Djehovha akabvunza Aisraeri kuti awona aidikana kugara anhu akacena. Kuti akwanise kuzviita Djehovha akaapasa mitemo inoti: “Usahambe-hambe pakati pe anhu ako ucireketa manyepo nge zve amweni. Usapsvake kudurura ngazi ye umweni wako. Ndini Djehovha”—Re. 19:2, 16.

Soko rokuti “usahambe wecipsvaka kudurura ngazi” rakanyasa kuturikirhwa zvakadjeka mu ciHebheru, asi ririkuda kureei? Bhuku re ciDjudha rakabhuya zvinoteera: “Dii re vhersikuro iyi . . . rinoshupha kuzwisisa ngekuti zvinoshupa kuziya kuti soko raida kureketwa ipona rinoda kunyasa kureei mu ciHebheru, ngekuti soko irona mu ciHebheru rinorea kuti ‘usaime pamusoro pe, pa dii, kana padhuze.’”

Azii amweni anorangarira kuti masoko aya akabatana ne masoko ari pa vhersikuro 15 anoti: “Usatonge zvisina unatsi. Usasanangura murombo kana mupfumi. Unodikana kutonga umweni wako ne unatsi.” (Re. 19:15) Kana zviri izvona mutemo uri pa vhersikuro 16 nge zve kutama kudurura ngazi ye umweni waizokwanisa kurea kusama kuita zviro zvisina unatsi mu matribunari mune zvekutengeserana uye mu mhuri. Mu Israeri wainga asikadikani kuita ciro asikazi kugondeka kuti akhorovhere ciro ce umweni. Zviripamhene kuti isusu atidikani kuita izvona, asi pano panganidzo imweni yakanyasa kudjeka ye vhersikuro 16.

Onai masoko ekutanga e vhersikuro 16. Djehovha akareketa kuti apadikani kuoneka munhu unohamba ecibararisa mapsveda. Kuziya kuti mapsveda ciro cakashata maningi kupinda kundoreketa upenyu we amweni. (Zvie. 10:19; Mup. 10:12-14; 1Ti. 5:11-15; Tg. 3:6) Munhu paanoreketa mapsveda iyena unonga ecireketa manyepo ecizviita kuti asvipise muhambiro we munhu umweni. Munhu unogara ecireketa mapsveda ungatoguma pakupasa upupuri we manyepo ku munhu umweni, kunyazi eciziya kuti izvona zvingauraisa munhuwo. Muezaniso wakhona nge we anarume airi akareketa mapsveda nge zva Nabhoti, akapupurira manyepo nge zvake. (1Mad. 21:8-13) Manyepo aya akaita kuti Nabhoti afurhwe ne mapuwe pasina cikonzero, kana kuti hingana zviro zvinoreketwa pana Revhitiko 19:16.

Munhu unomapsveda unonga ecipsvaka kudurura ngazi ye mudoni wake eciita kuti iyena auraiwe. Kupinda izvona, munhu unogara eciita mapsveda cipangidzo cekuti munomuzonda. Pana 1Ju. 3:15, panoti: “Munhu wese anozonda hama yake muurai, uye munozia kuti apana muurai anorumbwa ano upenyu usikaperi.” Zvinokosha kuona kuti mumasure mekuona kuti Djehovha areketa kuti azvizi kunaka kuedza kudurura ngazi ye mudoni ayena akazoti: “Usazonda hama yako mu mwoyo mako.”—Re. 19:17.

Ndiyo ndaa, mutemo uyu wakasiyana padoko ne mutemo uri pana Revhitiko 19:16 unotingwadza katiri ma Kristu. Tinodikana kupeta masimba ari ese kuti tisagare ne marangariro akashata topedzesera taakureketa mapsveda nge zve munhu umweni. Kana tikaedza kupsvaka kudurura ngazi ye munhu umweni tecireketa mapsveda uye tecireketa zvakashata nge zvake tinonga tecipangidza kuti tinomuzonda. Hingana maKristu atidi kuita zvakadaro.—Mt. 12:36, 37.