Ndaipfarira zviro zvakasikwa kubvira ndiciri mwana mudoko. Mhuri yedu yaigara yecidakadzwa nge kuona mafroresta no ma bahari akakura uye akanaka aitenderedza thaundi redu, Jyväskylä, ku Finlândia Central. Ndinopfarirawo maningi zvinyama. Pandaika ndiciri mudoko, ndaida kukhumbatira bishau uye imbwa ipi hayo yandaiona! Pandaikura, ndaineseka nge mabatiro akashata aiita anhu zvinyama. No kuhamba ke nguwa, ndakagara nhengo ye sangano rinoonerera nge zvezvitenderhwa zve zvinyama uye ndikona kandakaziya anhu airangarira hingana inini.

Takaseenza no simba kuti tirhwire zvitenderhwa zve zvinyama. Takaparadzira masoko uye takaronga kupangidzira tecihamba, tecienda mu maroja aitengesa macira anogadzirhwa ne mvere dze zvinyama uye mu mbuto dzinoongororhwa zvinyama. Takatomutsa sangano rinoonerera nge zvekudziirirhwa ke zvinyama. Matanho etakaita kuti tidziirire zvinyama akaita kuti tinesane no ane masimba. Ndakasungwa kakawanda uye ndaiendeswa ku cianze.

Pane kurhwira basi zvinyama, ndaineseka nge zve matambudziko amweni e mu nyika. No kuhamba ke nguwa, ndakagarazve nhai dze sangano dzakawanda dzinorhwira nge zve zvitenderhwa zve anhu rinozwi, Anistia Internacional uye rekucengetedzwa ke zvisikwa rinozwi Greenpeace. Ndaiseenza no simba rangu rese pakutsigira ma sangano aya. Ndairhwira anhu arombo, aikonerhwa zvekurhya uye aya anoonekwa hingana asikabetseri.

Asi padoko ne padoko ndakazoona kuti ndainga ndisikakwanisi kucinja nyika. Kunyazi masangano aya aikwanisa kugadzirisa matambudziko madoko basi, matambudziko akakura aiita hingana kuti aitunhudzira kushata. Zvaiita hingana kuti zvakashata zvaitunhudzirika mu nyika uye apana munhu wainga ano basa nazvo. Ndakaona hingana kuti apana cendaikwanisa kuita.

Nge kuora mwoyo ke ndainga ndakaita ngekukonerhwa kugadzirisa zviro, ndakatanga kurangarira nge zva Mwari uye Bhaibheri. Ndainga ndakambofunda Bhaibheri ne Apupuri a Djehovha. Kunyazi ndaiziya kuti Apupuri ainga ano usisi uye aindipfarira, ndainga ndisati ndaakuda kucinja muraramiro wangu. Asi pa nguwa ino, zviro zvainga zvacinja.

Ndakatora Bhaibheri rangu uye ndakatanga kurierenga. Izvi zvakandinyaradza maningi. Ndakaona ndima dzakawanda dzinotifundisa kubata no usisi zvinyama. Ngo muezaniso, Zvierengo 12:10 inoti “anhu akanaka anocengeta zvinyama zvawo.” (Good News Translation) Ndakazwisisawo kuti Mwari andiyepi anokonzera matambudziko ari pa nyika. Asi matambudziko edu arikutunhudzirika nge kuti anhu akawanda aapurutani Mwari. Ndakashamiswa maningi pandakafunda nge zve rudo uye mwoyo unononoka kutsamwa wa Djehovha.—Pisarema 103:8-14.

Pa nguwa iyona, ndakaona ciphepha caikohomedzesa kuti ndikumbire bhuku rinozwi Kodi Bhaibheri Rinotifundisei? uye ndakacitumira. Pasina nguwa yakareba, kazado imweni ye Apupuri a Djehovha, yakandivhakacira uye akati aida kufunda na inini Bhaibheri, uye inini ndakatendera kufunda nawo. Ndakatangawo kupinda misangano ye ciKristu ku Nyumba yo Umambo. Izvi zvakaita kuti ndipfarire cokwadi ce Bhaibheri candaifunda.

Bhaibheri rakandibetsera kucinja zviro zvakawanda mu upenyu. Ndakasiya kubhema uye kudhakwa. Ndakacinja ciimo cangu, mushobo wandaireketa. Ndakacinjawo maonero angu ano cokuita ne aya ano masimba. (Aroma 13:1) Ndakasiyawo upenyu we useki wandairarama.

Ciro cainyanya kundinetsa, kucinja maonero andaiita masangano anoonerera nge zve zvitenderhwa zve anhu uye zve zvinyama. Zvakatora nguwa kuti ndicinje. Pakutanga ndakarangarira kuti kaizonga kurikupenga kusiya masangano aya. Kunyazi zvakadaro, ndakaguma pakuziya kuti Umambo wa Mwari ndiwo basi ucapedza matambudziko e nyika. Hino, ndakasanangura kuseenzesa simba rangu rese pakutsigira Umambo iwona uye pakubetsera amweni kufunda nge zvawo.—Mateu 6:33.

Hingana munhu wairhwira zvitenderhwa zve anhu ne zvinyama, ndaisombokanda anhu mu zvikwata zviiri, ce akanaka ne ce akashata uye ndaigara ndakagadzirira kurhwisa aya andaiwona hingana akashata. Asi Bhaibheri rakandibetsera kuti ndisazonde anhu amweni. Ndinoedza kupangidza rudo re ciKristu ku anhu ese. (Mateu 5:44) Kutunhudzira pa mishobo dzakawanda dzandinopangidza nadzo rudo, ndinoparidzira masoko akanaka e Umambo wa Mwari. Ndinopfara kuona kuti basa iri rakanaka rinoita kuti anhu agare murunyararo, apfare uye rinoapasa kariro yecokwadi.

Ndaano ndangariro dzakaterama ngokuti ndinosiira zviro mu nyara dza Djehovha. Ndine rugondo rokuti ayena hinga Musiki, haazorekeri zvinyama ne anhu zvecitambudzwa nokusikaperi uye aazorekeri pasi redu rakanaka maningi reciparadzwa. Asi nokukasika acaseenzesa Umambo wake kuti ugadzirise zvese zvakakanganisika. (Isaya 11:1-9) Zvinondipfadza maningi kuziya cokwadi ici uyewo kubetsera amweni kuti atende maciri. Andicarangariri kuti ndinodikana kucinja Nyika.