BHAIBHERI RINOCINJA UPENYU
Akuna Kandaienda Ndisina Pfuti Yangu
-
GORE REKUBARHWA: 1958
-
NGANO YE UPENYU: ITALIA
-
MARARAMIRE ANDAIITA: NDENGO YECIKWATA CEMABHIYHA
MARARAMIRO ANDAIITA: Ndakabarirhwa uye ndakarerhwa kumuceto ke thaundi re Roma, mu mbuto yaigara arombo. Upenyu waishupha. Andizi kuziya mai akandibara uye ndainga ndisikazwirani no baba angu. Ndakakura ndecifundira mararamiro e mu gwanza.
Pandainga ndino makore 10 ndainga ndaakutoba. Pandakagumisa makore 12, ndakatiza pa nyumba kekutanga. Kakawanda baba angu aiuya kozonditora ku nyumba ye mapusisiya. Inini ndaigara ndecireketedzana no anhu—ndaiita zvekupondana uye ndaishatirhwa no munhu wese. Pandakagumisa makore 14, ndakatiza pa nyumba. Ndakatanga kuseenzesa mitombo inoraradzisa uye ndaigara mumakwanza. Ngekuti ndainga ndisina nyumba yekuwatira, ndaiphwanya makaru ndowatiremo dakara macibesi-besi. Pedzepo, pandaionera mvura, ndipona pandaisambira.
Ndakazogara shasha pakuba—uye ndaiba zvese, mapasta mu maroja uye mu nyumba dze anhu ce usiku. Ndakaziikanwa no mbiri yakashata uye ndakapinda mucikwata ce mabhinya cainga cino mbiri, imona “mendakanyasa fundiswa basa” kuti nditange kuba mu mabhanko. Nge ndaa ye hasha dzangu, ndakaguma pakutyiwa nge adoni angu kamare e mucikwata ce mabhinya cendainga. Akuna kandaienda ndisina pfuti yangu; ndaitowata nayo pasi pe mutsago. Upenyu wangu wainga wekuita zvekupondana, kuseenzesa mitombo inoraradzisa, kuba, kureketa zvipsverusi uye kuita uhure. Ndaigara ndecipsvagwa no mapurisiya. Ndakasungwa kakawanda uye ndakapedza makore akawanda ndecipinda uye ndecibuda mukaraboso.
BHAIBHERI RAKACINJA UPENYU WANGU: Zuwa rimweni, pandakabudiswa mukadheya ndakarangarira kovhakacira titiya angu. Candainga ndisikazii ngecekuti awona ne ana awo airi ainga agara Apupuri a Djehovha. Awona akandipika kuti ndipinde umwe we musangano wawo. Ndakasanangura kuenda ngekuti ndainga ndecida kuona zvainga zviriyo. Pandakaguma ku nyumba ye Umambo, ndakasanangura kugara pa dhuze ne pamusuwo kuti ndiwone ese aipinda nekubunda. Uye, hingana mazuwa esse, ndainga ndino pfuti yangu.
Musangano uwona wakacinja upenyu wangu. Ndaiita hinga ndiri mu nyika imweni! Ndakatambirhwa zvakanaka nge anhu ano ushamwari. Na nyamasi uno, diciri kuedzurira unaki waibva mu mwoyo wainga mumadziso e Apupuri a Djehovha aya. Izvi zvainga zvakatosiyana kamare no zviya zvandainga ndakadjaira.
Ndakatanga kufunda Bhaibheri no Apupuri a Djehovha. Pandairumbwa ndecifunda, zvaigara pamhene kuti ndaidikana kucinja mararamiro angu. Tsamba yakandibaya mwoyo ngeya Zvierengo 13:20: “Munhu anohamba no munhu akangwara ucagara akangwara, asi uya anoshamwaridzina no mapenzi zvicamushatira.” Ndakaona kuti ndaidikana kutambira kure ke cikwata ciya cemabhinya. Izvi zvainga zvisiripi nyore, asi no rubetso ra Djehovha ndakazvikwanisa
Kekutanga muupenyu wangu, ndakatanga kuonerera zviito zvangu
Ndakadzicenesawo. Ndakaseenza no simba kuti ndisiye kubhema forhya nekuseenzesa mitombo inoraradzisa. Ndakacinga bvudzi rangu rainga rakareba, uye ndakasiya kupfeka mabirinku uye kureketa zvipverusi. Kekutanga mu upenyu, ndainga ndakutokwanisawo kudzibata.
Ndainga ndisikapfariri kuerenga nokufunda, ndiyo ndaa zvakandishuphira kukanda nzeru dzangu pakufunda Bhaibheri. Asi pandairumbwa ndeciedza, padoko no padoko ndakatanga kuda Djehovha, asi hana yangu yakatanga kundipasa ndaa. Ndaidzipasa ndaa kakawanda uye ndairangarira kuti Djehovha ainga asikazombondirekereri nge zvese zvakashata zvandakaita. Pa nguwa iyona, ndainyaradzwa nge kuerenga nge zve kurekererhwa kakaizwa Mambo Dhavhidhi na Djehovha paakaita zvitema zvakakura—2 Samueri 11:1–12:13.
Cineso cimweni cainga cekureketa nge zvekutenda kangu pandaiparidzira nyumba no nyumba. (Mateu 28:19, 20) Inini ndaitya kuti ndaizosongana no munhu wandakaitira zvakashata kare! Asi padoko no padoko ndakakunda kutya kandaiita. Ndakapfara maningi ngekubetsera amweni kufunda nge zva Djehovha, Baba edu ekudenga akanaka uye anorekerera.
KUBETSERHWA KANDAKAIZWA: Kufunda nge zva Djehovha kakaponesa upenyu wangu. Shamwari dzangu dzakawanda dzekare dze cikwata ce mabhinya candainga ndiri, dzakafa uye pamweni dziri mukadheya, asi inini ndiri kurarama upenyu unopfadza zvezvirokwazvo uye ndiri kuetsera ramangwana rakanaka. Ndakafunda kudzidodosa, kupurutana uye kudzibata. Izvi zvinoita kuti ndigare ne ukama wakanaka ne anhu andinogara nawo. Ndinopfara nge kugara no mukadzi wangu wakanaka, Carmen. Tese tinopfara nge kubetsera amweni kuti afunde nge zve Bhaibheri.
Zvino pa mbuto yekuba mu mabhanko, ndinoita basa rakanaka rekucenesa, uye irona rinobatanidza kutocenesawo mabhanko!
