RANGARIRAI IZVI: Muri mu museu mamuri kupangidzwa zviro zvekare. Zvakawanda zvakhona zvino maboo-maboo. Zvimweni zvakona zvingori zvidimbu. Asi pane cimweni cisina kana pacakashaishika. Munobvunzisa munhu uri kumupangidza wakhona kuti, “Ici cipsva here?” Asi iyena unoti: “Haiwa, ndecekare, uye acisati cambogadzirhwa.” Munomubvunzisazwe meciti: “Cainga cakacengetwa here?” Munoti, “Haiwa, cakaita makore cecinaiwa uye cecipondhwa nge mhepo, uye anhu akawanda akatoedza kucitsakatisa.” Mecishamisika munomuti: ‘Hino cakambogadzirhwa ngei?’

Bhaibheri ringakwaniswa kuezanisirhwawo ne ciro cekare ici. Rakatarhwa kare uye raano makore akawanda kudarika mabhuku amweni. Asi kuezana ne zviro zve mu muzeu zvamborekethwa, mabhuku akawanda ekare asara ne nguwa. Zvaanoreketa ne zve siensiya azvicaenderani ne zvaa kuziikanwa mazuwa ano. Zvimweni zvaanoreketa pa nyaya dzekurapa zvinokwanisa kutokuwadza. Uye amweni akhona asara zvidimbu kana kuti aacanyasi kuerengeka.

Zvakaitika ku Bhaibheri zvakasiyana ne zvakaitika ku mabhuku aya. Rakatanga kutarhwa makore anodarika 3 500, asi zvese zvicirimo. Ke makore akawanda, anhu akaedza kuriparadza, aciripisa asi aazi kubudirira. Bhaibheri arizi kusarira hinga zvinorangarirwa no amweni. Rine zviro zvakawanda zvarinoreketa zvinopangidza kuti ritori pamberi.—Onai bhokisi rakazwi “Rasara Nenguva Kana Kuti Ritori Kumberi?”

Pamweni munombodzibvunzisa kuti: ‘Zvinofundiswa ne Bhaibheri zviciri kuseeza here mazuwa ano?’ Cimborangarirai nge zve mibvunzo iyi: ‘Matambudziko api ari kunyanya kunetsa anhu mazuwa ano? Ngeapi ari kunyanya kutyisa?’ Pamweni munokwanisa kurangarira nge zve hondo, kusvipiswa ke nharaunda, kana kuparhwa ke ndaa. Zvino cimboonai zvinofundiswa ne Bhaibheri. Pamunonga mecirierenga dzibvunzisei kuti: ‘Kudai anhu aiseenzesa mazano aya, tingadai tecirarama upenyu wakaita kudini?’

KUGARISANA ZVAKANAKA NE AMWENI

“Anopfara anoita kuti pagare norunyararo, ngokuti acazwi ‘ana a Mwari.” (Mateu 5:9) “Kana zvecibvira, ne pamunokwanisa napo, garai no runyararo ne anhu ese.”—Aroma 12:18.

USISI UYE KUREKERERANA

“Anopfara ane usisi, ngokuti acazwirhwa usisi.” (Mateu 5:7) “Rumbwai mecizwisisana uye mecirekererana no mwoyo wese, kunyazi kana pano munhu ano caakashaishirhwa no umweni wake. Hinga Djehovha * akamurekererai no mwoyo wese, imwimwi itaiwo zvimwezvo.”—Akorosi 3:13.

KUTAMA RUSANANGURO

Mwari “akaita madzindza ese e anhu kubva pa munhu umwe basi, kuti agare pa musoro pe nyika yese.” (Zviito 17:26) “Mwari aasananguri, asi mu dzindza rese munhu anomutya uye anoita zvakanaka anotenderhwa naye.”—Zviito 10:34, 35.

KUCENGETEDZA NYIKA

“Djehovha Mwari akabva atora munhu, akamugarisa mu munda we Edheni kuti aurime nokuucengeta.” (Genesi 2:15) Mwari “acaparadza aya anoparadza nyika.”—Zvakapangidzwa 11:18.

KUSIRIRA UYE USEKI

“Mungwarire kusirira ke madzindza ese, ngokuti kunyazi kana munhu ano zviro zvakawanda, upenyu wake aubvi pa zviro zvaanazvo.” (Ruka 12:15) “Useki zviro zvisina kucena zve madzindza ese kana kukara ngazvisamboreketwe pakati penyu, hingana zvinotenderhwa anhu apsvene.”—Aefeso 5:3.

KUGONDEKA UYE KUSEENZA NO SIMBA

“Tinoda kugara takagondeka mu zviro zvese.” (Ahebheru 13:18) “Anoba ngaasabezve, asi ngaasenze no simba.”—Aefeso 4:28.

KUBETSERA AMWENI

“Reketai zvinonyaradza mwiya yakaora mwoyo, tsigirai asina simba, pangidzai mwoyo unonoka kutsamwa ku anhu ese.” (1 Atesaronika 5:14) “Cengetai nherera ne mufirhwakadzi pakutambudzika kawo.”—Tiyago 1:27.

Bhaibheri arigumiri pakundoreketa zviro izvi basi. Rinotifundisa kuti tingazviseenzesa kudini mu upenyu. Kana anhu akawanda akanyasa kuseenzesa zviro izvi, matambudziko anoshomeka mu nyika. Hino, zvokwadi zvinoreketwa ne Bhaibheri zvinoseenza uye zvinonyasa kuenderana ne nguwa yatiri kurarama! Zvinofundiswa ne Bhaibheri zvingamubetsera kudini parizvino?

Djesu, munhu ano uzii kudarika ese akamboreketa eciti: “Uzii unopangidzwa kuti wakanaka ne mabsa awo.” (Mateu 11:19) Zvaakareketa izvi, zvinopangidza cokwadi cekuti ciro cizwi cinobetsera, zvinoonekwa nge zvacinoita. Hino, pamweni murangarira kuti: ‘Kana Bhaibheri reciseenza zvezvirokwazvo, rinodikana kucinja upenyu wangu. Ringadibetsera kudini pa matambudziko andiri kusongana nawo? Izwai zvakaitika ku mwanakadzi umweni.

Delphine, * aipfadzwa ne upenyu, zviro zvecimuhambira zvakanaka. Asi pakabva paitika zviro zvinorhwadza. Wakafirhwa ne mwana we musikana, wakarambwa ne mwamuna wake uye wakapererhwawo ne mare. Iyena unoedzurira kuti: “Ndainga ndisikatombozii kuti ndiri ani, ngekuti ndainga ndisina mwana, mwamuna uye nyumba. Ndaizwa hingana ndisiripi munhu, ndisina simba uye ndaikonerhwa cekuraramira.”

Delphine wakatanga kuzwisisa masoko aya: “Mazuwa e makore edu makore makumi manomwe; asi kana tino simba kamare, makore makumi masere, asi anorumbwa eciunza kuneseka ne zviro zvinokuwadza; ngokuti acakasika kudarika tomburuka toenda.—Pisarema 90:10.

Delphine wakabetserhwa ne Bhaibheri pa nguwa iyi yainetsa. Kumubetsera karakaita kunoshamisa. Hingana zvicapanganidzwa pa mazano 3 anoteera, anhu akawanda akaona kuti Bhaibheri rakaabetsera maningi paakaseenzesa mazano aro mu upenyu wawo. Akatanga kuona kuti Bhaibheri rakaita hingana ciro cekare ciri mu museu careketwa patangira nyaya ino. Arizi kuezana ne mabhuku amweni asikaenderani ne nguwa. Cinyi cinoita kuti Bhaibheri risiyane ne mabhuku amweni? Zvarinoreketa zvinobva kuna Mwari here kana kuti i ndangariro dze anhu?—1 Atesaronika 2:13.

Munokwanisa kuonawo kuti upenyu wakadzara ne matambudziko. Pamunodzarirhwa ne nhamo, munopsvakira kupi mazano?

Ngatione mazano 3 e Bhaibheri angakwanisa kumubetserai mu upenyu wenyu. Irona ringamubetsera kuti

1. munzvenge matambudziko.

2. mugadzirise panomuka matambudziko.

3. mushingirire zviro zvamusingakwanisi kucinja.

Nyaya dzinoteera dzicapanganidza zviro 3 izvi.