodosa takagadzirira kufunda. Hinga zvinorekethwa no Bhaibheri, tinodikana “kutambira no upfawi kusimwa ke soko.” (Tig. 1:21) Tikaita kudaro tinonga tecitendera kuti Soko ra Mwari ritsire nzinde mu mwoyo medu. Fundo dzatinoona mu Bhaibheri ngezve unatsi, usisi uye rudo ringaticinja kana tikasama kugara anhu anoshora nokudzikudza.

14. Tingaziya kudini kuti tiri kusiya Bhaibheri recitiumba? (Onai mifanikiso.)

¹⁴ Mushobo watinobata anhu amweni zvinopangidza kuti tiri kutendera here kuti Soko ra Mwari ritiumbe. Afarisi aazi kusiya kuti Soko ra Mwari ribaye mwoyo yawo. Ngokudaro, awona “aitonga anhu asina ndaa.” (Mat. 12:7) Ndiyo ndaa, maonero atinoita anhu amweni uye mabatiro atinoaita anopangidza kuti  tiri kusiya here kuti Soko ra Mwari ritiumbe. Ngo muezaniso, tinosocedzawo ngezve mawara akanaka ngezve amweni here, kana kuti tinosocedza ngezve zvishaishi zvawo? Kodi tino usisi uye tinosorekerera here kana kuti tinoshora uye tinocengeta bundu? Mhinduro dze mubvunzo idzi dzinopangidza kuti tiri kusiya zvatiri kuerenga zveciumba ndangariro dzedu, mazwiro edu uye maitiro edu.—1 Ti. 4:12, 15; Aheb. 4:12.

15. Djesu aizwa kudini ngezve Soko ra Mwari?

¹⁵ Djesu aida Soko ra Mwari uye masoko e uphorofita ari pana Pisarema 40:8 anobhuya kuti Djesu waizozwa kudini ngezve Soko ra Mwari. Ipona panoti: “Ndinopfarira kuita kuda kenyu, Haiwa Mwari wangu, uye mutemo wenyu uri mukatikati mangu.” Nge ndaa ye rudo iri, Djesu waiseenzera Djehovha no mupfaro. Ngo mushobo umwewo, isusu tingakwanisa kupfarawo uye kubudirira patinoerenga Soko ra Mwari uye tofundira kurida.—Pis. 1:1-3.

16. Munodikana kuitei kuti munyase kubetsereka pakuerenga kenyu Bhaibheri? (Onai bhokisi rakazwi: “ Masoko a Djesu Angamubetsera kuti Muzwisise Zviya Zvamuri Kuerenga.”)

¹⁶ Ngatiteedzere masoko uye muezaniso wa Djesu, kana tikadaro, ticaona mafundo akanaka angatibetsera pakuerenga kedu Bhaibheri. Tinganyasa kuzwisisa zvatinonga tecierenga mu Bhaibheri nge kuita munamato, ngekuerenga tisikagogomeki, ngekudziita mibvunzo, uye kutarira nge masoko manganani zviya zvatinonga tecierenga. Tingaseenzesa ungwaru ngekunyasa kukwarakwatisa zvatinonga tecierenga tecibetserhwa no mabhuku edu anotsamira mu Bhaibheri. Tingatunhudzira maseenzesere atinoita Matarhwa kunyazi ku tsamba dziya dzatisikanyanyi kuseenzesa ngekupsvaka upfumi we ku mwiya uri mukati me ndimedzo. Uye tingasiya kuti Soko ra Mwari ritiumbe nge kurumbwa tino marangariro akanaka patinoerenga Bhaibheri. Patinopeta masimba kuti tiseenzese mafundo aya ticanyasa kuzwisisa zviya zvatinoerenga uye ticanyasa kukhwedera dhuze na Mwari.—Pis. 119:17, 18; Tig. 4:8.