Ua hiˈo o Maria Magadala i te raˈi a horoi ai i to ˈna mau roimata. Ua tuuhia to ˈna Fatu here i nia i te hoê pou. Tei te area hora 12 i te avatea i te mau avaˈe matamua o te matahiti, “ati ihora te fenua taatoa i te poiri”! (Luka 23:44, 45) Ua tuu o Maria Magadala i to ˈna ahu i nia i to ˈna na paufifi e ua tapiri o ˈna i te mau vahine i pihai iho ia ˈna. E ere te hoê haapoiriraa mahana tei tupu no te mea pinepine te reira i te itehia tau minuti noa. I ô nei, ua poiri te fenua taatoa e 3 hora i te maoro. Peneiaˈe ua faaroo Maria Magadala e te feia tei tia i pihai iho ia Iesu i te taˈi o te mau animara tei faaroo-noa-hia i te po. Riaria roa ihora te tahi mau taata e na ô atura: “O te Tamaiti a te Atua iho â teie.” (Mataio 27:54) Ua manaˈo paha te mau pǐpǐ a Iesu e te tahi atu mau taata e e tapao te reira no to Iehova oto e riri i mua i te hamani-ino-raa ravehia i nia i ta ˈna Tamaiti.

 Mea fifi roa no Maria Magadala ia hiˈo ia Iesu e mauiui ra. Ua hinaaro râ o ˈna e vai noa i pihai iho ia ˈna. (Ioane 19:25, 26) Ua hinaaro atoa to ˈna metua vahine i te tamahanahanaraa e te tauturu.

 Ua tauturu rahi Iesu ia Maria Magadala. No reira i hinaaro ai o ˈna e rave i tei maraa ia ˈna no Iesu. I na mua ˈˈe, ua hiˈo-ino-hia e ua haafaufaa-ore-hia o Maria Magadala. Aita râ Iesu i na reira. Ua faaite atu o ˈna i to ˈna faufaaraa e ua tauturu atu ia ite eaha te fa o te oraraa. Ua riro atura Maria ei vahine faaroo puai. E nafea ïa? Eaha te haapiiraa ta tatou e huti mai i to ˈna faaroo?

 I roto i te Bibilia, te haamata ra te aamu o Maria Magadala i te taime i faatiamâ ˈi Iesu ia ˈna i te hoê tupuraa riaria mau. I taua tau ra, pinepine te mau demoni i te haamauiui i te mau taata. I te tahi taime, e ô roa ratou i roto i te tino o te mau taata no te haavî ia ratou. Aita tatou e ite eaha ta te mau demoni i rave i nia ia Maria Magadala. Ua ite râ tatou e ua uruhia o ˈna e 7 demoni faufau e te ino mau. E maoti Iesu Mesia, ua tiavaruhia ratou pauroa.—Luka 8:2.

 Auê ïa te oaoa no Maria Magadala i to ˈna faatiamâraahia! E oraraa apî te tiai ra ia ˈna. Eaha ta ˈna i rave no te faaite i to ˈna mauruuru? Ua riro o ˈna ei pǐpǐ taiva ore na Iesu. Ua riro atoa o ˈna ei tauturu i te hoê taime hinaaro-rahi-hia. Ua hinaaro Iesu e ta ˈna mau aposetolo i te maa, te ahu e te hoê vahi no te taoto i te po. E ere ratou i te taata moni e aita ta ratou e ohipa i taua taime ra. No te tiatonu i nia i ta ratou ohipa pororaa e haapiiraa ia vetahi ê, ua titauhia ia tauturuhia ratou i te pae o te faufaa.

 Ua turu rahi Maria e te tahi atu mau vahine ia Iesu e ta ˈna mau aposetolo. “Ua aupuru ratou ia Iesu e te mau aposetolo i ta ratou mau faufaa.” (Luka 8:1, 3) Peneiaˈe e taoˈa rahi ta vetahi mau vahine. Aita te Bibilia e parau ra ua tunu anei ratou i te maa, ua puˈa anei i te ahu aore ra ua faanaho i te vahi taotoraa i tera e tera oire iti. Te mea papu râ, ua aupuru maitai tera mau vahine i teie pǔpǔ taata ratere, e 20 paha ratou. Ua tauturu rahi taua mau vahine ra ia Iesu e te mau aposetolo ia tiatonu ratou i nia i ta ratou ohipa pororaa. Papu, ua ite Maria e aita o ˈna e nehenehe e faahoˈi ia Iesu ia au i ta ˈna i rave no ˈna. Auê râ te oaoa no ˈna ia horoa ˈtu i te maraa ia ˈna!

 I teie mahana, e rave rahi o te haafaufaa ore nei i te feia e rave ra i te ohipa haihai no te tauturu ia vetahi ê. E ere râ tera te manaˈo o te Atua. Papu maitai ua oaoa roa o ˈna i te iteraa ia Maria i te horoa i te mea e maraa ia ˈna no te turu ia Iesu e i ta ˈna mau aposetolo. I teie atoa mahana, e rave rahi Kerisetiano taiva ore o te rave ra i te mau ohipa haihai ma te oaoa no te tauturu ia vetahi ê. I te tahi mau taime, e navai noa te hoê rima tauturu aore ra te hoê parau maitai no te faaoaoa i te tahi atu. Te haafaufaa ra Iehova i taua mau ohipa ra.—Maseli 19:17; Hebera 13:16.

 Tei rotopu atoa Maria Magadala i te pǔpǔ vahine tei apiti ia Iesu i Ierusalema no te oroa Pasa i te matahiti 33. (Mataio 27:55, 56) I to ˈna faarooraa e ua tapeahia Iesu e ua haavahia i te po, papu maitai ua oti roa o ˈna. Te mea ino roa ˈtu â, ua faautua te tavana Ponotio Pilato ia Iesu i te hoê pohe ino mau i nia i te hoê pou. Na te mau tia faaroo ati Iuda e te nahoa i raro aˈe i ta ratou aratairaa tei turai i te tavana ia na reira. Ua ite paha Maria i to ˈna Fatu, ua î te toto i nia i to ˈna tino, ua paruparu roa o ˈna a haere ai na nia i te purumu e a amo ai i ta ˈna pou haamauiuiraa teiaha mau.—Ioane 19:6, 12, 15-17.

 I te taime i haapohehia ˈi Iesu, i te avatea i poiri roa ˈi te raˈi, ua tia o Maria Magadala e te tahi atu mau vahine “i pihai iho i te pou haamauiuiraa o Iesu.” (Ioane 19:25) Ua vai Maria i reira e tae atu i te hopea. Ua ite e ua faaroo o ˈna ia Iesu i te aniraa i te aposetolo here o Ioane ia aupuru i to Iesu metua vahine. Ua faaroo atoa o ˈna i to Iesu mauiuiraa e ta ˈna tuôraa i to ˈna Metua i te raˈi. E ua faaroo o ˈna i teie mau parau hopea ta Iesu i faahiti hou a pohe ai: “Ua hope ia ˈu i te rave i ta oe i ani mai!” Ua hepohepo roa o Maria. Noa ˈtu râ, i muri aˈe i to Iesu poheraa, ua vai noa o ˈna i pihai iho ia Iesu. I muri iho, ua rave te taata taoˈa rahi ra no Arimataio o Iosepha te iˈoa i te tino pohe o Iesu no te tuu atu i roto i te hoê menema apî e ua vai noa Maria i mua i te reira.—Ioane 19:30; Mataio 27:45, 46, 57-61.

 Te haamanaˈo ra te hiˈoraa o Maria eaha ta tatou e nehenehe e rave no to tatou mau hoa Kerisetiano e faaruru ra i te tupuraa fifi mau. Aita paha tatou e nehenehe e paruru ia vetahi ê i te mau ati aore ra e faaore i te mauiui i muri aˈe i te hoê tupuraa ino mau. E nehenehe râ tatou e faaite i te aumihi e te itoito. Ia faaruru te hoê taata i te fifi, auê te oaoa no ˈna a ite ai i te tauturu a te hoê hoa mau! Ma te turu tamau ia ˈna, te faaite ra tatou i to tatou tiaturi ia Iehova e e horoa tatou i te tamahanahanaraa rahi.—Maseli 17:17.

 I muri aˈe i te tuuraahia i te tino pohe o Iesu i roto i te menema, tei rotopu o Maria i te pǔpǔ vahine tei hoo i te raau noˈanoˈa anoihia i te monoˈi no te parai atu i nia i te tino o Iesu. (Mareko 16:1, 2; Luka 23:54-56) Tia ˈtura o ˈna i te poipoi roa i te otiraa te mahana Sabati. A feruri na ia Maria na te mau aroâ poiri e te tahi atu mau vahine te haere ra i to Iesu menema. Na nia i te purumu, ua uiui paha ratou e nafea ia turai i te ofai teiaha i te uputa o te menema. (Mataio 28:1; Mareko 16:1-3) Noa ˈtu râ, ua tamau i to ratou tere. Papu maitai, na to ratou faaroo i turai atu ia rave i ta ratou tuhaa e ia tiaturi e rave iho â Iehova i ta ˈna tuhaa.

 O Maria paha tei tapae matamua i te menema. Faaea ˈtura o ˈna no te mea ua maere roa o ˈna i ta ˈna i ite. Ua turaihia hoi te ofai e aita faahou te tino o Iesu i roto i te menema. E vahine o Maria o te haa oioi. Horo atura o ˈna ia Petero ra raua Ioane no te faaite atu i ta ˈna i ite. A feruri na i tei tupu. Ua paupau to Maria aho a parau atu ai: “Ua hopoi-ê-hia te Fatu mai roto atu i te menema, e aita matou i ite ihea o ˈna i te tuuraahia.” Oioi Petero e Ioane i te hororaa i te menema, ite atura raua e aita faahou te tino o Iesu e hoˈi atura raua i te fare. a—Ioane 20:1-10.

 I to Maria hoˈiraa ˈtu i te menema, ua vai o ˈna i reira o ˈna anaˈe. Mea poipoi i taua taime ra, aita hoê aˈe maniania. Haamata ˈtura o ˈna i te taˈi rahi. Aita â o ˈna e tiaturi ra e ua moˈe to ˈna Fatu. Hiˈo faahou atura o ˈna i roto i te menema e hiti mahuta ˈtura o ˈna. Te vai ra e piti melahi e parahi ra i roto! Ua ani raua ia ˈna: “No te aha oe e taˈi ai?” Ua maere roa o Maria e ua pahono o ˈna mai ta ˈna i parau i na aposetolo: “Ua ravehia to ˈu Fatu e aita vau i ite ihea o ˈna i te tuuraahia.”—Ioane 20:11-13.

 Hiˈo aˈera Maria i muri e ite ihora o ˈna i te hoê taata. Aita râ o Maria i ite o vai oia. Ua manaˈo o ˈna e o te taata tamâ aua paha oia. Ma te mǎrû, ua ani taua taata ra ia Maria: “No te aha oe e taˈi ai? O vai ta oe e imi nei?” Pahono atura Maria ia ˈna: “Mai te peu e na oe i hopoi ê ia ˈna, faaite mai ïa ihea to oe tuuraa ia ˈna, e rave hoi au ia ˈna.” (Ioane 20:14, 15) A feruri na i ta ˈna i parau. E nehenehe anei teie vahine e rave e e amo o ˈna anaˈe i te tino o Iesu Mesia? Mea pautuutu e mea teiaha hoi te tino o Iesu. Aita râ Maria i feruri mai tera. Te mea faufaa no ˈna, o te rave-noa-raa i tei maraa ia ˈna.

 I mua i te oto e te mau tupuraa fifi mau, e manaˈo paha tatou e aita e maraa ia tatou ia faaruru i te reira. I taua taime ra, e nehenehe anei tatou e pee i te hiˈoraa o Maria Magadala? Ia tiatonu noa tatou i nia i ta tatou mau paruparu e taotiaraa, e riaria e e feaa tatou a ore atu ai e haa faahou. Ia faaoti papu râ tatou i te rave i te maraa ia tatou e ia tiaturi e rave iho â te Atua i ta ˈna tuhaa, e haere ia tatou ia rave hau atu i ta tatou e manaˈo ra. (Korinetia 2, 12:10; Philipi 4:13) Te mea faufaa roa ˈˈe, e faaoaoa tatou ia Iehova. Tera ïa ta Maria i rave e ua haamaitai rahi Iehova ia ˈna ma te hoê ravea faahiahia roa.

 E ere te taata tei tia i mua ia Maria i te hoê taata tamâ aua. I na mua ˈtu, ua ohipa o ˈna ei tamuta. I muri iho, ua riro o ˈna ei orometua e i muri aˈe, ei Fatu here a Maria. Aita Maria i taa o vai tera taata e ua haamata o ˈna i te haere. Aita o ˈna i manaˈo aˈe e o Iesu taua taata ra tei faatiahia ei varua puai. Ua rave Iesu i te hoê tino taata apî, e ere râ te tino ta ˈna i pûpû ei tusia. I te mau mahana faahiahia mau i muri aˈe i to Iesu tia-faahou-raa, pinepine te mau taata, oia atoa te tahi o to ˈna mau hoa piri, i te ore e taa o vai o ˈna.—Luka 24:13-16; Ioane 21:4.

 Nafea Iesu i faaite ai ia Maria o vai o ˈna? Na roto i ta ˈna huru faahitiraa i to ˈna iˈoa: “Maria!” Fariu ihora Maria e parau atura o ˈna i teie taˈo Hebera: “Raboni!” E taˈo hoi teie ta ˈna i faaohipa pinepine no te paraparau ia Iesu. Teie to ˈna Fatu here! Oaoa rahi to Maria i taua taime ra. Haru atura Maria ia Iesu no te mea aita o ˈna i hinaaro ia faarue Iesu ia ˈna.—Ioane 20:16.

 Ua ite Iesu eaha ta Maria i manaˈo. Ua na ô o ˈna: “A faaea na i te turui noa i nia ia ˈu.” A feruri na i ta Iesu huru faahitiraa i taua mau parau ra. Papu maitai ua paraparau o ˈna ma te mǎrû, peneiaˈe ma te mata ataata, a faaatea ˈtu ai o ˈna ia Maria e a tamahanahana ˈi ia ˈna ma te parau: “Aita â hoi au i haere atura i nia i te Metua ra.” E ere te taime no Iesu no te haere i nia i te raˈi. Ua titauhia ia ˈna ia rave i te tahi mau ohipa i nia i te fenua e ua hinaaro o ˈna i te tauturu a Maria. Papu, ua faaroo maite Maria ia Iesu. Ua faaue Iesu ia ˈna: “A haere na râ i to ˈu mau taeae ra e a parau atu: ‘Te haere nei au i nia i to ˈu Metua ra e to outou Metua e i to ˈu Atua e to outou Atua.’”—Ioane 20:17.

 E haamaitairaa faahiahia roa teie no ǒ mai i to ˈna Fatu! Tei rotopu Maria i te mau pǐpǐ tei ite matamua ia Iesu i muri aˈe i to ˈna tia-faahou-raa e i teie nei, o ˈna tei maitihia no te haere e faaite ia vetahi ê i te parau apî oaoa. A feruri na i to ˈna oaoa e to ˈna oioiraa i te imi i te mau pǐpǐ. A feruri na ia ˈna: Ua paupau to ˈna aho e ua paraparau vitiviti roa o ˈna no to ˈna oaoa rahi, a parau atu ai ia ratou: “Ua ite au i te Fatu!” (Ioane 20:18) E mau parau teie ta Maria e ta te mau pǐpǐ i haamanaˈo maoro roa i muri aˈe. Ua faaroo te mau pǐpǐ i te faatiaraa a te tahi atu mau vahine tei haere i te menema o Iesu e i taua taime ra, na Maria i faaite i ta ˈna i ite.—Luka 24:1-3, 10.

 Eaha te huru o te mau pǐpǐ a faaroo ai ia Maria ma? Na mua roa, aita ratou i tiaturi ia ratou. Te na ô ra te aamu: “Manaˈo ihora râ ratou e aita e auraa to teie mau parau e aita ˈtura i tiaturi i taua mau vahine ra.” (Luka 24:11) Aita e manaˈo ino to teie mau tane. Tera râ, ua paari ratou i rotopu i te mau tane tei haafaufaa ore i te mau vahine. Ei hiˈoraa, ia au i te mau peu tumu ati Iuda, aita te mau vahine e faatiahia ia riro ei ite i mua i te tiripuna. Peneiaˈe ua vaiiho te mau aposetolo i tera mau peu tumu e aratai i to ratou feruriraa. Aita râ Iesu e to ˈna Metua e farii ra i taua mau manaˈo oti noa. Ua haamaitai rahi raua i taua vahine taiva ore ra!

 Papu maitai, aita roa ˈtu Maria i inoino i mua i te huru o te mau pǐpǐ. Ua ite o ˈna e ua tiaturi to ˈna Fatu ia ˈna e tera te mea faufaa roa ˈˈe no ˈna. I teie mahana, e titau-atoa-hia i te mau pǐpǐ a Iesu ia faaite i te hoê poroi. Te parau ra te Bibilia e “parau apî oaoa o te Faatereraa arii a te Atua” teie poroi. (Luka 8:1) Ua fafau Iesu i ta ˈna mau pǐpǐ e ere pauroa te taata te tiaturi ia ratou aore ra te mauruuru i ta ratou ohipa. (Ioane 15:20, 21) E mea faufaa roa ia haamanaˈo te mau Kerisetiano i te hiˈoraa o Maria Magadala. Noa ˈtu e aita to ˈna mau hoa Kerisetiano i tiaturi oioi ia ˈna, ua vai oaoa noa Maria a faaite atu ai i te parau apî oaoa no nia i te tia-faahou-raa o Iesu!

 Ua fa Iesu i ta ˈna mau aposetolo e i muri iho, ua ite hau atu â mau pǐpǐ ia ˈna. I te hoê mahana, ua fa o ˈna i hau atu 500 taata! (Korinetia 1, 15:3-8) Aita i ore e ua puai atu â to Maria faaroo a ite ai aore ra a faaroo ai e ua fa mai Iesu i te tahi atu mau taata. Peneiaˈe tei rotopu o Maria i te mau vahine tei putuputu mai i Ierusalema i te Penetekose, i te taime i fanaˈo ai te mau pǐpǐ a Iesu i te varua moˈa.—Ohipa 1:14, 15; 2:1-4.

 E tumu papu no te tiaturi e ua faatupu Maria Magadala i te faaroo e tae roa ˈtu i te hopea. Ia faaoti papu tatou i te pee i to ˈna hiˈoraa e tia ˈi! E nafea ïa? Ma te faaite i te mauruuru no te mau mea atoa ta Iesu i rave no tatou e ma te faaite i te haehaa a tavini ai ia vetahi ê e a turui ai i nia i te Atua.