E ahuru matahiti i teie nei, ua faaino-noa-hia te mau Ite no Iehova no te oreraa e farii i te pâmuraa toto. Aita hoi ratou e na reira no te mea te faaue ra te Bibilia ia haapae i te toto. I te tahi mau taime, ua patoi atu te mau taote o tei manaˈo e haa no te maitai o to ratou feia maˈi.—Ohipa 15:29.

Te rahi noa ˈtura râ te taote aravihi te faataa nei i te mau maitai i te pae rapaauraa ia faaohipa i te mau ravea te ore e titau i te pâmuraa toto.

I 2013, i roto i te hoê o ta ˈna mau vea, ua pia te fare haapiiraa tuatoru i te pae rapaauraa no Stanford i te hoê parau faataa taa ê i nia i te toto. (Stanford Medicine Magazine) Teie te upoo parau o te tahi tumu parau ta Sarah Williams i papai i roto: “Te oreraa e rave mai tei matauhia: No te aha e faaiti ai i te pâmuraa toto?” Te parau ra o ˈna e i teie na ahuru matahiti i mairi, mea rahi te hiˈopoaraa tei faaite e te faaohipa nei te mau fare maˈi na te ao e rave rahi roa toto i tei titauhia ia maitai mai te hoê taata maˈi. E na reira ratou i roto i te piha tâpûraa e te piha o te fare maˈi.

Ua faahiti tera taata papai ia Patricia Ford, na ˈna i haamau i te pu no te rapaauraa e te tâpûraa ma te ore e faaohipa i te toto i te fare maˈi no Pennsylvanie. O ˈna atoa te faatere ra i tera pu. No ˈna, te manaˈo papu ra te taote e e pohe te taata aita anaˈe e naea ia ratou te tahi faito toto. Oia atoa e o te toto te ravea maitai aˈe no te faaora mai i te taata. Ua na ô â oia e ua tano iho â te reira i roto i te tahi mau tupuraa taa maitai, a i roto râ i te rahiraa, e ere ïa i te mea tano.

Te rapaau ra te taote Ford e 700 aˈe Ite no Iehova i te matahiti taitahi. Ua parau o ˈna e mea rahi te taote ta ˈna i paraparau atu o tei manaˈo na ma te hape e mea rahi te taata maˈi te pohe ia ore ratou e pâmuhia i te toto. Tera atoa ta ˈna i manaˈo na i nia i te tahi faito. Ua ite oioi râ o ˈna e e nehenehe e rapaau i tera mau taata maˈi ma te faaohipa i te tahi mau ravea ohie ia rave.

I Atete 2012, ua faaite te hoê vea (Archives of Internal Medicine) i te hoê hiˈopoaraa o tei ravehia e 28 matahiti i te maoro i roto i te hoê pu i nia i te feia ua tâpûhia to ratou mafatu. Ua ora maitai aˈe te mau Ite no Iehova i te feia i roto i te hoê â tupuraa o tei pâmuhia i te toto. Mea iti aˈe te mau haafifiraa a te mau Ite no Iehova a faaea ˈi ratou i te fare maˈi, mea rahi aˈe tei ora mai i te tâpûraa e hoê â huru e 20 matahiti i muri aˈe.

Teie ta te hoê tumu parau i roto i te hoê vea (The Wall Street Journal) tei piahia i te 8 no Eperera 2013 i parau: “E rave rahi matahiti i teie nei te raveraahia te mau tâpûraa ma te ore e faaohipa i te toto i nia i te feia maˈi o tei ore i hinaaro i te pâmuraa toto no to ratou faaroo. Te rahi noa ˈtura te na reira nei i roto i te mau fare maˈi. . . . Te na ô ra te mau taote tâpû o te turu nei i tera huru tâpûraa e e iti mai te haamâuˈaraa taaihia i te hooraa mai i te toto, te faaherehereraa, te faataa-ê-raa i te mau tuhaa o te toto, te hiˈopoaraa e te pâmuraa i te toto. Hau atu â, e iti atoa mai te maˈi haapê taaihia i te pâmuraa toto e te mau haafifiraa e faaea maoro ai te taata i te fare maˈi.”

E ere ïa i te mea maere teie parau a Robert Lorenz, faatere e haapao ra i te toto no te fare maˈi no Cleveland: “E manaˈo oe e te tauturu ra oe i te taata maˈi ma te pâmu ia ˈna i te toto . . . Ia au râ i te itehia ra i nia i te hoê tau maoro, e ere roa ˈtu.”