Ndakabarirhwa ku thaundi re ku Saxônia, re ku República Democrática Alemã. Ndakakurira mu mhuri ine rudo uye abereki angu akandifundisa kugara munhu wakanaka. Nge ndaa yekuti nyika ii yainga iri nyika yecikomunista, anhu akaanda e ku Saxônia ainga asikadi zvekunamata. Hino inini ndaiti akuna Mwari. Ndainga ndakabatikana maningi nge zve cikomunista uye kusama kutenda kuti Mwari ariyo dakara ndaano makore 18.

Munoziya cikonzero caiita kuti ndipfarire cikomunista? Ngekuti caifundisa kuti anhu ese akaezana uye inini ndaizvipfarira. Ngodii rimweni, ndairangarira kuti kudai anhu ese angapaswa zvakaezana apana aizopfuma kupinda umweni. Nge ndaa yazvo, ndakabatana no sangano rimweni re ana adoko recikomunista. Pandainga ndaano makore 14, ndakamboita basa rekunongera maphepha ndeciaendesa kaaizogadzirwazve. Anhu ano masimba e ku thaundi randaigara re Aue, akapfara maningi nge basa randaiita uye akandipasa mubairo. Kunyazi ndainga ndiciri mudoko, ndainga ndaakutoziyana no anyautongi ecikomunista. Ndaiona hingana kuti ndiri mu gwanza kwaro uye hingana kuti ramangwana rangu rainga rakanaka.

Asi zviro zvakazocinja ciriporipoco. Muna 1989 Ukutira we Berlim wakawa uye ma govherno akawanda ecikomunista e ku Europa akawawo. Izvi zvakandirhwadza maningi. Ndakaona kuti anyautongi e mu nyika yangu ainga ano rusananguro. Ngo muezaniso, anhu ainga asikatsigiri cikomunista ainga asina zvitenderhwa zvimwezvo ne zve anhu amweni. Ndaigara ndecidzibvunzisa kuti: Arikumbodaro ngei? MaKomunista aabhuyi kuti anhu ese akaezana? Zvecikomunista izvi kainga kuri kurota here? Ndakatanga kuora mwoyo.

Hino ndakasiya zve cikomunista uye ndakatanga kubatikana ne zvekuemba uye kudhezenyari mifanikiso. Pa nguwa iyona, inini ndaifunda ku cikora ce kuemba uye—ndaida kurumbwa ndecifunda nge zve ngoma ku universidade—Ndaida maningi kudhezenyari uye kuemba. Hino ndakasiya muhambiro wakanaka wandainga ndafundiswa no abereki angu. Ndainga ndaakuda kupfara, kubatanidza kunamorari no asikana akawanda pa nguwa imweyo. Asi kuemba, kudhezenyari uye kudziwaraidza, azvizi kupedza dambudziko rangu rekudzirhya mwoyo. Kunyazi zviro zvandaidhezenyari, zvainga zviri zviro zvinotyisa. Ndaidzibvunzisa kuti: Ramangwana rangu rinonga ragagara kudini? Uye cinangwa ce upenyu ngacipi?

Pandakazoona mhinduro dze mibvunzo dzangu, ndakashamisika maningi. Zuwa rimweni, pandainga ndiri kucikora, inini no shamwari dzangu taicedza nge zve ramamgwana kuti rinonga rakaita kudini. Musikana umweni wandaifunda naye unozwi Mandy * wainga ari Mupupuri wa Djehovha. Iyena wakandipasa zano rakanaka maningi. Iyena wakati “Andreas, kana wecida kugumira mhinduro dze mibvunzo dzako dzakaringana no upenyu uye ramagwana, unodikana kuona zvinoreketwa ne Bhaibheri.”

Andizi kutenderana nazvo, asi kunyazi zvakadaro, ndakasanangura kuona zvaireketwa ne Bhaibheri. Mandy wakandipangidza kapituro 2 ye bhuku ra Dhanyeri, uye ndakashamiswa nge zviro zvandakaerenga. Uphorofita uu unoreketa nge zve munda-nda-nda we magovherno aizotonga uye aizogumawo mu mazuwa edu. Iyena wakandipangidzawo matii amweni e mu Bhaibheri anoreketa nge zve ramangwana. Zvezvirokwazvo, ndainga ndatogumira mhinduro dzemibvunzo dzangu! Asi ndiyani akatara uphorofita uu, anokwanisa kunyasa kupanganidza zvicaitika mune ramangwana? Ici cipangidzo cekuti Mwari ariyo here?

Mandy wakaita kuti ndionane ne kazado imweni ye Apupuri a Djehovha inozwi Horst na Angelika. Awona akandibetsera kunyasa kuzwisisa Bhaibheri. Inini ndakazwisisa kuti citendero ce a Apupuri a Djehovha ndicona basi cinobetsera anhu kuti aziye zina ra Mwari, Djehovha. (Pisarema 83:18; Mateu 6:9) Ndakafundawo kuti Djehovha anotipasa kariro ye kurarama nokusikaperi mu paradhizo pasi pano. Pisarema 37:9 inoti: “Aya anogonda Djehovha acagara nhaka ye nyika.” Ndakapfara maningi nge kuziya kuti anhu ese anopurutana Mwari acararama nokusikaperi.

Asi, zvainga zvisiripi nyore kutondowedza zvaireketwa ne Bhaibheri. Ndaidikana kupeta masimba kuti ndicinje. Pakutanga ndakafundira kugara munhu unodzidodosa, asi ndainga ndaakudzikudza nge ndaa ye kubudirira kandainga ndaakuita nge kuemba uye kudhezenyari. Uyewo zvakandishuphira maningi kucinja mararamiro akashata andaiita. Ndinotenda maningi Djehovha ngekugara kake Mwari anononoka kutsamwa uye anorekerera, anoona kupeta masimba katinoita kuti tiite kuda kake!

Cikomunista uye kusatenda kuti Mwari ariyo, zvakaita kuti ndigare no maonero asiriwopi dakara ndaano makore 18. Asi ndakazotanga kupurutana zvaireketwa ne Bhaibheri. Zvandakafunda zvakandibetsera kuti ndisathye ramangwana uye zvakandibetsera kuti ndigare no cinangwa mu upenyu. Muna 1993, ndakabhabhatidzwa uye ndakagara umwe we Apupuri a Djehovha, uye mu 2000, ndakacata ne hanzvadzi imweni inopeta masimba mu basa ra Djehovha inozwi Tabitha. Nyamasi uno, tinopedza nguwa yedu pakubetserawo anhu amweni kuti aziye Bhaibheri. Anhu akawanda atinosongana nawo, ano ngano yakaita hingana yangu, awona aatendi kuti Mwari ariyo uye anoita zvecikomunista. Ndinopfara maningi ngekuabetsera kuti anyase kuziya Djehovha.

Pandakatanga kufunda Bhaibheri ne Apupuri a Djehovha, abereki angu aazi kuzvipfarira. Asi no kuhamba ke nguwa, awona akaona kuti kufunda Bhaibheri kakacinja upenyu wangu. Cinonyanya kundipfadza ngecekuti, awona aakuerenga Bhaibheri uye anopinda misangano no Apupuri a Djehovha.

Inini na Tabitha tiri kupfara maningi ngekuti tinoedza kutondowedza mazano ari mu Soko ra Mwari. Ngo muezaniso, kupurutana zvarinoreketa nge zve kugara wakagondeka kune wewakawakana naye, kuri kuita kuti muzi wedu ugare wakabamba.—Ahebheru 13:4.

Andicagari ndecithyira ramangwana. Ndiri nhengo ye mhuri yakakura ye hama dziri pasi rese, dzino runyararo uye dzakabatana. Apana munhu ano rusananguro uye izvi ndizvona zvandaida mu upenyu wangu.