Patinotunhudzira kuziya maara e munhu, tinotunhudzirawo kumuziya . Nge gwanza rimwero, patinotunhudzira kuziya zvakawanda nge zve mawara a Djehovha, ushamwari wedu naye unobambirira kukura. Mwari ane mawara akawanda, asi marongomuna akhona ndiwona anonyasa kuziikanwa — simba, uzii wake, unatsi wake uye rudo rake.

“Cangamire Tenzi Djehovha! Makaita denga no nyika no simba renyu rakakura.”—DJEREMIYA 32:17.

Simba ra Mwari rinooneka pazviro zvaakasika. Ngo muezaniso, ukaima pazuva unozwa kudziirhwa. Nge ndaa ye simba ra Djehovha riri pa zviro zvaakasika. Zuwa rino simba rakaita kudini? Nge cepakati paro, zuwa rinopisa 15 000 000°C. Pa museswanyana umwe na umwe, zuva rinobudisa simba rakaezana no kuputika ke mazana e mamiriyonji e mabhomba e nyukireya.

Asi pamamiriyonji e nyeredzi dziri mucadenga, dzakawanda dzakhona dzakakura kupinda Zuwa. Shasha dze masiyentista dzinorangaridza kuti imwe ye nyeredzi inozwi UY Scuti, yakakura zvakapetwa ka 1 700 kupinda Zuwa. Kudai nyeredzi iyona yaizokandwa pane Zuwa, Nyika uye no ma praneta amweni anozwi Marte uye Júpiter, zvaizopinda mukati me nyeredzi ii. Izvi zvanotibetsera kuzwisisa zvakareketwa na Djeremiya paakabhuya kuti Djehovha Mwari, akasika matenga no Nyika kana kuti Universo eciseenzesa simba rake rakakura.

Simba ra Mwari rinotibetsera kudini? Kuti tirarame, tinotoda zviro zvakasikwa na Mwari, zvakadai hingana Zuwa uye no zvimweniwo zviro zviri pa Nyika. Kupinda izvona, Mwari unoseenzesa simba rake kuti abetsera munhu umwe nga umwe. Anozviita kudini? Djesu paainga ari pa nyika pano, Mwari akamupasa simba rekuti aite zvishamiso. Bhaibheri rinoti: “Mapofu ari kuonazve, akaremara murenje ari kuhamba, ane maperembudzi ari kuceneswa no asikazwi ari kuzwa, wakafa wari kumutswa.” (Mateu 11:5) Hino nyamasi ano, Mwari anotiitiyeiwo? Bhaibheri rinoti, “Anopasa munhu akaremba simba,” uye irona rnotizve: “Aya anoringisira kuna Djehovha acagarazve no simba.” (Isaya 40:29, 31) Mwari unokwanisa kutipasa “simba rinopinda re nguva dzese” kuti tikwanise kushingirira matambudziko atinosongana nawo mu upenyu. (2 Akorinti 4:7) Tese tinoda kugara padhuze na Mwari anotida maningi uye anoseenzesa simba rake kuti atibetsere.

“Haiwa Djehovha, mabasa enyu akawanda kudini! Ese hawo makaaita no uzii.”—PISAREMA 104:24.

Patinotunhudzira kufunda nge zve zviro zvakasikwa na Mwari, tinotunhudzirawo kushamisika nge uzii wake. Kutona mbuto ye kufunda inozwi biomimética. Ikona, Masiyentista anoteedzera zviro zvakasikwa na Djehovha kuti agadzirewo zvimweni zviro, ecitangira pa zviro zvidoko zvakadai hinga macira, dakara pa zviro zvakakura zvakadai hinga ndeka.

Muezaniso unoshamisa maningi we ruziyo ra Mwari, muiri we munhu. Rangarira basi nge zve mushobo unokura muiri we mwana. Muitiro iwona unotanga no célula imwe basi, ino zviro zvese zvinodikanwa pa kuumba munhu. célula iyona inogadzira macélula amweni akatodzana. Asi pa nguwa inodikana, macélula anotanga kisiyana no amweni, zveciita kuti paoneke mamiriongi e macélula akasiyana-siyana, akadai hingana macélula sanguíneas, nervosas uye ósseas. Nge kuhamba ke nguwa, matii e muiri anotanga kukura uye anotanga kuseenza. Pa mwedzi mipfembamwe basi, célula iya ye kutanga inotanga kukura yeciuumba cimwana eciizwa no mamiriyonji e macélula. Uzii uri pakati pe muitiro uu unoita kuti anhu akawanda atenderane no masoko e mutari umweni we Bhaibheri, iyena wakareketa eciti: “Ndinomukudzai ngekuti ndakaizwa nge gwanza rinoshamisa, nge mushobo unotyisa.”—Pisarema 139:14.

Tingabetsereka kudini ngo uzii wa Mwari? Musiki wedu unozviziya zviya zvatinoda kuti tipfare. Uye iyena anoseenzesa uzii wake wakakura uye uzwisisi wake kuti atipase nhungamiriro eciseenzesa Bhaibheri. Ngo muezaniso, Bhaibheri rinotipasa zano rekuti: “Rumbwai . . . mecirekererana no mwoyo weses.” (Akorosi 3:13) Asi zano iri rakanaka here? Honde kamare! Kupsvakisisa kakamboitika, kunopangidza kuti kurekerera kunoita kuti munhu anyase kuwata, kuteredza tensau, kuti asaore mwoyo uye kunobetserawo pa zviro zvakawanda. Mwari wakaita hingana shamwari ino uzii unorangarira umwe na umwe wedu uye anotipasa mazano akanaka nguwa dzese. (2 Timoti 3:16, 17) Amupfariri here kugara no shamwari yakadai?

“Djehovha anopfarira unatsi.”—PISAREMA 37:28.

Nguwa dzese Mwari unoita zviro zvakanaka. Bhaibheri rinoti: “Mwari we zvirokwazvo aamboiti zvakashata, We Masimba Ese aazomboiti zviro zvisikazi kunaka.” (Djobo 34:10) Kutonga ka Djehovha nde ke unatsi, nge ndaa ye izvono, mupisarema akati: “Mucatonga madzinza no unatsi.” (Pisarema 67:4) Anhu anonyeoera aakwanisi kitsotsa Djehovha, ngekuti iyena “unoongorora mwoyo”. (1 Samueri 16:7) Nguwa dzese, Djehovha anoziya kuti cokwadi ngacipi, uye nguwa dzese kutonga kake kakanaka. Kupinga izvona, Mwari ari kuona kubathwa zvisikazi kunaka uye uzondi uri mu nyika uye akagondesa kuti, mbai-mbai, anhu anoita zvakashata “acatsakatiswa pa nyika.”—Zvierengo 2:22.

Asi Djehovha Mwari aamutongipi asikazwisisi unoda basi kuphanica nguwa dzese. Pazvinobvira, iyena unorekerera anhu. Bhaibheri rinobhuya kuti: “Djehovha une ngoni uye no usisi” kunyazi no anhu anoita zviro zvakashata, kana awona akacinyuka zvezvirokwazvo. Uu ndiwo unatsi we zvirokwazvo, andizvopi?—Pisarema 103:8; 2 Pedru 3:9.

Tingabetsereka kudini ngo unatsi wa Mwari? Mwari aasanguri. Ndiyo ndaa, tingakwanisa kubetsereka nge unatsi wake. Muphostori Pedru akati: “Mwari aasanganguri, asi, mu madzinza ese, iyena anotenda uya anomutya uye anoita zve unatsi.” (Zviito 10:34, 35) Izvi zviri kuda kureya kuti, pasinei no mugarire wedu we ganda, nyika yedu, kufunda ke takaita kana kuti tiri apfumi here kana arombo, tingakwanisa kugara shamwari ya Mwari uye tomuseenzera. Mwari aasananguri. Izvi zviri kuda kureya kuti tingakomborerhwa naye, pasinei no mugarire wedu we ganda, kana tiri arombo here kana kuti apfumi.

Mwari anoda kuti umwe na umwe wedu azwisise kuti iyena anoseenzesa kuduni unatsi wake uye abetsereke ngo wara iri. Ndiyo ndaa, iyena akatipasa hana. Bhaibheri rinobhuya kuti hana yakaita hingana mutemo “wakatarhwa mu mwoyo” unotipasa “upupuri”, kana kuti, unotingwadza kuti catinonga tecida kuita cakanaka here kana kuti cakashata. (Aroma 2:15) Izvi zvinotibetsera kudini? Kana hana yedu ikanyasa kufundiswa, iyona ingakwanisa kutibetsera kuti tirambe zviro uye muitiro wakashata. Kana tikashaisha, iyona inotiita kuti ticinyuke uye tigadzirise miitiro yedu. Zvezvirokwazvo, kuzwisisa unatsi wa Mwari kunotibetsera uye kunotikhwededza dhuze naye!

“Mwari rudo.”—1 JUAU 4:8.

Mwari anopangidza simba, uzii uye unatsi, asi Bhaibheri aribhui kuti iyena i simba, uzii kana kuti unatsi. Asi Bhaibheri rinoti iyena i rudo. Ngei? Tingazwisisa izvi nge mushobo uu: Mwari anokwanisa kuita zviro ngekuti ano simba; Unatsi uye uzii wake zvinomutungamirira pa zvese zvaanoita; asi rudo ndirona rinoita kuti Djehovha aite ciito. Rudo ndirona riri pa mberi pa zviro zvese zvaanoita. Ngationei miezaniso minganani.

Rudo rakaita kuti Djehovha asike zvisikwa zvakangwara, pa Nyika uye no kudenga, zvingakwanisa kubetsereka nge rudo rake. Uye Djehovha aazi kuita izvi ngekuti pano caimushotera. Rudo rakaitawo kuti iyena asike Nyika kuti igare mbuto yakanyasa kurungama ye anhu. Kupinda izvona, Mwari anoramba ecipangidza rudo ku anhu ese uye anoita kuti ‘zuwa ribudire akashata uye no akanaka, uye kuita kuti mbvura inaire anatsi no asina unatsi.’—Mateu 5:45.

Djehovha ane “rudo rakakura uye ano usisi”. (Tiyago 5:11) Iyena ane rudo no ese aya anoita zviri zvese kuti amuziye, uye no aya anoda kugara dhuze naye. Mwari ari dhuze no munhu umwe na umwe. Zvevzvirokwazvo, iyena ‘anomurangarirai imwimwi pacenyu.’—1 Pedru 5:7

Tingabetsereka kudini ngo rudo ra Mwari? Rangaridzai nge zve kudakadza ke kuwona zuwa recibira ne kudakadzisa ke kuzwa kuseka ke kamwana. Uye ndiyani asikadakadzwi nge kuona kuti anodiwa ne mhuri yake? Kodi zviro izvi zvinokosha here kuti tirumbwe tiri apenyu? Haiwa. Asi amutenderani nazwo here kuti zvipangidziro izvi zve rudo ra Mwari zvinodzadza upenyu wedu ne mupfaro?

Asi pano cipangidziro cimweni ce rudo ra Mwari cingakwanisa kutibetserawo: munamato. Bhaibheri rinotibvunza reciti: “Musadzirhye mwoyo nge ciro cipi haco, asi mu zviro zvese, zvikumbiro zvenyu ngazviziiswe Mwari meciita minamato uye no kudeketera pamwepo no kutenda.” Mwari akaita hinga baba ane rudu uye iyena anoda kuti tipsvake rubetso rake kuti tikwaninisane no zvinetso zvedu, kunyazi pa zvinetso zviya zvatisikabvunzi amweni. Kana tikadaro, Djehovha nge rudo rake rese, anopika kuti acatipasa runyararo, “rinodarika kuzwisisa kese.”—Afiripi 4:6, 7.

Tine rugondo rekuti kupanganidzwa uku ke mawara a Mwari—akadai hingana simba, uzii, unatsi uye rudo—kamubetserai kuti munyase kuziya kuti Mwari akadini. Cimweni cingamubetserai kuti munyase kuziya Mwari, ngece kuziya zvaakamuitirai uye zvaacaita mune ramangwana. Izvi ndizvo zvaticaona zvino.