“Na ô ihora te Atua: ‘Hamani anaˈe i te taata i to tâua hohoˈa, ia au i to tâua huru, e ia haapao ratou i te iˈa o te miti e te mau animara rere o te raˈi, e te mau animara rata, e te fenua taatoa, e te mau animara atoa e nee haere i nia i te fenua.’”—Genese 1:26, Huriraa o te ao apî.

 Ua hamanihia te taata ia au i to te Atua hohoˈa. Te auraa ïa, e nehenehe tatou e faatupu e e faaite i te mau huru maitatai o te Atua mai te here, te aumauiui e te parau-tia. No reira tatou e nehenehe ai e pee i te huru o te Atua.

 “Na ô ihora te Atua: ‘Hamani anaˈe i te taata i to tâua hohoˈa.’” Hou a hamani ai i te mau mea atoa, ua poiete te Atua ra o Iehova a i te hoê melahi puai o tei riro mai i muri aˈe ei taata e ua topahia i te iˈoa ra o Iesu. Mea na roto ia Iesu i “poietehia ˈi to te raˈi atoa e to te fenua atoa.” (Kolosa 1:16) Ua pee maite Iesu i te huru o Iehova. No reira e parauhia ˈi “o ˈna te hohoˈa o te Atua ite-ore-hia.” (Kolosa 1:15) O Iesu ïa ta te Atua i parau: “Hamani anaˈe i te taata i to tâua hohoˈa.”

 “Ia haapao ratou i . . . te mau animara rata, e te fenua taatoa.” Aita te mau animara i poietehia ia au i to te Atua hohoˈa. No reira ratou e ore ai e faaite i te mau huru maitatai e vai ra i te taata mai te here. Hau atu â, aita to ratou e manaˈo haava. Tera râ, te tâuˈa ra te Atua i te mau animara. Tera te tumu i parau ai o ˈna i te taata ia “haapao” i te mau animara. I roto i te tahi atu huriraa Bibilia, ua hurihia “ei nia iho” te taata i te animara. (Te Bibilia Moˈa ra) Ua horoa ïa Iehova i te taata i te hopoia ia aupuru i te mau animara. (Salamo 8:6-8; Maseli 12:10) Te titau ra Iehova i te taata ia tiaau maitai i te fenua e te mau mea ora atoa i nia iho.

 Te faaite ra na pene matamua o te Genese mea nafea te poieteraahia te ao nui, to tatou paraneta e te ora i nia i te fenua. Pauroa te mau mea ta Iehova i poiete, mea maitai roa. Te mea faahiahia roa ˈˈe râ, o te taata ïa. I te otiraa te mau mea atoa i te poietehia, “ite ihora te Atua i te mau mea atoa ta ˈna i hamani, e inaha, mea maitai roa.”—Genese 1:31.

 A mataitai i teie video poto no te ite atu â mea nafea te mau mea atoa i te poieteraahia.

 Manaˈo hape: Te haapapu ra te Genese 1:26 o Iesu te Atua.

 Tupuraa mau: Mea piri roa Iesu i to ˈna Metua, mea taa ê râ raua. Ua parau hoi Iesu mea hau aˈe to ˈna Metua, oia hoi te Atua, ia ˈna. (Ioane 14:28) No te ite atu â, a mataitai i te video O Iesu Mesia anei te Atua? aore ra a taio i te tumu parau “No te aha e parauhia ˈi o Iesu te Tamaiti a te Atua?”

 A mataitai i teie video poto o te faaite mai i te tahi mau tuhaa o te buka Genese.