“Te faaroo, o te tiairaa papu ïa i te mau mea tiaturihia, te haapapuraa maramarama o te mau mea mau aita e itehia ra.”—Hebera 11:1, Huriraa o te ao apî.

 “E teie nei, o te faaroo nei, o te tiaturi ïa i te mau mea e tiaihia nei, e te ite i te mau mea aore e hiˈohia nei.”—Hebera 11:1, Te Bibilia Moˈa ra.

 Te horoa ra teie irava i te auraa poto roa ˈˈe o te Bibilia no nia i te faaroo e te faaite mai ra e ere noa te faaroo i te hoê tiaturiraa i te tahi mea.

 “Te faaroo, o te tiairaa papu ïa i te mau mea tiaturihia.” I roto i te huriraa tumu o te Hebera 11:1, ua faaohipahia te taˈo Heleni hurihia ei “faaroo” no te faaite i te manaˈo o te tiaturi papu. Aita tera huru faaroo i niuhia i nia i ta tatou e hinaaro ia tupu, o te hoê râ “tiairaa papu.” Te auraa o te taˈo Heleni hurihia ei “tiairaa papu,” a o te hoê ïa “parau haamana” e faaite ra o oe te fatu o te tahi fenua, aore ra te hoê haapapuraa e faaite ra na oe iho â tera fenua.

 “Te faaroo, o te . . . haapapuraa maramarama o te mau mea mau aita e itehia ra.” Ua niuhia te faaroo i nia i te hoê haapapuraa maramarama mau, a papu roa ˈi i te taata e mea mau te hoê mea, noa ˈtu aita o ˈna e nehenehe e ite i te reira.

 E rata te buka Bibilia o Hebera papaihia e te aposetolo Paulo na te mau Kerisetiano i te senekele matamua, e ora ra i Ierusalema e i te mau oire tapiri. I tera tuhaa o te rata, te faahiti ra Paulo i te faufaaraa o te faaroo. Ei hiˈoraa, ua papai o ˈna: “E ore roa te Atua e mauruuru i te taata aita e faaroo to ˈna, ia tiaturi hoi te taata o te faafatata i te Atua e te ora ra oia e e riro mai oia o te Atua o te haamaitai i te feia e imi maite nei ia ˈna.” (Hebera 11:6) I muri aˈe i te faataaraa eaha te faaroo i roto i te Hebera 11:1, ua horoa Paulo i te hiˈoraa o te mau tane e vahine o te Bibilia tei faaite i tera huru maitai. Ua haamanaˈo o ˈna mea nafea ratou i te faaiteraa i te faaroo a rave ai i te hinaaro o te Atua.—Hebera 11:4-38.