1. Cisananguro cipi cakanaka cinodikanwa kuizwa nge munhu umwe na umwe?

KAJINJI kakhona, zvisananguro zvinoizwa nge abereki zvingakwanisa kubata-bata ana awo ke nguwa yakareba. Kana abereki akaita zvisananguro zvakashata, zvingaunzira matambudziko ku ana awo. Asi kana akaita zvisananguro zvakanaka, zvicaita kuti ana awo agare no upenyu unopfadza. Zve zvirokwazvo ana anodikanawo kuita zvisananguro zvakanaka. Cisananguro cakanaka cingaizwa nge munhu umwe na umwe, ngece kuseenzera Baba edu e kudenga ano rudo, Djehovha.—Pis. 73:28.

2. Zvisananguro zvipi zvakaizwa na Djesu pamwepo ne abereki ake?

² Abereki a Djesu ainga akashinga kubetsa ana awo kuti aseenzere Djehovha, uye zvisananguro zvaakaita zvakapangidza kuti ici ndico cainga ciri cinangwa cawo mu upenyu. (Ru. 2:40, 41, 52) Djesu wakaitawo zvisananguro zvakanaka zvakamubetsera kuti aite basa rake pa kudzadzisa cinangwa ca Djehovha. (Mt. 4:1-10) Djesu wakakura ari munhu wakanaka, wakagondeka uye ano ushingi—ari mwana wiya waizokudza uye kupfadza mwoyo wa baba upi hake unotya Mwari.

3. Mu fundo ino ticaona mibvunzo ipi?

³ Mu fundo ino, ticaona mibvunzo inoteera: Zvisananguro zvipi zvakanaka zvakaizwa na Djehovha kuna Djesu? Abereki e ciKristu angafundei pa zvisananguro zvakaizwa nge abereki a Djesu? Uye madjaha e ciKristu, angafundeiwo pa zvisananguro zvakaizwa na Djesu?

4. Cisananguro cipi cinokosha cakaizwa na Djehovha nge kuda ke Mwana wake?

⁴ Djehovha wakasanangurira Djesu abereki akanaka. (Mt. 1:18-23; Ru. 1:26-38) Masoko a Mariya anobva pa mwoyo akatarhwa mu Bhaibheri anopangidza kuda kaanoita Djehovha ne Soko rake. (Ru. 1:46-55) Uye mushobo wakaizwa na Zuzee pakutungamirirhwa na Djehovha zvinopangidza kuti iyena waitya Mwari uye waida kumupfadza.—Mt. 1:24.

5-6. Djehovha wakatendera kuti Mwana wake asongane nei?

⁵ Onai kuti Djehovha aazi kusanangurira Djesu abereki akapfuma. Cibairo cakaizwa na Zuzee na Mariya Djesu paakabarhwa cinopangidza kuti awona ainga arombo. (Ru. 2:24) Zvingaita kuti Zuzee wainga ano cibhanka pa nyumba pake ku Nazareta paiitira basa rake rekutsetsa matabwa. Upenyu wawo wainga usina zvakawanda, nge kuti mhuri yaikura zvekuti yaitoguma anhu anomwe.—Mt. 13:55, 56.

⁶ Djehovha wakadziirira Djesu pangozi dzimweni, asi Iyena aazi kudziirira Mwana Wake pamatambudiko ese. (Mt. 2:13-15) Ngo muezaniso, Djesu waitodikana kubatana no anyaukama asikatendi. Cimborangarirai kurhwadziwa kakaita Djesu paakarambwa nge anyaukama ake kuti andiepi Mesiya. (Mk. 3:21; Ju. 7:5) Pamwenizve, Djesu wakarhwadziwa maningi pakafa baba ake akamurera. Izvi zvakaita kuti Djesu hingana dangwe atungamirira bhizi re mhuri. (Mk. 6:3) Paaikura, wakafunda kugara ne ubaba wekuonerera kugarika zvakana ke mhuri yake. Pamweni waitodikana kuseenza no simba pa kubetsera mhuri. Waitozia kuti cinyi cinozwi kuremba panopera zuwa.

7. (a) Mibvunzo ipi icabetsera kazado kurera ana? (b) Tsamba ya Zvierengo 2:1-6 ingabetsera kudini pakufundisa ana?

⁷ Kana imwimwi muri kazado, uye mecida kubara ana dzibvunzisei kuti: ‘Tiri anhu anodzidodosa uye akakura pakunamata aizosanangurhwa na Djehovha kuti tiriritire upenyu upsva?’ (Pis. 127:3, 4) Kana maa baba kana mai, dzibvunzisei kuti: ‘Ndiri kufundisa ana angu basa rinoshupha here?’ (Mup. 3:12, 13) ‘Ndinoita zviri zvese kuti ndidziirire ana angu pa ngozi dzaangasongana nadzo  mu nyika ya Sathani here?’ (Zvie. 22:3) Azvingabviri kudziirira ana enyu pa zvineso zvese zvaanosongana nazvo. Izvi azvibviri. Asi mungazviita padoko no padoko ne rudo meciagadzirira zvaacazosongana nazvo mu upenyu, meciafundisa kuti apsvake kutungamirirhwa ne Soko ra Mwari. (Erengai Zvierengo 2:1-6.) Nge muezaniso, kana umwe we anyaukama akasanangura kuramba kunamata ke cokwadi, betserai ana enyu kuti afundire ne Soko ra Mwari kuona kuti ngei zvakanakira kurumbwa takagondeka kuna Djehovha. (Pis. 31:23) Kana kuti mukafirhwa nge munhu wamunoda, pangidzirai ana enyu kuti angaseenzesa kudini Soko ra Mwari uye kuti angagumira kudini runyararo.—2Ako. 1:3, 4; 2Ti. 3:16.

8. Maererano na Dheuteronomiyo 6:6, 7, Cinyi caidikanwa kuizwa ndi Zuzee na Mariya?

⁸ Zuzee na Mariya akabetsera Djesu kuti akure ecitenderhwa na Djehovha; awona aipurutana nhungamiriro ya Djehovha ku abereki. (Erengai Dheuteronomiyo 6:6, 7.) Zuzee na Maria aida Djehovha ne mwoyo wese, uye cinangwa cawo cainga cekukohomedzesa ana awo kuti adewo Djehovha ne mwoyo wese.

9. Zvisananguro zvipi zvinokosha zvakaizwa ndi Zuzee na Mariya?

⁹ Zuzee na Mariya akasanangura kurumbwa eciita kunamata ke mhuri. Zviri pamhene kuti awona aipinda misangano yese mu masinagogi mu Nazareta, kutobatanidzawo no Phasika ku Djerusarema. (Ru. 2:41; 4:16) Zvinoita hingana kuti iwona aifundisa Djesu ne anukuna ake zvakaringana ne ngano ye anhu a Djehovha, paaita rhwendo iri aikhorovhera mukana uu kuti avhakacire mbuto dzinoreketwa mu Magwaro. Ngekuti mhuri yawo yaikura, zvainga zvisiripi nyore kuna Zuzee na Mariya kurumbwa ecitondoedza urongwa wawo wekunamata.

10. Abereki e ciKristu afundei kuna Zuzee na Mariya?

¹⁰ Abereki anotya Mwari angafundei no muezaniso wa Zuzee na Maria? Zvinotonyanya kukosha, ngezve kufundisa ana enyu nge masoko uye zviito kuti munoda Djehovha. Nyasai kuzwisisa kuti, cipo cikuru camungapasa  ana enyu ngecekuafundisa kuti ade Djehovha. Uye cinonyanya kukosha ngecekuafundisa kuti arumbwe ano urongwa wakanaka we kunamata, kufunda kuita minamato, kupinda misangano uye kubuda mu basa re mumunda. (1Ti. 6:6) Zvirokwazvo kuti munodikana kupasa ana enyu zviro zvekunyama zvaanoda. (1Ti. 5:8) Asi edzurirai kuti ushamwari we ana enyu na Djehovha ndiwo ucaita kuti apukunyuke pa kupera ke nyika ino uye kupinda mu nyika ipsva ya Mwari. *—Eze. 7:19; 1Ti. 4:8.

11. (a) Mazano ari pana 1 Timoti 6:17-19 anobetsera kudini abereki kuti aite zvisananguro zvakanaka paanonga ecirera ana awo? (b) Zvinangwa zvipi zvingakosheswa nge mhuri uye acaona makomborero api? (Onai bhokisi “ Zvinangwa Zvipi Zvamucada Kuseenzera?”)

¹¹ Zvinopfadza kuona abereki eciKristu akawanda eciita zvisananguro zvakanaka zvakaringana ne kunamata ke mhuri dzawo! Awona anonamata ese pamwepo. Anopinda misangano ye ungano no magungano. Uye aona anobuda ese pamwepo mu basa rekuparidza. Mhuri dzimweni dzinokwanisa kuparidza mu mbuto dzakaseenzwa padoko. Amweni anovhakacira Betheri kana kuti anobetsera pa mabasa e kuwaka e sangano. Mhuri dzinosanangura kuita mabasa aya dzinodikana kugara ne upenyu usina zvakawanda, uye pamweni acazobatana ne zvineso mberiyo. Asi makomborero aanozotambira anoasiya ari apfumi pakunamata. (Erengai 1 Timoti 6:17-19.) Ana anorerhwa mu mhuri dzakadai kajinji anorumbwa ecifunda tsika dzakanaka uye aazombotsumbi! *—Zvie. 10:22.

12. Zvinyi zvaidikana kuizwa na Djesu paaikura?

¹² Baba ekudenga a Djesu anorumbwa eciita zvisananguro zvakanaka, uye abereki ake e kurera aiitawo zvisananguro zvakanaka. (Aga. 6:5) Ngekudaro, Djesu paaikura iyena waidikana kuita zvisananguro zvake pacake. Iyena waikwanisa kukanda zvaanoda pa mbuto yekutanga. Pano kuita izvi, wakasanangura kukanda Djehovha pa mbuto yekutanga. (Ju. 8:29) Madjaha angafundei pa muezaniso wa Djesu?

13. Djesu wakaita cisananguro cipi paainga aciri djaha?

¹³ Pakutanga ke upenyu wake pasi pano, Djesu wakasanagura kuzwira abereki ake. Aazi kuramba kutungamirirhwa nge abereki ake, ecirangarira kuti awona aana ruziyo rakawanda. Pano kudaro “iyena wakarumbwa eciapurutana.” (Ru. 2:51) Djesu wakabata nge nyara mbiri ubaba wake wekugara dangwe. Iyena wakaseenza ne simba  rese kuti afundire basa na baba ake ekurera kuti aabetsere pa kuriritira mhuri.

14. Tinozia kudini kuti Djesu wainga ari mufundi wakanaka we Soko ra Mwari?

¹⁴ Pamweni abereki a Djesu akamubvunza nge zve kubarhwa kake kunoshamisa uye zvakarekethwa nge atumwa a Mwari. (Ru. 2:8-19, 25-38) Djesu aazi kusenga nyara pa zviya zvaakazwa; iyena wakafunda Magwaro kuti aziye pacake. Tinozia kudini kuti Djesu wainga ari mufundi wakanaka we Soko ra Mwari? Nge kuti iyena paainga aciri mwana mudoko, afundisi e ku Djerusarema “aishamiswa nge kuzwisisa uye ne mhinduro dzake.” (Ru. 2:46, 47) Aciri no makore 12 basi, Djesu wainga atodzipangidza kaari kuti Djehovha ndiwo Baba ake.—Ru. 2:42, 43, 49.

15. Cinyi cinopangidza kuti Djesu wakasanangura kuita kuda ka Djehovha?

¹⁵ Djesu paakafunda nge zve basa rake uye cinangwa ca Djehovha, wakasanangura kutanbira basa rake. (Ju. 6:38) Iyena waiziya kuti waizozondwa no anhu akawanda, uye pamweni kuziya zviro izvi zvakaita kuti aneseke. Kunyazi zvakadaro, iyena wakasanangura kuzwira Djehovha. Djesu paakabhabhatidzwa mu gore ra 29 K.A. cinangwa cake mu upenyu cainga cekuita kuda ka Djehovha. (Ahe. 10:5-7) Kunyazi paaifa pa mutanda wekutambudzikira, Djesu aazi kusiya kuita zvinoda Baba ake.—Ju. 19:30

16. Ana angafundei pa muezaniso wa Djesu?

¹⁶ Purutanai abereki enyu. Hingana Zuzee na Maria, abereki enyu aaziwo kukwana. Kunyazi zvakadaro awona akatambira kuna Djehovha ubaba we kudziirira, kuroedza, uye kumutungamirira. Kana mukareremedza mipango yawo uye ciremera cawo “zvicamuhambira zvakanaka.”—Aef. 6:1-4.

17. Maererano na Djoshuwa 24:15, zvisananguro zvipi zvinodikanwa kuizwa nge madjaha pacawo?

¹⁷ Sanangurai wamucaseenzera. Imwimwi munodikana kudzipangidzira mwega kuti Djehovha ndiyani, cinangwa cake ngecipi uye kuti kuda kake kakabatana papi no upenyu wenyu. (Aro. 12:2) Hino mukaita izvi, mucaita cisananguro cinokosha mu upenyu wenyu, cisananguro cekuseenzera Djehovha. (Erengai Djoshuwa 24:15; Mup. 12:1) Mukarumbwa  no urongwa wenyu wekuerenga uye kufunda Bhaibheri, kuda kenyu Djehovha kucarumbwa kecikura uye kutenda kenyu maari kucabamba.

18. Cisananguro cipi cinodikanwa kuizwa nge madjaha uye zvicaabetsera kudini?

¹⁸ Sanangurai kukanda Djehovha pa mbuto ye kutanga mu upenyu wenyu. Nyika ya Sathani inopikira kuti kana mukaseenzesa tarento dzenyu kuti muite zvamunoda, mucapfara. Zve zvirokwazvo anhu aya anobatikana pa kupsvaka pfuma, “anodzibaya nge marhwadzo akawanda.” (1Ti. 6:9, 10) Nge dii rimweni, kana mukapurutana Djehovha uye mokanda kuda kake pekutanga mu upenyu wenyu mucabudirira uye “mucagara ne ungwaru pa zviro zvamunoita.”—Djos. 1:8.

19. Abereki anodikana kuedzurirei?

¹⁹ Abereki, itai zvese zvamunokwanisa kuti mubetsere mhuri yenyu kuti iseenzere Djehovha. Mugondei, uye iyena ucamubetsera kuita zvisananguro zvakanaka. (Zvie. 3:5, 6) Edzurirai kuti ana enyu acateedzera zviya zvamunoita haiwa zvamunoreketa. Ndiyo ndaa, itai zvisananguro zvinoapasa mukana wekutenderhwa na Djehovha.

20. Makomborero api acatambira madjaha kana akasanangura kuseenzera Djehovha?

²⁰ Madjaha, abereki enyu angamubetsera kuita zvisananguro zvakanaka mu upenyu. Asi zvinotsamira kamuri kuti mutenderhwe na Mwari. Hino, teedzerai miezaniso wa Djesu uye sanangurai kuseenzera Baba enyu ekudenga. Kana mukadaro, mucagara no upenyu wakabatikana uye unopfadza. (1Ti. 4:16) Uye pano ramangwana, mucararama upenyu unopfadza maningi!