“Eiaha ïa tatou e faaea i te rave i te mea maitai, e ooti hoi tatou i te taime tano ra ia ore noa ˈtu tatou ia rohirohi.”—Galatia 6:9, Huriraa o te ao apî.

 “E eiaha tatou e rohirohi i te parau maitai, ei te tau mau ra hoi tatou e ooti ai ia ore tatou ia toaruaru.”—Galatia 6:9, Te Bibilia Moˈa ra.

 Te faaitoito ra te aposetolo Paulo i te mau Kerisetiano ia rave noa i te mea maitai ia au i te mau ture aveia a te Atua. A na reira ˈi, e nehenehe tatou e tiaturi papu e e haamaitai te Atua ia ratou.

 “Eiaha ïa tatou e faaea.” E nehenehe atoa teie manaˈo e hurihia ma te parau e “eiaha tatou e rohirohi.” Te auraa o tera parau na roto i te reo tumu, o te oreraa ïa e toaruaru aore ra e faatopa i te anaanatae. Na roto i teie mau parau, te faˈi ra te aposetolo Paulo e ua toaruaru atoa o ˈna i te tahi taime.—Roma 7:21-24.

 “Te mea maitai” aore ra “te parau maitai,” o te mau mea atoa ïa te titauhia i te hoê Kerisetiano ia rave i roto i ta ˈna taviniraa i te Atua. Oia atoa te mau ohipa ta te hoê taata e rave ra no te tauturu i to ˈna mau taeae e tuahine i roto i te faaroo e ia vetahi ê.—Galatia 6:10.

 “E ooti hoi tatou i te taime tano ra ia ore noa ˈtu tatou ia rohirohi.” Ua haamanaˈo Paulo i te feia taio e e titauhia i te taime no te ite i te mau haamaitairaa o ta ratou mau ohipa maitai, mai te hoê taata faaapu o te tiai ia tupu ta ˈna i ueue. A faaohipa ˈi i te taˈo “ooti,” ua faatuati Paulo i tera irava i teie parau mau tumu ta ˈna i faahiti i roto i te Galatia 6:7: “Ta te taata hoi e ueue ra, o ta ˈna atoa ïa e ooti.” Ma te rave i te mea maitai ia au i te mau ture aveia a te Atua, e ooti te hoê Kerisetiano i te mau haamaitairaa faahiahia mau, mai te ora mure ore.—Roma 2:6, 7; Galatia 6:8.

 Ua papai te aposetolo Paulo i teie rata i te mau Kerisetiano no Galatia i te matahiti 50 tae atu 52. Ua hinaaro o ˈna e paruru ia ratou i te feia e parau ra e Kerisetiano ratou, e o te taviri ra i te parau mau no nia ia Iesu. (Galatia 1:6, 7) Ei hiˈoraa, ua haapii teie mau faahua Kerisetiano e mea tia ia auraro i te mau ture ta te Atua i horoa i te nunaa Iseraela na roto ia Mose. (Galatia 2:15, 16) Tera râ, ua faataa Paulo e ua raea te Ture a Mose i ta ˈna fa. Aita ïa e faufaa faahou i te Kerisetiano ia auraro i te reira.—Roma 10:4; Galatia 3:23-25.

 A faaitoito ai Paulo i to ˈna mau hoa Kerisetiano ia tamau “i te rave i te mea maitai,” aita o ˈna i hinaaro e parau ia ratou ia auraro i te Ture a Mose. Ua faaitoito râ o ˈna ia ratou ia “haapao . . . i te ture a te Mesia,” oia hoi te mau haapiiraa atoa a Iesu no nia i te mau ohipa maitai te titauhia ia rave i nia ia vetahi ê.—Galatia 6:2; Mataio 7:12; Ioane 13:34.

 A mataitai i teie video o te faataa poto noa i te buka Galatia.