A feruri na i te hoê puhapa faehau, i te hoê taha aivi pâpâmǎrô mea ofaifai roa. I taua vahi ra, te hiˈo ra te mau faehau Philiseti i te tahi mea anaanatae mau: E piti tane Iseraela o te tia ra i te tahi atu pae o te afaa. Te hiˈo ra te mau faehau ia raua ma te huru faaooo, aita teie na Iseraela e faariaria ia ratou. Mea maoro to te mau Philiseti faatere-noa-raa i te mau Iseraela, e titauhia ia ratou ia haere i te mau Philiseti no te faaoi i ta ratou auri arote. Mea iti ïa te mau mauhaa tamaˈi a te mau Iseraela. Hau atu â, e piti noa tane! E noa ˈtu e faehau raua, eaha ta raua e nehenehe e rave? Ma te ata faaooo, tuô aˈera te mau Philiseti: “A pauma mai, e ite mai orua ta orua!”—Samuela 1, 13:19-23; 14:11, 12.

 Oia mau, e itehia i roto i tera tupuraa, o te mau Philiseti noa iho â tei ite i te faahopearaa o ta ratou i parau. Pou ihora na Iseraela e piti, horo atura i te tahi atu pae o te afaa e pauma aˈera raua ma te nee i nia i to raua rima e avae, e noa ˈtu mea ofaifai, ua tamau noa raua i te pauma ˈtu no te haere tia roa ˈtu i te puhapa faehau! (Samuela 1, 14:13) Te ite maitai ra te mau Philiseti i te taata i mua e mauhaa ta ˈna, e te apee ra ta ˈna tavini amo mauhaa. E taparahi iho â râ anei na taata e piti i teie mau faehau? Ua maamaahia anei teie taata?

 Aita o ˈna i maamaa, e faaroo rahi râ to ˈna. O Ionatana to ˈna iˈoa e e huti mai te mau Kerisetiano mau no teie mahana i te haapiiraa maoti to ˈna aamu. Noa ˈtu aita tatou e haere i te tamaˈi, e haapii atoa tatou no nia i te itoito, te taiva ore e te miimii ore o Ionatana no te faatupu i te hoê â faaroo mau.—Isaia 2:4; Mataio 26:51, 52.

 No te taa no te aha Ionatana i haere ai e aro i taua puhapa faehau, e titauhia ia tatou ia haapii no nia i to ˈna oraraa. O Ionatana te tamaiti matahiapo a Saula, te arii matamua o Iseraela. I to Saula faaariiraahia, ua paari aˈena Ionatana, peneiaˈe 20 matahiti aore ra hau atu. E au ra e, mea piri Ionatana i to ˈna papa, o tei haamahora pinepine i to ˈna aau i ta ˈna tamaiti. I taua tau ra, no Ionatana e ere noa to ˈna papa i te mea rahi, haviti e itoito, oia atoa râ e tane faaroo e te haehaa, te mea faufaa roa ˈtu â no ˈna. Ua taa ia Ionatana no te aha Iehova i maiti ai ia Saula ei arii. Tera atoa ta te peropheta Samuela i parau, aita hoê aˈe taata mai ia Saula i te fenua nei!—Samuela 1, 9:1, 2, 21; 10:20-24; 20:2.

 Ua oaoa roa Ionatana i te aro i te mau enemi o te nunaa o Iehova, i raro aˈe i te aratairaa a to ˈna papa. E ere teie mau tamaˈi mai te tamaˈi o teie mahana. I taua tau ra, ua maiti Iehova i te nunaa o Iseraela ei tia no ˈna, e pinepine Iseraela i te arohia na te mau nunaa o tei haamori i te mau atua hape. Ua tamata noa te mau Philiseti, o tei haamori i te atua ra o Dagona, i te haavî aore ra i te haamou atoa i te nunaa ta Iehova i maiti.

 No reira, no te mau tane mai ia Ionatana, te aroraa o te hoê ïa ravea no te faaite i te taiva ore ia Iehova. E ua haamaitai Iehova i te mau tutavaraa a Ionatana. I muri iti noa ˈˈe i to Saula riroraa mai ei arii, ua faaue oia i ta ˈna tamaiti ia haapao i na 1 000 faehau, e ua aratai Ionatana ia ratou no te haere e aro i te mau faehau Philiseti i Geba. Noa ˈtu aita i rahi ta ratou mauhaa tamaˈi, maoti ra te turu a Iehova ua upootia mai Ionatana. Ua haaputuputu rahi râ te mau Philiseti i te mau faehau. E rave rahi faehau a Saula tei riaria. Ua horo e ua tapuni te tahi, e te tahi atu pae ua haere ïa i te mau Philiseti ra! Aita râ te itoito o Ionatana i paruparu noa ˈˈe.—Samuela 1, 13:2-7; 14:21.

 I te mahana tei faahitihia i te omuaraa, ua faaoti Ionatana e haere e ta ˈna iho tavini amo mauhaa i te tahi atu pae. I to raua piriraa ˈtu i te puhapa faehau a to Philiseti i Mikamasa, ua faaite Ionatana i ta ˈna opuaraa i ta ˈna tavini amo mauhaa. E tia raua i mua maitai i te mau faehau Philiseti. Ia faaooo te mau Philiseti ia raua no te haere atu e aro ia ratou, e tapao te reira e tauturu mai Iehova ia raua. Ua ineine roa te tavini amo mauhaa, peneiaˈe no te mau parau itoito ta Ionatana i faaite atu: ‘Aita e mea e nehenehe e haafifi ia Iehova ia hinaaro oia e horoa i te upootiaraa, mea rahi anei aore ra mea iti tatou.’ (Samuela 1, 14:6-10) Eaha te auraa o ta ˈna i parau?

 Te mea papu, ua ite maitai Ionatana o vai to ˈna Atua. Ua ite o ˈna i tahito ra, ua tauturu Iehova i to ˈna nunaa ma te haapau i te mau enemi o tei rahi aˈe ia ratou. I te tahi mau taime, e faaohipa atoa Iehova hoê noa taata no te aratai i te upootiaraa. (Te mau tavana 3:31; 4:1-23; 16:23-30) No reira, ua ite Ionatana e ere te numera aore ra te puai aore ra te mauhaa ta te mau tavini a te Atua i te mea faufaa roa, o to ratou râ faaroo. E ma to ˈna faaroo, ua vaiiho Ionatana ia maiti Iehova e aro anei o ˈna e ta ˈna tavini amo mauhaa i te puhapa faehau, ua maiti oia i te hoê tapao no te faaite tera ta Iehova i faaoti. Maoti teie haapapuraa, ua haere tia ˈtu Ionatana ma te mǎtaˈu ore i te aroraa.

 A tapao na i na tuhaa e piti o te faaroo a Ionatana. A tahi, e mǎtaˈu rahi to ˈna i to ˈna Atua. Ua ite oia e ere na te puai taata e faatupu i te mau opuaraa a te Atua Manahope, tera râ mea au na Iehova e haamaitai i ta ˈna tavini taiva ore. (Paraleipomeno 2, 16:9) A piti, ua imi Ionatana i te haapapuraa o te farii maitai a Iehova hou oia a haere ai i te aroraa. I teie mahana, aita tatou e imi i te mau tapao maere mau no ǒ mai i to tatou Atua no te ite e te farii maitai ra oia i ta tatou mau haaraa. Maoti te Parau a te Atua, e nehenehe tatou e ite i to te Atua hinaaro. (Timoteo 2, 3:16, 17) E hiˈo maitai anei tatou i te Bibilia hou a rave ai i te mau faaotiraa faufaa? Mai te peu e e, e faaite tatou e mea faufaa to Iehova hinaaro i to tatou iho, mai ia Ionatana.

 Pauma oioi atura na tane e piti i te taha aivi no te haere atu i te puhapa a te faehau. Taa ˈtura i te mau Philiseti e te haere mai ra na taata e piti e aro ia ratou, e tono aˈera ratou i te mau taata no te aro ia raua. Ua nehenehe te mau Philiseti e tapea i na tane e piti, mea rahi hoi ratou e tei nia mai atoa ratou, no reira ua nehenehe ratou e haapohe oioi ia raua. Ua tairi râ Ionatana hoê faehau i muri i te tahi e na ta ˈna tavini amo mauhaa i haapohe ia ratou. Ua haapohe oioi ïa raua 20 faehau! E ua rave hau atu â ra Iehova. Te taio ra tatou: “Riaria aˈera to te puhapa e te mau faehau atoa, ua riaria atoa te mau faehau haru taoˈa. Aueue ihora te fenua e faatupu ihora te Atua i te riaria i rotopu i te mau Philiseti.”—Samuela 1, 14:15.

 Mai te atea, ite ihora Saula e to ˈna mau taata te huehue e te horo-maamaa-raa i rotopu i te mau Philiseti o tei haamata atoa i te aro ia ratou iho! (Samuela 1, 14:16, 20) Itoito aˈera te mau Iseraela e haere atura e aro ma te rave paha i te mau mauhaa tamaˈi a te mau Philiseti tei pohe. Ua horoa Iehova i to ˈna nunaa te upootiaraa rahi i taua mahana ra. Mai taua tau ra, aita oia i taui. Mai te peu e tuu tatou i teie mahana i to tatou tiaturiraa ia ˈna, mai ia Ionatana e ta ˈna tavini amo mauhaa, eita tatou e tatarahapa i ta tatou faaotiraa.—Malaki 3:6; Roma 10:11.

 No Saula, aita teie upootiaraa i faahiahia roa i to Ionatana manaˈo. Ua hape rahi o Saula. Ua faaroo ore oia i te peropheta Samuela ta Iehova i maiti, ma te pûpû i te hoê tusia, na Samuela e ati Levi hoi e nehenehe e rave i te reira. I to Samuela taeraa ˈtu, ua parau oia ia Saula no te mea ua faaroo ore oia, aita ta ˈna faatereraa arii e vai maoro. I muri iho, i to Saula tonoraa i to ˈna mau taata i roto i te hoê tamaˈi, ua horoa oia i te hoê aˈoraa maamaa: “Ia vai te ino i nia i te taata o te amu i te maa hou a topa ˈi te mahana e hou vau a tahoo ai i to ˈu mau enemi!”—Samuela 1, 13:10-14; 14:24.

 Te faaite ra te mau parau a Saula e te haamata ra oia i te ino mai. Te haamata ra anei teie taata haehaa e te feruriraa pae varua i te riro mai ei taata nounou? Oia mau, aita roa ˈtu Iehova i horoa i te hoê aˈoraa maamaa i ta ˈna mau faehau itoito. E no teie mau parau “hou vau a tahoo ai i to ˈu mau enemi,” te manaˈo ra anei Saula na ˈna teie tamaˈi? Ua moˈe anei ia ˈna e mea faufaa aˈe te parau-tia a Iehova, eiaha râ to ˈna iho tahoo, to ˈna hanahana aore ra to ˈna upootiaraa?

 Aita Ionatana i ite no nia i te aˈoraa maamaa a to ˈna papa. No te rohirohi o te tamaˈi, patia ihora oia i ta ˈna raau i roto i te meri, e amu ihora i te reira, e itoito atura oia. I muri iho, ua parau hoê o to ˈna mau taata ia ˈna no nia i ta to ˈna papa i opani i te amu. Pahono atura Ionatana: “E ati rahi ta to ˈu metua tane i faatae mai i nia i te nunaa. A hiˈo na, ua itoitohia vau i to ˈu amuraa maa meri. Hau atu â ïa te mau faehau ahani ratou i amu noa i teie mahana i te maa a to ratou mau enemi tei itea mai ia ratou! Mea rahi atu â ïa te Philiseti tei haapohehia.” (Samuela 1, 14:25-30) Mea afaro e e tamaiti haapao maitai Ionatana, aita râ o ˈna i pee ma te taa ore. Aita o ˈna i farii hanoa i ta to ˈna papa i rave aore ra i parau e ua faatura vetahi ia ˈna no to ˈna manaˈo aifaito.

 I to Saula iteraa e ua ofati Ionatana i ta ˈna i faaue, aita Saula i farii e mea maamaa iho â ta ˈna aˈoraa. Ua manaˈo râ oia e titauhia ia haapohe i ta ˈna iho tamaiti! Aita Ionatana i patoi aore ra i taparuparu i to ˈna papa. A tapao na râ i ta ˈna i pahono atu: “Teie au! Ua ineine au i te pohe!” Parau atura râ te ati Iseraela: “Mea tano anei ia pohe Ionatana, tei horoa ia Iseraela i teie upootiaraa rahi? Eiaha roa ˈtu! Te horeo nei matou i te ora o Iehova te Atua ora, eita hoê rouru o to ˈna upoo e marua i raro. Maoti hoi te tauturu a te Atua i rave ai oia i tera ohipa i teie mahana.” Eaha tei itehia? Ua tuu Saula. Te parau ra te aamu: “Ora maira ïa Ionatana i te mau faehau, e aita oia i haapohehia.”—Samuela 1, 14:43-45.

 Maoti to ˈna itoito, ta ˈna i rave e to ˈna feruriraa miimii ore, ua fanaˈo Ionatana i te hoê roo maitai. I to ˈna faarururaa i te fifi atâta, na to ˈna roo i tauturu ia ˈna. Ia feruri ïa tatou i to tatou roo i te mau mahana atoa. Te parau mai ra te Bibilia e mea faufaa aˈe te hoê iˈoa maitai. (Koheleta 7:1) Mai te peu mai ia Ionatana, e haapeapea tatou ia noaa i te hoê iˈoa maitai e o Iehova, e taoˈa rahi ïa te reira no tatou.

 Noa ˈtu te mau hape a Saula, ua aro noa Ionatana ma te taiva ore i pihai iho i to ˈna papa e rave rahi matahiti. E nehenehe tatou e feruri i to ˈna mauiui, i to ˈna iteraa i te faaroo ore e te teoteo o to ˈna papa. Te haere ino roa ra to ˈna papa e aita Ionatana i nehenehe e tapea i te reira.

 Aita te fifi i faaea noa i reira, e i to Iehova faaueraa ia Saula ia aro i to Amaleka te hoê nunaa ino mau i te tau o Mose, ua tohu Iehova e haamouhia te taatoaraa o te nunaa. (Exodo 17:14) Ua parauhia ia Saula ia haamou i te taatoaraa o te nǎnǎ e ia haapohe i to ratou arii Agaga. Ua manuïa Saula, e eita e ore ua aro Ionatana ma te itoito i raro aˈe i te aratairaa a to ˈna papa. Aita râ Saula i faaroo ia Iehova, ua faaora oia ia Agaga e ua tapea oia i te faufaa e te nǎnǎ atoa. Ua faahiti te peropheta Samuela i te haavaraa hopea a Iehova no Saula: “No te mea aita oe i haapao i te parau a Iehova, ua faarue oia ia oe e eita oe e arii faahou.”—Samuela 1, 15:2, 3, 9, 10, 23.

 Aita i maoro, ua tatara Iehova i to ˈna varua moˈa mai nia mai ia Saula. Aita anaˈe to Iehova here, e taui taue noa te huru o Saula, e riri taue oia e e riaria atoa oia. E au ra e, ua vaiiho te Atua ia haapeapea Saula i te mau manaˈo ino eiaha i te mau manaˈo maitai. (Samuela 1, 16:14; 18:10-12) Ua haapeapea paha Ionatana i to ˈna iteraa i to ˈna papa i te tauiraa! Aita râ Ionatana i faaea i te tavini ia Iehova ma te taiva ore. Ua turu oia i to ˈna papa mai ta ˈna i nehenehe, e ua parau afaro atoa ia ˈna i te tahi mau taime, ua tiatonu râ o ˈna i nia ia Iehova, te Metua e te Atua o te ore roa e taui.—Samuela 1, 19:4, 5.

 Ua ite aˈena anei oe i te hoê taata ta oe e here, te hoê mero anei o te utuafare o te taui ino-roa-raa? E tupuraa mauiui mau te reira. Te haamanaˈo mai ra te hiˈoraa o Ionatana i ta te papai Salamo i faaite i muri iho: “Noa ˈtu e faarue to ˈu metua tane e to ˈu metua vahine ia ˈu, e farii mai Iehova ia ˈu.” (Salamo 27:10) E Atua taiva ore o Iehova. E farii mai oia ia outou e e riro oia ei Metua maitai roa no outou, noa ˈtu e oto aore ra e paruparu outou i ta te feia tia ore e nehenehe e rave.

 Ua ite iho â Ionatana e ua tatara Iehova i te faatereraa arii a Saula. Eaha to Ionatana huru? Ua ui aˈena anei o ˈna i te huru faatere ta ˈna e nehenehe e riro mai? Ua tiaturi anei oia e faaafaro i te mau hape a to ˈna papa ma te riro ei arii taiva ore e te faaroo? Aita tatou i ite i to ˈna mau manaˈo, ta tatou noa i ite, aita to ˈna mau tiaturiraa i tupu. Te auraa anei ua faarue Iehova i teie taata taiva ore? Aita roa ˈtu, ua faaohipa oia ia Ionatana, mai te hoê o te mau hiˈoraa maitai roa ˈˈe o te hoê auhoaraa taiva ore i roto i te Bibilia! E itehia teie auhoaraa i roto i te tahi atu tumu parau no nia ia Ionatana.